Read fon Kɛ́nsísɔ́ 31 Bible Online

Kɛ́nsísɔ́ 31 - fon bible

Kɛ́nsísɔ́ 31

²“Yi dɔn tó nú Madiáani ví lɛ́ɛ, bó dó ba Izlayɛ́li ví lɛ́ɛ sín hlɔn, ɖó nǔ nyanya e Madiáani ví lɛ́ɛ wá xá yě ɔ́ wú. Énɛ́ ɔ́ gúdo ɔ́, a nǎ yi su tɔ́gbó towe lɛ́ɛ.”

³Ée Mawu Mavɔmavɔ ɖɔ mɔ̌ ɔ́, Mɔyízi ɖɔ nú togun ɔ́ ɖɔ: “Mi sɔ́ ahwannú nú súnnu ɖé lɛ́ɛ ɖo mi mɛ, bónú yě ná yi tɔ́n ahwan Madiáani ví lɛ́ɛ, bó dó sɔ́ yě dó ba hlɔn e xó Mawu Mavɔmavɔ ɖɔ ɔ́ ná.

⁴Mi ná ɖe ahwanfuntɔ́ afatɔ́n afatɔ́n (1.000) ɖo akɔta lɛ́ɛ ɖokpó ɖokpó mɛ.”

⁵Énɛ́ ɔ́, è kpɔ́n ahwangɔnu Izlayɛ́li tɔn lɛ́ɛ mɛ, bó cyán súnnu afatɔ́n afatɔ́n (1.000) ɖo akɔta ɖokpó ɖokpó mɛ. Mɛ e è cyán lɛ́ɛ bǐ bló súnnu děgba atɔn (12.000). È blǎ akpa nú yě, bɔ yě ná yi fun ahwan.

⁶Énɛ́ ɔ́, Mɔyízi sɛ́ yě bǐ dó ahwan fun gbé, bɔ vɔ̌sánú-xwlémawutɔ́ Pínxási Eleazáa ví ɔ́ xwedó yě. É hɛn nǔ e è nɔ zán ɖo tɛn mímɛ́ ɔ́ mɛ lɛ́ɛ, kpódó kpɛn e è nǎ kún dó ɖe xlɛ́ ɖɔ ahwanfunfun yá lɛ́ɛ kpó.

⁷Yě tɔ́n ahwan Madiáani ví lɛ́ɛ lě e Mawu Mavɔmavɔ ná gbe tɔn gbɔn Mɔyízi jí gbɔn é, bó hu súnnu lɛ́ɛ bǐ.

⁸Yě hu axɔ́sú Madiáani ví lɛ́ɛ tɔn atɔ́ɔ́n lɛ́ɛ; axɔ́sú lɛ́ɛ sín nyǐkɔ ɖíe: Ewi, Hlɛkɛ́mu, Súu, Húu kpó Hlɛva kpó. Yě hu nǔkantɔ́ Baláamu, Beɔ́ɔ ví súnnu ɔ́ lɔmɔ̌.

⁹Izlayɛ́li ví lɛ́ɛ wlí Madiáani ví nyɔ̌nu lɛ́ɛ sín ahwankannumɔ kpó vǐ yětɔn lɛ́ɛ kpó; yě bɛ́ nyibú yětɔn lɛ́ɛ bǐ, kpó gbɔ̌ yětɔn lɛ́ɛ bǐ kpó, bó bɛ́ dɔkun yětɔn lɛ́ɛ bǐ.

¹⁰Yě dǒ toxo e mɛ Madiáani ví lɛ́ɛ nɔ́ nɔ lɛ́ɛ bǐ zo, kpódó ahwankpá yětɔn lɛ́ɛ bǐ kpó.

¹¹Énɛ́ ɔ́ gúdo ɔ́, yě bɛ̌ nǔ e yě yí ɖo ahwangbénu lɛ́ɛ bǐ, bó kplá gbɛtɔ́ kpó kanlin kpó e yě wlí lɛ́ɛ bǐ, bó yi.

¹²Yě bɛ̌ mɛ e yě wlí lɛ́ɛ kpó kanlin lɛ́ɛ bǐ kpó, kpódó nǔ e yě yí ɖo ahwangbénu lɛ́ɛ kpó wá nú Mɔyízi kpó vɔ̌sánú-xwlémawutɔ́ Eleazáa kpó, kpódó Izlayɛ́li togun ɔ́ kpó, ɖo fí e yě ɖǒ gɔnu ɖó ɖo ayǐkúngban wɛnjɛ Mɔwabu tɔn lɛ́ɛ jí, ɖo Judɛ́ɛn tɔ ɔ́ kpá, ɖo Jeliko nukɔn é.

