Read fon Naxúmu 3 Bible Online

Naxúmu 3 - fon bible

Naxúmu 3

¹Heelú mɛhutɔ́ sín toxo ɔ́; ahizi kpó asúfánmɛ kpó jí wɛ axɔ́súɖuto tɔn jínjɔ́n. È nɔ gɔn ajo ja dó jɛ dɔkun ná ǎ.

²A ɖo bǎ gbe se wɛ ǎ cé? A ɖo ahwankɛkɛ́fɔ lɛ́ɛ sín zǐngídi se wɛ ǎ cé? A ɖo sɔ́ lɛ́ɛ sín afɔgbe se wɛ ǎ cé? A ɖo ahwankɛkɛ́ lɛ́ɛ sín zǐngídi se wɛ ǎ cé?

³Sɔ́xátɔ́ lɛ́ɛ tɔ́n ahwan Ninívu toxo ɔ́. Hwǐ lɛ́ɛ ɖo myɔ kán wɛ, bɔ hwǎn lɛ́ɛ ɖo kínkɔ́n wɛ. Gbɛtɔ́ wɔ̌buwɔ́bú ɖé gblé wǔ. Cyɔ ɖo kpɔ́. Mɛ e kú lɛ́ɛ nyí maxamaxa; a jɛ ayǐ ɔ́, mɛkúkú jí jɛ́n a nǎ jɛ.

⁴Ninívu toxo agalɛtɔ́ towunɖó ɔ́, nɔ́ sɔ́ ɖɛkpɛ tɔn kpó walɔ tɔn e é nɔ́ dó lú mɛ é kpó dó dɔn mɛ ná. É nɔ́ sɔ́ aga tɔn kpó azě tɔn kpó dó sa togun lɛ́ɛ kpó akɔta lɛ́ɛ kpó.

⁵Mawu Mavɔmavɔ Nǔbǐwúkpétɔ́ ɔ́ ɖɔ: “Éɖíe, un ɖo biba we wɛ. Un ná kplɔ́ awu gaga e a dǒ é sín do káká yi nukún mɛ. Un ná xlɛ́ mɛ̌ towe akɔta ɖě lɛ́ɛ, bó ná zé winnyá e a ɖu ɔ́ xlɛ́ axɔ́súɖuto lɛ́ɛ.

⁶Un ná dɔn we gbɔn babá mɛ; un ná kɔ́n wi towe, bó ná sɔ́ we dó húzú nǔkpínkpɔ́n.

⁷Mɛ e ná mɔ we lɛ́ɛ bǐ wɛ ná nɔ hɔn yi zɔ nú we, bɔ è nǎ ɖɔ: ‘Ninívu toxo ɔ́ gba. Mɛ̌ wɛ nǔ tɔn ká ná blá wǔ ná? Fítɛ́ wɛ un ka ná yi ba gbɔdónúmɛtɔ́ lɛ́ɛ sín wá n'i?’ ”

⁸Tɛbu ɔ́[3] Asilíi xɔ́sú Asúubanipalu yí toxo ɔ́, bó bɛ́ nǔ e ɖo toxo ɔ́ mɛ lɛ́ɛ bǐ, ɖo é kpo xwe nǔwɔntɔn kanɖé ko-nukún-atɔn (663) bɔ è nǎ ji Jezu Klísu. Tɔsisa tɛ́ntin wɛ é ɖe. Sin wɛ lɛ́ lɛ̌ dó, xu wɛ nyí ahohó tɔn, xu wɛ nyí dǒ tɔn. Hwɛ Ninívu ɔ́, a nyɔ̌ hú Tɛbu ɔ́ wɛ a?

⁹Etiopíi kpódó Ejípu kpó wɛ nɔ́ dó dɔkun ɖu mavɔ n'i. Putinu lɛ́ɛ kpódó Libíinu lɛ́ɛ kpó wɛ nɔ́ dó alɔ ɛ ahwan hwenu.

