Read fon Kɛ́nsísɔ́ 4 Bible Online

Kɛ́nsísɔ́ 4 - fon bible

Kɛ́nsísɔ́ 4

¹Mawu Mavɔmavɔ ɖɔ nú Mɔyízi kpódó Aalɔ́ɔn kpó ɖɔ:

²“Mi sɔ́ Levíi ví súnnu e jɔ ɖo Kexáti kún mɛ lɛ́ɛ sín kɛ́n; mi sɔ́ hɛ̌nnu nabí e ɖo akɔta ɔ́ mɛ lɛ́ɛ sín kɛ́n, bó sɔ́ gbɛtɔ́ nabí e ɖo hɛ̌nnu ɖokpó ɖokpó mɛ ɔ́ sín kɛ́n.

³Mi ná sɔ́ kɛ́n yětɔn bɛ́ sín yě mɛ e ɖó xwe gban (30) lɛ́ɛ, kpódó yě mɛ e ɖó hú mɔ̌ lɛ́ɛ kpó jí káká yi jɛ yě mɛ e ɖó xwe kanɖé wǒ (50) lɛ́ɛ jí. Yědɛɛ lɛ́ɛ wɛ ná nɔ́ wa azɔ̌ ɖé lɛ́ɛ ɖo Goxɔ ɔ́ mɛ.

⁴Azɔ̌ e yě ná nɔ́ wa ɖo Goxɔ ɔ́ mɛ ɔ́ wɛ nyí ɖɔ yě ná nɔ́ kpé nukún dó nǔ mímɛ́ bǐ lɛ́ɛ wú.

⁵Izlayɛ́li ví lɛ́ɛ jló ná sɛ tɛn sín fí e yě ɖó gɔnu ɖó ɔ́ hweɖěbǔnu ɔ́, Aalɔ́ɔn kpódó vǐ tɔn súnnu lɛ́ɛ kpó ná byɔ́ Goxɔ ɔ́ mɛ, bó ná ɖe xɔmɛgbovɔ e è dǒ gbo tɛn mímɛ́ bǐ ɔ́ ná ɔ́ síin, bó ná zé bú dó akɔjijɛgbá ɔ́,

⁶bó ná zé anyǔ tlitli cyɔ́n jí, bó ná zé avɔ cyɔ́n bǐ jí. Avɔ ɔ́ bǐ ná nyí kwlésinnɔ; énɛ́ gúdo ɔ́, yě ná bɛ́ kpo e è nɔ dó zé ná lɛ́ɛ dó alɔgan lɛ́ɛ mɛ.

⁷Távo e jí wɔ̌xúxú e è xwlé Mawu lɛ́ɛ nɔ́ nɔ ɔ́, yě ná tɛ́ avɔ kwlésinnɔ ɖokpó ɖ'é jí, bó ná bɛ́ nǔ élɔ́ lɛ́ɛ ɖ'é jí: gannúgbɛ́jɛ́, kɔ́fu, sinnugannú kpódó goví e mɛ è nǎ nɔ́ wún vɛ̌ɛn dó, bó ná nɔ́ xwlé nyɛ Mawu ɔ́ lɛ́ɛ kpó, kpódó wɔ̌xúxú e è nǎ nɔ́ xwlé mì lɛ́ɛ kpó; wɔ̌xúxú ɖó ná ɖo távo ɔ́ jí tɛgbɛ.

⁸Yě ná zé avɔ vɔvɔ cɛ́cɛ́ cyɔ́n dó nǔ énɛ́ lɛ́ɛ bǐ, bó ná zé anyǔ tlitli cyɔ́n jí, bó ná bɛ́ kpo e è nɔ dó zé távo ɔ́ ná lɛ́ɛ dó alɔgan lɛ́ɛ mɛ.

⁹Yě ná zé avɔ kwlésinnɔ cyɔ́n dó zogbɛ́nhɛnnú ɔ́ kpódó nǔ e ɖ'é wú lɛ́ɛ bǐ kpó: zogbɛ́n lɛ́ɛ, nǔwlínú lɛ́ɛ, afíngannú lɛ́ɛ kpódó amigoví lɛ́ɛ kpó.

¹⁰Yě ná bɛ́ nǔ énɛ́ lɛ́ɛ kpódó nǔzínzán lɛ́ɛ bǐ kpó dó anyǔ tlitli ɖé mɛ, bó ná zé dó agbanhɛnnú mɛ.