¹³Mɔyízi kpó Eleazáa kpó, kpódó togun Izlayɛ́li tɔn ɔ́ sín gǎn ɖě lɛ́ɛ kpó tɔ́n sín fí e yě ɖó gɔnu ɖó ɔ́, bó yi kpé yě.

¹⁴Mɔyízi ka sin xomɛ dó sɔ́ja afatɔ́ngán lɛ́ɛ kpó kanwekogán lɛ́ɛ kpó e gosín ahwan énɛ́ fun gbé lɛ́ɛ é.

¹⁵É ɖɔ nú yě ɖɔ: “Étɛ́! Nyɔ̌nu élɔ́ lɛ́ɛ bǐ wɛ mi jó dó nyi gbɛ a?

¹⁶ Yědɛɛ lɛ́ɛ wɛ Baláamu kplɔ́n nǔ, bɔ yě dɔn Izlayɛ́li ví lɛ́ɛ bɔ yě jɛ agɔ dó Mawu Mavɔmavɔ ɖo Peɔ́ɔ sín xó ɔ́ mɛ, bɔ nǔ énɛ́ ɔ́ zɔ́n bɔ nǔ nyanya byɔ́ togun Mawu Mavɔmavɔ tɔn ɔ́ mɛ.

¹⁷Din ɔ́, mi ná hu vǐ yětɔn súnnu lɛ́ɛ bǐ, bó ná hu nyɔ̌nu e kó tunwun súnnu lɛ́ɛ bǐ.

¹⁸Lo ɔ́, mi ná jó nyɔ̌nuví e má kó tunwun súnnu ǎ lɛ́ɛ dó nyi gbɛ nú mi ɖésúnɔ.

¹⁹Midɛɛ lɛ́ɛ ɔ́, mi ná tɔ́n sín fí e togun ɔ́ ɖó gɔnu ɖó ɔ́, bó ná yi ɖó gɔnu ɖó fí ɖěvo xɔ azǎn tɛ́nwe. Mɛ e ɖo mi mɛ bo hu gbɛtɔ́ lɛ́ɛ kpó mɛ e ɖó alɔ cyɔ wú lɛ́ɛ kpó bǐ ná slá wǔ azǎn atɔngɔ́ ɔ́ gbe kpó azǎn tɛ́nwegɔ́ ɔ́ gbe kpó; sɛ́n énɛ́ ɔ́ kan ahwankannumɔ mitɔn lɛ́ɛ lɔmɔ̌.

²⁰Mɔ̌ ɖokpó ɔ́, mi ná slá wǔ nú avɔ mitɔn lɛ́ɛ bǐ, kpó nǔ e è zě anyǔ dó bló ná lɛ́ɛ bǐ kpó, kpó nǔ e è zě gbɔ̌fún dó lɔn ná lɛ́ɛ bǐ kpó, kpódó nǔ e è nɔ zán bɔ è zě atín dó bló ná lɛ́ɛ bǐ kpó.”

²¹Vɔ̌sánú-xwlémawutɔ́ Eleazáa ɖɔ nú sɔ́ja e yi fun ahwan lɛ́ɛ ɖɔ: “Nǔ e sín gbe Mawu Mavɔmavɔ ná ɖo sɛ́n e é dó nú Mɔyízi ɔ́ mɛ lɛ́ɛ ɖíe:

²²Siká, kpatágan, ganvɔ, gan, aflemú kpódó sunmí kpó ɔ́,

²³nǔ ɖěbǔ e sixú yi myɔ mɛ ɔ́ wɛ mi ná zé gbɔn myɔ nu, bɔ é ná húzú nǔ mímɛ́. Lo ɔ́, wǔsláslá sín sin mɛ wɛ nǔ e má sixú yi myɔ mɛ ǎ lɛ́ɛ ná gbɔn, bó ná húzú nǔ mímɛ́. Nǔ e má sixú yi myɔ mɛ ǎ lɛ́ɛ bǐ wɛ mi ná zé gbɔn wǔsláslá sín sin mɛ.

²⁴Mi ná nya avɔ mitɔn lɛ́ɛ azǎn tɛ́nwegɔ́ ɔ́ gbe, bó ná nyí mɛ mímɛ́; énɛ́ ɔ́ gúdo ɔ́, mi hɛn ɔ́, mi ná byɔ́ fí e togun ɔ́ ɖó gɔnu ɖó é.”

