Read fon Kɛ́nsísɔ́ 5 Bible Online

Kɛ́nsísɔ́ 5 - fon bible

Kɛ́nsísɔ́ 5

¹Mawu Mavɔmavɔ ɖɔ nú Mɔyízi ɖɔ:

²“Đɔ nú Izlayɛ́li ví lɛ́ɛ ɖɔ yě ní ɖe mɛ e ɖo wǔtuzɔn baɖabaɖa jɛ wɛ, abǐ mɛ e ɖo glɔ̌ zɔn jɛ wɛ, abǐ mɛ e ɖ'alɔ cyɔ ɖé wú lɛ́ɛ tɔ́n sín fí e mi ɖó gɔnu ɖó é, ɖó mɛ blíblí wɛ yě nyǐ.

³Nú mɛ ɔ́ na bo nyí súnnu abǐ nyɔ̌nu ɔ́, mi ɖó ná ɖe e tɔ́n sín agun ɔ́ mɛ, bónú é má wá hɛn fí e mi ɖó gɔnu ɖó ɔ́ hɛn blí ó, ɖó un ɖo tɛ́ntin mitɔn.”

⁴Énɛ́ ɔ́, Izlayɛ́li ví lɛ́ɛ bló ɖó gbeta e Mawu Mavɔmavɔ ɖe tɔ́n nú Mɔyízi ɔ́ jí: yě ɖe mɛ e nyí mɛ blíblí lɛ́ɛ bǐ tɔ́n sín fí e yě ɖó gɔnu ɖó é.

⁵ Mawu Mavɔmavɔ ɖɔ nú Mɔyízi ɖɔ

⁶é ní ɖɔ nú Izlayɛ́li ví lɛ́ɛ ɖɔ: “Súnnu ɖé abǐ nyɔ̌nu ɖé wa nǔ nyi do nú mɛɖé hǔn, sɛ́n ce wɛ é gba, bɔ hwɛ tɔn ná nɔ kɔ n'i.

⁷É ɖó ná ɖɔ hwɛ e é hu ɔ́, bó ná sɔ́ nǔ e wú é hu hwɛ ɔ́ jó nú mɛ e tɔn nǔ ɔ́ nyí ɔ́, bó ná ná akwɛ́ e nǔ ɔ́ xɔ ɔ́ sín atɔ́ɔ́nvlɔ́ɖó d'é jí.

⁸Nú mɛ e tɔn nǔ ɔ́ nyí ɔ́ má sɔ́ ɖe ǎ, bɔ mɛ tɔn e sɛkpɔ́ ɛ ɔ́ ɖěbǔ má ɖe bɔ è nǎ sɔ́ nǔ ɔ́ jó n'i ǎ ɔ́, è nǎ sɔ́ nǔ ɔ́ jó nú Mawu Mavɔmavɔ. É wɛ nyí ɖɔ è nǎ sɔ́ jó nú vɔ̌sánú-xwlémawutɔ́. Mɛ e hu hwɛ ɔ́ ná lɛ́ ná agbo ɖokpó, bɔ è nǎ dó sá hwɛxɔ́súsú vɔ́ ná; vɔ̌sánú-xwlémawutɔ́ ɔ́ ná bló lě e è nɔ bló gbɔn, bó nɔ́ xwlé vɔ̌sánú Mawu Mavɔmavɔ ɔ́, bó ná sá vɔ̌ e nɔ́ súnsún hwɛ ɔ́ dó ta tɔn mɛ.

⁹Nǔ e è nǎ jɔ ɖo nǔ e Izlayɛ́li ví lɛ́ɛ ɖe ɖó vo nú Mawu Mavɔmavɔ ɔ́ jí lɛ́ɛ ɔ́, bǐ ná nyí vɔ̌sánú-xwlémawutɔ́ e nukɔn è zě wá ɔ́ tɔn.

¹⁰Mɛɖé sɔ́ nǔɖé ɖó vo nú Mawu Mavɔmavɔ ɔ́, mɛ ɔ́ ná sɔ́ nǔ ɔ́ jó nú vɔ̌sánú-xwlémawutɔ́ ɔ́. Nǔ e è sɔ́ jó nú vɔ̌sánú-xwlémawutɔ́ ɔ́, vɔ̌sánú-xwlémawutɔ́ ɔ́ tɔn wɛ.”

