Read fon Zakalíi 8 Bible Online

Zakalíi 8 - fon bible

Zakalíi 8

¹Mawu Mavɔmavɔ Nǔbǐwúkpétɔ́ ɔ́ ɖɔ nú mì ɖɔ:

²“Nyɛ Mawu Mavɔmavɔ ɔ́, wǎn yíyí ɖaxó wɛ un ɖó nú Jeluzalɛ́mu. Un yí wǎn n'i titewungbe.

³Énɛ́ ɔ́ wú wɛ un ɖo ɖiɖɔ wɛ ɖɔ un lɛ́ kɔ wá Jeluzalɛ́mu. Un lɛ́ wá jɛ Sinyɔ́ɔ. È nǎ nɔ ylɔ́ Jeluzalɛ́mu ɖɔ ‘Toxo e ɖo gbejí ɔ́’, bó ná nɔ́ ylɔ́ Sinyɔ́ɔ, só ce ɖɔ ‘Só mímɛ́’.

⁴Nǔgbó wɛ! Un ɖɔ bo tɛ ɖɛ̌ jí ɖɔ: Degénɔ kpódó nyɔ̌ɖaxóví kpó e nɔ hɛn kpogɛ, ɖó xwe yětɔn kó sɛ yi wútu lɛ́ɛ ɔ́, yě ná lɛ́ kɔ wá jínjɔ́n Jeluzalɛ́mu sín tokplétɛn lɛ́ɛ.

⁵Súnnuví lɛ́ɛ kpódó nyɔ̌nuví lɛ́ɛ kpó, ná lɛ́ wá kpɔ́ gégé, bó ná da ayihún ɖo toxo ɔ́ sín tokplétɛn lɛ́ɛ.

⁶Nǔ énɛ́ e ná wá jɛ ɔ́ ná cí nǔ ma sixú jɛ ɖɔhun nú mɛ e ná kpo ɖo gbɛ ɖo togun Izlayɛ́li tɔn ɔ́ mɛ lɛ́ɛ. Amɔ̌, nyɛ Mawu Mavɔmavɔ Nǔbǐwúkpétɔ́ ɔ́, un hɛn ɔ́, un ná bló nǔjíwǔ énɛ́ ɔ́.

⁷Akpá wɛ nyí bɔ un dó nú mi. Un ná hwlɛ́n togun ce e ɖo kannumɔgbénu, ɖo zǎnzǎnhwe jí kpódó gbadahwe jí kpó lɛ́ɛ gán.

⁸Un ná kplá yě sín dɔ̌n wá, bɔ yě ná nɔ Jeluzalɛ́mu; yě ná nyí togun ce, bɔ nyɛ ná nyí Mawu yětɔn. Un ná xwedó nǔgbó kpódó hwɛjijɔ kpó dó ɖu axɔ́sú ɖo yě nu.”

⁹Nǔ e Mawu Mavɔmavɔ Nǔbǐwúkpétɔ́ ɔ́ ɖɔ ɔ́ ɖíe: “Mi kpan akɔ́n! Akpá e un ko dó nú mi ɖ'ayǐ gbɔn gbeyíɖɔ lɛ́ɛ jí, hwenu e è dǒ sinsɛnxɔ ce do, bó ná vɔ́ gbá lɛ́ɛ se wɛ mi ɖe din.

¹⁰Đ'ayǐ xóxó ɔ́, mɛ ɖěbǔ nɔ́ sú azɔ̌ e gbɛtɔ́ lɛ́ɛ wa ɔ́ sín axɔ́ ǎ; è ka nɔ lɛ́ sú ée kanlin lɛ́ɛ wa ɔ́ sín axɔ́ ǎ. Mɛ ɖé sɔ́ nɔ́ glá tɔ́n ǎ, ɖó kɛntɔ́ lɛ́ɛ wútu. Đó un jó gbɛtɔ́ lɛ́ɛ bǐ dó, bɔ yě nɔ́ ɖo dǎka xo yěɖée wú wɛ.

¹¹Amɔ̌, din ɔ́, un sɔ́ ná hɛn mɛ e kpo ɖo gbɛ ɖo togun élɔ́ mɛ lɛ́ɛ ɖ'ayǐ tɔn ɖɔhun ǎ.

¹²Un ná kɔn fífá nyi ayǐkúngban ɔ́ jí. Vǐwuntín lɛ́ɛ ná nɔ́ sɛ́n, ayǐkúngban ná ná jinukún. Jǐ ná ja ɖésú. Un ná ná nyɔ̌ná énɛ́ lɛ́ɛ bǐ mɛ e kpo ɖo gbɛ ɖo togun ce mɛ lɛ́ɛ.

