Read fon Kɛ́nsísɔ́ 32 Bible Online

Kɛ́nsísɔ́ 32 - fon bible

Kɛ́nsísɔ́ 32

¹Hwlibɛ́ni ví lɛ́ɛ kpó Gadi ví lɛ́ɛ kpó ɖó kanlin bɔ é sukpɔ́ tawun. Yě mɔ ɖɔ Yazɛ́ɛ gbé jí kpó Galadi to ɔ́ kpó nyɔ́ nú kanlin nyinyi.

²Énɛ́ ɔ́, yě yi mɔ Mɔyízi kpó vɔ̌sánú-xwlémawutɔ́ Eleazáa kpó, kpódó togun Izlayɛ́li tɔn ɔ́ sín gǎn lɛ́ɛ kpó, bó ɖɔ nú yě ɖɔ:

³“Atalɔ́ti, Divɔ́ni, Yazɛ́ɛ, Nimula, Hɛcibɔ́ni, Eleale, Sevamu, Nɛbo kpódó Beɔ́ni kpó sín toxo lɛ́ɛ ɔ́,

⁴toxo énɛ́ lɛ́ɛ e Mawu Mavɔmavɔ dó alɔ Izlayɛ́li ví lɛ́ɛ bɔ yě yí lɛ́ɛ ɔ́, kanlin ná nyɔ́ nyi ɖo fí énɛ́ lɛ́ɛ; mǐ mɛsɛntɔ́ towe lɛ́ɛ ɖíe ká ɖó kanlin sukpɔ́ e.

⁵Ényí a nǎ wa ɖagbe nú mǐ mɛsɛntɔ́ towe lɛ́ɛ ɖo gbě énɛ́ ɔ́ jí hǔn, nǎ gbe bónú ní nyí mǐtɔn. Ma nyi mǐ sɛ́ dó Judɛ́ɛn tɔ ɔ́ gúdo ó.”

⁶Ée yě ɖɔ mɔ̌ ɔ́, Mɔyízi kanbyɔ́ Gadi kpó Hwlibɛ́ni kpó sín vǐ lɛ́ɛ ɖɔ: “Étɛ́? Nɔví mitɔn lɛ́ɛ ná yi ahwan fun gbé, bɔ midɛɛ lɛ́ɛ ná nɔ fí wɛ a?

⁷Aniwú wɛ mi ná dó awakanmɛkú nú Izlayɛ́li ví lɛ́ɛ ɖɔ yě ní má yi to e Mawu Mavɔmavɔ ná yě ɔ́ mɛ ó?

⁸ Nǔ e tɔ́ mitɔn lɛ́ɛ wa hwenu e un sɛ́ yě dó sín Kadɛ́ci-Baanɛ́ya bɔ yě ná yi ba do nú to ɔ́ nɛ́.

⁹Yě hun káká yi tɔdo Ɛcikɔ́lu tɔn ɔ́ mɛ, bɔ éé yě ba do nú to ɔ́, yě dǒ awakanmɛkú nú Izlayɛ́li ví lɛ́ɛ ɖɔ yě ní má yi to e Mawu Mavɔmavɔ ná yě ɔ́ mɛ ó.

¹⁰ Gbe énɛ́ gbe ɔ́, Mawu Mavɔmavɔ sin xomɛ ɖésú, bó dó akpá ɖɔ:

¹¹‘Mɛ élɔ́ lɛ́ɛ e gosín Ejípu lɛ́ɛ ɔ́, yě mɛ e ɖó xwe ko lɛ́ɛ kpó yě mɛ e ɖó hú mɔ̌ lɛ́ɛ kpó ɖěbǔ ná mɔ ayǐkúngban e sín akpá un dó nú Ablaxámu, Izáki, kpódó Jakɔ́bu kpó ɔ́ ǎ. Đó yě nɔ gbejí nú mì yi kpé ǎ.

¹²Kalɛ́bu Yefunnɛ́ɛ ví súnnu ɔ́ kpódó Jozuwée Nuni ví ɔ́ kpó kɛ́ɖɛ́ wɛ ná yi ayǐkúngban énɛ́ ɔ́ jí, ɖó yě nɔ gbejí nú mì yi kpé. Yefunnɛ́ɛ ɔ́, Kenázi kúnkan ɔ́ mɛ wɛ é jɔ ɖe.’

¹³Mawu Mavɔmavɔ sin xomɛ dó Izlayɛ́li ví lɛ́ɛ, bó bló bɔ yě flú gbɔn gbětótló mɛ xɔ xwe kanɖé (40) káká bɔ jijimɛ e sín zǐnzán má nyɔ́ Mawu Mavɔmavɔ nukún mɛ ǎ lɛ́ɛ bǐ sín kún sú dó.

¹⁴Hwɛhutɔ́ e mi, din ɔ́, mi jló ná wa nǔ tɔ́ mitɔn lɛ́ɛ ɖɔhun, bɔ Mawu Mavɔmavɔ ná lɛ́ sin xomɛ dó Izlayɛ́li ví lɛ́ɛ d'é jí.

