Read fon Zakalíi 1 Bible Online

Zakalíi 1 - fon bible

Zakalíi 1

¹ Hwenu e Daliwúsi ɖo axɔ́sú ɖu wɛ ɖo Pɛ́si ɔ́, xwe tɔn wegɔ́ ɔ́ sín sun tántɔngɔ́ ɔ́ mɛ ɔ́, Mawu Mavɔmavɔ ɖɔ xó nú gbeyíɖɔ tɔn Zakalíi Bɛlɛkya ví, Idóo vívú ɔ́; é ɖɔ n'i ɖɔ:

²A nǎ ɖɔ nú yě ɖɔ: “Mawu Mavɔmavɔ sin xomɛ dó tɔ́gbó mitɔn lɛ́ɛ bɔ é syɛ́n ɖésú.”

³“Mawu Mavɔmavɔ Nǔbǐwúkpétɔ́ ɔ́ ɖɔ: ‘Mi lɛ́ kɔ wá gɔ̌n ce, bónú má lɛ́ kɔ wá mi gɔ́n.

⁴Mi ma wa nǔ tɔ́gbó mitɔn lɛ́ɛ ɖɔhun ó. Đ'ayǐ xóxó ɔ́, gbeyíɖɔ lɛ́ɛ kó kplɔ́n nǔ yě ɖo nyǐkɔ ce mɛ ɖɔ yě ní lɛ́ kɔ sín gbɛ nyanya e zán wɛ yě ɖe ɔ́ gúdo, bó jó nǔ ma sɔgbe e wa wɛ yě ɖe lɛ́ɛ dó; yě ká jló ná se ǎ; yě se tónú nú mì ǎ.

⁵Din ɔ́, tɔ́gbó mitɔn lɛ́ɛ sɔ́ ɖe ǎ; gbeyíɖɔ lɛ́ɛ ká nɔ gbɛ sɔ́ yi ǎ, mi tunwun ganjí.

⁶É ká ɖo mɔ̌ có xó ɖěɖě un ɖɔ gbɔn mɛsɛntɔ́ ce gbeyíɖɔ lɛ́ɛ jí é, kpódó nǔ e un zɔ́n yě lɛ́ɛ kpó ɔ́, tɔ́gbó mitɔn lɛ́ɛ wá mɔ nǔ jɛ mɛ, bó húzú ninɔmɛ. Yě wá tunwun ɖɔ lě e un ɖɔ gbɔn ɔ́ wɛ nyi wa nǔ xá émí gbɔn; lě e gbɛ e zán wɛ émí ɖe ɔ́ kpódó nǔ e émí wa lɛ́ɛ kpó byɔ́ gbɔn ɔ́ wɛ nyɛ Mawu Mavɔmavɔ ɔ́ wa nǔ xá émí gbɔn.’ ” Mawu Mavɔmavɔ wɛ ɖɔ mɔ̌.

⁷Hwenu e axɔ́sú Daliwúsi ɖo xwe we bló wɛ ɖo zinkpo jí ɔ́, sun tɔn wǒ-ɖokpógɔ́ ɔ́ e è nɔ ylɔ́ ɖɔ “Cevati” ɔ́ sín azǎn ko-nukún-ɛnɛgɔ́ (24) ɔ́ gbe ɔ́, Mawu Mavɔmavɔ ɖɔ xó nú gbeyíɖɔ Zakalíi Bɛlɛkya ví, Idóo vívú ɔ́. É ɖɔ n'i ɖɔ:

⁸ “Zǎn élɔ́ mɛ ɔ́, un mɔ nǔɖé. Un mɔ sɔ́xátɔ́ ɖé, bɔ é ɖo sɔ́ vɔvɔ ɖé jí, bó ɖo atín kpɛví kpɛví ɖé lɛ́ɛ tɛ́ntin, ɖo tɔdo ɖé mɛ. Atín lɛ́ɛ dó ama ɖésú. Sɔ́ ɖěvo lɛ́ɛ ɖo gǔdo tɔn: sɔ́ vɔvɔ, sɔ́ ajavɛ, sɔ́ wěwé.

