Read fon Kɛ́nsísɔ́ 35 Bible Online

Kɛ́nsísɔ́ 35 - fon bible

Kɛ́nsísɔ́ 35

¹ Mawu Mavɔmavɔ ɖɔ xó nú Mɔyízi ɖo ayǐkúngban wɛnjɛ Mɔwabu tɔn lɛ́ɛ jí, ɖo Judɛ́ɛn tɔ ɔ́ kpá, ɖo Jeliko nukɔn. É ɖɔ n'i ɖɔ:

²“Đɔ nú Izlayɛ́li ví lɛ́ɛ ɖɔ yě ní kpɔ́n to yětɔn mɛ, bó ná toxo ɖé lɛ́ɛ Levíi ví lɛ́ɛ, bónú yě ná nɔ mɛ. Yě ní ná ayǐkúngban e lɛ́ dó toxo énɛ́ lɛ́ɛ lɔmɔ̌ yě.

³Toxo énɛ́ lɛ́ɛ ná nyí yětɔn, bɔ yě ná nɔ mɛ, bɔ ayǐkúngban e lɛ́ dó toxo lɛ́ɛ ná nyí amagbo nú kanlin yětɔn alɔkpa alɔkpa lɛ́ɛ.

⁴Ayǐkúngban e lɛ́ dó toxo ɔ́, bɔ mi ná ná Levíi ví lɛ́ɛ ɔ́, ná bɛ́ sín toxo ɔ́ sín dǒ ɔ́ wú ɖo kɔ́xo, bó ná ɖó mɛ̌tlu afɔwe kanwe ko (500) lɛ́ dó.

⁵Mi ná jlɛ́ mɛ̌tlu afatɔ́n (1.000) bɛ́ sín toxo ɔ́ wú, ɖo zǎnzǎnhwe jí, bó ná jlɛ́ mɛ̌tlu afatɔ́n (1.000) ɖo tofɔligbé, bó ná jlɛ́ mɛ̌tlu afatɔ́n (1.000) ɖo totaligbé. Toxo ɔ́ ná ɖo tɛ́ntin. Ayǐkúngban e ná lɛ́ dó toxo lɛ́ɛ ɔ́ nɛ́.

⁶Đo toxo e mi ná ná Levíi ví lɛ́ɛ mɛ ɔ́, toxo ayizɛ́n ná tíin, bó ná nyí bibɛtɛn, bɔ mɛɖé hu mɛ ɔ́, é sixú hɔn hwlá cí fínɛ́, bɔ toxo kanɖé-nukún-we (42) ɖěvo lɛ́ɛ ná gɔ́ ná.

⁷Toxo e mi ná ná Levíi ví lɛ́ɛ bǐ ná bló toxo kanɖé tántɔn (48), kpó ayǐkúngban e lɛ́ dó yě lɛ́ɛ kpó.

⁸Akɔta lɛ́ɛ ɖokpó ɖokpó ná kpɔ́n lě e ayǐkúngban tɔn d'agba gbɔn ɔ́, bó ná ná toxo lɛ́ɛ yě: akɔta e d'agba ɔ́ ná ná toxo gěgé; akɔta e ka hwe ɔ́ ná ná toxo kpɛɖé.”

⁹Mawu Mavɔmavɔ ɖɔ nú Mɔyízi ɖɔ

¹⁰é ní ɖɔ nú Izlayɛ́li ví lɛ́ɛ ɖɔ: “Mi dó asá Judɛ́ɛn tɔ ɔ́, bó byɔ́ Kanáa to mɛ ɔ́,

¹¹mi ná ɖó toxo ɖé lɛ́ɛ ayǐ, bó ná nɔ́ hɔn yi cí. Toxo énɛ́ lɛ́ɛ mɛ wɛ mɛ e ma tunwun ǎ bó hu gbɛtɔ́ ɔ́ ná hɔn yi cí.

