Read fon Zakalíi 9 Bible Online

Zakalíi 9 - fon bible

Zakalíi 9

¹ Mawu Mavɔmavɔ ɖɔ xó. Xó tɔn yi tokpɔn Hadlaki tɔn ɔ́ mɛ, bó yi nɔ te ɖo toxo Damási tɔn mɛ. Đó Mawu Mavɔmavɔ sín nukún ɔ́, akɔta Izlayɛ́li tɔn lɛ́ɛ kɛ́ɖɛ́ jí wɛ é ɖe ǎ, é lɛ́ ɖo gbɛtɔ́ ɖě lɛ́ɛ lɔmɔ̌ bǐ jǐ.

²Mawu Mavɔmavɔ sín xó ɔ́ lɛ́ yi Hamáti toxo ɔ́ mɛ, ɖo Damási kpá, bó lɛ́ yi Tíi kpó Sidɔ́ɔn kpó. To nukúnɖéjí wɛ toxo énɛ́ lɛ́ɛ nyí.

³Tíinu lɛ́ɛ mɛ ahohó lɛ́ lɛ̌ dó toxo yětɔn. Yě kplé kpatágan bɔ é sukpɔ́ kɔ́gúdu ɖɔhun. Yě tɛ́ siká kpé fí bǐ babá ɖɔhun.

⁴Lo ɔ́, Aklúnɔ ná yí bǐ sín yě sí. É ná hɔ́ ahohó yětɔn lɛ́ɛ kɔn nyi xu mɛ. Toxo ɔ́ ná ji zo.

⁵ Ényí Acikelɔ́ni toxo ɔ́ mɔ mɔ̌ ɔ́, xɛsi ná jɛ jǐ tɔn. Xɛsi ná ɖi Gaza toxo ɔ́, bɔ é ná sísɔ́; Eklɔ́ni toxo ɔ́ lɔmɔ̌ ná ɖi xɛsi bó ná sísɔ́, ɖó é ná ba Tíi toxo e wú é gán jɛ ɔ́ kpo. Axɔ́sú ɖě sɔ́ ná ɖo Gaza ǎ; Acikelɔ́ni ná jɛ vɔ̌.

⁶Acidɔ́di ná húzú toxo e mɛ jǒnɔ lɛ́ɛ ján dó Jwifu lɛ́ɛ mɛ ɖe ɔ́ sín toxo. Un ná yí nǔ e wú Filisitɛ́ɛn lɛ́ɛ ɖo go yí wɛ ɔ́ sín yě sí.

⁷Kanlin e è hu bɔ hun tɔn ma kɔn nyi ayǐ ǎ, abǐ ée è dǒ sá vɔ̌ nú vodún ɔ́ sín lan ɔ́, un ná yí sín nu yětɔn. Mɛ yětɔn e ná kpo ɖo gbɛ lɛ́ɛ ná sɔ́ mì dó ɖó Mawu yětɔn, lě e xwédo Judáa tɔn ɔ́ bló gbɔn ɔ́ é. Eklɔ́ninu lɛ́ɛ ná byɔ́ togun ce mɛ, lě e Jebuzinu lɛ́ɛ bló gbɔn é.

⁸Un ná cɔ́ to ce lɛ́ lɛ̌ dó, bó ná cyɔ́n alɔ jǐ tɔn ɖo ahwangɔnu e ná wá lɛ́ɛ nukɔn. Mɛ ɖěbǔ sɔ́ ná wá dó ya nú togun ce ǎ. Đó din ɔ́, nukún ce ɖo jǐ tɔn.

⁹ Sinyɔ́ɔnu lɛ́ɛ mi, mi j'awǎ! Jeluzalɛ́munu lɛ́ɛ mi, mi j'awǎ kpó awǒbóbó kpó. Axɔ́sú mitɔn ɖíe ja gɔ̌n mitɔn e. Nǔjlɔ́jlɔ́watɔ́ ɖé wɛ, é ɖu ɖ'é jí. É sɔ́ éɖée hwe, é jínjɔ́n tócí ɖé jí, tócí ví ɖé jí.

