Read fon Kɛ́nsísɔ́ 8 Bible Online

Kɛ́nsísɔ́ 8 - fon bible

Kɛ́nsísɔ́ 8

¹ Mawu Mavɔmavɔ ɖɔ nú Mɔyízi ɖɔ

²é ní ɖɔ nú Aalɔ́ɔn ɖɔ: “Hwenu e a nǎ bɛ́ zogbɛ́n tɛ́nwe lɛ́ɛ ɖó zogbɛ́nhɛnnú ɔ́ jí ɔ́, blǒ bónú yě nǐ ɖi ɖɛ̌ dó nukɔn.”

³Aalɔ́ɔn bló lě e è ɖɔ gbɔn ɔ́. É fɔ zogbɛ́n lɛ́ɛ ɖó zogbɛ́nhɛnnú ɔ́ jí ɖo nukɔn lě e Mawu Mavɔmavɔ ɖɔ gbɔn nú Mɔyízi é.

⁴Siká wɛ è dǒ tun zogbɛ́nhɛnnú ɔ́ ná, sín do káká yi aga. É tun bɔ é sɔgbe xá ée Mawu Mavɔmavɔ zé xlɛ́ Mɔyízi é.

⁵Mawu Mavɔmavɔ ɖɔ nú Mɔyízi ɖɔ:

⁶“Đe Levíi ví lɛ́ɛ sín Izlayɛ́li ví ɖě lɛ́ɛ mɛ, bó slá wǔ nú yě.

⁷Lě e a nǎ slá wǔ nú yě gbɔn ɔ́ ɖíe: a nǎ mi sin e è nɔ dó slá wǔ nú mɛ ɔ́ dó yě wú, bɔ yě ná xwlɛ́ fún e ɖo yě wú ɔ́ bǐ; yě ná nya avɔ yětɔn lɛ́ɛ, énɛ́ ɔ́, yě ná húzú mɛ mímɛ́.

⁸Énɛ́ ɔ́ gúdo ɔ́, yě ná ná nyibúsú wínnyáwínnyá ɖokpó, kpódó linfín e è sɔ́ ami dó nya ná ɔ́ kpó, bɔ hwi ɖésúnɔ ná zé nyibúsú wínnyáwínnyá ɖěvo, bɔ è nǎ dó sá hwɛxɔ́súsú vɔ́ ná.

⁹A nǎ kplá Levíi ví lɛ́ɛ wá Goxɔ ɔ́ nukɔn, bó ná ylɔ́ Izlayɛ́li ví lɛ́ɛ kplé.

¹⁰A nǎ kplá Levíi ví lɛ́ɛ wá Mawu Mavɔmavɔ nukɔn, bɔ Izlayɛ́li ví lɛ́ɛ bǐ ná fɔ alɔ ɖó jǐ yětɔn;

¹¹Aalɔ́ɔn ná bló lě e è nɔ bló gbɔn, bó nɔ ɖe mɛ ɖó vo nú mì ɔ́, bó ɖe yě ɖó vo nú mì, ɖo Izlayɛ́li ví lɛ́ɛ sín nyǐkɔ mɛ, bɔ yě ná nɔ́ wa azɔ̌ nú nyɛ Mawu Mavɔmavɔ.

¹²Levíi ví lɛ́ɛ ná fɔ alɔ ɖó nyibúsú we lɛ́ɛ ta, bɔ a nǎ sɔ́ ɖokpó dó sá hwɛxɔ́súsú vɔ́ ná, bó ná sɔ́ wegɔ́ ɔ́ dó sá vɔ̌ e è nɔ dó zo ɔ́ ná, bónú è nǎ sɔ́ hwɛ kɛ Levíi ví lɛ́ɛ.

¹³A nǎ bló bɔ Levíi ví lɛ́ɛ ná nɔ te ɖo Aalɔ́ɔn kpó vǐ tɔn súnnu lɛ́ɛ kpó sín nukɔn, bɔ a nǎ bló lě e è nɔ bló gbɔn, bó nɔ́ ɖe mɛ ɖó vo nú mì ɔ́, bó ɖe yě ɖó vo nú mì.

¹⁴A nǎ ɖe Levíi ví lɛ́ɛ sín Izlayɛ́li ví ɖě lɛ́ɛ mɛ, bɔ yě ná nyí nyɛ Mawu Mavɔmavɔ tɔn.