⁹Un kanbyɔ́ mɛ e ɖo sɔ́ ɔ́ jí ɔ́ ɖɔ: ‘Sɛ́mɛɖó ce, étɛ́ nyí wɛ sɔ́ énɛ́ lɛ́ɛ ká ɖe?’ Bɔ wɛnsagun Mawu Mavɔmavɔ tɔn e ɖo xó ɖɔ nú mì wɛ ɔ́ yí gbe ɖɔ: ‘Un ná tínmɛ nú we.’

¹⁰Wɛnsagun ɔ́ nɔ fí e é ɖe ɖo atín lɛ́ɛ tɛ́ntin ɔ́, bó lɛ́ ɖɔ: ‘Sɔ́ énɛ́ lɛ́ɛ ɔ́, Mawu Mavɔmavɔ wɛ sɛ́ yě dó ɖɔ yě ní gbɔn ayǐkúngban ɔ́ bǐ jí.’

¹¹Sɔ́xátɔ́ lɛ́ɛ ɖó gbe nú wɛnsagun Mawu Mavɔmavɔ tɔn ɔ́ ɖɔ: ‘Mǐ gbɔn ayǐkúngban ɔ́ bǐ jí, mǐ mɔ hunnyahunnya ɖo fí ɖěbǔ ǎ, fí bǐ wɛ ɖo tóó.’

¹²Ée yě ɖɔ mɔ̌ ɔ́, wɛnsagun ɔ́ sú xó ɖɔ: ‘Mawu Mavɔmavɔ Nǔbǐwúkpétɔ́! Xwe kanɖé gban (70) ɖíe wɛ a ko ɖo xomɛ sin dó Judáa sín toxo lɛ́ɛ wɛ e; a sin xomɛ dó Jeluzalɛ́mu, bó sin dó toxo ɖě lɛ́ɛ lɔ. Hwetɛ́nu wɛ a ka ná gɔn nǔbláwǔ kú nú yě yi jɛ?’ ”

¹³Hwe énɛ́ ɔ́ nu ɔ́, Mawu Mavɔmavɔ wá ɖɔ xó ɖagbe, xó e nɔ dó wǔsyɛ́n lanmɛ nú mɛ ɔ́ nú wɛnsagun ɔ́.

¹⁴Wɛnsagun e ɖo xó ɖɔ xá mì wɛ ɔ́ ná gbe mì ɖɔ nyɛ ní jlá xó élɔ́ ɖo Mawu Mavɔmavɔ Nǔbǐwúkpétɔ́ ɔ́ sín nyǐkɔ mɛ: “Wǎn yíyí ɖaxó ɖé wɛ un ɖó nú Jeluzalɛ́mu Sinyɔ́ɔ só ɔ́.

¹⁵Lo ɔ́, un sin xomɛ ɖaxó ɖé dó akɔta e nɔ gán jɛ yě ɖésúnɔ wú lɛ́ɛ. Nǔgbó ɔ́, un sin xomɛ dó Izlayɛ́li, é ká kó nyí xomɛsin jɔ xomɛsin ɖé ǎ. Akɔta énɛ́ lɛ́ɛ wɛ zɔ́n bɔ é gba.

¹⁶Énɛ́ ɔ́ wú wɛ nyɛ Mawu Mavɔmavɔ, Nǔbǐwúkpétɔ́ ɔ́, ɖo ɖiɖɔ wɛ ɖɔ un ná lɛ́ kɔ wá Jeluzalɛ́mu bó ná ɖe xomɛnyínyɔ́ ce xlɛ́. È nǎ vɔ́ sinsɛnxɔ ce gbá, bó ná vɔ́ toxo ɔ́ ɖó ayǐ.”

¹⁷Énɛ́ ɔ́ gúdo ɔ́, wɛnsagun ɔ́ ɖɔ nú mì ɖɔ nyɛ ní lɛ́ ɖɔ Mawu Mavɔmavɔ, Nǔbǐwúkpétɔ́ ɔ́ ɖɔ: “Toxo ce lɛ́ɛ ná lɛ́ jɛ ganjí; un ná lɛ́ vɔ́ Jeluzalɛ́mu sɔ́, un ná wá gɔ́ alɔ nú Sinyɔ́ɔ.”