Read fon Micée 7 Bible Online

Micée 7 - fon bible

Micée 7

¹É blá wǔ mɛ nya! Un cí mɛ e xwe atínsínsɛ́n gbɛ gbé, bɔ è ka ko gbɛ bǐ sín atín ɔ́ jí é ɖɔhun. É sɔ́ mɔ vǐwun ɖé ná ɖu ǎ; é ká sɔ́ mɔ fígi vǐví víví e é jló lɛ́ɛ ɖě ná ɖu ǎ.

²Gbɛtɔ́ e ɖo gbejí nú Mawu ɔ́ ɖě sɔ́ ɖo to ɔ́ mɛ ǎ; ayijlɔ́jlɔ́nɔ ɖě sɔ́ ɖo to ɔ́ mɛ ǎ. Lě e yě ná wa gbɔn bó ná hu mɛ ɔ́ jɛ́n nɔ ɖo ayi mɛ nú yě bǐ, bɔ yě nɔ́ ɖo yěɖée cɔ́ wɛ.

³Nǔ nyanya wiwa sín gǎn wɛ yě nyǐ. Gǎn lɛ́ɛ kpó hwɛɖɔtɔ́ lɛ́ɛ kpó nɔ byɔ́ ɖɔ émí ná ɖu nǔ ɖo nǔ mɛ dandan. Gbɛtɔ́ nukúnɖéjí lɛ́ɛ ɖo nǔɖé ba wɛ ɔ́, yě nɔ́ ɖɔ gannaganna, bó nɔ́ ba wlɛnwín tɔn ɖó kpɔ́, bó nɔ́ bló.

⁴Mɛ e kpɔ́n te ɖo yě mɛ ɔ́ lɛ́ nylá hú gběhan nyanya. Mɛ e ba ná nyí ayijlɔ́jlɔ́nɔ ɖo yě bǐ mɛ ɔ́ báɖá hú kpɔvɛwunkan sín kpá. Tódɔnnúmɛ e sín xó gbeyíɖɔ Mawu tɔn lɛ́ɛ ɖɔ nú mi ɔ́ sín azǎn ɖíe kó sɛ yá e, bɔ mi ko ɖo adohu adohu jí.

⁵Nǔ e mɛ e ɖo xwé mitɔn kpá lɛ́ɛ ná ɖɔ ɔ́, mi ma ɖi nǔ ná ó; mi ma ɖeji dó xɔ́ntɔn mitɔn wú ó; mi nyɔ́ xó ɖɔ ɖo asi mitɔn ɖésú gɔ́n.

⁶ Azǎn énɛ́ lɛ́ɛ gbe ɔ́, súnnuví ná zun tɔ́ tɔ́n; nyɔ̌nuví ná fɔ́n gǔ dó nɔ tɔn jí; vǐsi ná fɔ́n gǔ dó asú tɔn nɔ jí; hɛ̌nnumɔ mɛtɔn lɛ́ɛ ɖésú ná nyí kɛntɔ́ mɛtɔn.

⁷Amɔ̌, nyɛ ɔ́, un ná nɔ te kpɔ́n Mawu Mavɔmavɔ ce; un ɖeji dó Mawu wǔ, ɖó é nɔ hwlɛ́n mì gán. Mawu ce ná se ɖɛ ce.

⁸Kɛntɔ́ ce lɛ́ɛ mi, mi ma ko mì ó, ɖó un na bo jɛ ayǐ ɔ́, un ná lɛ́ fɔ́n; un na bo ɖo zǐnflú mɛ din ɔ́, Mawu Mavɔmavɔ ná ná wěziza mì, ɖó é wɛ nyí wěziza ce.

⁹Đó un hu hwɛ dó Mawu Mavɔmavɔ wútu ɔ́, un ná ɖo didɛ wɛ ɖo xomɛsin tɔn nu káká, bɔ é ná mɔ hwɛjijɔ nú mì. É ná lɛ́ kplá mì wá wěziza nu, bó ná kɔn nyɔ̌ná tɔn lɛ́ɛ dó jǐ ce.

¹⁰Kɛntɔ́ ce lɛ́ɛ ná mɔ nǔ e jɛ nɛ́ ɔ́, bɔ winnyá ná hu yě. Yě mɛ e nɔ kanbyɔ́ mì ɖ'ayǐ ɖɔ: “Fítɛ́ Mawu Mavɔmavɔ, Mawu towe ká ɖe” a jí lɛ́ɛ ɔ́, è nǎ gbídí yě ɖó afɔ wú lě e è nɔ ɖo zɔnlin ɖi wɛ bó nɔ́ gbídí babá ɖó afɔ wú é ɖɔhun, bɔ un ná mɔ kpó nukún ce lɛ́ɛ kpó, bó ná j'awǎ.