¹⁰É ɖo mɔ̌ có, è wlǐ kannumɔ tɔn hɛn yi. È hu vǐ tɔn lɛ́ɛ tɛ́ gbɔn ali jí ali jí. Mɛ e ɖu ɖ'é jí lɛ́ɛ nyi akɔ dó mɛ nukúnɖéjí tɔn lɛ́ɛ bǐ bó má, bó dó wɔlɔ kpinkpɛn togán tɔn lɛ́ɛ.

¹¹Hwɛ Ninívu toxo ɔ́, wǔvɛ́ ná mú we ahan ɖɔhun, bɔ a nǎ hɔn hwlá. Hwɛ ɖésú ɔ́, a nǎ ba fí e a nǎ hɔn bɛ dó bɔ kɛntɔ́ towe lɛ́ɛ ma ná mɔ we ǎ é.

¹²Ahohó towe lɛ́ɛ bǐ cí fígitín e sínsɛ́n tɔn lɛ́ɛ ko myá é ɖɔhun. Ényí è hǔnhún atín ɔ́ lě ɔ́, sínsɛ́n lɛ́ɛ nɔ jɛ mɛ e jló ná ɖu é sín nu mɛ. Lě e ahohó towe lɛ́ɛ ɖe gbɔn ɔ́ nɛ́.

¹³Togun towe ɔ́, nyɔ̌nu kɛ́ɖɛ́ wɛ. To towe sín hɔn lɛ́ɛ nɔ́ nɔ yě ɖóɖó bó nɔ́ hun ɖo kɛntɔ́ nukɔn. Hɔnglá towe lɛ́ɛ bǐ ji zo.

¹⁴Mi bló blǐkisúnto mitɔn lɛ́ɛ ɖó. Mi dun sin. Mi byɔ́ kɔ́do mɛ. Mi nya kɔ́. Mi sún blǐki bó bló ahohó mitɔn lɛ́ɛ ɖó, ɖó ahwan e ná tɔ́n mi wɛ è ɖe ɔ́ wú.

¹⁵Mi na bo bló gbɔn ɖěbǔ ɔ́, myɔ ná fyɔ́ mi. Ahwan ná gba mi; é ná ɖu mi lě e wɛn nɔ ɖu gběhan ɔ́ ɖɔhun. Togun mitɔn sukpɔ́ ɖ'ayǐ bó ɖo winnini wɛn ɖɔhun.

¹⁶Ɖ'ayǐ ɔ́, ajɔ̌watɔ́ mitɔn lɛ́ɛ sukpɔ́ hú sunví e ɖo jǐxwé lɛ́ɛ. Yě cí wɛn nyi ahwan wá xweyǐgbe ɖɔhun.

¹⁷Mɛ nukúnɖéjí mitɔn lɛ́ɛ sukpɔ́ wɛn ɖɔhun. Azɔ̌watɔ́ mitɔn lɛ́ɛ cí wɛn wá kɔn nyi kpá jí avivɔ hwenu ɖɔhun. Ényí hwe tɔ́n ɔ́, yě nɔ́ zɔn, bɔ è sɔ́ nɔ tunwun fí e yě zɔn sín é ǎ.

¹⁸Hwi Asilíi xɔ́sú ɔ́, tokpɔngán towe lɛ́ɛ kú. Ahwangán towe lɛ́ɛ dɔ́ amlɔ dɔ̌mányí. Togun towe gba kpé sókan lɛ́ɛ mɛ, bɔ mɛ ɖé ká xo yě kplé ǎ.

¹⁹Amasin ɖé ɖe nú è nǎ dó hu akpa e a xo é ǎ. Wǔ vantankánnyá wɛ a gblě. Mɛ e ná se xó towe lɛ́ɛ bǐ ná kpa wǒóo dó ta nú we. Ɖó nǔ nyanya e a nɔ ɖo sin dó wɛ ɔ́, mɛ̌ wɛ bǎ tɔn ma ká xo ǎ?