Read fon Zakalíi 14 Bible Online

Zakalíi 14 - fon bible

Zakalíi 14

¹Gbe e gbe Mawu Mavɔmavɔ ná sin xomɛ ɔ́ ɖo sisɛkpɔ́ wɛ. Jeluzalɛ́munu lɛ́ɛ mi, è nǎ mǎ dɔkun mitɔn lɛ́ɛ ɖo nukún mitɔn mɛ.

²Mawu Mavɔmavɔ ná kplé akɔta lɛ́ɛ bǐ, bɔ yě ná tɔ́n ahwan Jeluzalɛ́mu. Yě ná yí toxo ɔ́, yě ná bɛ́ nǔ e ɖo xwé lɛ́ɛ gbe lɛ́ɛ, bó ná hwlɛ́n kan xá nyɔ̌nu lɛ́ɛ, bó ɖó xó xá yě. È nǎ wlí mɛ e ɖo toxo ɔ́ mɛ lɛ́ɛ vlɔ̌ɖówe yi kannumɔgbénu. Amɔ̌, è nǎ vívá mɛ e ná kpo ɖo toxo ɔ́ mɛ lɛ́ɛ sín kún ǎ.

³Mawu Mavɔmavɔ ná wá, bó ná fun ahwan xá akɔta énɛ́ lɛ́ɛ. É ná fun ahwan lě e é kó nɔ́ fun gbɔn ahwan hwenu é.

⁴Mawu Mavɔmavɔ ná nɔ te ɖo olívutín só e ɖo Jeluzalɛ́mu ɔ́ nukɔn, ɖo zǎnzǎnhwe jí ɔ́ jí. Olívutín só ɔ́ ná zɛ ɖó we sín zǎnzǎnhwe jí yi gbadahwe jí, bɔ tɔdo ɖaxó ɖokpó ná tɔ́n: só ɔ́ akpá ɖokpó ná yi totaligbé, bɔ akpá wegɔ́ ɔ́ ná yi tofɔligbé.

⁵Énɛ́ ɔ́, mi ná hɔn yi tɔdo e ɖo só ce lɛ́ɛ tɛ́ntin é mɛ, ɖó tɔdo ɔ́ ná gbló ada káká yi Asálu. Mi ná hɔn lě e tɔ́gbó mitɔn lɛ́ɛ hɔn gbɔn hwenu e ayǐkúngban dán wǔ axɔ́sú Judáa tɔn Oziyási hwenu é. Mawu Mavɔmavɔ, Mawu ce ná wá, é kpódó wɛnsagun tɔn lɛ́ɛ bǐ kpó.

⁶Wěziza ná ɖe hwenɛ́nu ǎ. Jɔhɔn ná gbɛ́ ǎ, kɛ́njí ná ja ǎ.

⁷Hwenu ɖé wɛ hwenu énɛ́ ɔ́ ná nyí, bɔ Mawu Mavɔmavɔ ɖokpónɔ wɛ tunwun. Kéze ná ɖo te hwebǐnu, bɔ è sɔ́ ná tunwun kéze ɖó vo nú zǎn ǎ; gbadanu na bo su ɔ́, gbɛmɛ ná za wě.

⁸ Hwenɛ́nu ɔ́, tɔjɔtɛn ɖé ná tɔ́n ɖo Jeluzalɛ́mu. Sin e ná nɔ́ tɔ́n sín tɔjɔtɛn énɛ́ ɔ́ mɛ ɔ́ akpá ɖokpó ná nɔ́ sa yi Xu Kúkú mɛ, bɔ akpá ɖokpó ná nɔ sa yi Mɛditɛlanɛ́ɛ xu mɛ. Sin ɔ́ ná nɔ sa mɔ̌ alǔun mɛ kpó jǐ hwenu kpó.

⁹Hwenɛ́nu ɔ́, Mawu Mavɔmavɔ ná nyí ayǐkúngban ɔ́ bǐ sín axɔ́sú. Mawu Mavɔmavɔ ɖokpónɔ géé wɛ è nǎ nɔ́ sɛn, nyǐkɔ tɔn ɖokpónɔ géé wɛ gbɛtɔ́ lɛ́ɛ bǐ ná nɔ́ ylɔ́.

¹⁰To ɔ́ bǐ ná húzú, bó ná cí ayǐkúngban wɛnjɛ ɖɔhun sín Gɛva, ɖo totaligbé yi Hlimumɔ́ni, ɖo tofɔligbé. Jeluzalɛ́mu ná yi jǐ hú to e lɛ́ lɛ̌ dó e lɛ́ɛ, bó ná gbló sín Bɛnjamɛ́ɛ hɔn ɔ́ kɔn, káká yi fí e hɔn nukɔntɔn ɔ́ ɖe ɔ́, káká yi hɔn e ɖo zwe lɛ́ɛ mɛ ɔ́ kɔn, bó ná gosín Hananɛ́li sín síngbó ɔ́ kɔn, káká yi vɛ̌ɛnto axɔ́sú ɔ́ tɔn lɛ́ɛ kɔn.

