Read fon Zakalíi 2 Bible Online

Zakalíi 2 - fon bible

Zakalíi 2

¹Un lɛ́ mɔ nǔ ɖěvo: un mɔ lanzo ɛnɛ.

²Un kanbyɔ́ wɛnsagun e ɖo xó ɖɔ xá mì wɛ ɔ́ ɖɔ: “Étɛ́ nyí wɛ lanzo ɛnɛ lɛ́ɛ ɖe?” Bɔ é yí gbe nú mì ɖɔ: “Lanzo énɛ́ lɛ́ɛ ɔ́, akɔta hlɔ̌nhlɔ́nnɔ e gba Judáanu lɛ́ɛ, Izlayɛ́linu lɛ́ɛ, kpódó Jeluzalɛ́munu lɛ́ɛ kpó dó lɛ́ɛ wɛ.”

³Énɛ́ ɔ́ gúdo ɔ́, Mawu Mavɔmavɔ xlɛ́ fletuntɔ́ ɛnɛ mì.

⁴Bɔ un kanbyɔ́ ɖɔ: “Étɛ́ wa gbé yě wá?” Bɔ é yí gbe nú mì ɖɔ: “Yě wá bó ná dó xɛsi akɔta hlɔ̌nhlɔ́nnɔ e sí te dó Judáanu lɛ́ɛ jí, bó ná gba é. Yě gba Judáanu lɛ́ɛ dó káká bɔ mɛ ɖěbǔ sixú nɔ te nukɔn yětɔn ǎ.”

⁵Nǔ ɖěvo e un mɔ ɔ́ ɖíe: Un mɔ nya ɖé, bɔ é hɛn nǔjlɛ́kan alɔnu.

⁶Un kanbyɔ́ ɛ ɖɔ: “Fítɛ́ wɛ a xwe?” Bɔ é yí gbe nú mì ɖɔ: “Un xwe Jeluzalɛ́mu, bó ná jlɛ́ ga tɔn kpó gblǒ tɔn kpó.”

⁷Đěe é ɖɔ mɔ̌ ɔ́, wɛnsagun e ɖo xó ɖɔ xá mì wɛ ɔ́ ɖidó, bɔ wɛnsagun ɖěvo wá kpé e.

⁸Bó ɖɔ n'i ɖɔ: “Kán wezun yi ɖɔ nú dɔ̌nkpɛvú e hɛn kan ɔ́ ɖɔ: È nǎ mɛ dǒ lɛ́ lɛ̌ dó Jeluzalɛ́mu ǎ, ɖó gbɛtɔ́ kpó kanlin kpó e ná nɔ mɛ lɛ́ɛ ná sukpɔ́ ɖésú.

⁹Mawu Mavɔmavɔ ɖɔ: ‘Nyɛ ɖésúnɔ ná nyí myɔ bó ná lɛ́ lɛ̌ dó toxo ɔ́ ahohó ɖɔhun, bó ná ɖe susu ce xlɛ́.’ ”

¹⁰Mawu Mavɔmavɔ ɖɔ: “Mi hɔn, mi hɔn sín to e ɖo taligbé ɔ́ mɛ[1], ɖó un gba mi dó, bɔ mi kpé wɛ̌kɛ́zo ɛnɛ lɛ́ɛ bǐ mɛ.

¹¹Jeluzalɛ́munu e ɖo kannumɔgbénu ɖo Babilɔ́nu lɛ́ɛ é mi, mi yá wǔ hɔn.”

¹²Đó Mawu Mavɔmavɔ Nǔbǐwúkpétɔ́ ɔ́ zɔ́n azɔ̌ ɖokpó mì, bó ɖɔ dó akɔta e vɔ mi lɛ́ɛ wú ɖɔ: “Nú mɛɖé ɖó alɔ mi wú hǔn, nukúnzin ce wú wɛ é ɖó alɔ.

¹³Alɔ ce ná jɛ akɔta énɛ́ lɛ́ɛ wú, bɔ yě ná jɛ mɛ e kó nyí kannumɔ yětɔn ɖ'ayǐ lɛ́ɛ sín alɔ mɛ.” Hwe énɛ́ ɔ́ nu ɔ́, mi ná tunwun ɖɔ Mawu Mavɔmavɔ Nǔbǐwúkpétɔ́ ɔ́ wɛ sɛ́ mì dó nǔgbó.

¹⁴Mawu Mavɔmavɔ lɛ́ ɖɔ: “Jeluzalɛ́munu e mi, xomɛ ní hun mi, mi sú xó bó j'awǎ, ɖó un ja bó ná nɔ tɛ́ntin mitɔn.

¹⁵Bɛ́ sín hwe énɛ́ ɔ́ nu ɔ́, akɔta wɔ̌buwɔ́bú ɖé ná xwedó nyɛ Mawu Mavɔmavɔ ɔ́, bɔ yě ná húzú togun ce. É ká ɖo mɔ̌ có midɛɛ lɛ́ɛ tɛ́ntin wɛ un ná nɔ.” É nyí nǔ cí mɔ̌ ɔ́, a nǎ tunwun ɖɔ Mawu Mavɔmavɔ Nǔbǐwúkpétɔ́ ɔ́ wɛ sɛ́ mì dó nǔgbó.

¹⁶Judáa ná lɛ́ húzú Mawu Mavɔmavɔ tɔn ɖo ayǐkúngban mímɛ́ ɔ́ jí, bɔ Mawu Mavɔmavɔ ná lɛ́ sɔ́ Jeluzalɛ́mu.

¹⁷Hǔn mɛ bǐ ní nɔ abwɛ̌ ɖo Mawu Mavɔmavɔ nukɔn! Đó é ná tɔ́n sín nɔtɛn tɔn.