¹¹Jeluzalɛ́munu lɛ́ɛ mi, azǎn ɖé gbe ná su, bɔ un ná vɔ́ to mitɔn sín dǒ lɛ́ɛ mɛ. Gbe énɛ́ ɔ́ gbe ɔ́, Mawu ná bló bɔ ayǐkúngban e jí mi ɖe din ɔ́ ná lɛ́ dó agba d'é jí.

¹²Énɛ́ ɔ́, mɛ mitɔn e ɖo gbějí lɛ́ɛ ná lɛ́ kɔ wá xwé. Yě ná gosín Asilíi, bó gosín Ejípu. Yě ná gosín to e ɖo Nilu kpó Efláti tɔ kpá lɛ́ɛ kpó mɛ. Yě ná gosín to e ɖo xutó lɛ́ɛ mɛ, bó gosín to e ɖo sókan mɛ lɛ́ɛ mɛ, bó ná wá xwé.

¹³Fí e kpo ɖo ayǐkúngban jí lɛ́ɛ ná húzú gbětótló, ɖó dǎka e mɛ e ɖo to ɔ́ mɛ lɛ́ɛ nɔ xo ɔ́ wú.

¹⁴Mawu Mavɔmavɔ, zě lɛ̌ngbɔ́nyitɔ́ kpogɛ towe dó kplá togun towe ná, ɖó é ɖo zɔ ɖo ayǐkúngban e jí nǔɖé má nɔ nyɔ́ ɖe ǎ é, có ayǐkúngban ɖagbe kɛ́ɖɛ́ wɛ ka lɛ́ lɛ̌ dó e, kplá ɛ yi ayǐkúngban ɖagbe ɖagbe Basáni tɔn kpó Galadi tɔn kpó jí, lě e a ko nɔ wa gbɔn ɖ'ayǐ é.

¹⁵Wa nǔjíwǔ ɖo tɛ́ntin mǐtɔn hwenu e a ɖe mǐ tɔ́n sín Ejípu ɔ́ ɖɔhun.

¹⁶Akɔta ɖěvo lɛ́ɛ ná mɔ nǔ énɛ́ lɛ́ɛ, bɔ winnyá ná hu yě, yě syɛ́n káká có winnyá ná hu yě. Nǔ énɛ́ ná kpácá yě káká bɔ yě ná sixú kɛ nu ǎ, bó ká sɔ́ ná jló ná lɛ́ se xó ɖě ǎ.

¹⁷Yě ná ɖíɖɔ́ kɔ́gúdu ɖi dan kpódó kanlin e nɔ sá gbɔn kɔ́ mɛ lɛ́ɛ kpó ɖɔhun, yě ná ɖo sísɔ́sísɔ́ wɛ, bó ná tɔ́n sín tɛn yětɔn mɛ, bó ná wá hwɛ Mawu Mavɔmavɔ, Mawu mǐtɔn gɔ́n. Yě ná ɖi xɛsi nú we.

¹⁸Mawu Mavɔmavɔ, è sixú jlɛ́ vodún ɖěbǔ dó wǔ towe ǎ. A sɔ́ hwɛ kɛ mɛ e kpo ɖo gbɛ ɖo togun towe mɛ lɛ́ɛ, bó wɔn hwɛ yětɔn lɛ́ɛ. A nɔ sin xomɛ dó mɛ káká sɔ́yi ǎ, ɖó nǔ e nyɔ́ nukún towe mɛ ɔ́ wɛ nyí ɖɔ a nǎ ɖe xomɛnyínyɔ́ towe xlɛ́ mǐ mɛ e nyí togun towe é.

¹⁹A nǎ lɛ́ kú nǔbláwǔ nú mǐ azɔn ɖokpó gɔ́ ná. A nǎ sɔ́ hwɛ mǐtɔn lɛ́ɛ kɛ mǐ, bó ná sɔ́ hwɛ mǐtɔn lɛ́ɛ nyi dó fí e gɔ́ngɔ́n hú fí bǐ ɖo xu mɛ é.

²⁰A nǎ ɖe wǎn yíyí towe e ma nɔ húzú ǎ é xlɛ́ Ablaxámu ví lɛ́ɛ, bó ná ɖe xlɛ́ Jakɔ́bu ví lɛ́ɛ, lě e a ko dó akpá tɔn nú tɔ́gbó mǐtɔn lɛ́ɛ gbɔn é.