Read fon Ajée 1 Bible Online

Ajée 1 - fon bible

Ajée 1

¹ Hwenu e axɔ́sú Daliwúsi ɖo xwe we bló wɛ ɖo zinkpo jí ɔ́, sun tɔn ayizɛ́ngɔ́ ɔ́ sín azǎn nukɔntɔn ɔ́ gbe ɔ́, Mawu Mavɔmavɔ gbɔn gbeyíɖɔ tɔn Ajée jí, bó ɖɔ xó nú Zolobabɛ́li tokpɔngán Judáa tɔn ɔ́ kpódó vɔ̌sánú-xwlémawutɔ́ Jozuwée kpó. Zolobabɛ́li ɔ́, Calutiyɛ́li ví wɛ, bɔ Jozuwée ká nyí Yexosadaki ví.

²Xó e Mawu Mavɔmavɔ Nǔbǐwúkpétɔ́ ɔ́ ɖɔ nú yě gbɔn Ajée jí ɔ́ ɖíe: “Togun ɔ́ nɔ ɖo ɖiɖɔ wɛ ɖɔ: ‘Hwenu ko su ǎ, hwenu e è nǎ vɔ́ Mawu Mavɔmavɔ xwé ɔ́ gbá dó ɔ́ kó su ǎ.

⁴Bɔ din ɔ́, é nyɔ́ ɖɔ mi ní jó xwé ce dó nyi gbigba mɔ̌, bó yi cí xwé mitɔn e mi va, bo ɖó acɔ́ ná sɔ mɔ̌ lɛ́ɛ gbe a?

⁵Nyɛ Mawu Mavɔmavɔ Nǔbǐwúkpétɔ́ ɔ́, má kan nǔ ɖokpó byɔ́ mi. Mi ka nɔ lin tamɛ dó nǔ e ɖo mi gbo wɛ lɛ́ɛ wú a?

⁶Mi nɔ dó jinukún gěgé, nǔkún kpɛɖé jɛ́n mi ka nɔ mɔ ya. Mi nɔ ɖu nǔ, mi ka nɔ gɔ́ xo ǎ. Mi nɔ nu sin, kɔ ka nɔ lɛ́ kpo ɖo mi xú wɛ. Mi nɔ cyɔ́n avɔ, é ka nɔ glɔ́n jɔhɔn nú mi ǎ. Azɔ̌watɔ́ nɔ́ yí azɔ̌kwɛ́ tɔn, lobo ka nɔ bɛ́ kɔn dó adɔ̌kpo gbo ɖo yonu mɛ.

⁷Nyɛ Mawu Mavɔmavɔ Nǔbǐwúkpétɔ́ ɔ́, un lɛ́ vɔ́ ɖo ɖiɖɔ nú mi wɛ ɖɔ mi ní lin tamɛ dó nǔ e ɖo mi gbo wɛ lɛ́ɛ wú.

⁸Mi yi sókan mɛ, bó yi ba atín dó wá gbá xwé ce ná. É ná dó xomɛhunhun nú mì, bɔ è na sɔ́ mì su. Xó e nyɛ Mawu Mavɔmavɔ ɖɔ é nɛ́.

⁹Jinukún gěgé ɖó nukún wɛ mi ɖe, mi bo ka kpɔ́n kpɛ e mi ya é! Kpɛ énɛ́ e mi bɛ́ yi xwé gbe ɔ́, un fún funfún dó, bɔ bǐ gba dó. Nyɛ Mawu Mavɔmavɔ Nǔbǐwúkpétɔ́ ɔ́, má lɛ́ kan nǔ ɖokpó byɔ́ mi: Étɛ́wú nǔ ká ɖo mɔ̌ cí wɛ? Nǔ e wú wɛ ɔ́ wɛ nyí ɖɔ xwé ce ɖo gbigba, bɔ mi mɔ bó jó dó, bɔ ɖokpó ɖokpó mitɔn ka ɖo nukún kpé dó étɔn wú wɛ.

¹⁰Énɛ́ ɔ́ wú wɛ jǐ gɔn jija, bɔ nǔ ɖěbǔ wú ǎ.

¹¹Un ɖɔ bɔ akú ɖó gbɔn to ɔ́ bǐ mɛ: sókan mɛ wɛ a, jinukúngbo mɛ wɛ a, vǐwungbo mɛ wɛ a, olívugbo mɛ wɛ a, gle mɔ̌hun tíin bɔ akú gɔn ɖǐɖó ɖ'é mɛ ǎ. Akú ɖó gbɔn fí bǐ. Gbɛtɔ́ kpó kanlin kpó bǐ wɛ mɔ wǔvɛ́; azɔ̌ e è wa ɔ́ nǔɖé tɔ́n ɖ'é mɛ ǎ.’ ”

¹²Zolobabɛ́li, Calutiyɛ́li ví ɔ́ kpó Jozuwée vɔ̌sánú-xwlémawutɔ́ ɖaxó e nyí Yexosadaki ví ɔ́ kpó, kpódó yě mɛ e lɛ́ kɔ sín kannumɔgbénu wá xwé lɛ́ɛ bǐ kpó ylɔ́ xó e Mawu Mavɔmavɔ, Mawu yětɔn ɖɔ nú yě gbɔn Ajée jí ɔ́ ɖɔ nǔjɔnǔ. Lě e Ajée wa azɔ̌ e Mawu Mavɔmavɔ zɔ́n ɛ é gbɔn ɔ́ nɛ́; énɛ́ ɔ́, toví lɛ́ɛ bǐ mɔ nǔ jɛ acɛkpikpa Mawu Mavɔmavɔ tɔn wú.

¹³Énɛ́ ɔ́ gúdo ɔ́, mɛsɛ́dó Mawu Mavɔmavɔ tɔn Ajée dó Mawu Mavɔmavɔ sín wɛn élɔ́ yě. É ɖɔ: “Un ná nɔ xá mi, nyɛ Mawu Mavɔmavɔ ɔ́ wɛ dó akpá tɔn nú mi.”

¹⁴Mawu Mavɔmavɔ hun ayi nú Zolobabɛ́li tokpɔngán Judáa tɔn ɔ́, kpó vɔ̌sánú-xwlémawutɔ́ ɖaxó Jozuwée kpó, kpódó mɛ e lɛ́ kɔ sín kannumɔgbénu wá xwé lɛ́ɛ bǐ kpó, bɔ yě jɛ azɔ̌ wú, bó ná gbá Mawu yětɔn, Mawu Mavɔmavɔ Nǔbǐwúkpétɔ́ ɔ́ sín xwé.

¹⁵Yě jɛ azɔ̌ jí xwe énɛ́ ɔ́ xwe, ɖo sun ayizɛ́ngɔ́ ɔ́ sín azǎn ko-nukún-ɛnɛgɔ́ ɔ́ gbe.