¹¹Vɔ̌sákpe siká tɔn ɔ́, yě ná tɛ́ avɔ kwlésinnɔ d'é jí, bó ná zé anyǔ tlitli cyɔ́n jí, bó ná bɛ́ kpo e è nɔ dó zé vɔ̌sákpe ɔ́ ná lɛ́ɛ dó alɔgan lɛ́ɛ mɛ.

¹²Yě ná bɛ́ nǔzínzán e è nɔ dó wa azɔ̌ ná ɖo Goxɔ ɔ́ mɛ lɛ́ɛ, bó bɛ́ yě dó avɔ kwlésinnɔ mɛ, bó ná zé anyǔ tlitli bú dó, bó ná zé dó agbanhɛnnú mɛ.

¹³Vɔ̌sákpe e jí è nɔ dó vɔ̌ zo ɖe ɔ́, yě ná bɛ́ afín sín jí, bó ná tɛ́ avɔ vɔvɔ cɛ́cɛ́ ɖ'é jí,

¹⁴bó ná bɛ́ nǔ e è nɔ zán ɖo vɔ̌sísá hwenu lɛ́ɛ bǐ ɖ'é jí. Yě wɛ nyí afíngannú lɛ́ɛ, gǎfu lɛ́ɛ, pɛ́li lɛ́ɛ, basya lɛ́ɛ, nǔ e è ko nɔ sixú zán ɖo vɔ̌sákpe jí lɛ́ɛ bǐ, bó ná zé anyǔ tlitli cyɔ́n jí, bó ná bɛ́ kpo e è nɔ dó zé vɔ̌sákpe ɔ́ ná lɛ́ɛ dó alɔgan lɛ́ɛ mɛ.

¹⁵Cóbónú yě ná jɛ ali ɔ́, Aalɔ́ɔn kpódó vǐ tɔn súnnu lɛ́ɛ kpó nɔ́ bú nǔ dó nǔ mímɛ́ énɛ́ lɛ́ɛ, kpódó nǔ e è nɔ zán ɖo nǔ énɛ́ lɛ́ɛ kɔn lɛ́ɛ kpó. Yě bló fó ɔ́, Kexáti sín vǐ súnnu lɛ́ɛ nɔ́ wá ɖíɖá. Lo ɔ́, yě ná ɖó alɔ nǔ mímɛ́ lɛ́ɛ ɖě wú ǎ; yě táá kú. Nú è tún Goxɔ ɔ́, azɔ̌ e nyí yědɛɛ lɛ́ɛ tɔn bɔ yě ná wa é nɛ́.

¹⁶Eleazáa, vɔ̌sánú-xwlémawutɔ́ Aalɔ́ɔn sín vǐ ɔ́ ná nɔ́ kpé nukún dó ami e è nɔ dó tá zogbɛ́n ná ɔ́ kpó atínkɛn wǎnɖagbenɔ ɔ́ kpó, kpódó nǔníná jinukún tɔn e è nɔ ná ayǐhɔ́ngbe ayǐhɔ́ngbe ɔ́ kpó wú; Eleazáa ná nɔ́ kpé nukún dó Mawu xwé ɔ́ bǐ, kpódó nǔ e ɖ'é mɛ lɛ́ɛ kpó wú. É ná nɔ́ kpé nukún dó nǔ mímɛ́ lɛ́ɛ, kpó nǔ e è nɔ zán ɖo xwé ɔ́ gbe lɛ́ɛ kpó wú.”

¹⁷Mawu Mavɔmavɔ ɖɔ nú Mɔyízi kpó Aalɔ́ɔn kpó ɖɔ:

¹⁸“Mi ma lɔn nú Kexáti ví lɛ́ɛ wa nǔ e yě ná wa bɔ un ná hu yě ɔ́ ó.

¹⁹Yě ɖo nukún kpé dó nǔ mímɛ́ lɛ́ɛ wú wɛ ɔ́, nǔ e mi ná bló, bɔ yě má ná kú ǎ ɔ́ ɖíe: hwenu e yě ná sɛkpɔ́ tɛn mímɛ́ bǐ ɔ́, hwɛ Aalɔ́ɔn kpó vǐ towe súnnu lɛ́ɛ kpó ɔ́, mi ná kplá yě mɛ ɖokpó ɖokpó ɖó tɛn yětɔn yětɔn mɛ, bó ná ɖɔ nǔ e mɛ ɖokpó ɖokpó ɖó ná wa ɔ́, abǐ nǔ e mɛ ɖokpó ɖokpó ɖó ná sɔ́ ɔ́ n'i.

