Read fon Sofoníi 3 Bible Online

Sofoníi 3 - fon bible

Sofoníi 3

¹Heelú Jeluzalɛ́mu toxo, toxo gǔfɔ́ntɔ́, ahizinɔ, acɛ gannaganna kpa nú mɛ tɔ́, heelú Jeluzalɛ́mu.

²É ɖótó Mawu Mavɔmavɔ sín xó lɛ́ɛ ǎ, é ké ya nú kplɔ́n e é ná ɛ lɛ́ɛ é ǎ. É ɖeji dó Mawu Mavɔmavɔ wú ǎ. É nɔ́ hɔn yi su Mawu tɔn ǎ.

³Gǎn e ɖo toxo ɔ́ mɛ lɛ́ɛ cí kinnikínní e ɖo adǎn jí é ɖɔhun. Hwɛɖɔtɔ́ e ɖo toxo ɔ́ mɛ lɛ́ɛ cí hla e xovɛ́ sin, bɔ é yi zǎngbé, bɔ adɔ ma lɔn nǔ n'i nú é ɖu nǔɖé kpo nú zǎnzǎn ǎ é ɖɔhun.

⁴Gbeyíɖɔ Mawu tɔn e ɖo toxo ɔ́ mɛ lɛ́ɛ nɔ tɛ afɔ ayǐ. Adingbannɔ wɛ yě nyí. Vɔ̌sánú-xwlémawutɔ́ tɔn lɛ́ɛ nɔ ɖó sísí nú nǔ e è zě xwlé Mawu é ǎ; yě nɔ́ gba Mawu sɛ́n.

⁵Nǔ ɖo mɔ̌ có, Mawu Mavɔmavɔ ɖo toxo ɔ́ mɛ; é nɔ́ wa nǔ jlɔ́jlɔ́; é nɔ́ wa nǔ nyanya ǎ. Mawu nɔ́ ɖɔ hwɛ xá mɛ ayǐhɔ́ngbe ayǐhɔ́ngbe dó jlɔ̌jlɔ́ jí. É gblá gbeɖé ǎ. É ɖo mɔ̌ bló wɛ có winnyá hú dǎnúwatɔ́ lɛ́ɛ ǎ, yě kpo ɖo dǎka yětɔn xo wɛ.

⁶Mawu Mavɔmavɔ ɖɔ: “Un sú akɔta gěgé sín kún, un gba mɛcɔ́tɔ́xɔ lɛ́ɛ. Ali e gbɔn toxo yětɔn lɛ́ɛ mɛ lɛ́ɛ bǐ jɛ vɔ̌. Un gba toxo yětɔn lɛ́ɛ bǐ; gbɛtɔ́ ɖěbǔ sɔ́ nɔ gbɔn toxo lɛ́ɛ mɛ dín ǎ; mɛ ɖěbǔ sɔ́ ɖo toxo lɛ́ɛ mɛ ǎ.

⁷Un ɖɔ dó ayi mɛ ɖɔ: ‘Jeluzalɛ́mu, é nyí a ɖǒ sísí nú mì ɔ́, é nyí a sɔ́ kplɔ́n e un ná we lɛ́ɛ ylɔ́ nǔ ɔ́, un ná gba nɔtɛn towe hánnyá ǎ. Un ná kplɔ́n we gbɔn alɔ bǐ mɛ có, nǔ baɖabaɖa wiwa jɛ́n a nɔ hwlɛ́n dó.’ ”

⁸Mawu Mavɔmavɔ ɖɔ nú yě ɖɔ: “Din ɔ́, mi bo nɔ te ba kpɔ́n lě e un ná wa nǔ mitɔn gbɔn gbe e gbe un ná wá dó hwɛ mi é. Un ko ɖɔ un ná kplé akɔta lɛ́ɛ kpó axɔ́súɖuto lɛ́ɛ kpó, bó ná ɖe xomɛsin ce xlɛ́ yě. Xomɛsin ɖaxó e jí un ná ɖe ɔ́ ná cí myɔ ɖɔhun, bó ná fyɔ́ to ɔ́ bǐ.”

⁹“Énɛ́ ɔ́ gúdo ɔ́, un ná húzú togun lɛ́ɛ; un ná lɛ nu yětɔn wé: Yě ná xo mlá nyɛ Mawu Mavɔmavɔ ɔ́ sín nyǐkɔ; yě ná ɖó gbe kpɔ́ bó ná sɛn mì.