²⁵Mawu Mavɔmavɔ ɖɔ nú Mɔyízi ɖɔ:

²⁶“Hwi kpó vɔ̌sánú-xwlémawutɔ́ Eleazáa kpó, kpódó hɛ̌nnugán lɛ́ɛ kpó ní xa nǔ e yě hɛn wá sín ahwangbénu lɛ́ɛ; mi xa gbɛtɔ́ e yě wlí wá lɛ́ɛ kpó kanlin lɛ́ɛ kpó.

²⁷A nǎ má nǔ lɛ́ɛ nú ahwanfuntɔ́ e yi fun ahwan lɛ́ɛ kpó togun ɔ́ bǐ kpó.

²⁸A nǎ ɖe nǔjɔ ɖo sɔ́ja e yi fun ahwan lɛ́ɛ sín nǔ lɛ́ɛ jí nú nyɛ Mawu Mavɔmavɔ. A nǎ zé gbɛtɔ́ ɖokpó ɖo gbɛtɔ́ afɔwe kanwe ko (500) jí, nyibú ɖokpó ɖo nyibú afɔwe kanwe ko jí (500), tócí ɖokpó ɖo tócí afɔwe kanwe ko (500) jí, bó ná zé lɛ̌ngbɔ́ ɖokpó ɖo lɛ̌ngbɔ́ afɔwe kanwe ko (500) jí.

²⁹A nǎ yí, bó ná bɛ́ nú vɔ̌sánú-xwlémawutɔ́ Eleazáa, bɔ é ná nyí nǔníná ɖé nú nyɛ Mawu Mavɔmavɔ.

³⁰Nǔ e nyí Izlayɛ́li ví ɖě lɛ́ɛ tɔn lɛ́ɛ ɔ́, a nǎ zé gbɛtɔ́ ɖokpó ɖo gbɛtɔ́ kanɖé wǒ (50) jí, nyibú ɖokpó ɖo nyibú kanɖé wǒ (50) jí, tócí ɖokpó ɖo tócí kanɖé wǒ (50) jí, lɛ̌ngbɔ́ ɖokpó ɖo lɛ̌ngbɔ́ kanɖé wǒ (50) jí, bó ná bló nǔ ɖokpó ɔ́ nú kanlin alɔkpa alɔkpa lɛ́ɛ bǐ; a nǎ bɛ́ nǔ énɛ́ lɛ́ɛ e a jɔ ɔ́ nú Levíi ví e nɔ́ kpé nukún dó nyɛ Mawu Mavɔmavɔ sín nɔtɛn wú lɛ́ɛ é.”

³¹Énɛ́ ɔ́, Mɔyízi kpó vɔ̌sánú-xwlémawutɔ́ Eleazáa kpó bló nǔ e Mawu Mavɔmavɔ ɖɔ nú Mɔyízi é.

³²Đo nǔ e ahwanfuntɔ́ lɛ́ɛ yí ɖo kɛntɔ́ lɛ́ɛ sí ɔ́ lɛ́ɛ mɛ ɔ́, é kpo lɛ̌ngbɔ́ kpó gbɔ̌ kpó adɔ̌kpo gban-nukún-atɔn děgba atɔn afɔwó-afatɔ́n (675.000),

³³nyibú adɔ̌kpo atɔn děgba atɔn (72.000),

³⁴tócí adɔ̌kpo atɔn afatɔ́n (61.000),

³⁵kpó nyɔ̌nuví e má kó tunwun súnnu ǎ lɛ́ɛ adɔ̌kpo ɖě děgba atɔn (32.000) kpó.

³⁶Nǔ e è nǎ ahwanfuntɔ́ e yi fun ahwan lɛ́ɛ ɖíe: lɛ̌ngbɔ́, kpó gbɔ̌ kpó adɔ̌kpo afɔtɔn-nukún-ɖokpó děgba ɛnɛ afɔtɛ́nwe kanwe ko (337.500),

³⁷bɔ è ɖe nǔwɔntɔn kanɖé gbantɔ́n (675) sín mɛ nú Mawu Mavɔmavɔ.

³⁸Nyibú adɔ̌kpo ɖě děgba ɛnɛ (36.000) bɔ è ɖe kanɖé gban-nukún-we (72) sín mɛ nú Mawu Mavɔmavɔ.

³⁹Tócí adɔ̌kpo ɖě děgba we afɔwó afɔwe kanwe ko (30.500), bɔ è ɖe kanɖé ko-nukún-ɖokpó (61) sín mɛ nú Mavɔmavɔ.

