Read fon Kɛ́nsísɔ́ 7 Bible Online

Kɛ́nsísɔ́ 7 - fon bible

Kɛ́nsísɔ́ 7

¹Gbe e gbe Mɔyízi bló Mawu xwé ɔ́ fó ɔ́, é kɔn ami d'é wú, bó dó ɖe é kpó nǔ e ɖ'é mɛ lɛ́ɛ bǐ kpó ɖó vo nú Mawu Mavɔmavɔ. Mɔ̌ ɖokpó ɔ́, é kɔn ami dó vɔ̌sákpe ɔ́ wú, bó dó ɖe é kpódó nǔ e è nɔ zán ɖ'é kɔn lɛ́ɛ bǐ kpó ɖó vo nú Mawu Mavɔmavɔ.

²Ée é bló mɔ̌ é ɔ́, hɛ̌nnugán e sɔ́ akɔta Izlayɛ́li ví lɛ́ɛ tɔn sín afɔ ɖó te lɛ́ɛ sɛkpɔ́. Yědɛɛ lɛ́ɛ wɛ sɔ́ Izlayɛ́li ví lɛ́ɛ sín kɛ́n xá yě.

³Yě hɛn nǔ wá ná Mawu Mavɔmavɔ: yě hɛn kɛkɛ́ví ayizɛ́n bɔ è bǔ nǔ dó, bó hɛn nyibú wěwe; hɛ̌nnugán we kpédó kɛkɛ́ví ɖokpó, bɔ nyibú lɛ́ɛ ɖokpó ɖokpó nyí hɛ̌nnugán ɖokpó ɖokpó tɔn. Yě bɛ̌ nǔ énɛ́ lɛ́ɛ yi Mawu xwé ɔ́ nukɔn.

⁴Mawu Mavɔmavɔ ɖɔ nú Mɔyízi ɖɔ:

⁵“Yǐ nǔ e yě hɛn wá lɛ́ɛ. Kɛkɛ́ví énɛ́ lɛ́ɛ, kpódó nyibú énɛ́ lɛ́ɛ kpó ɔ́, è nǎ zán yě dó wa Goxɔ ɔ́ sín azɔ̌ ná. A nǎ kpɔ́n azɔ̌ e Levíi ví lɛ́ɛ ɖokpó ɖokpó nɔ́ wa ɔ́, bó ná ná nǔ énɛ́ lɛ́ɛ yě.”

⁶Mɔyízi yí kɛkɛ́ví lɛ́ɛ kpódó nyibú lɛ́ɛ kpó, bó má nú Levíi ví lɛ́ɛ.

⁷É ná kɛkɛ́ví we, nyibú ɛnɛ Gɛɛcɔ́ni ví lɛ́ɛ, bónú azɔ̌ yětɔn ná nyɔ́ wa nú yě.

⁸Bɔ kɛkɛ́ví ɛnɛ, kpódó nyibú tántɔn e kpo lɛ́ɛ kpó ná nyí Mɛlali ví lɛ́ɛ tɔn, bónú azɔ̌ yětɔn ná nyɔ́ wa nú yě. Itamáa vɔ̌sánú-xwlémawutɔ́ Aalɔ́ɔn sín vǐ ɔ́ sín acɛ mɛ wɛ yě nɔ́ wa azɔ̌ ɖe.

⁹É zé kɛkɛ́ví ɖě nú Kexáti ví lɛ́ɛ ǎ, é ká zé nyibú ɖě nú yě ǎ, ɖó nǔ mímɛ́ lɛ́ɛ wú wɛ yědɛɛ lɛ́ɛ nɔ́ kpé nukún dó, bó nɔ́ hɛn yě abɔ̌ta.

¹⁰Hɛ̌nnugán akɔta Izlayɛ́li ví lɛ́ɛ tɔn lɛ́ɛ ná nǔ, bɔ è nǎ dó jó vɔ̌sákpe ɔ́ nú Mawu Mavɔmavɔ, gbe e gbe Mɔyízi kɔn ami d'é wú é. Hɛ̌nnugán lɛ́ɛ hɛn nǔníná yětɔn lɛ́ɛ wá vɔ̌sákpe ɔ́ nukɔn.