¹⁰Mɛ e nɔ sɛn mì lɛ́ɛ, yě mɛ e un gba dó lɛ́ɛ ɔ́, yě ná hɛn nǔ wá ná mì. Yě sixú gosín tɔsisa Etiopíi tɔn lɛ́ɛ gúdo.”

¹¹Mawu Mavɔmavɔ ɖɔ: “Togun ce, gbe énɛ́ gbe ɔ́, nǔ nyanya e a wa lɛ́ɛ, hwɛ e a hu dó mì lɛ́ɛ sɔ́ ná nyí winnyá nú we ǎ. Un ná ɖe mɛ e ɖo go yí wɛ lɛ́ɛ sín tɛ́ntin towe, bɔ a sɔ́ ná nɔ́ tɛ afɔ ayǐ ɖě ɖo só mímɛ́ ce jí ǎ.

¹²Mɛ e ɖo togun towe mɛ, bó má ɖó nǔɖé ǎ, bó nɔ́ zé yěɖée hwe, bó nɔ́ byɔ́ mì ɖɔ nyi ní nya xɛ ɖo émí jí lɛ́ɛ ɔ́, un ná jó yě dó nyi togun ɔ́ mɛ.

¹³ Mɛ e ná kpo ɖo gbɛ ɖo Izlayɛ́li lɛ́ɛ sɔ́ ná wa nǔ agɔ ɖě ǎ; yě sɔ́ ná ɖó adingban ɖě ǎ; yě sɔ́ ná zé ɖɛ̌ yětɔn dó blɛ́ mɛ ná ǎ. Yě ná ɖu nǔ, bó ná dɔ́ amlɔ, bɔ mɛ ɖěbǔ ná dó xɛsi nú yě ǎ.”

¹⁴Sinyɔ́ɔnu lɛ́ɛ mi! Mi j'awǎ. Izlayɛ́li ví lɛ́ɛ mi! Mi sú xó bó kɛ awe. Jeluzalɛ́munu lɛ́ɛ mi! Mi hun xomɛ bo j'awǎ.

¹⁵Mawu Mavɔmavɔ ɖe hwɛ e è ɖǒ nú mi é síin. É nya kɛntɔ́ mitɔn lɛ́ɛ dó gbě. Mawu Mavɔmavɔ Izlayɛ́li xɔ́sú ɔ́ ɖo kpɔ́ xá mi, nǔ nyanya sɔ́ ná ɖó adohu nú mi ǎ.

¹⁶Gbe énɛ́ gbe ɔ́, è nǎ ɖɔ nú Jeluzalɛ́mu ɖɔ: “Sinyɔ́ɔ, ma ɖi xɛsi ó, awakanmɛ ma kú we ó.

¹⁷Mawu Mavɔmavɔ, Mawu towe ɖo kpɔ́ xá we. É dó hlɔ̌nhlɔ́n, bó ná jiɖiɖe we, ɖɔ a nǎ ɖu ɖ'é jí. É ɖo awǎ jɛ wɛ ɖó hwi wútu. Wǎn yíyí tɔn ná gbɛ yɔ̌yɔ́ we. É ɖo xomɛhunhun mɛ ɖó hwi wútu.

¹⁸È nǎ ɖɔ xwe ɖu wɛ é ɖe.” Mawu Mavɔmavɔ ɖɔ: “Un sɔ́ ná sɛ́ nǔ nyanya dó mi ǎ. Un ná ɖe wunkpɛn nú mi.

¹⁹Hwenu e un ná dɔn tó nú mɛ e táfú mi lɛ́ɛ dó ɔ́ ɖíe su e. Un ná klɔ́ akpa nú mɛ mitɔn e gblé wǔ lɛ́ɛ. Un ná kplá mɛ e ɖo kannumɔgbénu lɛ́ɛ wá xwé. Un ná bló bɔ mi ná xɔ susu, bɔ nyǐkɔ mitɔn ná yi jǐ gbɔn fí e mi ɖu winnyá gbɔn ɖo ayǐkúngban jí lɛ́ɛ bǐ.

²⁰Hwenɛ́nu ɔ́, un ná kplá mi wá xwé, bó ná kplé mi ɖó kpɔ́. Mi ná mɔ lě e un ná húzú gbɛ mitɔn gbɔn é. Un ná ná susu mi, bɔ è nǎ nɔ mlá mi ɖo togun e ɖo ayǐkúngban jí fí lɛ́ɛ bǐ mɛ.” Mawu Mavɔmavɔ wɛ ɖɔ mɔ̌.