Read fon Micée 3 Bible Online

Micée 3 - fon bible

Micée 3

¹Izlayɛ́li mɛxó hwɛɖɔtɔ́ lɛ́ɛ e mi, mi ɖɔ xó ná wɛ un ɖe; azɔ̌ mitɔn wɛ nyí ɖɔ mi ní tunwun nǔ e nyí nǔ jlɔ́jlɔ́ ɔ́ ǎ cé?

²Mi ka gbɛ́ wǎn nú ɖagbewiwa, bó yí wǎn nú nǔ nyanya wiwa. Mi nɔ kɔ́n anyǔ sín mɛ ce lɛ́ɛ wú, bó nɔ ɖe lan e ɖo xú yětɔn wú lɛ́ɛ síin.

³Yě nɔ́ ɖu togun ce sín lan; yě nɔ́ kɔ́n anyǔ yětɔn bó nɔ gba xú yětɔn lɛ́ɛ. Yě nɔ́ já lan yětɔn ɖi nǎ ɖa wɛ è ɖe ɖɔhun.

⁴Énɛ́ ɔ́ wú wɛ hwenu e mi ná sú xó ylɔ́ Mawu Mavɔmavɔ ɖɔ ní wá gɔ́ alɔ nú émí ɔ́, Mawu Mavɔmavɔ ná kɛ nu d'é mɛ nú mi ǎ; lo ɔ́, é ná ɖe kɔ sín mi wú, ɖó nǔ nyanya e mi wa ɔ́ wú.

⁵Gbeyíɖɔ Mawu tɔn e nɔ flú togun Mawu tɔn lɛ́ɛ ɔ́, nǔ e ɖɔ nú yě wɛ Mawu Mavɔmavɔ ɖe ɔ́ ɖíe: Ényí mɛɖé ná yě akwɛ́ ganjí ɔ́, yě nɔ́ ɖɔ nú mɛ ɔ́ ɖɔ nǔ tɔn bǐ nyɔ̌; lo ɔ́, yě nɔ́ tɔ́n ahwan mɛ e ma nɔ dó nǔɖé nu nú yě ǎ lɛ́ɛ.

⁶Din ɔ́, gbeyíɖɔ Mawu tɔn lɛ́ɛ e mi: “Zǎn ná kú dó mi; mi sɔ́ ná nɔ mɔ nǔɖé ǎ; mi ká sɔ́ ná nɔ mɔ nǔ e ɖo na jɛ wɛ ɔ́ ɖě bo ɖɔ ǎ. Zǐnflú ná vun blá mi lě e hwe nɔ yi xɔ, bɔ zǎn nɔ kú é ɖɔhun; mi sɔ́ ná nɔ mɔ nukúnnú ɖěbǔ ǎ.”

⁷Mɛ e nɔ ɖɔ nǔ e ná wá jɛ lɛ́ɛ bǐ ná ɖu winnyá, bó cyɔ́n alɔ nukún mɛ, ɖó Mawu sɔ́ ná nɔ yí gbe nú yě ǎ.

⁸Amɔ̌, nyɛ ɔ́, Mawu Mavɔmavɔ ná hlɔ̌nhlɔ́n tɔn mì; é ná Yɛ tɔn mì; é ná mì nǔjlɔ́jlɔ́wiwa, bó ná mì, bɔ un ná dó sixú ɖe gbejímánɔ kpódó gǔfínfɔ́n Izlayɛ́li ví lɛ́ɛ tɔn kpó gba.

⁹Izlayɛ́li mɛxó hwɛɖɔtɔ́ lɛ́ɛ e mi, mi ɖɔ xó ná wɛ un ɖe. Mi gbɛ́ wǎn nú nǔ ɖagbe wiwa, bó nɔ gba sɛ́n.

¹⁰Mi zé mɛhuhukwɛ́, kpódó mɛtáfúkwɛ́ e mi nɔ mɔ lɛ́ɛ kpó dó ɖo Jeluzalɛ́mu Mawu sín toxo ɔ́ gba wɛ.

¹¹Hwɛɖɔtɔ́ lɛ́ɛ ɔ́, mɛ e dó nǔ nu nú yě ɔ́ sín hwɛ wɛ nɔ jɔ. Vɔ̌sánú-xwlémawutɔ́ lɛ́ɛ nɔ yí akwɛ́ ɖo mɛ sí, cóbó nɔ kplɔ́n Mawusɛ́n lɛ́ɛ mɛ. Gbeyíɖɔ Mawu tɔn lɛ́ɛ nɔ yí akwɛ́ ɖo mɛ sí cóbó nɔ dó Mawu sín wɛn mɛ. Nǔ ɖo mɔ̌ bɔ yě bǐ ká nɔ glá bó nɔ ɖɔ Mawu Mavɔmavɔ tɔn wɛ émí nyí, ɖɔ Mawu Mavɔmavɔ ɖo kpɔ́ xá émí, ɖɔ nǔ nyanya ɖěbǔ kún ná wa émí ó.

¹²Đó midɛɛ lɛ́ɛ wú ɔ́, Sinyɔ́ɔ ná húzú gle e jí è na nɔ dó nǔ ɖe é, Jeluzalɛ́mu ná húzú zunkɔ́ta; lo ɔ́, fí e Sinsɛnxɔ Mawu tɔn e ɖo só jí ɔ́ ɖe ɔ́ bǐ ná húzú zungbó ɖó mi wú.