Read fon Matíe 10 Bible Online

Matíe 10 - fon bible

Matíe 10

¹Jezu ylɔ́ ahwanvú tɔn wěwe lɛ́ɛ kplé, bó ná acɛ yě, nú yě ná dó nya yɛ nyanya lɛ́ɛ ná, bó ná nɔ́ gbɔ azɔn lɛ́ɛ bǐ, kpódó wɔ̌nzɔn lɛ́ɛ bǐ kpó.

²Mɛsɛ́dó wěwe lɛ́ɛ sín nyǐkɔ ɖíe: jɛ nukɔn ɔ́, Sinmɔ́ɔ e è nɔ lɛ́ ylɔ́ ɖɔ Piyɛ́ɛ ɔ́, kpódó nɔví tɔn Andlé kpó; Zebeɖée ví we, Jaki kpódó Jǎan kpó.

³Filípu kpódó Baatelemíi kpó; Tɔmáa kpódó Matíe tokwɛ́yítɔ́ ɔ́ kpó; Jaki Alufée ví ɔ́, kpódó Tadée kpó;

⁴Sinmɔ́ɔ hunjɛdótojítɔ́ ɔ́[6], kpódó Judási Isikaliɔ́ti e wá jó Jezu ɔ́ kpó.

⁵Yě mɛ wěwe nɛ́ lɛ́ɛ ɔ́, Jezu sɛ́ yě dó, bó kplɔ́n nǔ yě ɖɔ: “Mi ma yi mɛ e ma nyí Jwifu ǎ lɛ́ɛ gɔ́n ó, mi ma ka byɔ́ Samalíinu lɛ́ɛ sín to ɖé mɛ ó.

⁶Izlayɛ́li ví e cí lɛ̌ngbɔ́ búbú ɖɔhun lɛ́ɛ gɔ́n wɛ mi ná yi.

⁷ Mi jlá dó ali ɖɔ: ‘Axɔ́súɖuɖu sɛ́xwé tɔn ko sɛ yá.’

⁸Mi gbɔ azɔn nú azinzɔnnɔ lɛ́ɛ; mi fɔ́n mɛkúkú lɛ́ɛ; mi gbɔ azɔn nú gudunɔ lɛ́ɛ, bó bló nú yě ní húzú mɛ mímɛ́; mi nya yɛ nyanya lɛ́ɛ. Lě e un ná acɛ mi vɔ̌nu ɔ́, mi lɔmɔ̌ mi bo wa nǔ lɛ́ɛ bǐ vɔ̌nu.

⁹Mi ma hɛn siká ó, mi ma hɛn kpatágan ó, mi ma ka hɛn akwɛ́ dó ganɖɔkɛn mɛ ó;

¹⁰ mi ma hɛn glo ó, mi ma hɛn awu we ó; mi ma hɛn afɔkpa ó, mi ma hɛn kpo ó; ɖó azɔ̌watɔ́ ɖó ná yí azɔ̌ e é wa ɔ́ sín akwɛ́.

¹¹“Mi jɛ toxo ɖaxó ɖé abǐ gletoxo ɖěbǔ mɛ hǔn, mi kan mɛ e jǒnɔ mitɔn yíyí jɛ xá ɔ́ byɔ́, bó yi nɔ gɔ̌n tɔn káká yi jɛ hwenu e mi ná gosín to ɔ́ mɛ dó é.

¹²Ényí mi byɔ́ xwé ɖé gbe hǔn, mi ɖɔ: ‘Fífá ní nɔ xwé ɔ́ jí.’

¹³Ényí fífá jɛ xá mɛ e ɖo xwé énɛ́ gbe lɛ́ɛ hǔn, fífá mitɔn ní nɔ yě jí; é ma ka jɛ xá yě ǎ hǔn, fífá mitɔn ní lɛ́ kɔ xwedó mi.

¹⁴ Nú è ma yí mi, abǐ è gbɛ̌ xó mitɔn se ɖo xwé ɖé gbe, abǐ toxo ɖé mɛ hǔn, mi tɔ́n sín fínɛ́, bó xúxú afɔkɔ́ mitɔn[7].

¹⁵ Má ɖɔ nǔgbó nú mi: é wá jɛ hwɛɖɔzán gbe ɔ́, é ná bɔkun nú Sodɔ́munu lɛ́ɛ kpódó Gomɔ́ɔnu lɛ́ɛ kpó hú to énɛ́ mɛ nu lɛ́ɛ.”

