Read fon Zakalíi 5 Bible Online

Zakalíi 5 - fon bible

Zakalíi 5

¹Un lɛ́ mɔ nǔ ɖěvo: un mɔ anyǔwéma mlámlá ɖé, bɔ é ɖo jɔhɔn mɛ, bo ɖo yiyi wɛ.

²Wɛnsagun Mawu Mavɔmavɔ tɔn ɔ́ kanbyɔ́ mì ɖɔ: “Étɛ́ mɔ wɛ a ɖe?” Bɔ un yí gbe n'i ɖɔ: “Un mɔ anyǔwéma mlámlá ɖé, bɔ é ɖo jɔhɔn mɛ, bó ɖo yiyi wɛ. Ga tɔn nyí mɛ̌tlu wǒ, gblǒ tɔn nyí mɛ̌tlu atɔ́ɔ́n.”

³Bɔ é ɖɔ nú mì ɖɔ: “Nu e è dǒ to ɔ́ bǐ é sín wěma wɛ. É wlán dó wěma ɔ́ sín akpá ɖé xwé ɖɔ è ná nya ajotɔ́ lɛ́ɛ bǐ sín to ɔ́ mɛ, bó wlán dó akpá ɖě ɔ́ xwé ɖɔ è nǎ nya mɛ e nɔ ɖó adingban bo nɔ xwlé nǔ d'é jí lɛ́ɛ lɔ bǐ sín to ɔ́ mɛ.”

⁴Mawu Mavɔmavɔ Nǔbǐwúkpétɔ́ ɔ́ ɖɔ émí ɖésú wɛ ná sɛ́ nudómɛ énɛ́ ɔ́ dó. Nudómɛ énɛ́ ɔ́ ná gba nǔ ɖo ajotɔ́ lɛ́ɛ ɖokpó ɖokpó xwé, bó ná gba ɖo mɛ e nɔ ɖó adingban bo nɔ xwlé nyǐkɔ ce d'é jí lɛ́ɛ ɖokpó ɖokpó xwé. Nudómɛ énɛ́ ɔ́ ná nɔ to ɔ́ mɛ, bó ná hɛn nǔ bǐ gblé. Xɔtín kpódó awǐnnya e è dǒ gbá xɔ lɛ́ɛ ná lɛ́ɛ kpó bǐ wɛ ná hánnyá.

⁵Wɛnsagun e ɖo xó ɖɔ nú mì wɛ ɖ'ayǐ ɔ́ wá bó ɖɔ nú mì ɖɔ: “Zě ta bo kpɔ́n! Étɛ́ wɛ tɔ́n sín dɔ̌n ja?”

⁶Bɔ un kanbyɔ́ ɛ ɖɔ: “Étɛ́ ká nɛ́?” Bɔ é yí gbe nú mì ɖɔ: “Xasun e mɛ hwɛ e to ɔ́ bǐ hu ɔ́ ɖe ɔ́ wɛ.”

⁷Hwe énɛ́ ɔ́ nu ɔ́, nusú e ɖo xasun ɔ́ nu ɔ́ jɛ hunhun jí, bɔ un mɔ nyɔ̌nu ɖé ɖo ayǐjínjɔ́n ɖo xasun ɔ́ mɛ. Nusú ɔ́, sunmí wɛ è dǒ bló ná.

⁸Bɔ wɛnsagun ɔ́ ɖɔ nú mì ɖɔ: “Nyɔ̌nu énɛ́ ɔ́, dǎkaxixo sín xlɛ́ nyí wɛ é ɖe.” Ée é ɖɔ mɔ̌ ɔ́, é lɛ́ kpíkpé nyɔ̌nu ɔ́ dó xasun ɔ́ mɛ, bó sú.

⁹Un zé ta bo ná mɔ nǔɖé kpowun ɔ́, nyɔ̌nu we ɖé lɛ́ɛ jɛ́n tɔ́n ɖo jɔhɔn mɛ jǎwe, jɔhɔn ɖo yě zé wɛ, bɔ yě ɖo zinzɔn wɛ. Nǔgbó ɔ́, yě ɖǒ awa, bɔ é cí aɖɔwé sín awa ɖɔhun. Yě wá zé xasun ɔ́ hɛn yi jɔhɔn mɛ.

¹⁰Un kanbyɔ́ wɛnsagun ɔ́ ɖɔ fítɛ́ wɛ yě ká zé xasun ɔ́ xwe a jí?

¹¹Bɔ é yí gbe nú mì ɖɔ: “Yě zé xwe Mɛzopotamíi, bó ná gbá sinsɛnxɔ ɖokpó n'i, bó ná xo kpe ɖokpó bó sɔ́ ɖ'é jí.”