¹¹Lo ɔ́, Mawu Mavɔmavɔ ɖɔ nú Mɔyízi ɖɔ: “Hɛ̌nnugán ɖokpó wɛ ná nɔ́ wá gbe ɖokpó, bó ná nɔ́ hɛn nǔníná tɔn e è nǎ dó jó vɔ̌sákpe ɔ́ nú Mawu Mavɔmavɔ ɔ́ wá.”

¹²Naxicɔ́ni, Aminadabu ví súnnu e jɔ ɖo akɔta Judáa tɔn mɛ ɔ́ wɛ hɛn nǔníná éyɛ́ tɔn wá ɖo azǎn nukɔn nukɔntɔn ɔ́ gbe.

¹³É ná agbǎn e è sɔ́ kpatágan dó bló ná ɔ́ ɖokpó, bɔ é da glǎmu afayizɛ́n kanwe ko (1.300), bó ná basya e è sɔ́ kpatágan dó bló ná ɔ́ ɖokpó, bɔ é da glǎmu nǔwɔntɔn kanwe ko (700). Gan e è nɔ dó da nǔ ɖo Mawu Mavɔmavɔ xwé gbe é wɛ è dǒ da. Linfín e è sɔ́ ami dó nya ná ɔ́ gɔ́ gannú we énɛ́ lɛ́ɛ, bɔ è nǎ zé xwlé Mawu.

¹⁴É ná kɔ́fu e è sɔ́ siká dó bló ná ɔ́ ɖokpó, bɔ é da glǎmu kanwe ko (100), bɔ nǔhwɛ́nkún gɔ́;

¹⁵nyibúsú wínnyáwínnyá ɖokpó, agbo ɖokpó, lɛ̌ngbɔ́ví e ɖó xwe ɖokpó ɔ́ ɖokpó. È nǎ bɛ̌ kanlin énɛ́ lɛ́ɛ dó sá vɔ̌ e è nɔ dó zo ɔ́ ná.

¹⁶É ná gbǎgbá ɖokpó, bɔ è nǎ dó sá hwɛxɔ́súsú vɔ́ ná,

¹⁷bó ná nyibú we, agbo atɔ́ɔ́n, gbǎgbá atɔ́ɔ́n, lɛ̌ngbɔ́ví e ɖó xwe ɖokpó ɔ́ atɔ́ɔ́n. È nǎ bɛ́ kanlin énɛ́ lɛ́ɛ dó sá kɔnɖókpɔ́ vɔ́ ná. Nǔ e Naxicɔ́ni Aminadabu ví súnnu ɔ́ ná lɛ́ɛ nɛ́.

¹⁸Azǎn wegɔ́ ɔ́ gbe ɔ́, Nɛtanɛli Suwáa ví súnnu e nyí akɔta Isakáa tɔn sín hɛ̌nnugán ɔ́ hɛn nǔníná tɔn wá.

¹⁹É ná agbǎn e è sɔ́ kpatágan dó bló ná ɔ́ ɖokpó, bɔ é da glǎmu afayizɛ́n kanwe ko (1.300), bó ná basya e è sɔ́ kpatágan dó bló ná ɔ́ ɖokpó, bɔ é da glǎmu nǔwɔntɔn kanwe ko (700). Gan e è nɔ dó da nǔ ɖo Mawu Mavɔmavɔ xwé gbe é wɛ è dǒ da. Linfín e è sɔ́ ami dó nya ná ɔ́ gɔ́ gannú we énɛ́ lɛ́ɛ, bɔ è nǎ xwlé Mawu.

²⁰É ná kɔ́fu e è sɔ́ siká dó bló ná ɔ́ ɖokpó, bɔ é da glǎmu kanwe ko (100) bɔ nǔhwɛ́nkún gɔ́.

²¹Nyibúsú wínnyáwínnyá ɖokpó, agbo ɖokpó, lɛ̌ngbɔ́ví e ɖó xwe ɖokpó ɔ́ ɖokpó; è nǎ bɛ̌ kanlin énɛ́ lɛ́ɛ dó sá vɔ̌ e è nɔ dó zo ɔ́ ná.

