Read fon Kɛ́nsísɔ́ 36 Bible Online

Kɛ́nsísɔ́ 36 - fon bible

Kɛ́nsísɔ́ 36

¹Xwédo Galadi e nyí Makíi ví, bó nyí Manasée vívú, ɖo Jozɛ́fu kúnkan lɛ́ɛ mɛ ɔ́ sín hɛ̌nnugán lɛ́ɛ wá Mɔyízi kpó akɔtagán Izlayɛ́li tɔn lɛ́ɛ kpó gɔ́n,

² bó ɖɔ nú yě ɖɔ: “Gǎn mǐtɔn Mɔyízi, hwenu e Mawu Mavɔmavɔ ɖɔ hwi ní nyi akɔ bo má to ɔ́ nú Izlayɛ́li ví lɛ́ɛ ɔ́, é lɛ́ ɖɔ hwi ní má nɔví mǐtɔn Selofɛxádi sín ayǐkúngban lɛ́ɛ nú vǐ tɔn nyɔ̌nu lɛ́ɛ.

³Din ɔ́, ényí yě ká yi da asú ɖo akɔta Izlayɛ́li tɔn lɛ́ɛ ɖěvo mɛ ɔ́, énɛ́ ɔ́, è nǎ kán ayǐkúngban yětɔn e ɖo akɔta mǐtɔn mɛ ɔ́, bó ná zé dó ayǐkúngban e nyí akɔta yɔ̌yɔ́ e mɛ yě byɔ́ ɔ́ tɔn jí. Hǔn, ayǐkúngban e è nyi akɔ bo ná mǐ ɔ́ ɖo nǎ ɖe kpo wɛ nɛ́.

⁴Énɛ́ ɔ́, xwe e xwe è nǎ ɖu ‘Awǎjijɛxwe’ ɔ́, è nǎ kán ayǐkúngban yětɔn ɔ́ sín akɔta mǐtɔn mɛ bǐ dégbédégbé, bó ná zé dó akɔta yětɔn yɔ̌yɔ́ ɔ́ tɔn jí.”

⁵Mɔyízi ɖɔ nǔ e Mawu Mavɔmavɔ ɖɔ ɔ́ nú Izlayɛ́li ví lɛ́ɛ. É ɖɔ: “Akɔta Jozɛ́fu ví lɛ́ɛ tɔn sín hwɛ jɔ.

⁶Gbeta e Mawu Mavɔmavɔ ɖe tɔ́n dó Selofɛxádi ví nyɔ̌nu lɛ́ɛ wú lɛ́ɛ ɖíe: yě sixú da mɛ e jló yě ɔ́; amɔ̌, akɔta tɔ́ yětɔn lɛ́ɛ tɔn sín hɛ̌nnu mɛ jɛ́n yě ná da asú ɖe.

⁷Ayǐkúngban e nyí Izlayɛ́li ví lɛ́ɛ tɔn ɔ́, è nǎ kán akɔta ɖě tɔn dó akɔta ɖěvo tɔn jí ǎ. Lo ɔ́, Izlayɛ́li ví ɖokpó ɖokpó ɖó ná jɛ hun dó ayǐkúngban e nyí tɔ́ tɔn sín akɔta tɔn ɔ́ jí syɛ́nsyɛ́n.

⁸Vǐ nyɔ̌nu e ná ɖó ayǐkúngban, ɖo akɔta Izlayɛ́li tɔn lɛ́ɛ mɛ ɔ́ ɖó ná da asú ɖo akɔta tɔ́ tɔn tɔn ɔ́ sín hɛ̌nnu ɖokpó mɛ, bónú Izlayɛ́li ví lɛ́ɛ ɖokpó ɖokpó ná hɛn ayǐkúngban e nyí tɔ́ yětɔn lɛ́ɛ tɔn é, bɔ ɖě ná hwe ɖ'é wú ǎ.

⁹Énɛ́ ɔ́, ayǐkúngban akɔta ɖě tɔn ɖě ná byɔ́ akɔta ɖěvo tɔn mɛ ǎ. Lo ɔ́, akɔta Izlayɛ́li ví lɛ́ɛ tɔn lɛ́ɛ ɖokpó ɖokpó ná jɛ hun dó ayǐkúngban e nyí étɔn ɔ́ jí.”

¹⁰Selofɛxádi sín vǐ nyɔ̌nu lɛ́ɛ ká bló ɖó nǔ e Mawu Mavɔmavɔ ɖɔ nú Mɔyízi ɔ́ jí.

¹¹Maxla, Tíisa, Hogla, Miluka kpódó Nɔwa kpó da tɔ́ yětɔn sín nɔví lɛ́ɛ. Selofɛxádi sín nɔví nyɔ̌nu wɛ yě nyǐ.

¹²Yě da asú ɖo Manasée Jozɛ́fu ví ɔ́ sín hɛ̌nnu lɛ́ɛ mɛ; énɛ́ ɔ́, ayǐkúngban e nyí yětɔn lɛ́ɛ nɔ akɔta tɔ́ yětɔn tɔn ɔ́ sín hɛ̌nnu ɔ́ sí.

¹³Sɛ́n kpó tito kpó e Mawu Mavɔmavɔ ná Izlayɛ́li ví lɛ́ɛ gbɔn Mɔyízi jí ɖo ayǐkúngban wɛnjɛ Mɔwabu tɔn lɛ́ɛ jí, ɖo Judɛ́ɛn tɔ ɔ́ tó, ɖo Jeliko toxo ɔ́ nukɔn ɔ́ lɛ́ɛ nɛ́.