Read fon Micée 6 Bible Online

Micée 6 - fon bible

Micée 6

¹Mi ɖótó nǔ e ɖɔ wɛ Mawu Mavɔmavɔ ɖe é: é ɖɔ nú mì ɖɔ má jɛ ahwan émí jí, bó sú xó, bo ɖɔ nǔ e togun ɔ́ wa nyi do n'i lɛ́ɛ, ɖo só kpɛví kpó só ɖaxó kpó nukɔn.

²Só lɛ́ɛ e mi, mi ɖótó mì; dodó syɛ́nsyɛ́n e jí ayǐkúngban ɔ́ jínjɔ́n ɔ́ lɛ́ɛ e mi, mi ɖótó mì. Mawu Mavɔmavɔ ɖo hwɛ dó togun tɔn wɛ. É ɖo byɔ̌byɔ́ yě wɛ ɖɔ yě ní ɖɔ nǔ e émí wa nyi do nú yě ɔ́ nú émí.

³Mawu Mavɔmavɔ ɖɔ: “Togun ce, nǔ nyanya tɛ́ wɛ un ka wa dó mi? Étɛ́ mɛ wɛ un nyí agban bó kpɛn mi ɖe? Mi yí gbe nú mì!

⁴ Un ɖe mi tɔ́n sín Ejípu, bó hwlɛ́n mi sín kannumɔgbénu. Un sɛ́ Mɔyízi, Aalɔ́ɔn kpó Miliamu kpó dó mi, bónú yě ná nɔ nukɔn mitɔn bo xlɛ́ ali mi. Abǐ énɛ́ lɛ́ɛ sín hwɛ dó mì wɛ mi ɖe a?

⁵ Togun ce, hwenu e Balaki axɔ́sú Mɔwabu tɔn ɔ́ ɖo linlin wɛ ná wa nǔ dó mi ɔ́, xósin e Baláamu Beɔ́ɔ ví ɔ́ ná ɛ ɔ́, mi flín a? Énɛ́ ɔ́ gúdo ɔ́, un kplá mi sín Citímu káká wá Gilugalu, bónú mi ná mɔ ɖagbe e nyɛ Mawu Mavɔmavɔ mitɔn wa nú mi lɛ́ɛ é.”

⁶Ényí un wá Mawu Mavɔmavɔ sɛn gbé ɔ́, vɔ̌sánú tɛ́ mɔ̌ un ka ɖó na xwlé Mawu Ajalɔ̌nlɔn ɔ́? Nyibúví e ɖó xwe ɖokpó ɔ́ wɛ un ná nɔ dó sá vɔ̌ kpíkpé n'i a?

⁷Mawu Mavɔmavɔ ɔ́, agbo gěgé kpó ami gěgé kpó ba wɛ é ɖe a? Nukɔngbéví mǐtɔn lɛ́ɛ wɛ mǐ ɖó ná zé jó n'i cóbɔ é ná sɔ́ gǔfínfɔ́n mǐtɔn lɛ́ɛ kpódó gbejímánɔ mǐtɔn lɛ́ɛ kpó kɛ mǐ a?

⁸Hwi gbɛtɔ́, Mawu xlɛ́ we nǔ e nyɔ́ bɔ a ɖo ná wa é. Étɛ́ wɛ Mawu Mavɔmavɔ jló ɖɔ a nǐ wa? Nǔ e é jló ɖɔ a nǐ wa kpowun ɔ́ wɛ nyí ɖɔ a nǐ nɔ wa nǔ jlɔ́jlɔ́. A nǎ nɔ́ yí wǎn nú nǔwiwa kpó xomɛnyínyɔ́ kpó, bó ná nɔ zán gbɛ ɖo mɛɖée sɔ́ hwe mɛ ɖo Mawu towe nukɔn.

⁹Mawu Mavɔmavɔ ɖo xó ɖɔ nú Jeluzalɛ́munu lɛ́ɛ wɛ, bó ná hwlɛ́n mɛ e nɔ sí i lɛ́ɛ. Akɔta e ɖo Judáa tomɛ lɛ́ɛ e mi, mi mɛ e kplé ɖo toxo ɔ́ mɛ lɛ́ɛ e mi, mi ɖótó.

¹⁰Un ná sixú yí gbe bɔ mɛdídá ná kplé nǔ e é xo yí lɛ́ɛ dó xwé gbe wɛ a? Un sixú yí gbe bɔ è na nɔ zé jlɛ̌nú e ma sɔgbe ǎ dó sa nǔ nú mɛ ǎ.

¹¹Mɛ e nɔ zán nǔdagan e má sɔgbe ǎ lɛ́ɛ, bó nɔ́ zé kilóo e ma sɔgbe ǎ lɛ́ɛ dó glo mɛ lɛ́ɛ ɔ́, un ná gɔn hwɛ ɖó nú yě a?

¹²Akwɛ́nɔ e ɖo to ɔ́ mɛ lɛ́ɛ bǐ wɛ nɔ táfú mɛ, bɔ mɛ e ɖo to ɔ́ mɛ lɛ́ɛ bǐ nɔ́ ɖó nǔvú, bó nɔ́ flú mɛ.

¹³A hu hwɛ; énɛ́ ɔ́ wú wɛ un ko jɛ tó dɔn nú we jí, bɔ tó e dɔn nú mi wɛ un ɖe ɔ́ ná zɔ́n, bɔ ajɔ̌ mitɔn ná jɛ ayǐ.

¹⁴A nǎ ɖu nǔ, a ka ná gɔ́ xo ǎ, adɔ ná wa nǔ xá we káká ɖó lě do. Nǔ e a sɔ́ ɖó vo ɔ́ ná sixú nɔ ayǐ ǎ. A ká sɔ́ nǔɖé ɖó ayǐ jɛ́n wɛ ɔ́, un ná sɛ́ kɛntɔ́ towe lɛ́ɛ dó, bɔ yě ná tɔ́n ahwan mi, bó hɛn bǐ gblé.

¹⁵A nǎ nɔ dó nǔ, a ka ná nɔ mɔ ya ǎ; a nǎ nɔ li olívu, a ka ná mɔ ami tɔn bó sa ǎ. A nǎ nɔ li vǐwun, a ka ná nɔ mɔ vɛ̌ɛn tɔn nu ǎ.

¹⁶ Jujɔ nyanya e axɔ́sú Ɔmúli zán bɔ vǐ tɔn Akábu kpó[3] hɛ̌nnu tɔn kpó zán ɔ́ xwedó wɛ a ɖe. A nɔ se gbe nú yě. Énɛ́ ɔ́ wú wɛ un ná ɖɔ bɔ è nǎ gba to towe, un ná ɖɔ bɔ gbɛtɔ́ lɛ́ɛ ná nɔ ko mi mɛ e ɖ'é mɛ lɛ́ɛ. Mi na ɖu winnyá e togun ce ɖó ná ɖu é.