²²É ná gbǎgbá ɖokpó, bɔ è nǎ dó sá hwɛxɔ́súsú vɔ́ ɔ́ ná,

²³nyibú we, agbo atɔ́ɔ́n, gbǎgbá atɔ́ɔ́n, lɛ̌ngbɔ́ví e ɖó xwe ɖokpó ɔ́ atɔ́ɔ́n. Nǔ e Nɛtanɛli Suwáa ví ɔ́ ná lɛ́ɛ nɛ́.

²⁴Azǎn atɔngɔ́ ɔ́ gbe ɔ́, Eliavu, Helɔ́ni sín vǐ súnnu e nyí akɔta Zabulɔ́ɔn tɔn sín hɛ̌nnugán ɔ́ hɛn nǔníná tɔn lɛ́ɛ wá.

²⁵É ná agbǎn e è sɔ́ kpatágan dó bló ná ɔ́ ɖokpó, bɔ é da glǎmu afayizɛ́n kanwe ko (1.300), bó ná basya e è sɔ́ kpatágan dó bló ɔ́ ɖokpó, bɔ é da glǎmu nǔwɔntɔn kanwe ko (700). Gan e è nɔ dó da nǔ ɖo Mawu Mavɔmavɔ xwé gbe é wɛ è dǒ da. Linfín e è sɔ́ ami dó nya ɔ́ gɔ́ gannú we énɛ́ lɛ́ɛ bǐ, bɔ è nǎ xwlé Mawu.

²⁶É ná kɔ́fu e è sɔ́ siká dó bló ná ɔ́ ɖokpó, bɔ é da glǎmu kanwe ko (100), bɔ nǔhwɛ́nkún gɔ́.

²⁷É ná nyibúsú wínnyáwínnyá ɖokpó, agbo ɖokpó, lɛ̌ngbɔ́ví e ɖó xwe ɖokpó ɔ́ ɖokpó; è nǎ bɛ̌ kanlin énɛ́ lɛ́ɛ dó sá vɔ̌ e è nɔ dó zo ɔ́ ná.

²⁸É ná gbǎgbá ɖokpó, bɔ è nǎ dó sá hwɛxɔ́súsú vɔ́ ɔ́ ná,

²⁹bó ná nyibú we, agbo atɔ́ɔ́n, gbǎgbá atɔ́ɔ́n, lɛ̌ngbɔ́ví e ɖó xwe ɖokpó ɔ́ atɔ́ɔ́n; è nǎ bɛ́ kanlin énɛ́ lɛ́ɛ dó sá kɔnɖókpɔ́ vɔ́ ná. Nǔ e Eliavu, Helɔ́ni ví ɔ́ ná lɛ́ɛ nɛ́.

³⁰Azǎn ɛnɛgɔ́ ɔ́ gbe ɔ́, Elisúu, Cedewúu ví súnnu e nyí akɔta Hwlibɛ́ni tɔn sín hɛ̌nnugán ɔ́ wɛ hɛn nǔníná tɔn lɛ́ɛ wá.

³¹É ná agbǎn e è sɔ́ kpatágan dó bló ná ɔ́ ɖokpó, bɔ é da glǎmu afayizɛ́n kanwe ko (1.300), basya e è sɔ́ kpatágan dó bló ná ɔ́ ɖokpó, bɔ é da glǎmu nǔwɔntɔn kanwe ko (700). Gan e è nɔ dó da nǔ ná ɖo Mawu xwé gbe ɔ́ wɛ è dǒ da; linfín e è sɔ́ ami dó nya ná ɔ́ gɔ́ gannú we énɛ́ lɛ́ɛ, bɔ è nǎ nɔ́ xwlé Mawu.

³²É ná kɔ́fu e è sɔ́ siká dó bló ná ɔ́ ɖokpó, bɔ é da glǎmu kanwe ko (100), bɔ nǔhwɛ́nkún gɔ́.

³³É ná nyibúsú wínnyáwínnyá ɖokpó, agbo ɖokpó, lɛ̌ngbɔ́ví e ɖó xwe ɖokpó ɔ́ ɖokpó; è nǎ bɛ́ kanlin énɛ́ lɛ́ɛ dó sá vɔ̌ e è nɔ dó zo ɔ́ ná.

