Read fon Zakalíi 12 Bible Online

Zakalíi 12 - fon bible

Zakalíi 12

¹Mawu Mavɔmavɔ ɖɔ xó dó Izlayɛ́li wú. Mawu Mavɔmavɔ e bló jǐxwé, bó ɖó ayǐkúngban ɔ́ ayǐ, bó ná gbɛ gbɛtɔ́ ɔ́, xó e é ɖɔ ɔ́ ɖíe; é ɖɔ:

²“Un ná sɔ́ Jeluzalɛ́mu dó ɖó kɔ́fu, bɔ xomɛsin ce ná nyí vɛ̌ɛn bo gɔ́ kɔ́fu ɔ́: vɛ̌ɛn énɛ́ ɔ́ ná zɔ́n bɔ togun e lɛ́ lɛ̌ dó e lɛ́ɛ bǐ sín nukún mɛ ná nɔ gbá zǐn. Togun Judáa tɔn ɔ́ bǐ sín nukún mɛ ná nɔ́ lɛ́ lɛ̌ hwenu e kɛntɔ́ lɛ́ɛ ná xá Jeluzalɛ́mu é.

³Hwenɛ́nu ɔ́, un ná sɔ́ Jeluzalɛ́mu dó ɖó awǐnnya kpinkpɛn ɖé nú togun lɛ́ɛ bǐ. Mɛ e ná zé dó jǐ lɛ́ɛ bǐ ná gblé wǔ. Énɛ́ ɔ́, akɔta e ɖo ayǐkúngban jí lɛ́ɛ bǐ ná kplé bó húzú kpan nukɔn ɛ.”

⁴Mawu Mavɔmavɔ ɖɔ: “Gbe énɛ́ ɔ́ gbe ɔ́, un ná ɖɔ bɔ xɛsi ná mú sɔ́ yětɔn lɛ́ɛ bǐ ahan ɖɔhun, bɔ mɛ e xá sɔ́ lɛ́ɛ ná lú dó te. Lo ɔ́, hwenu e un ná ɖɔ bɔ togun lɛ́ɛ sín sɔ́ lɛ́ɛ ná tɔ́n nukún ɔ́, nukún ce ná ɖo togun Judáa tɔn ɔ́ jí.

⁵Judáa sín gǎn lɛ́ɛ ná ɖɔ dó ayi mɛ ɖɔ: ‘Jeluzalɛ́munu lɛ́ɛ ɔ́, Mawu Mavɔmavɔ Nǔbǐwúkpétɔ́ ɔ́ mɛ wɛ yě nɔ́ mɔ hlɔ̌nhlɔ́n yětɔn ɖe.’

⁶Hwenɛ́nu ɔ́, un ná ɖɔ bɔ Judáa sín gǎn lɛ́ɛ ná cí myɔ hɛhɛ ɖé ɖɔhun, ɖo zungbó mɛ, abǐ zohwín e ɖo jiji wɛ ɖo jinukún e è kplé lɛ́ɛ tɛ́ntin ɔ́ ɖɔhun. Yě ná vɔ togun e lɛ́dó yě lɛ́ɛ bǐ gbɔn ɖisí amyɔ. Jeluzalɛ́munu lɛ́ɛ ká ná nɔ toxo yětɔn mɛ tɛgbɛ.”

⁷Mawu Mavɔmavɔ ná wá dó alɔ Judáa sín hɛ̌nnu lɛ́ɛ hwɛ̌, bónú Davídi sín vǐ lɛ́ɛ kpódó Jeluzalɛ́munu lɛ́ɛ kpó má vɛdó ɖɔ émí hú gǎn togun Judáa tɔn e kpo lɛ́ɛ wɛ sín ó.

⁸Hwenɛ́nu ɔ́, Mawu Mavɔmavɔ ná cyɔ́n alɔ Jeluzalɛ́munu lɛ́ɛ jí: mɛ e vɔ́ hú mɛ bǐ ɖo yě mɛ lɛ́ɛ ná dó hlɔ̌nhlɔ́n Davídi ɖɔhun, bɔ Davídi sín vǐ lɛ́ɛ ná cí Mawu ɖɔhun nú Jeluzalɛ́munu lɛ́ɛ; yě ná cí wɛnsagun Mawu Mavɔmavɔ tɔn ɖɔhun ɖo Jeluzalɛ́munu lɛ́ɛ nukɔn.

⁹Mawu Mavɔmavɔ ɖɔ: “Hwenɛ́nu ɔ́, un ná wá, bó ná vívá akɔta e ná wá tɔ́n ahwan Jeluzalɛ́mu lɛ́ɛ bǐ.

¹⁰ Énɛ́ ɔ́, un ná gba wǔjɔmɛ kpó vosisa kpó sín yɛ kɔn nyi Davídi xwé ɔ́ kpó Jeluzalɛ́munu lɛ́ɛ kpó jí, bɔ yě ná sɔ́ nukún yětɔn ɖó nyɛ mɛ e yě sɔ́ hwǎn é wú. Yě ná ví mì, lě e è nɔ ví vǐɖokpónɔ e kú nú mɛ é ɖɔhun. Yě ná ví mì, bó só hehe, lě e è nɔ ví nukɔngbéví e kú nú mɛ é ɖɔhun.

¹¹Hwenɛ́nu ɔ́, Jeluzalɛ́munu lɛ́ɛ ná nɔ aluwɛ ɖaxó ɖé mɛ, é ná cí aluwɛ e mɛ è nɔ dó Hadádi-Hlimumɔ́ni[5] ta mɛ, ɖo tɔdo Mɛgidó tɔn mɛ é ɖɔhun.

¹²To ɔ́ ná nɔ aluwɛ mɛ. Hɛ̌nnu ɖokpó ɖokpó ná nɔ vovo. Davídi hɛ́nnu ɔ́ ná nɔ vo. Nyɔ̌nu lɛ́ɛ ná nɔ vo. Natáni hɛ́nnu ɔ́ ná nɔ vo, nyɔ̌nu lɛ́ɛ ná nɔ vo.

¹³Levíi hɛ́nnu ɔ́ ná nɔ vo, nyɔ̌nu lɛ́ɛ ná nɔ vo. Cimɛ́yi hɛ́nnu ɔ́ ná nɔ vo, nyɔ̌nu lɛ́ɛ ná nɔ vo.

¹⁴Hɛ̌nnu ɖě lɛ́ɛ bǐ ná nɔ vo: hɛ̌nnu ɖokpó ɖokpó ná nɔ vovo, nyɔ̌nu lɛ́ɛ ná nɔ vo.”