¹⁵Đó ényí mi lɛ́ kɔ sín Mawu Mavɔmavɔ gúdo ɔ́, é ná jó Izlayɛ́li ví lɛ́ɛ dó nyi gbětótló mɛ, bɔ yě ná ɖo flúflú wɛ, bɔ é ná sín midɛɛ lɛ́ɛ wú, bɔ togun élɔ́ bǐ ná sú kún dó.”

¹⁶Ée Mɔyízi ɖɔ mɔ̌ ɔ́, yě sɛ yi gɔ̌n tɔn, bó ɖɔ n'i ɖɔ: “Mǐ ná bló kpó nyi fí nú kanlin mǐtɔn lɛ́ɛ, bó ná ɖó toxo ɖaxó ɖaxó lɛ́ɛ ayǐ nú vǐ mǐtɔn lɛ́ɛ.

¹⁷Énɛ́ ɔ́ gúdo ɔ́, mǐ ná yá wǔ sɔ́ ahwanfunnú, bó ná jɛ nukɔn nú Izlayɛ́li ví ɖě lɛ́ɛ, bó ná bló bɔ yě ná yi ayǐkúngban e Mawu Mavɔmavɔ ná yě ɔ́ jí. Vǐ mǐtɔn lɛ́ɛ ná nɔ fí, ɖo toxo e è mɛ ahohó lɛ́ lɛ̌ dó lɛ́ɛ mɛ, bó ná gán ɖo to ɔ́ mɛ nu lɛ́ɛ sí.

¹⁸Ényí Izlayɛ́li ví lɛ́ɛ ɖokpó ɖokpó má jɛ ayǐkúngban yětɔn yětɔn jí ǎ ɔ́, mǐ ná lɛ́ kɔ yi xwé mǐtɔn lɛ́ɛ gbe ǎ.

¹⁹Mǐ ká ná má ayǐkúngban ɖě xá yě ɖo Judɛ́ɛn tɔ ɔ́ sín akpá ɖě ɔ́ xwé ǎ, ɖó ayǐkúngban e nyí mǐdɛɛ lɛ́ɛ tɔn lɛ́ɛ kó ɖo Judɛ́ɛn tɔ ɔ́ sín zǎnzǎnhwe jí fí.”

²⁰Mɔyízi ka ɖɔ nú yě ɖɔ: “Ényí mi bló nǔ gbɔn mɔ̌ ɔ́, ényí mi sɔ́ ahwannú bó fun ahwan ɖo Mawu Mavɔmavɔ nukɔn ɔ́,

²¹ényí mi mɛ e sɔ́ ahwannú lɛ́ɛ bǐ dó asá Judɛ́ɛn tɔ ɔ́, bó nɔ Mawu Mavɔmavɔ nukɔn káká bɔ é nya kɛntɔ́ tɔn lɛ́ɛ bǐ dó zɔ,

²²bónú hwenu e to ɔ́ jɛ Mawu Mavɔmavɔ sín acɛ mɛ dó ɔ́ jɛ́n mi ná lɛ́ kɔ dó ɔ́, Mawu Mavɔmavɔ ná mɔ nǔɖé ɖɔ dó mi wú ǎ, bɔ to élɔ́ ná nyí mitɔn ɖo Mawu Mavɔmavɔ nukɔn.

²³Lo ɔ́, ényí mi ma wa nǔ gbɔn mɔ̌ ǎ ɔ́, mi hu hwɛ dó Mawu Mavɔmavɔ. Mi ka ná tunwun ɖɔ hwɛ e mi hu ɔ́ ji nǔɖé ɔ́, mi ná kpan.

²⁴Mi bo ɖó toxo ɖaxó ɖaxó lɛ́ɛ ayǐ nú vǐ mitɔn lɛ́ɛ, bó bló kpó nú kanlin mitɔn lɛ́ɛ; amɔ̌, mi ma wɔn nǔ e mi ɖɔ émí ná bló lɛ́ɛ ó.”

²⁵Gadi kpó Hwlibɛ́ni kpó sín vǐ lɛ́ɛ ká ɖɔ nú Mɔyízi ɖɔ: “Mǐ mɛsɛntɔ́ towe lɛ́ɛ ná bló nǔ e hwi gǎn mǐtɔn ɔ́ ɖɔ lɛ́ɛ.

²⁶Mǐ nǎ jó vǐ mǐtɔn lɛ́ɛ kpó asi mǐtɔn lɛ́ɛ kpó dó, bó ná jó nyibú mǐtɔn lɛ́ɛ bǐ kpó gbɔ̌ mǐtɔn lɛ́ɛ bǐ kpó dó bɔ yě ná nɔ fí, ɖo toxo e ɖo Galadi lɛ́ɛ mɛ.

