Read fon Matíe 11 Bible Online

Matíe 11 - fon bible

Matíe 11

¹Ée Jezu kplɔ́n nǔ énɛ́ lɛ́ɛ ahwanvú tɔn wěwe lɛ́ɛ fó ɔ́, é gosín fínɛ́, bó ɖidó toxo e ɖo gbě ɔ́ jí fínɛ́ lɛ́ɛ mɛ, lobo ná jlá Mawuxó yě.

²Ée Jǎan ɖo gankpá mɛ, bó se azɔ̌ e wa wɛ Klísu ɖe lɛ́ɛ ɔ́, é sɛ́ ahwanvú tɔn lɛ́ɛ dó e,

³nú yě ní yi kanbyɔ́ ɛ ɖɔ: “Hwi wɛ nyí mɛ e ɖó ná wá, bɔ mǐ ɖo te kpɔ́n é a? Abǐ mɛ ɖěvo wɛ mǐ ná nɔ te kpɔ́n?”

⁴Jezu ka yí gbe nú yě bó ɖɔ: “Mi yi ɖɔ nǔ e se wɛ mi ɖe lɛ́ɛ kpódó nǔ e mɔ wɛ mi ɖe lɛ́ɛ kpó nú Jǎan.

⁵ Nukúntíntɔ́nnɔ lɛ́ɛ ɖo nukúnnú mɔ wɛ; sékúnɔ lɛ́ɛ ɖo zɔnlin ɖi wɛ; gudunɔ lɛ́ɛ sín wǔtu ɖo te jɛ wɛ; tókúnɔ lɛ́ɛ ɖo nǔ se wɛ; è ɖo mɛkúkú lɛ́ɛ fɔ́n wá gbɛ wɛ, bó ɖo Wɛn Ɖagbe ɔ́ jlá wamamɔnɔ lɛ́ɛ wɛ.

⁶Nǔ nyɔ́ nú mɛ e sín nǔɖiɖi ma ná jɛ ayǐ ɖó nyɛ wú ǎ lɛ́ɛ.”

⁷Ée wɛnsagun Jǎan tɔn lɛ́ɛ lɛ́ kɔ ɖidó ɔ́, Jezu jɛ Jǎan xó ɖɔ nú togun ɔ́ jí ɖɔ: “Ani wɛ mi ka yi kpɔ́n ɖo gbětótló mɛ? Fántín ɖé wɛ mi mɔ bɔ jɔhɔn ɖo dǐndán wɛ a? Éeǒ!

⁸Ani mi ka yi mɔ? Mɛ ɖé wɛ mi mɔ, bɔ é dó awu xɔ akwɛ́ a? Mɛ e ka nɔ dó akwɛ́nɔwu lɛ́ɛ ɔ́, axɔ́sú lɛ́ɛ sín xwé gbe wɛ yě nɔ́ nɔ.

⁹Étɛ́ kpɔ́n gbé wɛ mi ka yi? Gbeyíɖɔ Mawu tɔn ɖé wɛ a? Ɛɛn wɛ un ɖɔ nú mi; é ka lɛ́ hú gbeyíɖɔ Mawu tɔn.

¹⁰ Ɖó Jǎan wɛ nyí mɛ e xó ɖɔ wɛ Mawuxówéma ɔ́ ɖe ɔ́ bó ɖɔ: Mawu ɖɔ: ‘Wɛnsagun ce ɖíe un sɛ́ dó e, bɔ é ná jɛ nukɔn nú we, bó ná bló ali ɖó nú we.’

¹¹Má ɖɔ nǔgbó nú mi: ɖo mɛ e è ji sín nyɔ̌nu xomɛ lɛ́ɛ bǐ mɛ ɔ́, ɖokpó yětɔn hú gǎn Jǎan Yɛhwesinlɛnúmɛtɔ́ ɔ́ ǎ. É ka ɖo mɔ̌ có, mɛ e hwe hú mɛ bǐ, ɖo axɔ́súɖuto sɛ́xwé tɔn mɛ ɔ́, hú gǎn Jǎan Yɛhwesinlɛnúmɛtɔ́ ɔ́.

¹² Sín Jǎan Yɛhwesinlɛnúmɛtɔ́ ɔ́ hwenu káká wá jɛ din ɔ́, axɔ́súɖuto sɛ́xwé tɔn ɔ́, hlɔ̌nhlɔ́n nú wɛ é nyí, bɔ mɛ e dó gǎn ɖésú lɛ́ɛ wɛ nɔ́ ba ná klá jɛ nu.

¹³Ɖó gbeyíɖɔ Mawu tɔn lɛ́ɛ bǐ kpódó sɛ́n Mɔyízi tɔn lɛ́ɛ kpó ko ɖɔ xó dó axɔ́súɖuto sɛ́xwé tɔn wú káká wá jɛ Jǎan hwenu.

¹⁴ Bónú mi ná dó mɔ nǔ jɛ xó e ɖɔ wɛ un ɖe ɔ́ wú ɔ́, mi bo tunwun ɖɔ Jǎan wɛ nyí Elíi e ɖó ná wá bɔ è ɖɔ é.

¹⁵Mɛ e ɖó tó, bó ná dó se nǔ ná ɔ́ ní ɖótó, bó se.

¹⁶“Mɛ̌ wú wɛ un ka sigǎn jlɛ́ gbɛtɔ́ din tɔn lɛ́ɛ dó? Yě cí yɔkpɔ́vú e nɔ jínjɔ́n tokplétɛn bó nɔ́ ɖo xó sú sɛ́ dó gbɛ̌ yětɔn ɖě lɛ́ɛ wɛ ɔ́ ɖɔhun.