¹²Toxo énɛ́ lɛ́ɛ mɛ wɛ mi ná nɔ́ hɔn yi cí, bó ná sixú gló mɛ e ɖo mɛ e kú ɔ́ sín hlɔn ba wɛ é. Énɛ́ ɔ́, mɛɖé ná hu mɛhutɔ́ ɔ́ cóbɔ é ná wá hwɛgun ɖo togun ɔ́ nukɔn, bɔ è nǎ ɖɔ hwɛ xá ɛ ǎ.

¹³Toxo e mi ná ná lɛ́ɛ mɛ ɔ́, ayizɛ́n ná nyí toxo e mɛ mi ná nɔ́ hɔn yi cí é.

¹⁴Mi ná ná toxo atɔn ɖo Judɛ́ɛn tɔ ɔ́ gúdo, bó ná ná atɔn ɖo Kanáa tomɛ; toxo e mɛ mi ná nɔ́ hɔn yi cí lɛ́ɛ wɛ toxo énɛ́ lɛ́ɛ ná nyí.

¹⁵Toxo ayizɛ́n énɛ́ lɛ́ɛ ná nyí bibɛtɛn nú Izlayɛ́li ví lɛ́ɛ, bó ná nyí nú jǒnɔ kpó mɛ e ná nɔ mi mɛ nú hwenu kpɛɖé lɛ́ɛ kpó. Mɛ ɖěbǔ má tunwun ǎ, bó hu mɛ ɔ́, mɛ ɔ́ ná hɔn yi fínɛ́.

¹⁶“Ényí mɛɖé zé alǐnnyánú ɖé dó xo nɔzo tɔn ná, bɔ é kú ɔ́, mɛhutɔ́ wɛ mɛ énɛ́ ɔ́ nyí, bɔ è nǎ hu é lɔmɔ̌.

¹⁷Ényí mɛɖé zé awǐnnya e sixú hu mɛ ɔ́ nyi dó nɔzo tɔn, bɔ é kú ɔ́, mɛhutɔ́ wɛ mɛ énɛ́ ɔ́ nyí, bɔ è nǎ hu é lɔmɔ̌.

¹⁸Ényí kpo e sixú hu mɛ ɔ́ wɛ mɛ ɔ́ zé dó xo nɔzo tɔn ná bɔ é kú ɔ́, mɛhutɔ́ wɛ mɛ énɛ́ ɔ́ nyí, bɔ è nǎ hu é lɔmɔ̌.

¹⁹Mɛ e ɖo mɛ e è hu ɔ́ sín hlɔn ba wɛ ɔ́ ná hu mɛhutɔ́ ɔ́. Ényí hlɔnbatɔ́ ɔ́ mɔ mɛhutɔ́ ɔ́, hlɔnbatɔ́ ɔ́ ná hu i.

²⁰Ényí mɛɖé wa wǎngbɛ́númɛ nú xá nɔzo tɔn abǐ é ɖó ayixa nyanya dó wǔ tɔn bó nyi nǔɖé dó e bɔ é kú,

²¹abǐ nɔzo tɔn ɔ́ sín nǔ vɛ́ wǔ tɔn, bɔ é dó akpotokwín i bɔ é kú ɔ́, è nǎ hu mɛ e hu mɛ ɔ́, ɖó mɛhutɔ́ wɛ é nyí. Ényí mɛ e ɖo mɛ e è hu ɔ́ sín hlɔn ba wɛ ɔ́ mɔ mɛ e hu mɛ ɔ́, é ná hu mɛ e hu mɛ ɔ́.

²²“Lo ɔ́, ényí mɛɖé sísɛ́ nɔzo tɔn vawun, bɔ é má nyí mɛnúvɛ́mɛwú sín nǔ ǎ, abǐ mɛɖé nyi nǔɖé dó nɔzo tɔn bɔ é má nyí kpó ayixa nyanya kpó ǎ ɔ́,

²³abǐ mɛ ɔ́ tunwun ǎ bó nyi awǐnnya e sixú hu mɛ ɔ́ dó nɔzo tɔn bɔ é kú, bɔ é má nyí ɖɔ mɛnúvɛ́mɛwú sín nǔ wɛ é wa xá ɛ ǎ, bó má ká ɖo biba ná wa nǔ nyanya xá ɛ wɛ ǎ ɔ́,