²⁷Mǐ mɛsɛntɔ́ towe lɛ́ɛ bǐ ná sɔ́ ahwannú, bó ná yi fun ahwan ɖo Mawu Mavɔmavɔ nukɔn, lě e hwi gǎn mǐtɔn ɔ́ ɖɔ gbɔn é.”

²⁸ Ée yě ɖɔ mɔ̌ ɔ́, Mɔyízi ɖe gbe nú vɔ̌sánú-xwlémawutɔ́ Eleazáa kpó Jozuwée Nuni ví ɔ́ kpó, kpódó hɛ̌nnugán akɔta Izlayɛ́li tɔn lɛ́ɛ tɔn lɛ́ɛ kpó.

²⁹É ɖɔ nú yě ɖɔ: “Ényí Gadi kpó Hwlibɛ́ni kpó sín vǐ lɛ́ɛ bǐ sɔ́ ahwannú bó dó asá Judɛ́ɛn tɔ ɔ́ kpó mi kpó, bó ná fun ahwan ɖo Mawu Mavɔmavɔ nukɔn, bɔ to ɔ́ ná jɛ acɛ mǐtɔn mɛ hǔn, mi ná ná Galadi yíkúngban ɔ́ yě.

³⁰Lo ɔ́, ényí yě má sɔ́ ahwannú, bó xwedó mi ǎ ɔ́, mi ná ná ayǐkúngban yě ɖo gɔ̌n mitɔn ɖo Kanáa.”

³¹Gadi ví lɛ́ɛ kpó Hwlibɛ́ni ví lɛ́ɛ kpó ká lɛ́ ɖɔ nú Mɔyízi ɖɔ: “Mǐ ná bló nǔ e Mawu Mavɔmavɔ ɖɔ nú mǐ mɛsɛntɔ́ towe lɛ́ɛ é.

³²Mǐ ná sɔ́ ahwannú ɖo Mawu Mavɔmavɔ nukɔn, bó ná yi Kanáa. Amɔ̌, ayǐkúngban e ɖo Judɛ́ɛn tɔ ɔ́ sín akpáxwé fí ɔ́ ní nyí mǐtɔn.”

³³Énɛ́ ɔ́, Sihɔ́ni axɔ́sú Amɔliti ví lɛ́ɛ tɔn kpó Ɔgu axɔ́sú Basáni ví lɛ́ɛ tɔn kpó sín axɔ́súɖuto lɛ́ɛ kpó toxo e lɛ́ dó yě lɛ́ɛ kpó ɔ́, Mɔyízi ná Gadi kpó Hwlibɛ́ni kpó sín akɔta lɛ́ɛ, kpódó akɔta vlɔ́ Manasée Jozɛ́fu ví ɔ́ tɔn kpó.

³⁴Toxo e Gadi ví lɛ́ɛ vɔ́ ɖó ayǐ lɛ́ɛ ɖíe: Divɔ́ni, Atalɔ́ti, Alowɛ́ɛ,

³⁵Atlɔ́ti-Cofani, Yazɛ́ɛ, Yogibóxa,

³⁶Bɛti-Nimula kpódó Bɛti-Halani kpó. Yě mɛ ahohó lɛ́ lɛ̌ dó toxo énɛ́ lɛ́ɛ, bó bló kpó nú kanlin yětɔn lɛ́ɛ.

³⁷Toxo e Hwlibɛ́ni ví lɛ́ɛ vɔ́ ɖó ayǐ lɛ́ɛ ɖíe: Hɛcibɔ́ni, Eleale, Kiliyatayimu,

³⁸Nɛbo, Baalu-Mɛyɔ́ni kpódó Sivuma kpó. Yě sun nyǐkɔ ɖěvo toxo e yě vɔ́ ɖó ayǐ lɛ́ɛ.

³⁹Makíi Manasée ví ɔ́ sín vǐ lɛ́ɛ tɔ́n ahwan Galadi bo yí to tɔn lɛ́ɛ. Yě nya Amɔliti ví e nɔ́ nɔ to ɔ́ mɛ lɛ́ɛ.

⁴⁰Énɛ́ ɔ́, Mɔyízi ná to ɔ́ Makíi ví lɛ́ɛ nú yě ná nɔ fínɛ́.

⁴¹Yayíi Manasée ví ɔ́ sín vǐ lɛ́ɛ tɔ́n ahwan Amɔliti ví lɛ́ɛ, bó yí gletoxo yětɔn lɛ́ɛ, bó nɔ́ ylɔ́ gletoxo énɛ́ lɛ́ɛ ɖɔ: “Gletoxo Yayíi tɔn lɛ́ɛ.”

⁴²Nɔváxi yi yí toxo e è nɔ ylɔ́ ɖɔ Kenáti ɔ́ kpódó gletoxo e lɛ́ dó e lɛ́ɛ kpó. Nyǐkɔ é ɖésúnɔ tɔn ɔ́ wɛ é sun toxo ɔ́, bɔ toxo ɔ́ nɔ́ nyí Nɔváxi.