Read fon Matíe 12 Bible Online

Matíe 12 - fon bible

Matíe 12

¹ Ée Jezu ɖɔ xó énɛ́ lɛ́ɛ, bɔ é ná nɔ zaan ɔ́, é kpódó ahwanvú tɔn lɛ́ɛ kpó wá ɖo ali ɖé jí gbɔn dín wɛ, ɖo jinukúngle ɖé mɛ, ɖo gbɔjɛzán Jwifu lɛ́ɛ tɔn gbe. Xovɛ́ ka sin ahwanvú tɔn lɛ́ɛ, bɔ yě jɛ jinukún ɔ́ ba jí, bó jɛ ɖuɖu jí.

²Ée Falizyɛn lɛ́ɛ mɔ mɔ̌ ɔ́, yě ɖɔ nú Jezu ɖɔ jí: “Kpɔ́n ahwanvú towe lɛ́ɛ ɖo nǔ e Mɔyízisɛ́n ɔ́ gbɛ́ ɖɔ è ma wa gbɔjɛzán gbe ó é wa wɛ.”

³ Jezu ka yí gbe nú yě ɖɔ jí: “Nǔ e Davídi wa hwenu e xovɛ́ sin é kpódó mɛ tɔn lɛ́ɛ kpó ɔ́, mi xá kpɔ́n ǎ cé?

⁴ É byɔ́ sinsɛnxɔ mɛ, bɔ é kpódó mɛ tɔn lɛ́ɛ kpó ɖu nǔɖuɖu e è sɔ́ xwlé Mawu é; ɖo sɛ́n mǐtɔn mɛ ɔ́, yě ká ɖó ná ɖu ǎ; vɔ̌sánú-xwlémawutɔ́ lɛ́ɛ kɛ́ɖɛ́ jɛ́n wɛ ɖó ná ɖu.

⁵ Abǐ, mi ma xa ɖo sɛ́nwéma ɔ́ mɛ ɖɔ gbɔjɛzán gbe ɔ́, vɔ̌sánú-xwlémawutɔ́ e jí azɔ̌ ɖe ɖo sinsɛnxɔ mɛ lɛ́ɛ nɔ́ gba gbɔjɛzánsɛ́n ɔ́, cóbɔ é nɔ́ gɔn hwɛ nyí nú yě ǎ cé?

⁶Má ɖɔ nú mi, nǔ hú gǎn sinsɛnxɔ wɛ ɖo fí.

⁷ Nǔ e ɖɔ wɛ è ɖe bo ɖɔ: ‘Nǔbláwǔkúnúmɛ ba wɛ un ɖe; vɔ̌sísá ba wɛ un ɖe ǎ’ ɔ́, ényí ɖɔ mi ko mɔ nukúnnú jɛ xógbe énɛ́ wú wɛ ɔ́, mi sɔ́ ná ɖo hwɛ dó xomɛvɔ́nɔ lɛ́ɛ wɛ ǎ;

⁸ɖó nyɛ Gbɛtɔ́ví ɔ́ wɛ kpa acɛ nú gbɔjɛzán ɔ́.”

⁹Ée Jezu gosín fínɛ́ ɔ́, é yi kplɔ́ngbasá yětɔn.

¹⁰Nya ɖé ka ɖo fínɛ́, bɔ alɔ tɔn ɖokpó kú. Mɛ e ɖo fínɛ́ lɛ́ɛ kanbyɔ́ Jezu ɖɔ: “Sɛ́n ɔ́ ná gbe ɖɔ è nǐ gbɔ azɔn nú mɛ gbɔjɛzán gbe a?” Yě ɖɔ mɔ̌, ɖó yě ná mɔ nǔɖé wú ɖó dó, bó ná dó ɖó hwɛ n'i wútu.

¹¹ Jezu ka yí gbe nú yě ɖɔ: “Mɛ̌ ka ɖo mi mɛ, bónú gbɔ̌ ɖokpó e ɖo así tɔn ɔ́ jɛ dó mɛ gbɔjɛzán gbe ɔ́, é ma ná yi ɖe tɔ́n ǎ;

¹²gbɛtɔ́ ka xɔ akwɛ́ hú gbɔ̌. Ényí mɔ̌ hǔn, ɖo sɛ́n mǐtɔn mɛ ɔ́, è hɛn ɔ́, è nǎ wa ɖagbe gbɔjɛzán gbe.”