¹⁷Yě nɔ́ ɖo ɖiɖɔ wɛ ɖɔ: ‘Mǐ kún kpete dó ji awǎjijɛ han nú mi, bɔ mi gbɛ́ we ɖú; mǐ ji nǔwamɛ han nú mi bɔ mi gbɛ́ alě ná.’

¹⁸Ɖó Jǎan wá, bó nɔ́ ɖu nǔ ǎ; é ka nɔ́ nu vɛ̌ɛn ǎ; bɔ è ɖɔ: ‘Yɛ nyanya wɛ ɖo jǐ tɔn.’

¹⁹Nyɛ Gbɛtɔ́ví ɔ́ ka wá bó nɔ́ ɖu nǔ, bó nɔ́ nu vɛ̌ɛn, bɔ è ɖɔ: ‘Nya élɔ́ ɔ́, adɔtɔ́nɔ wɛ; vɛ̌ɛnnutɔ́ wɛ; tokwɛ́yítɔ́ lɛ́ɛ kpódó hwɛhutɔ́ lɛ́ɛ kpó sín xɔ́ntɔn wɛ.’ Lo ɔ́, nǔnywɛ́ Mawu tɔn ɖe hwɛjijɔ é ɖésúnɔ tɔn xlɛ́ gbɔn nǔwiwa tɔn lɛ́ɛ mɛ.”

²⁰Ée Jezu ɖɔ xó énɛ́ lɛ́ɛ vɔ ɔ́, é jɛ hwɛ dó mɛ e sín tomɛ é jlɛ́ nǔ gěgé ɖe lɛ́ɛ jí, ɖó yě lɛ́ kɔ sín hwɛ yětɔn lɛ́ɛ gúdo ǎ wútu.

²¹ É ɖɔ: “Heelú mi, Kolazíinnu e mi! Heelú mi, Bɛtisayidanu e mi! Ɖó ényí nǔ e un jlɛ́ ɖo to mitɔn lɛ́ɛ mɛ ɔ́, Tíi kpódó Sidɔ́ɔn kpó wɛ un ko jlɛ́ yě ɖe ɔ́, to énɛ́ lɛ́ɛ mɛ nu lɛ́ɛ ná ko kplá ati, bó ná ko sá afín, bó ná dó ɖe xlɛ́ ɖɔ émí lɛ́ kɔ sín hwɛ émítɔn lɛ́ɛ gúdo.

²²Énɛ́ ɔ́ wú wɛ un ɖo ɖiɖɔ nú mi wɛ ɖɔ: hwɛɖɔzán gbe ɔ́, tó e è nǎ dɔn nú Tilunu lɛ́ɛ kpódó Sidɔ́ɔnnu lɛ́ɛ kpó ɔ́ ná bɔwǔ hú ée è nǎ dɔn nú mi e.

²³ Kafaanawúmu, hwɛ ɔ́ ka lo? È nǎ sɔ́ we yi jǐ káká yi sɔ́ jǐnukúnsin wɛ a vɛdó a? Gbeɖé kpɔ́n! Káká kútomɛ wɛ Mawu ná kpíkpé we nyi; ɖó nǔ e un jlɛ́ ɖo tɛ́ntin towe lɛ́ɛ ɔ́, ényí Sodɔ́mu wɛ un ko jlɛ́ yě ɖe ɔ́, to énɛ́ ɔ́ ná kpo ɖo te káká jɛ égbé.

²⁴ Énɛ́ ɔ́ wú wɛ un ɖo ɖiɖɔ nú we wɛ ɖɔ: hwɛɖɔzán gbe ɔ́, tó e è nǎ dɔn nú Sodɔ́muto ɔ́ ná bɔwǔ hú ée è nǎ dɔn nú we ɔ́.”

²⁵Hwenɛ́nu ɔ́, Jezu yí xó, bó ɖɔ: “Daá! Aklúnɔ jǐnukúnsin kpódó ayǐkúngban kpó tɔn, un dó kú nú we, ɖó a sɔ́ nǔ énɛ́ lɛ́ɛ hwlá dó nukúnnú-mɔjɛnǔmɛtɔ́ lɛ́ɛ kpódó nǔnywɛ́tɔ́ lɛ́ɛ kpó, lobo ka ɖe yě xlɛ́ vǐ ɖo anɔ̌nu lɛ́ɛ.

²⁶Mɔ̌ wɛ, Daá! Ɖó lě e a jlǒ gbɔn é nɛ́.

²⁷ “Nǔ bǐ wɛ Tɔ́ ce sɔ́ dó alɔ ce mɛ, bɔ mɛ ɖěbǔ ka mɔ nǔ jɛ Vǐ ɔ́ wú, zɛ Tɔ́ ɔ́ wú ǎ; mɛ ɖěbǔ ka lɛ́ mɔ nǔ jɛ Tɔ́ ɔ́ wú, zɛ Vǐ ɔ́ kpódó mɛ e Vǐ ɔ́ jló ná ɖe e xlɛ́ lɛ́ɛ kpó wú ǎ.

²⁸“Mi wá gɔ̌n ce; mi mɛ e agban kpinkpɛn hinhɛn cikɔ ná lɛ́ɛ é bǐ, bónú ma ná gbɔjɛ́ mi.”

²⁹ Mi yí nǔkplɔ́nmɛ ce lɛ́ɛ se, bónú lǐndɔ̌n mitɔn lɛ́ɛ ná vo, ɖó mɛ fífá wɛ un nyí, bó nyí xomɛnyɔ́tɔ́.

³⁰Ɖó nǔkplɔ́nmɛ ce lɛ́ɛ vɛ́ wǔ ǎ, su ce lɛ́ɛ ka vɛ́ nyi ǎ.