Read fon Xabakúku 3 Bible Online

Xabakúku 3 - fon bible

Xabakúku 3

¹Gbeyíɖɔ Mawu tɔn Xabakúku xo ɖɛ. Gbɛvíhan sín hangbe mɛ è nǎ ji dó.

²É ɖɔ: Mawu Mavɔmavɔ, è ɖɔ nǔ ɖaxó ɖaxó e a wa lɛ́ɛ bɔ un se, bɔ xɛsi jɛ jǐ ce. Mawu Mavɔmavɔ, lɛ̌ wa azɔ̌ towe ɖo xwe e ná wá lɛ́ɛ mɛ. Wa azɔ̌ towe! A na bo ɖo xomɛ sin wɛ hǔn, ɖe nǔbláwǔ kú nú mɛ towe xlɛ́.

³Mawu gosín Temani ja. Mɛ mímɛ́ ɔ́ gosín Paláni só ɔ́ jí ja. Agbɔ̌n Nǔbǐwúkpíkpé tɔn kpé sɛ́xwé, bɔ susu tɔn gɔ́ ayǐkúngban ɔ́ jí.

⁴É nɔ hɔ́n jǐkɛwun ɖɔhun, jǐ nɔ́ kɛwun sín alɔ tɔn mɛ. Alɔ tɔn mɛ wɛ hlɔ̌nhlɔ́n tɔn ɖe.

⁵Jɛmɛjí ɖo gǔdo nukɔn nú Mawu Mavɔmavɔ. É gbɔn fí ɖěbǔ dín ɔ́, azɔn wɛ è nɔ bɛ́ ɖo fínɛ́.

⁶É nɔ te lě ɔ́, nukún tɔn nɔ kpé ayǐkúngban ɔ́ bǐ jí. É kpɔ́n akɔta lɛ́ɛ lě ɔ́, xɛsi nɔ jɛ yě jí, bɔ yě nɔ́ sísɔ́. Só ɖaxó ɖaxó e ma nɔ gba gbeɖé ǎ lɛ́ɛ nɔ dán wǔ, só kpɛví kpɛví hwexónu tɔn lɛ́ɛ nɔ yi do, bɔ ali swɛ́ɛ́n hwexónu tɔn lɛ́ɛ nɔ hun ɖo nukɔn tɔn.

⁷Un mɔ bɔ Kucáni togun ɔ́ ɖo aluwɛ mɛ, bɔ Madiáani ví lɛ́ɛ ɖo adohu adohu jí.

⁸Mawu Mavɔmavɔ! Tɔsisa lɛ́ɛ wɛ zɔ́n bɔ a sin xomɛ a? Tɔsisa lɛ́ɛ wɛ dó xomɛsin nú we a? Xu wɛ a sin xomɛ dó a? A byɔ́ akpɔ́kpɔ́ mɛ ahwankɛkɛ́ mɛ wɛ a byɔ́ ɖɔhun, ahwankɛkɛ́ e sɔ́ lɛ́ɛ nɔ dɔn bɔ a nɔ yi ɖu ɖ'é jí é.

⁹A ɖo nǔ sɔ́ wɛ bó ná zán da towe. A ɖo nǔ sɔ́ wɛ bó ná da gǎ towe. Agbɔ̌n A blǒ bɔ jǐkɛwun bó zɛ ayǐkúngban ɔ́, bɔ tɔ jɛ sisa jí.

¹⁰Só ɖaxó ɖaxó lɛ́ɛ mɔ ninɔmɛ towe lě ɔ́, yě nɔ́ húnhún, jǐ ɖaxó nɔ ja bɔ ayǐsun nɔ sa hoho. Xu nɔ dó gbe, bɔ aslɔkɛ́ tɔn lɛ́ɛ nɔ xo káká yi jǐxwé.

¹¹Hwe kpó sun kpó mɔ gǎ towe lɛ́ɛ sín wěziza ɖo jɔhɔn mɛ ɔ́, yě nɔ́ nɔ te. Yě mɔ hwǎn towe ɖo kinkɛn wɛ, bó ɖo nukún gba mɛ wɛ ɔ́, yě nɔ́ nɔ te ɖo fí e yě ɖe é.

¹²A nɔ gbɔn ayǐkúngban ɔ́ jí kpódó adǎn kpó. A ɖo xomɛsin jí ɔ́, a nɔ nyínyɛ́ akɔta lɛ́ɛ.

¹³A nɔ tɔ́n bó nɔ́ hwlɛ́n togun towe gán, togun towe e a sɔ́ ɔ́ gán. A nɔ hu mɛ e kpa acɛ dó mɛ nyanya lɛ́ɛ nu é. A nɔ sú mɛ e nyí étɔn lɛ́ɛ kún dó bǐ gbídígbídí. Agbɔ̌n

¹⁴Kɛntɔ́ mǐtɔn lɛ́ɛ sín gǎn lɛ́ɛ zɔn jǐ mǐtɔn jɔhɔn ɖaxó ɖé ɖɔhun, bó ná gba mǐ dó. Yě nɔ́ ɖo awǎjijɛ sín xó sú wɛ, ɖi nǔ yě kó ɖo nyɛ gbɛ̌dónánɔ ɔ́ vún ɖu wɛ ɖo nǔglɔ́ ɖɔhun. Gǎn énɛ́ lɛ́ɛ ɔ́, a zě gǎ yě ɖésúnɔ tɔn dó tɔ́n ta nú yě.

¹⁵Hwi kpódó sɔ́ towe lɛ́ɛ kpó gbɔn xu mɛ dín kpó zǐngídi kpó.

¹⁶Un se zǐngídi ɔ́, bɔ wǔ kú mì; ée un se zǐngídi énɛ́ ɔ́, nu ce nɔ sísɔ́, kanmɛ ce gbɔ́jɔ́, bɔ afɔ ce lɛ́ɛ xo dɔjɔ. Un nɔ xwíí, bó ɖo nǔwamɛ sín azǎn ɔ́ nɔ te kpɔ́n wɛ, bó ná yi tɔ́n ahwan togun e wá tɔ́n ahwan mǐ é.

¹⁷“Fígitín na bo ma sɛ́n ǎ ɔ́, vǐwuntín na bo ma sɛ́n ǎ ɔ́, olívu na bo ma tíin ǎ ɔ́, gle lɛ́ɛ na bo ma ná jinukún ǎ ɔ́, lɛ̌ngbɔ́ lɛ́ɛ ná bo bú sín amagbo mɛ ɔ́, nyibú bǐ na bo vɔ ɖo kpó mɛ ɔ́,

¹⁸nyɛ ná j'awǎ ɖo Mawu Mavɔmavɔ mɛ, un ná j'awǎ ɖo Mawu e nɔ hwlɛ́n mì gán ɔ́ mɛ.

¹⁹ Aklúnɔ Mavɔmavɔ wɛ nyí hlɔ̌nhlɔ́n ce. É bló bɔ un nɔ yá afɔ zungbɔ́ ɖɔhun. É nɔ́ bló bɔ un nɔ fán kpó lɛ́ɛ.” Hanjigbɛ́gán ɔ́ sín han wɛ nyí han élɔ́, kanhún wɛ è nǎ nɔ́ xo d'é mɛ.