¹⁰ É ná hɛn ahwankɛkɛ́ví e ɖo Eflayímu lɛ́ɛ gblé. É ná sú ahwansɔ́ e ɖo Jeluzalɛ́mu lɛ́ɛ sín kún dó. É ná wɛ́n da e yě nɔ́ dó fun ahwan ná lɛ́ɛ. É ná ná fífá akɔta lɛ́ɛ, bó ná kpa acɛ sín xu ɖě kɔn yi ɖěvo kɔn, é ná kpa acɛ sín Efláti tɔ ɔ́ kɔn, káká yi ayǐkúngban ɔ́ sín vivɔnu.

¹¹ Mawu Mavɔmavɔ ɖɔ: “Đó akɔ e un jɛ xá mi bó sɔ́ hun ce slé jí ɔ́ wú ɔ́, un ná ɖe mɛ mitɔn e nyí gantɔ́, ɖo do gɔngɔn e mɛ sin ma ɖe ǎ mɛ lɛ́ɛ nyi te.

¹²Gantɔ́ e ɖo nukúnɖíɖó mɛ lɛ́ɛ é mi, mi lɛ́ kɔ yi toxo mitɔn ɖaxó e è ko vɔ́ ahohó tɔn lɛ́ɛ mɛ ɔ́ mɛ. Un ɖo ɖiɖɔ nú mi wɛ égbé ɖɔ ya e mi ji ɔ́, un ná wa ɖagbe nú mi ɖ'é nu, bɔ é ná túnflá.

¹³Đó un ná zán Judáanu lɛ́ɛ da e è nɔ dó fun ahwan ná é ɖɔhun, bɔ Eflayímunu lɛ́ɛ ná nyí gǎ. Sinyɔ́ɔnu lɛ́ɛ mi, un ná sɛ́ súnnu e ɖo mi mɛ lɛ́ɛ dó, bɔ yě ná yi tɔ́n ahwan Glɛ̌sinu lɛ́ɛ. Un ná zán yě lě e ahwanfuntɔ́ nɔ́ zán hwǐ tɔn gbɔn é.”

¹⁴Mawu Mavɔmavɔ ná tɔ́n ɖo togun tɔn sín ta nu. Gǎ e é ná da ɔ́ ná yi jǐkɛwun ɖɔhun. Aklúnɔ Mavɔmavɔ ná kún kpɛn. É ná zɔn jǐ ɖaxó ɖé mɛ wá; jǐ ɔ́ ná ɖo jija wɛ kpó jɔhɔn kpó.

¹⁵Mawu Mavɔmavɔ Nǔbǐwúkpétɔ́ ɔ́ ná cyɔ́n alɔ jǐ yětɔn. É ná sɛ́ kɛ́njí dó bɔ é ná hu mɛ lɛ́ɛ, bó ná sú kún yětɔn dó. Yě ná ɖu ɖo mɛ e ná fɔ́n gǔ dó yě jí lɛ́ɛ jí. Yě ná kɔn kɛntɔ́ lɛ́ɛ sín hun nyi ayǐ, bɔ é ná sa tɔ vɛ̌ɛn ɖɔhun, abǐ kanlin e è dǒ sá vɔ̌ ná lɛ́ɛ sín hun e gɔ́ basya bó kɔn nyi vɔ̌sákpe ɔ́ sín zwe lɛ́ɛ mɛ é ɖɔhun.

¹⁶Hwenɛ́nu ɔ́, Mawu Mavɔmavɔ ná hwlɛ́n togun tɔn gán, lě e lɛ̌ngbɔ́nyitɔ́ nɔ́ hwlɛ́n kanlin tɔn lɛ́ɛ gán gbɔn é. Yě ná nɔ́ kɔ́n ɖo to ɔ́ mɛ awǐnnya xɔ akwɛ́ e ɖo axɔ́súgbákún wú lɛ́ɛ ɖɔhun.

¹⁷To ɔ́ ná nyí to e mɛ nyɔ̌ná kpó ɖɛkpɛnyínyɔ́ kpó ná tíin ɖe é. Jinukún kpó vɛ̌ɛn yɔ̌yɔ́ kpó ná ná hlɔ̌nhlɔ́n dɔ̌nkpɛvú lɛ́ɛ kpódó ɖyɔ̌vǐ lɛ́ɛ kpó.