²⁰Yě ɖó ná byɔ́ tɛn mímɛ́ bǐ ɔ́ mɛ, bó ná fin nǔ mímɛ́ lɛ́ɛ kpɔ́n hwenu e è ɖo nǔ bǔ dó yě wɛ ɔ́ ǎ. Yě mɔ ɔ́, yě ná kú”

²¹Mawu Mavɔmavɔ ɖɔ nú Mɔyízi ɖɔ:

²²“Sɔ́ Gɛɛcɔ́ni ví lɛ́ɛ sín kɛ́n; sɔ́ hɛ̌nnu nabí e ɖo akɔta ɔ́ mɛ lɛ́ɛ sín kɛ́n, bó sɔ́ gbɛtɔ́ nabí e ɖo hɛ̌nnu ɖokpó ɖokpó mɛ ɔ́ sín kɛ́n.

²³Sɔ́ súnnu e ɖó xwe gban (30) káká yi xwe kanɖé wǒ (50) lɛ́ɛ sín kɛ́n. Súnnu e sixú wa azɔ̌ e kan Mawu xwé ɔ́ lɛ́ɛ bǐ sín kɛ́n wɛ a nǎ sɔ́.

²⁴Azɔ̌ Gɛɛcɔ́ni ví lɛ́ɛ tɔn ɖíe:

²⁵Yě ná nɔ́ ɖíɖá Goxɔ ɔ́ sín avɔ ɖagbe ɖagbe lɛ́ɛ kpó avɔ ɖě lɛ́ɛ e è cyɔ́n Goxɔ ɔ́ jí lɛ́ɛ kpó, kpó anyǔ e è cyɔ́n avɔ lɛ́ɛ jí lɛ́ɛ kpó, kpódó avɔ e ɖo Goxɔ ɔ́ sín ali nu ɔ́ kpó.

²⁶Yě ná nɔ́ kpé nukún dó avɔ e è dǒ xá kɔ́xota ɔ́ ná lɛ́ɛ, kpódó avɔ e ɖo Mawu xwé ɔ́ sín ali nu ɔ́ kpó wú. Avɔ énɛ́ lɛ́ɛ wɛ è dǒ xá Goxɔ ɔ́ kpódó vɔ̌sákpe ɔ́ kpó. Yě ná kpé nukún dó kan e è sin dó Goxɔ ɔ́ wú lɛ́ɛ wú. Mɔ̌ ɖokpó ɔ́, yě ná nɔ́ kpé nukún dó nǔ e ɖo Goxɔ ɔ́ wú lɛ́ɛ, kpódó nǔ e è nɔ zán ɖ'é mɛ lɛ́ɛ kpó wú. Nǔ e wú yě ná nɔ́ kpé nukún dó lɛ́ɛ nɛ́.

²⁷Hɛ̌nnu Gɛɛcɔ́ni tɔn lɛ́ɛ ná nɔ́ wa azɔ̌ yětɔn lɛ́ɛ ɖo Aalɔ́ɔn kpódó vǐ tɔn súnnu lɛ́ɛ kpó sín acɛ mɛ. Nǔ e yě ná nɔ́ hɛn lɛ́ɛ, kpódó azɔ̌ e yě ná nɔ́ wa lɛ́ɛ kpó ɔ́, acɛ Aalɔ́ɔn kpó vǐ tɔn súnnu lɛ́ɛ kpó mɛ wɛ yě ná nɔ́. Yědɛɛ lɛ́ɛ wɛ ná nɔ́ ɖɔ nǔ e yě ná nɔ́ wa lɛ́ɛ kpódó nǔ e yě ná nɔ́ ɖíɖá lɛ́ɛ kpó nú yě.

²⁸Azɔ̌ e kan Mawu xwé ɔ́, bɔ è sɔ́ dó así nú hɛ̌nnu Gɛɛcɔ́ni tɔn lɛ́ɛ, bɔ yě ná nɔ́ wa lɛ́ɛ nɛ́. Itamáa, vɔ̌sánú-xwlémawutɔ́ Aalɔ́ɔn sín vǐ ɔ́ wɛ ná nɔ yě nu.”