³⁴É ná gbǎgbá ɖokpó, bɔ è nǎ dó sá hwɛxɔ́súsú vɔ́ ná,

³⁵bó ná nyibú we, agbo atɔ́ɔ́n, gbǎgbá atɔ́ɔ́n, lɛ̌ngbɔ́ví e ɖó xwe ɖokpó ɔ́ atɔ́ɔ́n; è nǎ bɛ́ kanlin énɛ́ lɛ́ɛ dó sá kɔnɖókpɔ́ vɔ́ ná. Nǔ e Elisúu, Cedewúu sín ví súnnu ɔ́ ná lɛ́ɛ nɛ́.

³⁶Azǎn atɔ́ɔ́ngɔ́ ɔ́ gbe ɔ́, Celumiyɛ́li, Sulicadáyi sín vǐ súnnu e nyí akɔta Sinmɛnyɔ́ɔ tɔn sín hɛ̌nnugán ɔ́ hɛn nǔníná éyɛ́ tɔn lɛ́ɛ wá.

³⁷É ná agbǎn e è sɔ́ kpatágan dó bló ɔ́ ɖokpó, bɔ é da glǎmu afayizɛ́n kanwe ko (1.300), basya e è sɔ́ kpatágan dó bló ɔ́ ɖokpó, bɔ é da glǎmu nǔwɔntɔn kanwe ko (700). Gan e è nɔ dó da nǔ ɖo Mawu xwé gbe ɔ́ wɛ è dǒ da. Linfín e è sɔ́ ami dó nya ná ɔ́ gɔ́ gannú we énɛ́ lɛ́ɛ bǐ, bɔ è nǎ xwlé Mawu.

³⁸É ná kɔ́fu e è sɔ́ siká dó bló ná ɔ́ ɖokpó, bɔ é da glǎmu kanwe ko (100), bɔ nǔhwɛ́nkún gɔ́.

³⁹É ná nyibúsú wínnyáwínnyá ɖokpó, agbo ɖokpó, lɛ̌ngbɔ́ví e ɖó xwe ɖokpó ɔ́ ɖokpó; è nǎ bɛ́ kanlin énɛ́ lɛ́ɛ dó sá vɔ̌ e è nɔ dó zo ɔ́ ná.

⁴⁰É ná gbǎgbá ɖokpó, bɔ è nǎ dó sá hwɛxɔ́súsú vɔ́ ná,

⁴¹bó ná nyibú we, agbo atɔ́ɔ́n, gbǎgbá atɔ́ɔ́n, lɛ̌ngbɔ́ví e ɖó xwe ɖokpó ɔ́ atɔ́ɔ́n; è nǎ bɛ́ kanlin énɛ́ lɛ́ɛ dó sá kɔnɖókpɔ́ vɔ́ ná. Nǔ e Celumiyɛ́li, Sulicadáyi ví ɔ́ ná lɛ́ɛ nɛ́.

⁴²Azǎn ayizɛ́ngɔ́ ɔ́ gbe ɔ́, Eliyasáfu, Dewúɛli ví súnnu e nyí akɔta Gadi tɔn sín hɛ̌nnugán ɔ́ hɛn nǔníná éyɛ́ tɔn wá.

⁴³É ná agbǎn e è sɔ́ kpatágan dó bló ná ɔ́ ɖokpó, bɔ é da glǎmu afayizɛ́n kanwe ko (1.300), bó ná basya e è sɔ́ kpatágan dó bló ná ɔ́ ɖokpó, bɔ é da glǎmu nǔwɔntɔn kanwe ko (700). Gan e è nɔ dó da nǔ ɖo Mawu xwé gbe ɔ́ wɛ è dǒ da. Linfín e è sɔ́ ami dó nya ná ɔ́ gɔ́ gannú we énɛ́ lɛ́ɛ, bɔ è nǎ xwlé Mawu.

⁴⁴É ná kɔ́fu e è sɔ́ siká dó bló ná ɔ́ ɖokpó, bɔ é da glǎmu kanwe ko (100), bɔ nǔhwɛ́nkún gɔ́.

⁴⁵É ná nyibúsú wínnyáwínnyá ɖokpó, agbo ɖokpó, lɛ̌ngbɔ́ví e ɖó xwe ɖokpó ɔ́ ɖokpó; è nǎ bɛ́ kanlin énɛ́ lɛ́ɛ dó sá vɔ̌ e è nɔ dó zo ɔ́ ná.