¹³Ée é ɖɔ mɔ̌ ɔ́, é ɖɔ nú nya ɔ́ ɖɔ: “Dlɛ̌n alɔ towe,” bɔ nya ɔ́ dlɛ́n alɔ, bɔ alɔ jɛ alɔ tɛn mɛ, bó cí wegɔ́ ɔ́ ɖɔhun,

¹⁴bɔ Falizyɛn lɛ́ɛ tɔ́n, bó yi kpá dó lě e yě ná hu Jezu gbɔn ɔ́ wú.

¹⁵Ée Jezu tunwun ɖɔ yě blá gbě émítɔn ɔ́, é gosín fí e é ɖe ɔ́; mɛ lɛ́ɛ ka nyi ahwan xwedó e, bɔ é gbɔ azɔn nú azinzɔnnɔ lɛ́ɛ bǐ.

¹⁶Lo ɔ́, é dó sɛ́n nú yě syɛ́nsyɛ́n ɖɔ yě ní ma yi ɖɔ mɛ e émí nyí ɔ́ nú mɛɖé ó.

¹⁷Nǔ nyí mɔ̌, bónú nǔ e è ko ɖɔ ɖ'ayǐ gbɔn gbeyíɖɔ Mawu tɔn Ezayíi jí ɔ́ ná dó jɛ; é wɛ nyí ɖɔ:

¹⁸ “Mɛsɛntɔ́ ce e un sɔ́ ɔ́ ɖíe. Mɛ vívɛ́ná ce wɛ bɔ xomɛ nɔ hun mì dó wǔ tɔn. Un ná sɔ́ Yɛ ce ɖó jǐ tɔn, bɔ é ná jlá hwɛjijɔxó Mawu tɔn nú akɔta lɛ́ɛ bǐ.

¹⁹É ná dɔn nǔ xá mɛɖé ǎ; é ka ja xó sú gbé ǎ; mɛɖé ka ja gbe tɔn se gbé ɖo toligbó xo ǎ.

²⁰É ná nyínyɛ́ fántín e ko tɔ é ǎ; é ka ná cí myɔ e ko ɖo cící wɛ é ǎ. É ná bló mɔ̌ káká jɛ hwenu e mɛ bǐ ná xwedó Mawusɛ́n ɔ́ dó é.

²¹Bɔ akɔta lɛ́ɛ bǐ na ɖó nukún i.”

²²È kplá yɛnyanyanɔ ɖé wá nú Jezu. Nya énɛ́ nɔ́ mɔ nukúnnú ǎ, é ka nɔ́ ɖɔ xó ǎ; Jezu ka gbɔ azɔn n'i, bɔ é jɛ nǔ mɔ jí, bó jɛ xó ɖɔ jí.

²³Nǔ énɛ́ kpácá ahwan ɔ́ tlala, bɔ yě ɖɔ: “Davídi ví ɔ́ nɛ́ ǎ cé?”

²⁴ Ée Falizyɛn lɛ́ɛ se xó énɛ́ ɔ́, yě ɖɔ jí: “Nya élɔ́ ɔ́, Bɛluzebúlu yɛ nyanya lɛ́ɛ xɔ́sú sín hlɔ̌nhlɔ́n wɛ é nɔ dó nya yɛ nyanya lɛ́ɛ ná.”

²⁵Ée Jezu ka mɔ nǔ jɛ ayi yětɔn mɛ ɔ́, é ɖɔ nú yě ɖɔ: “Axɔ́sú ɖé sín to ma ɖó gbe kpɔ́ ǎ ɔ́, to énɛ́ ɔ́ gba wɛ é nɔ́ gba; bɔ to abǐ xwé ɖé tíin bónú mɛ e ɖ'é mɛ lɛ́ɛ sín gbe ma ɖo kpɔ́ ǎ ɔ́, to énɛ́ ɔ́, abǐ xwé énɛ́ ɔ́ gba wɛ é nɔ́ gba.

²⁶Ényí Satáan ka ɖo nǔ e nyí é ɖésúnɔ tɔn ɔ́ nya wɛ ɔ́, ahwan tɔ́n éɖée wɛ é ɖe nɛ́; nɛ̌ wɛ axɔ́súɖuto tɔn ka sixú nɔ te gbɔn?

²⁷Ényí ɖɔ yɛ nyanya lɛ́ɛ xɔ́sú Bɛluzebúlu sín hlɔ̌nhlɔ́n wɛ nyɛ nɔ sɔ́ dó nya yɛ nyanya lɛ́ɛ ná ɔ́, mɛ̌ sín hlɔ̌nhlɔ́n wɛ ahwanvú mitɔn lɛ́ɛ ka nɔ dó nya yě ná lo? Énɛ́ ɔ́ wútu wɛ yě ɖésúnɔ ná wá ɖɔ hwɛ xá mi.