¹⁶ “Éɖíe, un sɛ́ mi dó, bɔ mi ná cí lɛ̌ngbɔ́ ɖo hla lɛ́ɛ tɛ́ntin ɖɔhun e; mi bo ɖó ayi te dan ɖɔhun, bó fá xomɛ ahwannɛ́ ɖɔhun.

¹⁷ Mi cɔ́ miɖée dó gbɛtɔ́ lɛ́ɛ wú, ɖó yě ná wá dɔn mi yi hwɛ nukɔn, bo na wá ɖɔ hwɛ xá mi, lobo ná ɖó bǎ nú mi ɖo kplɔ́ngbasá yětɔn lɛ́ɛ.

¹⁸Yě ná wá kplá mi yi tokpɔngán lɛ́ɛ kpódó axɔ́sú lɛ́ɛ kpó nukɔn ɖó nyɛ wútu, bónú mi ná ɖe kúnnu nú mì, ɖo yě kpódó mɛ e ma nyí Jwifu ǎ lɛ́ɛ kpó nukɔn.

¹⁹Lo ɔ́, hwenu e yě ná wá wlí mi yi jó ɔ́, mi ma jɛ tagba bo ɖo nǔ e mi ná ɖɔ ɖo dɔ̌n lɛ́ɛ, abǐ lě e mi ná ɖɔ xó gbɔn ɖo dɔ̌n ɔ́ linkpɔ́n wɛ ó, è nǎ sɔ́ nǔ e mi ná ɖɔ ɖo dɔ̌n hwenɛ́nu lɛ́ɛ dó ayi mɛ nú mi.

²⁰Ɖó mi ɖésúnɔ wɛ ɖo xó ná ɖɔ wɛ ǎ; Yɛ Tɔ́ mitɔn tɔn wɛ ná ɖo xó ɖɔ wɛ gbɔn mi jí.

²¹ “Nɔví ná jó nɔví tɔn, bɔ è nǎ hu; tɔ́ ná jó vǐ tɔn, bɔ è nǎ hu; vǐ lɛ́ɛ ná fɔ́n gǔ dó mɛjitɔ́ yětɔn lɛ́ɛ jí, bó ná zɔ́n ɖɔ è ní hu yě.

²² Mɛ bǐ ná gbɛ́ wǎn nú mi ɖó nyɛ wú. Lo ɔ́, mɛ e ná dɛ ɖo ya énɛ́ lɛ́ɛ nu káká yi fó ɔ́, è nǎ hwlɛ́n ɛ gán.

²³Nú è dǒ ya nú mi ɖo toxo ɖé mɛ hǔn, mi hɔn yi toxo ɖěvo mɛ. Má ɖɔ nǔgbó nú mi: mi ná ko gbɔn Izlayɛ́li toxo lɛ́ɛ bǐ mɛ fó, cóbɔ nyɛ Gbɛtɔ́ví ɔ́ ná wá ǎ.

²⁴ “Nǔkplɔ́ntɔ́ ɖé nɔ́ hú gǎn mɛ̌si tɔn ǎ; mɔ̌ ɖokpó ɔ́, mɛsɛntɔ́ ɖé nɔ́ hú gǎn gǎn tɔn ǎ;

²⁵ ényí nǔkplɔ́ntɔ́ sixú tunwun nǔ káká wá mɛ̌si tɔn há jí ɔ́, é ko kpé. Mɔ̌ ɖokpó ɔ́, mɛsɛntɔ́ ɖó ná cí gǎn tɔn ɖɔhun; ɖó, nú è ylɔ́ hɛ̌nnugán ɔ́ ɖɔ Bɛluzebúlu yɛ nyanya xɔ́sú ɔ́, nyǐkɔ e è nǎ ná xwéví lɛ́ɛ ná lɛ́ nylá hú mɔ̌.

²⁶ “Mi bo ma ɖi xɛsi nú gbɛtɔ́ lɛ́ɛ ó; ɖó nǔ e wa wɛ è ɖe ɖo nǔglɔ́ ɔ́, bǐ ná wá jɛ wěxo.

²⁷Xó e un kplá mi ɖó vo, bó ɖɔ nú mi ɔ́, mi ɖɔ bónú mɛ bǐ ní se.