⁴⁶É ná agbo ɖokpó, bɔ è nǎ dó sá hwɛxɔ́súsú vɔ́ ɔ́ ná,

⁴⁷bó ná nyibú we, agbo atɔ́ɔ́n, gbǎgbá atɔ́ɔ́n, lɛ̌ngbɔ́ví e ɖó xwe ɖokpó ɔ́ atɔ́ɔ́n; è nǎ bɛ́ kanlin énɛ́ lɛ́ɛ dó sá kɔnɖókpɔ́ vɔ́ ná. Nǔ e Eliyasáfu, Dewúɛli ví ɔ́ ná lɛ́ɛ nɛ́.

⁴⁸Azǎn tɛ́nwegɔ́ ɔ́ gbe ɔ́, Elicama, Amumihudi ví súnnu e nyí akɔta Eflayímu tɔn sín hɛ̌nnugán ɔ́ hɛn nǔníná éyɛ́ tɔn wá.

⁴⁹É ná agbǎn e è sɔ́ kpatágan dó bló ná ɔ́ ɖokpó, bɔ é da glǎmu afayizɛ́n kanwe ko (1.300), basya e è sɔ́ kpatágan dó bló ná ɔ́ ɖokpó, bɔ é da glǎmu nǔwɔntɔn kanwe ko (700). Gan e è nɔ dó da nǔ ɖo Mawu xwé gbe ɔ́ wɛ è dǒ da. Linfín e è sɔ́ ami dó nya ná ɔ́ gɔ́ gannú we énɛ́ lɛ́ɛ, bɔ è nǎ xwlé Mawu.

⁵⁰É ná kɔ́fu e è sɔ́ siká dó bló ná ɔ́ ɖokpó, bɔ é da glǎmu kanwe ko (100), bɔ nǔhwɛ́nkún gɔ́.

⁵¹É ná nyibúsú wínnyáwínnyá ɖokpó, agbo ɖokpó, lɛ̌ngbɔ́ví e ɖó xwe ɖokpó ɔ́ ɖokpó; è nǎ bɛ́ kanlin énɛ́ lɛ́ɛ dó sá vɔ̌ e è nɔ dó zo ɔ́ ná.

⁵²É ná gbǎgbá ɖokpó, bɔ è nǎ dó sá hwɛxɔ́súsú vɔ́ ná,

⁵³nyibú we, agbo atɔ́ɔ́n, gbǎgbá atɔ́ɔ́n, lɛ̌ngbɔ́ví e ɖó xwe ɖokpó ɔ́ atɔ́ɔ́n; è nǎ bɛ́ kanlin énɛ́ lɛ́ɛ dó sá kɔnɖókpɔ́ vɔ́ ná. Nǔ e Elicama, Amumihudi ví ɔ́ ná lɛ́ɛ nɛ́.

⁵⁴Azǎn tántɔngɔ́ ɔ́ gbe ɔ́, Gamɛliyɛ́li, Pedasúu sín vǐ súnnu e nyí akɔta Manasée tɔn sín hɛ̌nnugán ɔ́ hɛn nǔníná éyɛ́ tɔn wá.

⁵⁵É ná agbǎn e è sɔ́ kpatágan dó bló ná ɔ́ ɖokpó, bɔ é da glǎmu afayizɛ́n kanwe ko (1.300), basya e è sɔ́ kpatágan dó bló ná ɔ́ ɖokpó, bɔ é da glǎmu nǔwɔntɔn kanwe ko (700). Gan e è nɔ dó da nǔ ɖo Mawu xwé gbe ɔ́ wɛ è dǒ da. Linfín e è sɔ́ ami dó nya ɔ́ gɔ́ gannú we énɛ́ lɛ́ɛ, bɔ è nǎ xwlé Mawu.

⁵⁶É ná kɔ́fu e è sɔ́ siká dó bló ná ɔ́ ɖokpó, bɔ é da glǎmu kanwe ko (100), bɔ nǔhwɛ́nkún gɔ́.

⁵⁷É ná nyibúsú wínnyáwínnyá ɖokpó, agbo ɖokpó, lɛ̌ngbɔ́ví e ɖó xwe ɖokpó ɔ́ ɖokpó; è nǎ bɛ́ kanlin énɛ́ lɛ́ɛ dó sá vɔ̌ e è nɔ dó zo ɔ́ ná.

