Read fon Micée 1 Bible Online

Micée 1 - fon bible

Micée 1

¹ Hwenu e Jotámu kpó Akázi kpó, kpódó Ezekiyási kpó ɖo axɔ́sú ɖu wɛ ɖo Judáa ɖě jɛ ɖě gúdo ɔ́, Mawu Mavɔmavɔ sɔ́ xó élɔ́ dó ayi mɛ nú Micée Mɔlɛcɛ́tinu ɔ́. É ɖe nǔ e ná wá jɛ dó Samalíi toxo ɔ́ kpó Jeluzalɛ́mu toxo ɔ́ kpó jí ɔ́ xlɛ́ ɛ.

²Togun lɛ́ɛ bǐ ní ɖótó; gbɛtɔ́ e ɖo ayǐkúngban jí lɛ́ɛ bǐ ní tɛ́ tó bó se. Aklúnɔ Mavɔmavɔ ná gosín tɛn tɔn mímɛ́ ɔ́ mɛ, bó ná wá dó hwɛ mi.

³Nǔgbó wɛ, Mawu Mavɔmavɔ ná tɔ́n sín fí e é nɔ́ nɔ é; é ná jɛ te bó ɖi zɔnlin gbɔn só lɛ́ɛ jí.

⁴Só lɛ́ɛ ná sínsín ɖo afɔ tɔn lɛ́ɛ glɔ́, lě e vɛ̌la nɔ sínsín ɖo myɔ nu é ɖɔhun. Só lɛ́ɛ ná sínsín, bó sa yi dodomɛ, lě e sin nɔ sa sín só jí ɔ́ ɖɔhun.

⁵Nǔ énɛ́ lɛ́ɛ bǐ ná jɛ ɖó Izlayɛ́li ví lɛ́ɛ hu hwɛ, bó fɔ́n gǔ dó Mawu jí. Mɛ̌ ká zɔ́n bɔ Izlayɛ́li ví lɛ́ɛ fɔ́n gǔ dó Mawu jí? Samalíinu lɛ́ɛ wɛ. Mɛ̌ ká dɔn Judáanu lɛ́ɛ dó vodúnsinsɛn mɛ? Jeluzalɛ́munu lɛ́ɛ ɖésú wɛ.

⁶Mawu ɖɔ: “Énɛ́ ɔ́ wú ɔ́, un ná gba Samalíi toxo ɔ́ bǐ hánnyá, bó ná zé dó húzú ayǐkúngban e jí è na nɔ dó vǐwun ɖe é. Un ná zɔ́n bɔ è ná flí awǐnnyaglo tɔn lɛ́ɛ kɔn nyi dodomɛ, bɔ to ɔ́ sín dodó lɛ́ɛ bǐ ná jɛ wěxo.

⁷Un ná gba Samalíi sín vodún lɛ́ɛ bǐ, bó ná dó nǔ e è ná ɛ lɛ́ɛ zo. Un ná gba bǒcyɔ lɛ́ɛ, ɖó hun sinsɛn sín aga e é lɛ ɔ́ sín akwɛ́ wɛ é zé dó xɔ nǔ énɛ́ lɛ́ɛ ná. Énɛ́ ɔ́ wú wɛ è nǎ bɛ́ nǔ énɛ́ lɛ́ɛ dó ba acɔ́ nú vodúnxɔ ɖěvo lɛ́ɛ.”

⁸Micée ɖɔ: “Un ná ya gbɛvíhan, bó ná ná alě; un ná nɔ mɛ̌, bó ná zɔn afɔvɔ́. Un ná hó avǔn gbě tɔn ɖɔhun, bó ná ɖo alě ná wɛ gowungo ɖɔhun.

⁹Samalíi toxo ɔ́ ná gán ɖo awě e ná xo e ɔ́ mɛ ǎ. Adǎn ɖokpó ɔ́ wɛ ka ɖo te kpɔ́n Judáa. Tódɔnnúmɛ ɔ́ kó ɖo Jeluzalɛ́mu fí e togun ce nɔ kplé ɖe, ɖo toxo ɔ́ sín hɔntogbó lɛ́ɛ nukɔn é.

¹⁰Mi ma dó wɛn énɛ́ ɔ́ Gatinu lɛ́ɛ ó; mi kpan akɔ́n bó má ya avǐ ó. Mi mɛ e ɖo Bɛti-Leafla lɛ́ɛ e mi, mi blí gbo gbɔn kɔ́gúdu mɛ, bó dó ɖe xlɛ́ ɖɔ mi ɖo aluwɛ mɛ.

¹¹Cafíinu lɛ́ɛ e mi, kɛntɔ́ mitɔn lɛ́ɛ ná kplá mi yi kannumɔgbénu mɛ̌ jɔgbe, bɔ winnyá ná hu mi. Đó adǎn e gbo Bɛti-Esɛ́linu lɛ́ɛ, bɔ yě ɖo alě ná wɛ ɔ́ wútu wɛ, Saanáni lɛ́ɛ sɔ́ glá tɔ́n sín toxo yětɔn mɛ ǎ, ɖó yě mɔ ɖɔ Bɛti-Esɛ́li toxo ɔ́ kún sɔ́ nyí bibɛtɛn ɖé ó.

¹²Mawu Mavɔmavɔ sɛ́ awě dó, bɔ é xo Jeluzalɛ́mu toxo ɔ́, bɔ Malɔ́tinu lɛ́ɛ ɖo sísɔ́sísɔ́ wɛ, ɖó ayi yětɔn sɔ́ jɛ ayǐ ǎ.

¹³Mi Lakícinu e mi, mi sin sɔ́ mitɔn lɛ́ɛ dó ahwankɛkɛ́ mitɔn lɛ́ɛ wú[1]. Mi gbɛ́ gbe nú Mawu Izlayɛ́li ví lɛ́ɛ ɖɔhun; mi wútu wɛ yě hu hwɛ.

¹⁴Énɛ́ ɔ́ wú ɔ́, mi Judáanu lɛ́ɛ ɔ́, mi ɖó ná nɔ zɔ nú Mɔlɛcɛ́ti-Gatinu lɛ́ɛ[2]; Akizívunu lɛ́ɛ ká ná flú axɔ́sú Izlayɛ́li tɔn lɛ́ɛ.

¹⁵Malecanu e mi, Mawu ná jó mi nú gǎn ɖěvo, bɔ é ná yí to mitɔn, bɔ gǎn nukúnɖéjí Izlayɛ́li tɔn lɛ́ɛ ná hɔn yi hwlá cí Adulámu sín sóxo lɛ́ɛ mɛ.

¹⁶Judáanu e mi, mi sun ɖa mitɔn lɛ́ɛ; mi xwlɛ́ ta mitɔn, ta mitɔn ní cí mlɛ́mlɛ́ aklasúta ɖɔhun; mi ya avǐ dó vǐ mitɔn vívɛ́ná lɛ́ɛ tamɛ, ɖó è na kplá yě yi kannumɔgbénu, bɔ yě ná lín dó mi.”