²⁸Lo ɔ́, é nyí ɖɔ Yɛ Mawu tɔn wɛ un nɔ dó nya yɛ nyanya lɛ́ɛ ná ɔ́, hǔn mi bo tunwun ɖɔ axɔ́súɖuɖu Mawu tɔn ko wá mi mɛ.

²⁹“Mɛ ɖé sixú byɔ́ súnnu glegbenu ɖé xwé, bó ná fɔ nǔ tɔn lɛ́ɛ ma to blá ɛ hwɛ̌ ǎ. Lo ɔ́, ényí é blá ɛ ɔ́, é ná fɔ nǔ e ɖo xwé tɔn gbe lɛ́ɛ.

³⁰ “Mɛ e ma ɖo ahwan ce mɛ ǎ ɔ́, mɛ énɛ́ mɔ mì gbɔ ǎ; bɔ mɛ e ma ka nɔ dɔn gbɛtɔ́ lɛ́ɛ wá gɔ̌n ce ǎ ɔ́, gbɛtɔ́ lɛ́ɛ nya dó zɔ nú mì wɛ é ɖe.

³¹Énɛ́ ɔ́ wú wɛ un ɖo ɖiɖɔ nú mi wɛ ɖɔ: ‘Hwɛ ɖěbǔ e gbɛtɔ́ lɛ́ɛ ná hu ɔ́, kpódó nu ɖěbǔ e yě ná nylá dó Mawu wú ɔ́ kpó ɔ́, bǐ wɛ è hɛn ɔ́, è nǎ sɔ́ kɛ yě; lo ɔ́, mɛ e ná nylá nu dó Yɛsinsɛn wú ɔ́, è nǎ sɔ́ kɛ ɛ ǎ.

³² Mɛɖěbǔ nylá nu dó nyɛ Gbɛtɔ́ví ɔ́ wú ɔ́, Mawu na sɔ́ kɛ ɛ; lo ɔ́, mɛ e ná nylá nu dó Yɛsinsɛn wú ɔ́, è nǎ sɔ́ kɛ ɛ ɖo hwe élɔ́ nu din ǎ; è ka na lɛ́ sɔ́ kɛ ɛ ɖo hwenu e jǎwe ɔ́ ǎ.’ ”

³³ “Atín ɖagbe ɔ́, sínsɛ́n ɖagbe wɛ é nɔ́ ná, bɔ atín nyanya nɔ ná sínsɛ́n nyanya; ɖó sínsɛ́n atín tɔn wɛ è nɔ kpɔ́n, bó nɔ́ dó tunwun atín alɔkpa e é nyí é.

³⁴ Jakpata kúnkan e mi! Nɛ̌ wɛ mi mɛ e nylá sɔ mɔ̌ lɛ́ɛ ná sixú ɖɔ nǔ ɖagbe gbɔn? Ɖó nǔ e gɔ́ ayi mɛtɔn mɛ ɔ́ wɛ nu mɛtɔn nɔ ɖɔ.

³⁵Mɛ ɖagbe ɔ́, nǔ ɖagbe e ɖo ayi tɔn mɛ ɔ́ wɛ é nɔ ɖe tɔ́n, bɔ mɛ nyanya ka nɔ ɖe nǔ nyanya e ɖo ayi tɔn mɛ ɔ́ tɔ́n.

³⁶Má ɖɔ nú mi: hwɛɖɔzán gbe wá su ɔ́, xó gbló e tɔ́n sín gbɛtɔ́ lɛ́ɛ nu mɛ ɔ́ bǐ sín gbe wɛ yě ná ɖó.

³⁷Ɖó xó e tɔ́n sín hwi ɖésúnɔ nu mɛ ɔ́ wɛ ná ɖe xlɛ́ ɖɔ a nyǐ hwɛjijɔnɔ; xó e ná tɔ́n sín hwi ɖésúnɔ nu mɛ ɔ́ wɛ è nǎ kpɔ́n, bó ná mɔ ɖɔ a nyǐ xomɛvɔ́nɔ, abǐ a kú hwɛ.”

³⁸ Sɛ́nkplɔ́nmɛtɔ́ ɖé lɛ́ɛ kpódó Falizyɛn ɖé lɛ́ɛ kpó yí xó, bó ɖɔ: “Mɛ̌si, mǐ jló ɖɔ a nǐ jlɛ́ nǔ ɖokpó nú mǐ ná kpɔ́n.”