⁵⁸É ná gbǎgbá ɖokpó, bɔ è nǎ dó sá hwɛxɔ́súsú vɔ́ ná,

⁵⁹nyibú we, agbo atɔ́ɔ́n, gbǎgbá atɔ́ɔ́n, lɛ̌ngbɔ́ví e ɖó xwe ɖokpó ɔ́ atɔ́ɔ́n; è nǎ bɛ́ kanlin énɛ́ lɛ́ɛ dó sá kɔnɖókpɔ́ vɔ́ ná. Nǔ e Gamɛliyɛ́li Pedasúu ví ɔ́ ná lɛ́ɛ nɛ́.

⁶⁰Azǎn tɛ́nnɛgɔ́ ɔ́ gbe ɔ́, Avidáni, Gideóni sín ví e nyí akɔta Bɛnjamɛ́ɛ tɔn sín hɛ̌nnugán ɔ́ hɛn nǔníná éyɛ́ tɔn wá.

⁶¹É ná agbǎn e è sɔ́ kpatágan dó bló ná ɔ́ ɖokpó, bɔ é da glǎmu afayizɛ́n kanwe ko (1.300), basya e è sɔ́ kpatágan dó bló ná ɔ́ ɖokpó, bɔ é da glǎmu nǔwɔntɔn kanwe ko (700). Gan e è nɔ dó da nǔ ɖo Mawu xwé gbe ɔ́ wɛ è do da. Linfín e è sɔ́ ami dó nya ná ɔ́ gɔ́ gannú we énɛ́ lɛ́ɛ, bɔ è nǎ xwlé Mawu.

⁶²É ná kɔ́fu e è sɔ́ siká dó bló ná ɔ́ ɖokpó, bɔ é da glǎmu kanwe ko (100), bɔ nǔhwɛ́nkún gɔ́.

⁶³É ná nyibúsú wínnyáwínnyá ɖokpó, agbo ɖokpó, lɛ̌ngbɔ́ví e ɖó xwe ɖokpó ɔ́ ɖokpó; è nǎ bɛ́ kanlin énɛ́ lɛ́ɛ dó sá vɔ̌ e è nɔ dó zo ɔ́ ná;

⁶⁴é ná gbǎgbá ɖokpó, bɔ è nǎ dó sá hwɛxɔ́súsú vɔ́ ná,

⁶⁵bó ná nyibú we, agbo atɔ́ɔ́n, gbǎgbá atɔ́ɔ́n, lɛ̌ngbɔ́ví e ɖó xwe ɖokpó ɔ́ atɔ́ɔ́n; è nǎ bɛ́ kanlin énɛ́ lɛ́ɛ dó sá kɔnɖókpɔ́ vɔ́ ná. Nǔ e Avidáni, Gideóni sín vǐ ɔ́ ná lɛ́ɛ nɛ́.

⁶⁶Azǎn wǒgɔ́ ɔ́ gbe ɔ́, Axiezɛ́ɛ, Amumicadayi sín vǐ súnnu e nyí akɔta Dan tɔn sín hɛ̌nnugán ɔ́ hɛn nǔníná éyɛ́ tɔn wá.

⁶⁷É ná agbǎn e è sɔ́ kpatágan dó bló ná ɔ́ ɖokpó, bɔ é da glǎmu afayizɛ́n kanwe ko (1.300), basya e è sɔ́ kpatágan dó bló ná ɔ́ ɖokpó, bɔ é da glǎmu nǔwɔntɔn kanwe ko (700). Gan e è nɔ dó da nǔ ɖo Mawu xwé gbe ɔ́ wɛ è dǒ da. Linfín e è sɔ́ ami dó nya ɔ́ gɔ́ gannú we énɛ́ lɛ́ɛ, bɔ è nǎ xwlé Mawu.

⁶⁸É ná kɔ́fu e è sɔ́ siká dó bló é ɖokpó, bɔ é da glǎmu kanwe ko (100), bɔ nǔhwɛ́nkún gɔ́.

⁶⁹É ná nyibúsú wínnyáwínnyá ɖokpó, agbo ɖokpó, lɛ̌ngbɔ́ví e ɖó xwe ɖokpó ɔ́ ɖokpó; è nǎ bɛ́ kanlin énɛ́ lɛ́ɛ dó sá vɔ̌ e è nɔ dó zo ɔ́ ná.