¹¹Mawu Mavɔmavɔ ɖɔ nú Mɔyízi ɖɔ,

¹²é ní ɖɔ nú Izlayɛ́li ví lɛ́ɛ ɖɔ: “Mǐ ní ɖɔ nyɔ̌nu mɛsi ɖé dó afɔ gbě.

¹³É hɛn éɖée blí, ɖó súnnu ɖěvo ɖó xó xá ɛ ɖo nǔglɔ́; asú tɔn ká wlí kpó alɔ kpó ǎ. Mɛɖé ɖo te bo mɔ lě e nǔ ɔ́ jɛ gbɔn ɔ́ ǎ, mɛɖé ká gbo e dó ǎ;

¹⁴lo ɔ́, asú tɔn ɔ́ ɖo nǔ vɛ dó e wɛ. É sixú wá jɔ bɔ súnnu ɖé ná vɛ aga dó asi tɔn, có nyɔ̌nu ɔ́ wa mɔ̌ nú ɖé ǎ,

¹⁵Nú nǔ cí mɔ̌ ɔ́, súnnu ɔ́ ná kplá asi tɔn ɔ́ yi vɔ̌sánú-xwlémawutɔ́ ɔ́ gɔ́n, bó ná ná ɔ́ji sín linfín kilóo atɔn ɖó ta tɔn mɛ; é ná kɔn ami dó linfín ɔ́ jí ǎ, é ká ná hɛn zǎlínkpɔ́n d'é jí ǎ, ɖó nǔvɛdómɛ wú wɛ è nǎ nǔ énɛ́, bó ná dó ɖe nǔ e é wa nyi do ɔ́ gba.

¹⁶Vɔ̌sánú-xwlémawutɔ́ ɔ́ ná kplá nyɔ̌nu ɔ́ byɔ́ Goxɔ ɔ́ mɛ bɔ é ná nɔ te Mawu Mavɔmavɔ nukɔn.

¹⁷Énɛ́ ɔ́, vɔ̌sánú-xwlémawutɔ́ ɔ́ ná wún sin e è ɖe ɖó vo nú Mawu Mavɔmavɔ ɔ́ dó kogbán ɖé mɛ, bó ná wún kɔ́ ɖo Mawu xwé gbe dó sin ɔ́ mɛ, bó ná dán d'é wú.

¹⁸Nyɔ̌nu ɔ́ ná nɔ te mɔ̌ ɖo Mawu Mavɔmavɔ nukɔn, bɔ vɔ̌sánú-xwlémawutɔ́ ɔ́ ná ɖe avɔ sín ta n'i. Énɛ́ ɔ́ gúdo ɔ́, é ná zé mɛɖegba sín nǔ e è nǎ, ɖó è vɛ nǔ d'é ɔ́ wú ɔ́ dó alɔ mɛ n'i. É ɖésú ná hɛn sin vívɛ́ e nɔ dɔn nyladó wá ɔ́ alɔ mɛ.

¹⁹Vɔ̌sánú-xwlémawutɔ́ ɔ́ ná ɖɔ nú nyɔ̌nu ɔ́ ɖɔ émí ɖɔ xó élɔ́ lɛ́ɛ ɔ́, é ná xwlé nǔ d'é jí; é ná ɖɔ nú nyɔ̌nu ɔ́ ɖɔ: ‘Ényí súnnu ɖěvo ma ɖó xó xá we ǎ, ényí a ma hɛn hwiɖée blí, bó blɛ́ asú towe ǎ, bó nu sin vívɛ́ élɔ́ e nɔ hɛn nyladó wá nú mɛ ɔ́ hǔn, é ní má wa nǔɖé nú we ó.

²⁰Amɔ̌, nú a hɛn hwiɖée blí, bó blɛ́ asú towe nǔgbó ɔ́, nú súnnu ɖěvo ɖó xó xá we nǔgbó ɔ́,

²¹Mawu Mavɔmavɔ ní dɔn tó nú we; é ní bló bónú a nǐ húzú wɛnsinɔ; é ní bló bónú adɔgo towe ní jí; é ní bló mɔ̌ nú we, bónú gbɛ̌ towe lɛ́ɛ ná nɔ́ sɔ́ we dó ná xlɛ́, hwenu e yě ná ja nu dó mɛ ɖé gbé é.

