Read fon Micée 2 Bible Online

Micée 2 - fon bible

Micée 2

¹Heelú mɛ e nɔ mlɔ́ ayǐ zǎn mɛ bó nɔ gɔn amlɔ dɔ́, bó nɔ ɖo nǔ nyanya e yě ná wa dó nɔzo yětɔn wú wɛ lɛ́ɛ lin wɛ lɛ́ɛ! Yě mɛ e ayǐ hɔ́n lě tlóló ɔ́, yě nɔ́ wa nǔ e yě lin ɔ́, ɖó yě ɖǒ acɛ tɔn.

²Mɛ ɖé sín gle jló yě ɔ́, yě nɔ́ yí; mɛɖé sín xwé jló yě ɔ́, yě nɔ́ yí; yě nɔ́ fán asú mɛ lɛ́ɛ, bó nɔ́ klá jɛ xwé yětɔn nu, lobo nɔ yí gǔ e yě ɖu lɛ́ɛ bǐ.

³Énɛ́ ɔ́ wú wɛ Mawu Mavɔmavɔ ɖɔ: “Un ɖo nǔ nyanya ɖé sín nǔ sɔ́ ɖ'ayǐ nú gbɛtɔ́ mi ɖɔhun lɛ́ɛ wɛ; mi ná gló ǎ. Mi ɖo zɔnlin zun wɛ ɔ́, mi sɔ́ ná nɔ glá awa ǎ, ɖó wǔvɛ́ hwenu wɛ jǎwe.”

⁴Hwenu e nǔ énɛ́ ɔ́ ná jɛ ɔ́, è na ji gbɛvíhan élɔ́ nú mi: “Mǐ ɖíe wá jɛ ya mɛ bǐ din e; è yǐ ayǐkúngban mǐtɔn lɛ́ɛ sín mǐ sí. Mɛ e ɖo mǐ nya sín gle mǐtɔn lɛ́ɛ mɛ wɛ lɛ́ɛ nɔ́ má gle lɛ́ɛ ɖo yěɖée tɛ́ntin. Étɛ́wú è ka ɖo ajo ja dó mǐ wɛ?

⁵Énɛ́ ɔ́ wú wɛ hwenu e togun Mawu Mavɔmavɔ tɔn ná lɛ́ má ayǐkúngban lɛ́ɛ ɔ́, mi mɛ ɖěbǔ ná mɔ ɖě yí ǎ.”

⁶Mɛ ɖé lɛ́ɛ nɔ ɖɔ nú mì ɖɔ: “Gbɔ xógbló énɛ́ ɔ́ ɖɔ!

⁷Mawu Mavɔmavɔ dó nu togun tɔn wɛ a? É nɔ yá wǔ sin xomɛ wɛ a? É nɔ kó wa nǔ gbɔn mɔ̌ ɖ'ayǐ wɛ a? Amɔ̌, nyɛ ɔ́, mɛ e ɖo nǔ jlɔ́jlɔ́ wa wɛ lɛ́ɛ kɛ́ɖɛ́ wɛ un ná ɖɔ xó ɖagbe ná.”

⁸Mawu yí gbe bó ɖɔ: “Mi húzú kɛntɔ́ togun ce tɔn. Mɛ ce lɛ́ɛ yi fun ahwan bó lɛ́ kɔ wá kpó jiɖiɖe kpó ɔ́, mi nɔ yí awu ɖaxó yětɔn dó axɔ́ e yě ɖu dó mi ɔ́ nu.

⁹Nyɔ̌nu e ɖo togun ce mɛ lɛ́ɛ ɔ́, mi nɔ nya yě sín xwé yětɔn e yě yí wǎn ná lɛ́ɛ gbe, bó nɔ ɖe wi e un ɖó ta nú vǐ yětɔn lɛ́ɛ ɔ́ síin, bɔ é ná nɔ mɔ̌ káká sɔ́yi.

¹⁰Mi sí te bo yi, ɖó vivo sɔ́ tíin nú mi ɖo fí ǎ. Gbejímánɔ mitɔn lɛ́ɛ zɔ́n, bɔ wǔvɛ́ ɖaxó ɖo te kpɔ́n mi.”

¹¹Ényí mɛɖé wá xwetɔ́n, bó ɖo xó ɖɔ dó jɔhɔn mɛ wɛ, bó ɖó adingban nú mi ɖɔ vɛ̌ɛn kpó ahan syɛ́nsyɛ́n kpó ná sa ɖo to élɔ́ mɛ ɔ́, xówlíɖɔtɔ́ mɔ̌hunkɔtɔn wɛ jɛ xá togun élɔ́.

¹²Lo ɔ́, Mawu ɖɔ: “Un ná kplé mi Izlayɛ́li ví e kpo ɖo gbɛ lɛ́ɛ bǐ; un ná kplé mi ɖó kpɔ́, lě e è nɔ kplé gbɔ̌ dó wutó mɛ é ɖɔhun; lě e gbɔ̌hwan nɔ ɖo amagbo mɛ ɔ́ ɖɔhun. Gbɛtɔ́ ná lɛ́ gɔ́ to mitɔn mɛ, bɔ è na nɔ se hlǔnhlún mitɔn.

¹³Mɛ e nɔ hun ali nú mɛ ɔ́ wɛ ɖo nukɔn mitɔn; mi jɛ miɖée sí. Mi ná gba to e mɛ mi ɖe ɔ́ sín hɔntogbó bó tɔ́n; Mawu Mavɔmavɔ axɔ́sú mitɔn ɔ́ wɛ ɖo nukɔn nú mi.”