⁴⁰Gbɛtɔ́ děgba ɛnɛ (16.000), bɔ è ɖe kanɖé gban-nukún-we (72) sín mɛ nú Mawu Mavɔmavɔ.

⁴¹Mɔyízi bɛ́ nǔjɔ énɛ́ lɛ́ɛ nú vɔ̌sánú-xwlémawutɔ́ Eleazáa, bɔ yě nyí nǔníná ɖé nú Mawu Mavɔmavɔ, lě e Mawu Mavɔmavɔ ko ɖɔ n'i gbɔn é.

⁴²Nǔ e è nǎ Izlayɛ́li ví e kpo lɛ́ɛ, bɔ Mɔyízi ɖe ɖó vo nú mɛ e yi fun ahwan lɛ́ɛ,

⁴³nyí nǔ ɖokpó ɔ́ xá sɔ́ja e yi fun ahwan lɛ́ɛ. Nǔ lɛ́ɛ ɖíe: lɛ̌ngbɔ́ kpó gbɔ̌ kpó adɔ̌kpo afɔtɔn-nukún-ɖokpó děgba ɛnɛ afɔtɛ́nwe kanwe ko (337.500),

⁴⁴nyibú adɔ̌kpo ɖě děgba ɛnɛ (36.000),

⁴⁵tócí adɔ̌kpo ɖě děgba we afɔwó afɔwe kanwe ko (30.500),

⁴⁶gbɛtɔ́ děgba ɛnɛ (16.000).

⁴⁷Mɔyízi ɖe nǔjɔ ɖo nǔ e nyí Izlayɛ́li ví lɛ́ɛ tɔn lɛ́ɛ jí; é ɖe gbɛtɔ́ ɖokpó ɖo gbɛtɔ́ kanɖé wǒ (50) jí, bó ɖe kanlin ɖokpó ɖo kanlin kanɖé wǒ (50) jí, bó kplá yě jó nú Levíi ví e nɔ́ kpé nukún dó nɔtɛn Mawu Mavɔmavɔ tɔn ɔ́ wú, lě e Mawu Mavɔmavɔ ko ɖɔ n'i gbɔn é.

⁴⁸Ahwangán e nɔ ahwan ɔ́ nu bɔ yě fun lɛ́ɛ, sɔ́ja afatɔ́ngán lɛ́ɛ, kpódó kanwekogán lɛ́ɛ kpó yi kplé ɖo Mɔyízi gɔ́n,

⁴⁹bó ɖɔ n'i ɖɔ: “Mǐ mɛsɛntɔ́ towe lɛ́ɛ xa sɔ́ja e nɔ acɛ mǐtɔn mɛ lɛ́ɛ; mɛ ɖěbǔ hwe ɖo yě mɛ ǎ,

⁵⁰bɔ mǐ mɛ ɖokpó ɖokpó hɛn sikánú e mǐ mɔ lɛ́ɛ wá nú Mawu Mavɔmavɔ; mǐ mɛ ɖokpó ɖokpó hɛn sikánú e mǐ mɔ lɛ́ɛ wá, bónú è nǎ dó sá hwɛsɔ́kɛmɛvɔ́ ná dó ta mǐtɔn mɛ. Sikánú lɛ́ɛ ɖíe: wɔlɔ, alɔgan, alɔkɛ́, tógbé kpó kɔjɛ́ kpó.”

⁵¹Mɔyízi kpó Eleazáa kpó ká yí sikánú énɛ́ lɛ́ɛ bǐ ɖo yě sí.

⁵²Siká e sɔ́ja afatɔ́ngán lɛ́ɛ kpó kanwekogán lɛ́ɛ kpó hɛn wá ná Mawu Mavɔmavɔ ɔ́ bǐ da kilóo kɛnnɛ wǒ mɔ̌ (170).

⁵³Sɔ́ja lɛ́ɛ ɖokpó ɖokpó ká hɛn nǔ e é mɔ bɛ́ sín ahwangbénu lɛ́ɛ é.

⁵⁴Mɔyízi kpó vɔ̌sánú-xwlémawutɔ́ Eleazáa kpó ká yí sikánú e sɔ́ja afatɔ́ngán lɛ́ɛ kpó kanwekogán lɛ́ɛ kpó ná Mawu Mavɔmavɔ lɛ́ɛ, bó bɛ́ yě yi dó Goxɔ ɔ́ mɛ, bónú Mawu Mavɔmavɔ ná nɔ́ dó flín Izlayɛ́li ví lɛ́ɛ.