¹⁵Énɛ́ ɔ́, Levíi ví lɛ́ɛ ná nɔ́ wá wa azɔ̌ ɖo Goxɔ ɔ́ mɛ. “Lě e a nǎ slá wǔ nú yě gbɔn, bó ná bló lě e è nɔ bló gbɔn, bó nɔ́ ɖe mɛ ɖó vo nú mì gbɔn ɔ́ nɛ́.

¹⁶Đó ce wɛ yě nyǐ; yě wɛ sɔ́ Izlayɛ́li ví ɖě lɛ́ɛ sín afɔ ɖó te. Un ɖe yě ɖó vo nú nyɛɖée, bɔ yě ná nɔ Izlayɛ́li ví ɖě lɛ́ɛ sín tɛn mɛ.

¹⁷ Đó nukɔngbéví e ɖo Izlayɛ́li lɛ́ɛ bǐ wɛ nyí ce; é sixú nyí gbɛtɔ́, é sixú nyí kanlin, ɖó gbe e gbe un hu nukɔngbéví lɛ́ɛ bǐ ɖo Ejípu ɔ́, un ko ɖe yě ɖó vo nú nyɛɖée,

¹⁸bó zé Levíi ví lɛ́ɛ ɖó Izlayɛ́li ví ɖě lɛ́ɛ sín nukɔngbéví lɛ́ɛ tɛn mɛ.

¹⁹Un ɖe Levíi ví lɛ́ɛ sín Izlayɛ́li ví ɖě lɛ́ɛ tɛ́ntin, bó sɔ́ yě jó nú Aalɔ́ɔn kpódó vǐ tɔn súnnu lɛ́ɛ kpó, bónú yě ná nɔ́ wa Izlayɛ́li ví lɛ́ɛ sín azɔ̌ ɖo Goxɔ ɔ́ mɛ, bó ná sá vɔ̌ e nɔ́ súnsún hwɛ ɔ́ ɖó ta yětɔn mɛ. Énɛ́ ɔ́, nú Izlayɛ́li ví lɛ́ɛ sɛkpɔ́ Mawu xwé ɔ́, nyladó ɖěbǔ ná kɔn dó yě jí ǎ.”

²⁰Mɔyízi kpó Aalɔ́ɔn kpó, kpódó Izlayɛ́li ví lɛ́ɛ bǐ kpó bló nǔ e Mawu Mavɔmavɔ ɖɔ nú Mɔyízi dó Levíi ví lɛ́ɛ wú é.

²¹Levíi ví lɛ́ɛ slá wǔ, bó nya avɔ yětɔn lɛ́ɛ, bɔ Aalɔ́ɔn ɖe yě ɖó vo nú Mawu Mavɔmavɔ; é bló lě e è nɔ bló gbɔn, bó nɔ́ ɖe mɛ ɖó vo nú Mawu ɔ́, bó sá hwɛxɔ́súsú vɔ́ nú yě, bɔ yě húzú mɛ mímɛ́.

²²Énɛ́ ɔ́ gúdo ɔ́, Levíi ví lɛ́ɛ wá wa azɔ̌ yětɔn ɖo Goxɔ ɔ́ mɛ, ɖo Aalɔ́ɔn kpódó vǐ tɔn súnnu lɛ́ɛ kpó sín nukɔn, lě e Mawu Mavɔmavɔ kó ɖɔ gbɔn nú Mɔyízi dó Levíi ví lɛ́ɛ wú é.

²³Mawu Mavɔmavɔ ɖɔ nú Mɔyízi ɖɔ:

²⁴“Levíi ví e ɖó xwe koatɔ́n lɛ́ɛ (25) kpódó ée ɖó hú mɔ̌ lɛ́ɛ kpó ná jɛ azɔ̌ yětɔn jí, ɖo Goxɔ ɔ́ mɛ.

²⁵Nú mɛ ɖé ɖó xwe kanɖé wǒ (50) ɖo yě mɛ ɔ́, mɛ ɔ́ ná yí gbɔjɛ́, bó sɔ́ ná nɔ́ wa azɔ̌ ɔ́ ɖě ǎ.

²⁶É ná nɔ́ gɔ́ alɔ nú nɔví tɔn lɛ́ɛ ɖo Goxɔ ɔ́ mɛ, bó ná nɔ́ kpé nukún dó nǔ e è sɔ́ ɖ'ayǐ nú yě lɛ́ɛ wú. Lo ɔ́, azɔ̌ sɔ́ ná nɔ́ jɛ yě jí ɖě ǎ. Lě e a nǎ nɔ́ bló gbɔn nú Levíi ví lɛ́ɛ ɖo azɔ̌ yětɔn sín alixo ɔ́ nɛ́.”