³⁹ Jezu ka yí gbe nú yě ɖɔ: “Gbɛtɔ́ din tɔn mɛ nyanya gbejímánɔ-númawutɔ́ élɔ́ lɛ́ɛ ɖo nǔjíjlɛ́ Mawu tɔn ba wɛ. Lo ɔ́, yě sɔ́ ɖo ɖěvo ná mɔ wɛ zɛ gbeyíɖɔ Mawu tɔn Jonási tɔn wú ǎ;

⁴⁰ ɖó lě e Jonási nɔ hweví ɖaxó ɖé sín xomɛ xɔ kéze atɔn zǎn atɔn gbɔn ɔ́, mɔ̌ ɖokpó ɔ́ wɛ nyɛ Gbɛtɔ́ví ɔ́ ná nɔ ayǐkúngban glɔ́ xɔ kéze atɔn zǎn atɔn gbɔn.

⁴¹ Hwɛɖɔzán gbe wá su ɔ́, Ninívunu lɛ́ɛ ná sí te ɖo gbɛtɔ́ din tɔn lɛ́ɛ nukɔn, bó ná ɖó hwɛ nú yě; ɖó hwenu e gbeyíɖɔ Mawu tɔn Jonási ɖɔ Mawuxó nú yědɛɛ lɛ́ɛ ɖo Ninívu ɔ́, yě se, lobo lɛ́ kɔ sín hwɛ yětɔn lɛ́ɛ gúdo; éɖíe, nǔ e ka ɖo fí din ɔ́ hú gǎn Jonási;

⁴² ɖo hwɛɖɔzán gbe ɔ́, axɔ́sú nyɔ̌nu tofɔligbé tɔn ɔ́ ná sí te ɖo gbɛtɔ́ din tɔn lɛ́ɛ nukɔn, bó ná ɖó hwɛ nú yě; ɖó é gosín to línlín mɛ, bó wá ɖótó nǔnywɛ́xó axɔ́sú Salomɔ́ɔ tɔn. Nǔ e ka ɖo fí din ɔ́ hú gǎn Salomɔ́ɔ.”

⁴³“Ényí yɛ nyanya gosín mɛɖé jí ɔ́, é nɔ́ yi dán gbɔn axéko jí, bó nɔ́ ɖo gbɔjɛtɛn ba wɛ; ényí é ma mɔ ǎ ɔ́,

⁴⁴é nɔ́ ɖɔ: ‘Un ná lɛ́ kɔ yi xwé ce e gbe un gosín ɔ́.’ Nú é ka lɛ́ kɔ wá ɔ́, é nɔ́ mɔ ɖɔ nɔtɛn énɛ́ kpo ɖo vɔ̌tɔ́, bɔ è ko blóɖó bǐ.

⁴⁵Nú é mɔ mɔ̌ ɔ́, é nɔ́ yi kplá yɛ nyanya ɖěvo e nylá hú é ɖésúnɔ ɔ́ tɛ́nwe dó éɖée jí, bɔ yě nɔ wá sá xwé nyi fínɛ́, bɔ lě e nya énɛ́ sín gbɛ nɔ wá cí ɔ́ nɔ lɛ́ nylá hú lě e é ko ɖe gbɔn ɖ'ayǐ é. Mɔ̌ wɛ é ná nyí gbɔn nú gbɛtɔ́ nyanya din tɔn lɛ́ɛ é nɛ́.”

⁴⁶Jezu kpo ɖo xó ɖɔ nú togun ɔ́ wɛ, bɔ nɔ tɔn kpódó nɔví tɔn lɛ́ɛ kpó wá, bó ɖo te ɖo hɔnto, bó jló ná ɖɔ xó n'i; [

⁴⁷bɔ mɛɖé wá ɖɔ n'i ɖɔ: “Éɖíe! Nɔ towe kpódó nɔví towe lɛ́ɛ kpó ɖo biba we wɛ; yě ɖo te ɖo hɔnto, bó jló ná ɖɔ xó nú we.”]

⁴⁸Jezu ka yí gbe nú mɛ e wá ɖɔ xó n'i ɔ́ ɖɔ: “Mɛ̌ ka nyí nɔ ce? Mɛ̌ ka nyí nɔví ce lɛ́ɛ?”

⁴⁹Ée é ɖɔ mɔ̌ ɔ́, é dlɛ́n alɔ dó ahwanvú tɔn lɛ́ɛ, bó ɖɔ: “Nɔ ce kpódó nɔví ce lɛ́ɛ kpó ɖíe;

⁵⁰ɖó mɛ ɖěbǔ bló Tɔ́ ce e ɖo sɛ́xwé ɔ́ sín jlǒ ɔ́, mɛ énɛ́ wɛ nyí nɔví ce súnnu, bó nyí nɔví ce nyɔ̌nu, bó nyí nɔ ce.”