²²Sin élɔ́ e nɔ́ hɛn nyladó wá nú mɛ ɔ́ ní yi xo towe mɛ, bónú adɔgo towe ní jí, bó sɔ́ we dó húzú wɛnsinɔ.’ Nú é ɖɔ mɔ̌ ɔ́, nyɔ̌nu ɔ́ ná yí gbe ɖɔ: ‘Nú un bló mɔ̌ nǔgbó hǔn, nǔ e a ɖɔ ɔ́ ní bó nyí gbɔn mɔ̌.’

²³“Vɔ̌sánú-xwlémawutɔ́ ɔ́ ná wlán nudómɛ sín xó énɛ́ lɛ́ɛ dó wěma jí, bó ná klɔ́ dó sin vívɛ́ ɔ́ mɛ,

²⁴bó ná ná nyɔ̌nu ɔ́, bɔ é ná nu, bɔ sin vívɛ́ énɛ́ ɔ́ ná yi xo tɔn mɛ, bó ná wa nǔ xá ɛ.

²⁵Vɔ̌sánú-xwlémawutɔ́ ɔ́ ná yí mɛɖegba sín nǔ e è nǎ ɔ́ ɖo nyɔ̌nu ɔ́ sí, bó bló lě e è nɔ bló gbɔn, bó nɔ́ xwlé vɔ̌sánú Mawu Mavɔmavɔ ɔ́, bó ná xwlé e, bó ná zé ɖó vɔ̌sákpe jí.

²⁶Vɔ̌sánú-xwlémawutɔ́ ɔ́ ná wún nǔníná énɛ́ ɔ́ alɔgogo ɖokpó, bó ná dó zo ɖo vɔ̌sákpe ɔ́ jí, bɔ é ná nyí flǐnnú ɖé nú Mawu Mavɔmavɔ. Énɛ́ ɔ́ gúdo ɔ́, é ná ná sin ɔ́ nyɔ̌nu ɔ́, bɔ é ná nu.

²⁷Nú é ná sin ɔ́ nyɔ̌nu ɔ́ bɔ é nu fó ɔ́, nú nyɔ̌nu ɔ́ má nɔ gbejí nú asú tɔn ǎ, bó hɛn éɖée blí nǔgbó ɔ́, sin énɛ́ e nɔ́ hɛn nyladó wá nú mɛ ɔ́ ná yi xo tɔn mɛ, bó ná ná ɛ vǐvɛ́ sise; adɔgo tɔn ná jí; é ná húzú wɛnsinɔ. Nyɔ̌nu énɛ́ sín gbɛ̌ lɛ́ɛ ja nu dó mɛ gbé ɔ́, yě ná nɔ́ sɔ́ ɛ dó ná xlɛ́.

²⁸Nú nyɔ̌nu ɔ́ má ká hɛn éɖée blí ǎ, bó ɖo gbejí ɔ́, è nǎ mɔ ɖɔ é ɖo xomɛvɔ́, bɔ é ná lɛ́ ji vǐ.

²⁹“Sɛ́n e ɖɔ xó dó mɛɖegba wú ɔ́ nɛ́; sɛ́n énɛ́ ɔ́ kan nyɔ̌nu e ɖo asúxwé, bó dó afɔ gbě ɔ́,

³⁰abǐ nyɔ̌nu e asú tɔn vɛ aga dó é. Vɔ̌sánú-xwlémawutɔ́ ɔ́ ná sɔ́ nyɔ̌nu ɔ́ ɖó te Mawu Mavɔmavɔ nukɔn, bó ná zé sɛ́n énɛ́ ɔ́ bǐ bɔ dó wǔ tɔn.

³¹Nú asú ɔ́ wɛ gba acɛ nyɔ̌nu ɔ́ wú ɔ́, è nǎ dó hwɛ ɖěbǔ i ǎ; amɔ̌, nyɔ̌nu ɔ́, nú é wɛ gba acɛ súnnu ɔ́ wú ɔ́, é ji nǔɖé ɔ́, é ná kpan.”