¹³Axɔ́súɖuto Judáa tɔn kpódó Izlayɛ́li tɔn kpó e mi! Togun e è dǒ nu ɔ́ sín xlɛ́ wɛ mi ko nyí ɖ'ayǐ ɖo akɔta lɛ́ɛ tɛ́ntin. Amɔ̌, din ɔ́, un hwlɛ́n mi gán. Mi ná nyí togun nyɔ̌nánɔ ɖé sín xlɛ́. Mi ma sɔ́ ɖi xɛsi ó, mi kpan akɔ́n.”

¹⁴Nǔ e nyɛ Mawu Mavɔmavɔ Nǔbǐwúkpétɔ́ ɔ́ ɖɔ ɔ́ ɖíe: “Nǔ nyanya e un ɖɔ un ná wa xá mi ɖ'ayǐ hwenu e tɔ́gbó tɔgbo mitɔn lɛ́ɛ dó xomɛsin nú mì ɔ́ un wɔn ǎ.

¹⁵Amɔ̌, din ɔ́, un jó xó dó, bó ɖɔ un ná wa ɖagbe nú Jeluzalɛ́munu lɛ́ɛ; un ná wa ɖagbe nú Judáa togun ɔ́. Mi bo ma sɔ́ ɖi xɛsi ó.

¹⁶ Lě e mi ɖó ná wa nǔ gbɔn ɔ́ ɖíe: Mɛ ɖokpó ɖokpó ní nɔ́ ɖɔ nǔgbó nú nɔzo tɔn. Hwɛɖɔxɔsá mitɔn lɛ́ɛ ní nɔ́ ɖɔ hwɛ jlɔ́jlɔ́, bó vɔ́ fífá ɖó ayǐ.

¹⁷Mi ma lin nǔ nyanya ɖěbǔ dó miɖée wú ó. Mi ma ɖe kúnnu agɔ bo xwlé nǔ d'é jí ó, ɖó nyɛ Mawu Mavɔmavɔ ɔ́, un gbɛ́ wǎn nú nǔ mɔ̌hunkɔtɔn lɛ́ɛ wiwa.”

¹⁸Mawu Mavɔmavɔ Nǔbǐwúkpétɔ́ ɔ́ ɖɔ nú mì ɖɔ:

¹⁹“Un ɖo ɖiɖɔ nú mi wɛ ɖɔ nu e mi nɔ blá ɖo sun ɛnɛgɔ́ ɔ́, sun atɔ́ɔ́ngɔ́ ɔ́, sun tɛ́nwegɔ́ ɔ́ kpódó wǒgɔ́ ɔ́ kpó mɛ xwewú xwewú ɔ́, bɛ́ sín din ɔ́, yě ná húzú xwe ɖaxó ɖaxó nú Judáa togun ɔ́, bɔ yě ná nɔ́ hun xomɛ, bó ná nɔ j'awǎ tawun. “Amɔ̌, mi ní nɔ́ ba nǔgbó ɖiɖɔ kpódó fífá kpó.”

²⁰Nǔ e Mawu Mavɔmavɔ Nǔbǐwúkpétɔ́ ɔ́ ɖɔ ɔ́ ɖíe: “Akɔta ɖěvo lɛ́ɛ, to wɔ̌buwɔ́bú ɖé mɛ nu lɛ́ɛ ná lɛ́ wá Jeluzalɛ́mu.

²¹To ɖě mɛ nu lɛ́ɛ ná yi ɖɔ nú ɖěvo mɛ nú lɛ́ɛ ɖɔ: Mi wá nú mǐ ná yi sa vo nú Mawu Mavɔmavɔ Nǔbǐwúkpétɔ́ ɔ́, bó ná ba ɛ mɔ, bɔ yě ná yí gbe nú yě ɖɔ: ‘Mǐ ná xwedó mi yi.’

²²Nǔgbó wɛ, togun wɔ̌buwɔ́bú lɛ́ɛ kpódó akɔta hlɔ̌nhlɔ́nnɔ lɛ́ɛ kpó ná wá Jeluzalɛ́mu, bó ná wá ba nyɛ Mawu Mavɔmavɔ ɔ́ mɔ, bó ná sa vo nú mì gbɔn ɖɛ e yě ná xo lɛ́ɛ mɛ.

²³Hwenɛ́nu ɔ́, jǒnɔ wǒ ná tíin, bɔ yě mɛ ɖokpó ɖokpó ná dó gbe vovo: yě ná hɛn Jwifu ɖokpó sín awu ɖaxó sín tó majómájó bó dó hɛn ɛ ɖó te bó ná ɖɔ n'i ɖɔ: ‘Mǐ jló ná xwedó mi, ɖó mǐ se ɖɔ Mawu ɖo kpɔ́ xá mi.’ ”