²⁹Mawu Mavɔmavɔ ɖɔ nú Mɔyízi ɖɔ: “Sɔ́ Mɛlali ví lɛ́ɛ sín kɛ́n; sɔ́ hɛ̌nnu nabí e ɖo akɔta ɔ́ mɛ lɛ́ɛ sín kɛ́n, bó sɔ́ gbɛtɔ́ nabí e ɖo hɛ̌nnu ɖokpó ɖokpó mɛ ɔ́ sín kɛ́n.

³⁰Sɔ́ súnnu nabí e ɖó xwe gban (30) káká yi xwe kanɖé wǒ (50) lɛ́ɛ sín kɛ́n, bó ná zé Goxɔ ɔ́ sín azɔ̌ ɖé lɛ́ɛ dó así nú yě, bɔ yě ná nɔ́ wa.

³¹Azɔ̌ e a nǎ zé dó así nú yě lɛ́ɛ ɖíe: yě ná nɔ́ ɖíɖá Goxɔ ɔ́ sín xwlɛ lɛ́ɛ, wɛ̌n lɛ́ɛ, dotín lɛ́ɛ, kpódó nǔ e jí dotín lɛ́ɛ nɔ́ jínjɔ́n lɛ́ɛ kpó,

³²kpódó Mawu xwé ɔ́ sín dotín lɛ́ɛ kpó, kpódó nǔ e jí dotín lɛ́ɛ nɔ́ jínjɔ́n lɛ́ɛ kpó, kpódó só yětɔn lɛ́ɛ kpó, kpódó kan yětɔn lɛ́ɛ kpó, kpódó nǔ e yě nɔ́ zán ɖ'é mɛ lɛ́ɛ bǐ kpó. Mi ná wlán nǔ e mi ná sɔ́ dó así nú mɛ ɖokpó ɖokpó bɔ é ná hɛn ɔ́ sín nyǐkɔ.

³³Azɔ̌ e kan Mawu xwé ɔ́, bɔ è sɔ́ dó así nú hɛ̌nnu Mɛlali tɔn lɛ́ɛ, bɔ yě ná nɔ́ wa lɛ́ɛ nɛ́. Itamáa vɔ̌sánú-xwlémawutɔ́ Aalɔ́ɔn ví ɔ́ ná nɔ yě nu.”

³⁴Mɔyízi kpódó Aalɔ́ɔn kpó, kpódó kplékplé Izlayɛ́li tɔn ɔ́ sín gǎn lɛ́ɛ kpó sɔ́ Kexáti ví lɛ́ɛ sín kɛ́n; yě sɔ́ hɛ̌nnu nabí e ɖo akɔta ɔ́ mɛ lɛ́ɛ sín kɛ́n, bó sɔ́ gbɛtɔ́ nabí e ɖo hɛ̌nnu ɖokpó ɖokpó mɛ ɔ́ sín kɛ́n.

³⁵Yě sɔ́ kɛ́n yětɔn bɛ́ sín mɛ e ɖó xwe gban (30) lɛ́ɛ, kpó mɛ e ɖó hú mɔ̌ lɛ́ɛ kpó jí, káká yi mɛ e ɖó xwe kanɖé wǒ (50) lɛ́ɛ jí. Yědɛɛ lɛ́ɛ wɛ ná nɔ́ wa azɔ̌ ɖé lɛ́ɛ ɖo Mawu xwé gbe.

³⁶Mɛ e sín kɛ́n yě sɔ́ lɛ́ɛ bǐ bló afɔwó nǔwɔntɔn kantɔn gban (2.750).

³⁷Hǔn Kexáti ví e sín kɛ́n è sɔ́ lɛ́ɛ nɛ́. Yě mɛ bǐ wɛ ɖó azɔ̌ ɖé bó nɔ wa ɖo Mawu xwé gbe. Mɔyízi xwedó gbeta e Mawu Mavɔmavɔ ná ɛ ɔ́, bɔ é kpódó Aalɔ́ɔn kpó sɔ́ kɛ́n yětɔn.