⁷⁰É ná gbǎgbá ɖokpó, bɔ è nǎ dó sá hwɛxɔ́súsú vɔ́ ná,

⁷¹bó ná nyibú we, agbo atɔ́ɔ́n, gbǎgbá atɔ́ɔ́n, lɛ̌ngbɔ́ví e ɖó xwe ɖokpó ɔ́ atɔ́ɔ́n; è nǎ bɛ́ kanlin énɛ́ lɛ́ɛ dó sá kɔnɖókpɔ́ vɔ́ ná. Nǔ e Axiezɛ́ɛ, Amumicadayi sín vǐ ɔ́ ná lɛ́ɛ nɛ́.

⁷²Azǎn wǒ-ɖokpógɔ́ ɔ́ gbe ɔ́, Pagiyɛ́li, Ɔkláni ví súnnu e nyí akɔta Acɛ́ɛ tɔn sín hɛ̌nnugán ɔ́ hɛn nǔníná éyɛ́ tɔn wá.

⁷³É ná agbǎn e è sɔ́ kpatágan dó bló ná ɔ́ ɖokpó, bɔ é da glǎmu afayizɛ́n kanwe ko (1.300), basya e è sɔ́ kpatágan dó bló ná ɔ́ ɖokpó, bɔ é da glǎmu nǔwɔntɔn kanwe ko (700). Gan e è nɔ dó da nǔ ɖo Mawu xwé gbe ɔ́ wɛ è dǒ da. Linfín e è sɔ́ ami dó nya ɔ́ gɔ́ gannú we énɛ́ lɛ́ɛ, bɔ è nǎ xwlé Mawu.

⁷⁴É ná kɔ́fu e è sɔ́ siká dó bló ná ɔ́ ɖokpó, bɔ é da glǎmu kanwe ko (100) bɔ nǔhwɛ́nkún gɔ́.

⁷⁵É ná nyibúsú wínnyáwínnyá ɖokpó, agbo ɖokpó, lɛ̌ngbɔ́ví e ɖó xwe ɖokpó ɔ́ ɖokpó; è nǎ bɛ́ kanlin énɛ́ lɛ́ɛ dó sá vɔ̌ e è nɔ dó zo ɔ́ ná.

⁷⁶É ná gbǎgbá ɖokpó, bɔ è nǎ dó sá hwɛxɔ́súsú vɔ́ ná,

⁷⁷bó ná nyibú we, agbo atɔ́ɔ́n, gbǎgbá atɔ́ɔ́n, lɛ̌ngbɔ́ví e ɖó xwe ɖokpó ɔ́ atɔ́ɔ́n; è nǎ bɛ̌ kanlin énɛ́ lɛ́ɛ dó sá kɔnɖókpɔ́ vɔ́ ná. Nǔ e Pagiyɛ́li, Ɔkláni sín vǐ ɔ́ ná lɛ́ɛ nɛ́.

⁷⁸Azǎn wěwegɔ́ ɔ́ gbe ɔ́, Axila, Eyináni ví súnnu e nyí akɔta Nɛfutali tɔn sín hɛ̌nnugán ɔ́ hɛn nǔníná éyɛ́ tɔn wá.

⁷⁹É ná agbǎn e è sɔ́ kpatágan dó bló ná ɔ́ ɖokpó, bɔ é da glǎmu afayizɛ́n kanwe ko (1.300), basya e è sɔ́ kpatágan dó bló ná ɔ́ ɖokpó, bɔ é da glǎmu nǔwɔntɔn kanwe ko (700). Gan e è nɔ dó da nǔ ɖo Mawu xwé gbe ɔ́ wɛ è dǒ da. Linfín e è sɔ́ ami dó nya ná ɔ́ gɔ́ gannú we énɛ́ lɛ́ɛ, bɔ è nǎ xwlé Mawu.

⁸⁰É ná kɔ́fu e è sɔ́ siká dó bló ná ɔ́ ɖokpó, bɔ é da glǎmu kanwe ko (100) bɔ nǔhwɛ́nkún gɔ́.

