Read fon Sofoníi 1 Bible Online

Sofoníi 1 - fon bible

Sofoníi 1

¹ Xó e Mawu Mavɔmavɔ ɖɔ nú Sofoníi hwenu e Amɔ́ni ví Joziyási ɖo axɔ́sú ɖu wɛ ɖo Judáa ɔ́ ɖíe: Sofoníi ɔ́, Kúcí ví wɛ, bɔ Kúcí nyí Gedaliyá ví, bó nyí Amaliya vívú, bó nyí vívú vivu nú Ezekiyási.

²Mawu Mavɔmavɔ ɖɔ: “Un ná sú nǔ e ɖo gbɛ ɖo ayǐkúngban jí lɛ́ɛ bǐ sín kún dó.

³Un ná hu gbɛtɔ́ kpó kanlin kpó; un ná hu xɛ lɛ́ɛ bǐ, un ná hu hweví lɛ́ɛ bǐ. Un ná hu adǎkaxotɔ́ lɛ́ɛ bǐ, bó ná sú nǔ baɖabaɖa e yě zě alɔ yětɔn dó bló ná lɛ́ɛ bǐ sín kún dó. Un ná jó mɛ ɖěbǔ dó nyi gbɛ ɖo ayǐkúngban ɔ́ jí ǎ.”

⁴Mawu ɖɔ: “Un ná wa nǔ xá Jeluzalɛ́munu lɛ́ɛ kpódó Judáa to ɔ́ bǐ kpó. Un ná ɖe nǔ e kó nyí vodún Baalu sín wǔjɔnú e kpo ɖo fí é bǐ síin. Mɛ ɖěbǔ sɔ́ ná flín mɛ e nɔ sɛn ɛ lɛ́ɛ kpó hunnɔ lɛ́ɛ kpó vɔ́vɔ́ ǎ.

⁵Un ná sú mɛ e nɔ xá xɔ ta, bo nɔ sɛn sun kpó hwe kpó lɛ́ɛ sín kún dó. Mɛ e nɔ ɖɔ émí ná nɔ gbejí nú nyɛ Mawu Mavɔmavɔ, bɔ é ká lɛ́ yá ɔ́, yě nɔ́ ɖɔ émí ná nɔ gbejí nú vodún Mɔlɛ́ki lɛ́ɛ ɔ́, un ná sú mɛ énɛ́ lɛ́ɛ bǐ sín kún dó.

⁶Un ná sú mɛ e dó gǔdo mì, bó má nɔ ba alɔdó ce ǎ, bó má nɔ ba ná ɖó xó te nú mì ǎ lɛ́ɛ sín kún dó.”

⁷Mi nɔ xwíí ɖo Aklúnɔ Mavɔmavɔ nukɔn, ɖó xomɛsinzán Mawu Mavɔmavɔ tɔn kó sɛkpɔ́. Mawu Mavɔmavɔ kó zé nǔ e ná sá vɔ̌ ná wɛ é ɖe ɔ́ ɖó alɔ jí. É kó cyán mɛ e ná ɖu agɔ̌ lɛ́ɛ.

⁸Mawu Mavɔmavɔ ɖɔ: “Vɔ̌sísázán gbe su ɔ́, un ná dɔn tó nú gǎn lɛ́ɛ kpó axɔ́sú ví lɛ́ɛ kpó, kpódó mɛ e nɔ xwedó walɔ to ɖěvo tɔn lɛ́ɛ é kpó.

⁹Gbe énɛ́ gbe ɔ́, un ná dɔn tó nú mɛ e nɔ lɔ́n gbɔn sinsɛnxɔ yětɔn lɛ́ɛ sín kpekánta ahe lɛ́ɛ ɖɔhun[1], bó nɔ́ ja ajo bó nɔ́ xo dǎka, dó bɛ́ dɔkun gɔ́ gǎn yětɔn xwé lɛ́ɛ.

¹⁰Gbe énɛ́ gbe ɖo Jeluzalɛ́mu ɔ́, è nǎ se xósúsú ɖaxó ɖé sín Hweví Hɔntogbó ɔ́ kɔn. Gbɛvíhan ná ɖo Slǎ Yɔ̌yɔ́ ɔ́ mɛ, bɔ nǔ baɖabaɖa ɖé ná jɛ gbɔn só lɛ́ɛ jí.