²⁴sɛ́n e togun ɔ́ ná xwedó dó ɖɔ hwɛ xá mɛ e dó nǔ mɛ bɔ è kú ɔ́ kpó mɛ e ná ba hlɔn ɔ́ kpó lɛ́ɛ ɖíe:

²⁵Togun ɔ́ ná hwlɛ́n mɛhutɔ́ ɔ́ ɖo hlɔnbatɔ́ ɔ́ sí, bó ná lɛ́ kɔ n'i yi toxo e nyí bibɛtɛn, bɔ é kó hɔn yi hwlá cí ɔ́ mɛ. “É ná nɔ fínɛ́ káká jɛ hwenu e vɔ̌sánú-xwlémawutɔ́ ɖaxó e è kɔn ami dó ta ná ɔ́ ná kú dó é.

²⁶Ényí mɛhutɔ́ ɔ́ ká tɔ́n sín toxo e nyí bibɛtɛn, bɔ é hɔn hwlá yi cí ɔ́ mɛ,

²⁷bɔ mɛ e ɖo mɛ e é hu ɔ́ sín hlɔn ná ba wɛ ɔ́ mɔ ɛ ɖo toxo ɔ́ gúdo bo hu i ɔ́, hlɔnbatɔ́ ɔ́ ná nyí mɛhutɔ́ hwenɛ́nu ǎ.

²⁸Đó mɛhutɔ́ ɔ́ ɖó ná nɔ toxo e nyí bibɛtɛn ɔ́ mɛ káká bɔ vɔ̌sánú-xwlémawutɔ́ ɖaxó ɔ́ ná kú. Ényí vɔ̌sánú-xwlémawutɔ́ ɖaxó ɔ́ kú ɔ́, mɛhutɔ́ ɔ́ hɛn ɔ́, é ná lɛ́ kɔ yi to tɔn mɛ.

²⁹“Sɛ́n e mi kpó vǐ mitɔn lɛ́ɛ kpó ná nɔ́ xwedó hwebǐnu dó ɖɔ hwɛ xá mɛ ɖo fí e mi ná nɔ́ nɔ lɛ́ɛ bǐ é nɛ́.

³⁰ “Ényí mɛɖé hu mɛ ɔ́, è nǎ hu é lɔmɔ̌; amɔ̌, è ɖǒ ná mɔ kúnnuɖetɔ́ gěgé hwɛ̌; kúnnuɖetɔ́ ɖokpó kpé bɔ è nǎ ɖǒ kúhwɛ nú mɛ e hu mɛ ɔ́ ǎ.

³¹Mi ma yí nǔ ɖu bó jó mɛhutɔ́ e è ɖǒ ná hu ɔ́ dó nyi gbɛ ó, ɖó è ɖǒ ná hu i.

³²Mi ma yí nǔ ɖu, bó ná tɛn mɛhutɔ́ ɔ́ bónú é hɔn yi toxo e nyí bibɛtɛn tɔn ɔ́ mɛ, bó ná wá lɛ́ kɔ yi to tɔn mɛ, cóbɔ vɔ̌sánú-xwlémawutɔ́ ɖaxó ɔ́ ná kú ó.

³³“Mi ma hɛn to e mɛ mi ɖe ɔ́ blí ó, ɖó nú è hu mɛ ɖo to ɖé mɛ ɔ́, to ɔ́ nɔ́ nyí to blíblí. Ényí mɛ ɖé hu mɛ ɔ́, mɛ e hu mɛ ɔ́ jɛ́n è nǎ hu, cóbó ná sixú slá wǔ nú to ɔ́.

³⁴Mi ma hɛn to e mɛ mi ná yi nɔ, bɔ nyɛ ɖésúnɔ ná nɔ tɛ́ntin mitɔn ɔ́ blí ó, ɖó nyɛ wɛ nyí Mawu Mavɔmavɔ; nyɛ wɛ nɔ nɔ Izlayɛ́li ví lɛ́ɛ tɛ́ntin.”