⁸¹É ná nyibúsú wínnyáwínnyá ɖokpó, agbo ɖokpó, lɛ̌ngbɔ́ví e ɖó xwe ɖokpó ɔ́ ɖokpó; è nǎ bɛ́ kanlin énɛ́ lɛ́ɛ dó sá vɔ̌ e è nɔ dó zo ɔ́ ná.

⁸²É ná gbǎgbá ɖokpó, bɔ è nǎ dó sá hwɛxɔ́súsú vɔ́ ná.

⁸³É ná nyibú we, agbo atɔ́ɔ́n, gbǎgbá atɔ́ɔ́n, lɛ̌ngbɔ́ví e ɖó xwe ɖokpó ɔ́ atɔ́ɔ́n; è nǎ bɛ́ kanlin énɛ́ lɛ́ɛ dó sá kɔnɖókpɔ́ vɔ́ ná. Nǔ e Axila, Eyináni ví ɔ́ ná lɛ́ɛ nɛ́.

⁸⁴Nǔ e akɔta Izlayɛ́li ví lɛ́ɛ tɔn sín hɛ̌nnugán lɛ́ɛ ná, bɔ è nǎ dó jó vɔ̌sákpe ɔ́ nú Mawu Mavɔmavɔ lɛ́ɛ nɛ́; hwenu e Mɔyízi kɔn ami dó vɔ̌sákpe ɔ́ wú ɔ́ wɛ yě ná nǔ énɛ́ lɛ́ɛ. Bǐ bló agbǎn e è sɔ́ kpatágan dó bló ná ɔ́ wěwe, basya e è sɔ́ kpatágan dó bló ná ɔ́ wěwe, kɔ́fu e è sɔ́ siká dó bló ná ɔ́ wěwe.

⁸⁵Agban e è sɔ́ kpatágan dó bló ná lɛ́ɛ ɖokpó ɖokpó da glǎmu afayizɛ́n kanwe ko (1.300). Basya e è sɔ́ kpatágan dó bló ná lɛ́ɛ ɖokpó ɖokpó da glǎmu nǔwɔntɔn kanwe ko (700). Kpatágan e è dǒ bló gannú we énɛ́ lɛ́ɛ ná ɔ́ bǐ da kilóo ko-nukún-ɛnɛ (24). Gan e nɔ dó da nǔ ɖo Mawu xwé gbe ɔ́ wɛ è dǒ da.

⁸⁶Kɔ́fu wěwe e è sɔ́ siká dó bló lɛ́ɛ ɖokpó ɖokpó da glǎmu kanwe ko (100); hǔn wěwe lɛ́ɛ bǐ da glǎmu afayizɛ́n (1.200). Nǔhwɛ́nkún e è nǎ dó zo lɛ́ɛ gɔ́ ná.

⁸⁷Kanlin e è nǎ dó sá vɔ̌ e è nɔ dó zo ɔ́ ná lɛ́ɛ bǐ bló nyibúsú wěwe, agbo wěwe, lɛ̌ngbɔ́ví e ɖó xwe ɖokpó ɔ́ wěwe, bɔ nǔníná kpaa lɛ́ɛ jɛ jí. Kanlin e è nǎ dó sá hwɛxɔ́súsú vɔ́ ná lɛ́ɛ bǐ bló gbǎgbá wěwe.

⁸⁸Kanlin e è nǎ dó sá kɔnɖókpɔ́ vɔ́ ná lɛ́ɛ bǐ bló nyibúsú ko-nukún-ɛnɛ (24), agbo kanɖé ko (60), gbǎgbá kanɖé ko (60), lɛ̌ngbɔ́ví e ɖó xwe ɖokpó ɔ́ kanɖé ko (60). Ée Mɔyízi kɔn ami dó vɔ̌sákpe ɔ́ wú ɔ́, nǔ e è nǎ, bɔ è nǎ dó jó vɔ̌sákpe ɔ́ nú Mawu Mavɔmavɔ ɔ́ nɛ́.

⁸⁹Hwenu e Mɔyízi byɔ́ Goxɔ ɔ́ mɛ, bo ná ɖɔ xó xá Mawu Mavɔmavɔ ɔ́, é se gbe ɖé sín wɛnsagun susunɔ we e ɖo akɔjijɛgbá ɔ́ sín nusú jí lɛ́ɛ ta nu. Hwe énɛ́ ɔ́ nu ɔ́, é jɛ xó ɖɔ xá ɛ jí.