³⁸È sɔ́ Gɛɛcɔ́ni ví súnnu lɛ́ɛ sín kɛ́n; è sɔ́ hɛ̌nnu nabí e ɖo akɔta ɔ́ mɛ lɛ́ɛ sín kɛ́n, bó sɔ́ gbɛtɔ́ nabí e ɖo hɛ̌nnu ɖokpó ɖokpó mɛ ɔ́ sín kɛ́n.

³⁹È sɔ́ kɛ́n yětɔn bɛ́ sín súnnu e ɖó xwe gban (30) lɛ́ɛ, kpó mɛ e ɖó hú mɔ̌ lɛ́ɛ kpó jí káká yi mɛ e ɖó xwe kanɖé wǒ (50) lɛ́ɛ jí. Yědɛɛ lɛ́ɛ nɔ́ wa azɔ̌ ɖé lɛ́ɛ ɖo Mawu xwé gbe.

⁴⁰Mɛ e sín kɛ́n è sɔ́ lɛ́ɛ bǐ bló afɔwó nǔwɔntɔn gban (2.630).

⁴¹Hǔn Gɛɛcɔ́ni ví e sín kɛ́n è sɔ́ lɛ́ɛ nɛ́. Yě wɛ ɖó azɔ̌ ɖé bó nɔ́ wa ɖo Mawu xwé gbe. Mɔyízi xwedó gbeta e Mawu Mavɔmavɔ ná ɛ ɔ́, bɔ é kpó Aalɔ́ɔn kpó sɔ́ kɛ́n yětɔn.

⁴²È sɔ́ Mɛlali ví súnnu lɛ́ɛ sín kɛ́n; è sɔ́ hɛ̌nnu nabí e ɖo akɔta ɔ́ mɛ lɛ́ɛ sín kɛ́n, bó sɔ́ gbɛtɔ́ nabí e ɖo hɛ̌nnu ɖokpó ɖokpó mɛ ɔ́ sín kɛ́n.

⁴³È sɔ́ kɛ́n yětɔn bɛ́ sín mɛ e ɖó xwe gban (30) lɛ́ɛ, kpó mɛ e ɖó hú mɔ̌ lɛ́ɛ kpó jí káká yi mɛ e ɖó xwe kanɖé wǒ (50) lɛ́ɛ jí. Yědɛɛ lɛ́ɛ nɔ́ wa azɔ̌ ɖé lɛ́ɛ ɖo Mawu xwé gbe.

⁴⁴Mɛ e sín kɛ́n è sɔ́ lɛ́ɛ bǐ bló afɔwó-afayizɛ́n (3.200).

⁴⁵Hǔn Mɛlali ví e sín kɛ́n è sɔ́ lɛ́ɛ nɛ́. Mɔyízi xwedó gbeta e Mawu Mavɔmavɔ ná ɛ ɔ́, bɔ é kpódó Aalɔ́ɔn kpó sɔ́ kɛ́n yětɔn.

⁴⁶Hǔn Levíi ví e sín kɛ́n Mɔyízi kpó Aalɔ́ɔn kpó, kpódó Izlayɛ́li sín gǎn lɛ́ɛ kpó sɔ́ ɖo akɔta ɖokpó ɖokpó mɛ, hɛ̌nnu ɖokpó ɖokpó mɛ lɛ́ɛ nɛ́.

⁴⁷Yě sɔ́ kɛ́n yětɔn bɛ́ sín súnnu e ɖó xwe gban (30) lɛ́ɛ, kpó éé ɖó hú mɔ̌ lɛ́ɛ kpó jí, káká yi mɛ e ɖó xwe kanɖé wǒ (50) lɛ́ɛ jí. Yě mɛ e sín kɛ́n è sɔ́ lɛ́ɛ bǐ wɛ nɔ́ wa azɔ̌ ɖé ɖo Mawu xwé gbe, bó nɔ́ ɖíɖá Goxɔ ɔ́ sín agban.

⁴⁸Yě bǐ bló děgba we afɔwe kɛnnɛ ko (8.580).

⁴⁹È ɖɔ nú e yě mɛ ɖokpó ɖokpó ná wa ɔ́ kpó nǔ e mɛ ɖokpó ɖokpó ná hɛn ɔ́ kpó nú yě, lě e Mawu Mavɔmavɔ ɖɔ nú Mɔyízi gbɔn é, bó sɔ́ kɛ́n yětɔn lě e Mawu Mavɔmavɔ ɖɔ n'i gbɔn é.