²⁸Mi ma ɖi xɛsi nú yě mɛ e nɔ hu agbaza, bó ma ka sixú wa nǔɖé nú lǐndɔ̌n ǎ lɛ́ɛ ó; lo ɔ́, mi ɖi xɛsi nú Mawu e ɖó acɛ e sixú dɔn lǐndɔ̌n kpódó agbaza kpó bǐ dó zojimací mɛ é.

²⁹Gboli ɖo akwɛ́ ɖé jí ǎ; é ka ɖo mɔ̌ có, ɖokpó yětɔn ka nɔ́ kú Mawu Tɔ́ mitɔn sín jlǒ mɛ vo ǎ.

³⁰Midɛɛ lɛ́ɛ ɔ́, ɖa e ɖo ta nú mi ɔ́ ɖésú ɔ́, Mawu tunwun nabí e é nyí é.

³¹Hǔn, mi bo ma ɖi xɛsi ó, ɖó mi xɔ akwɛ́ hú gboli gěgé.

³²“Mɛ e ná ɖɔ ɖo mɛ bǐ nukɔn ɖɔ émí nyí ahwanvú ce ɔ́, nyɛ lɔmɔ̌ ná ɖe kúnnu n'i ɖo Tɔ́ ce e ɖo sɛ́xwé ɔ́ nukɔn.

³³ Lo ɔ́, mɛɖé gbɛ́ ɖo gbɛtɔ́ lɛ́ɛ nukɔn ɖɔ émí kún tunwun mì ó ɔ́, nyɛ lɔmɔ̌ na gbɛ́ ɖo Tɔ́ ce e ɖo sɛ́xwé ɔ́ nukɔn ɖɔ un kún tunwun i ó.

³⁴“Mi ma vɛdó ɖɔ fífá wɛ un hɛn wá ayǐkúngban jí sín ó; fífá wɛ un hɛn wá ǎ; hwǐ wɛ un hɛn wá.

³⁵ Ɖó un wá bɔ nyɛ wútu ɔ́, vǐ súnnu ná mɔ tɔ́ tɔn gbɔ ǎ; vǐ nyɔ̌nu ná mɔ nɔ tɔn gbɔ ǎ; vǐsi ná mɔ asú tɔn nɔ gbɔ ǎ.

³⁶Xwé mɛtɔn gbe nu lɛ́ɛ na húzú kɛntɔ́ mɛtɔn.

³⁷“Mɛ e yí wǎn nú tɔ́ tɔn abǐ nɔ tɔn hú mì ɔ́, mɛ énɛ́ jɛ xá ná nyí ahwanvú ce ǎ; mɛ e ka ná yí wǎn nú vǐ tɔn súnnu abǐ vǐ tɔn nyɔ̌nu hú mì ɔ́, mɛ énɛ́ lɔmɔ̌ jɛ xá na nyí ahwanvú ce ǎ.

³⁸ Mɛ e ma ɖíɖá aklúzu tɔn[8], bó jɛ gǔdo ce ǎ ɔ́, mɛ énɛ́ jɛ xá ná nyí ahwanvú ce ǎ.

³⁹ Mɛ e jló ná hwlɛ́n gbɛ éɖée tɔn gán ɔ́, gbɛ tɔn ná bú dó e; mɛ e ka ná hɛn gbɛ tɔn bú dó ta ce mɛ ɔ́, é ná lɛ́ mɔ gbɛ tɔn.

⁴⁰ “Mɛ e yí mi ɔ́, nyɛ wɛ é yí; mɛ e ka yí nyɛ ɔ́, mɛ e sɛ́ mì dó ɔ́ wɛ é yí.

⁴¹Mɛ e yí gbeyíɖɔ Mawu tɔn, ɖó é nyí gbeyíɖɔ Mawu tɔn wútu ɔ́, é ná mɔ gbeyíɖɔ Mawu tɔn sín ajɔ yí. Mɛ e ka na yí hwɛjijɔnɔ, ɖó é nyí hwɛjijɔnɔ wútu ɔ́, é ná mɔ hwɛjijɔnɔ sín ajɔ yí.

⁴²Bɔ mɛ ɖěbǔ ka ná sin fífá kɔ́fu ɖokpó kpowun yɔkpɔ́vú lěhunkɔtɔn, ɖó é nyí ahwanvú ce wútu ɔ́, má ɖɔ nǔgbó nú mi, é ná ba ajɔ tɔn kpo ǎ.”