¹¹Mi mɛ e ɖo Makitɛ́ci slǎ mɛ, ɖo Jeluzalɛ́mu lɛ́ɛ e mi, mi bǐ ní wɛn azɔn, ɖó ajɔ̌tɔ́ lɛ́ɛ bǐ ná kú; è nǎ vívá akwɛ́ɖyɔ́tɔ́ lɛ́ɛ bǐ sín kún.

¹²É jɛ hwenɛ́nu ɔ́, un ná zé zogbɛ́n dó kíjé Jeluzalɛ́mu toxo ɔ́ bǐ xéɖéxéɖé. Un ná dó gbɛya nú mɛ ɖěɖě e ɖo cúɖúɖú ahan ɖo go mɛ ɖɔhun, lobo nɔ ɖɔ dó ayi mɛ ɖɔ: ‘Mawu Mavɔmavɔ ma sixú ɖo nǔɖé ná wa wɛ; é sixú wa nǔ ɖagbe ɖé ǎ, é ká sixú wa nǔ nyanya ɖé ǎ’ lɛ́ɛ. Un ná dó gbɛya nú yě mɛ énɛ́ lɛ́ɛ.

¹³È nǎ hɛn dɔkun yětɔn bǐ gblé, bó ná gba xwé yětɔn lɛ́ɛ. Yě ná gbá xɔ bó ka ná nɔ mɛ ǎ. Yě ná tun vǐwun, yě ká ná ɖu ǎ.”

¹⁴Xomɛsinzán Mawu Mavɔmavɔ tɔn sɛkpɔ́! Azǎn ɖaxó Mawu Mavɔmavɔ tɔn ɔ́ kó sɛkpɔ́ bǐ kɛ́nnɛ́kɛ́nnɛ́. É ɖo hwlɛndó jí jǎwe. È ko ɖo azǎn ɔ́ sín xɔxɔ se wɛ. Mɛ ɖěɖě e kpan akɔ́n titewungbe lɛ́ɛ lɔ kó ɖo xó sú wɛ ɖɔ: “Mɛ̌ ká ná hwlɛ́n mǐ gán! Mɛ̌ ná hwlɛ́n mǐ gán!”

¹⁵Xomɛsinzán wɛ azǎn énɛ́ ɔ́ ná nyí. Xɛsi kpó wǔkúmɛ kpó sín azǎn wɛ. Mɛ vivɔ kpó nǔhɛngblé kpó sín azǎn wɛ. Zǐnflú kpó ablu gɔngɔn kpó sín azǎn wɛ. Akpɔ́kpɔ́ kpó amǔ kpó sín azǎn wɛ.

¹⁶Gbe énɛ́ gbe ɔ́, sɔ́ja lɛ́ɛ ná kún lanzo, bó ná ɖo acéjí bó ná tɔ́n ahwan toxo e è mɛ ahohó lɛ́ lɛ̌ dó lɛ́ɛ, bó ná tɔ́n ahwan mɛcɔ́tɔ́xɔ lɛ́ɛ.

¹⁷Mawu Mavɔmavɔ ɖɔ: “Un ná dɔn gbɛtɔ́ lɛ́ɛ dó nǔ nyanya mɛ; yě ná dlá avi nukúntíntɔ́nnɔ ɖɔhun, ɖó yě hu hwɛ dó mì. Kanjɔ yětɔn ná kpé fí bǐ kɔ́gúdu ɖɔhun, bɔ cyɔ yětɔn ná nyɔ zunkɔ́ ɖɔhun.”

¹⁸Azǎn e gbe Mawu Mavɔmavɔ ná ɖo xomɛsin jí é ɔ́, kpatágan yětɔn sixú hwlɛ́n yě gán ǎ, siká yětɔn ká sixú hwlɛ́n yě gán ǎ. Wǔhwan Mawu Mavɔmavɔ tɔn ná sɛ́ myɔ ɖɔhun, bó ná dó to ɔ́ bǐ zo, bó ná vívá gbɛtɔ́ e ɖo to ɔ́ mɛ lɛ́ɛ bǐ sín kún; é ná vívá bɔ é ná vɛ́ jlɛ́.