¹¹ È nǎ jɛ toxo ɔ́ mɛ, mɛ ɖé sɔ́ ná ɖo adǎn jí ɖɔ émí ná gba toxo ɔ́ ǎ. Ayi ná jɛ ayǐ ɖo Jeluzalɛ́mu.

¹²Togun e yi ahwan fun xá Jeluzalɛ́mu gbé lɛ́ɛ ɔ́, tó e Mawu Mavɔmavɔ ná dɔn nú yě ɔ́ ɖíe: yě ná ɖo gbɛ céɖécéɖé, bɔ lan yětɔn ná nyɔ, nukún yětɔn lɛ́ɛ ná nyɔ ɖo akpa mɛ, bɔ ɖɛ̌ yětɔn lɛ́ɛ lɔmɔ̌ ná nyɔ ɖo nu mɛ.

¹³Hwenɛ́nu ɔ́, Mawu Mavɔmavɔ ná dó hunnyahunnya ɖaxó ɖé yě mɛ. Yě ná húzú kpan nukɔn yěɖée, bɔ mɛ ɖokpó ɖokpó ná tɔ́n ahwan nɔzo tɔn.

¹⁴Súnnu Judáa tɔn lɛ́ɛ ná fun ahwan bó ná jɛ ahwan Jeluzalɛ́mu jí. Yě ná bɛ́ akɔta e lɛ́ lɛ̌ dó e lɛ́ɛ sín dɔkun lɛ́ɛ bǐ. Yě ná bɛ́ siká, kpatágan, kpódó avɔ kpó, bɔ é ná sukpɔ́ ɖésú.

¹⁵Nǔ e gbo mɛ e tɔ́n ahwan Jeluzalɛ́munu lɛ́ɛ wɛ ná gbo kanlin yětɔn lɛ́ɛ bǐ: sɔ́ lɛ́ɛ, sɔ́tócí lɛ́ɛ, lǎkúnmí lɛ́ɛ, kpó tócí lɛ́ɛ kpó.

¹⁶ Hwenɛ́nu ɔ́, mɛ e ná gán ɖo akɔta e wá tɔ́n ahwan Jeluzalɛ́mu lɛ́ɛ mɛ lɛ́ɛ bǐ ná nɔ́ yi Jeluzalɛ́mu xwewú xwewú, bó ná nɔ́ yi sɛn Mawu Mavɔmavɔ axɔ́sú Nǔbǐwúkpétɔ́ ɔ́, bó ná nɔ́ ɖu azavaxwe ɔ́.

¹⁷Ényí togun e ɖo ayǐkúngban jí lɛ́ɛ ɖokpó gɔn Mawu Mavɔmavɔ Nǔbǐwúkpétɔ́ yi sɛn ɖo Jeluzalɛ́mu ɔ́, jǐ ná ja ɖo to tɔn mɛ ǎ.

¹⁸Ényí Ejípunu lɛ́ɛ gbɛ́ ɖɔ émí kún ná yi Jeluzalɛ́mu bo yi ɖu azavaxwe ɔ́ ó ɔ́, awě e xo akɔta ɖě lɛ́ɛ e gbɛ́ ɖɔ émí kún ná yi ɖu xwe ɔ́ ó lɛ́ɛ, ɖokpó ɔ́ wɛ ná xo yě lɔmɔ̌.

¹⁹Ényí Ejípu kpó akɔta ɖé kpó ma yi ɖu azavaxwe ɔ́ ǎ ɔ́, tó e Mawu Mavɔmavɔ ná dɔn nú yě ɔ́ nɛ́.

²⁰Hwenɛ́nu ɔ́, è nǎ wlán dó gan e è dǒ kɔ nú sɔ́ lɛ́ɛ é wú é ɖɔ: “È sɔ́ ɖó vo nú Mawu Mavɔmavɔ”. Bɔ ganzɛ́n e ɖo Mawu Mavɔmavɔ xwé gbe lɛ́ɛ ɔ́, è nǎ sɔ́ yě lɔ ɖó vo nú Mawu Mavɔmavɔ kɔ́fu e ɖo vɔ̌sákpe ɔ́ nukɔn lɛ́ɛ ɖɔhun.

²¹Ganzɛ́n e ɖo Jeluzalɛ́mu é kpó éé ɖo Judáa é kpó bǐ wɛ è nǎ sɔ́ ɖó vo nú Mavɔmavɔ Nǔbǐwúkpétɔ́ ɔ́. Mɛ e ná xwlé vɔ̌sánú Mawu Mavɔmavɔ lɛ́ɛ bǐ ɔ́, ganzɛ́n énɛ́ lɛ́ɛ wɛ yě ná nɔ́ zán dó ɖa kanlin e yě hu lɛ́ɛ ná. Nǔsatɔ́ ɖě sɔ́ ná ɖo Mawu Mavɔmavɔ Nǔbǐwúkpétɔ́ ɔ́ sín xwé gbe hwenɛ́nu ǎ.