Read fon Matíe 17 Bible Online

Matíe 17 - fon bible

Matíe 17

¹ Azǎn tɔn ayizɛ́n gúdo ɔ́, Jezu kplá Piyɛ́ɛ, bó kplá Jaki kpódó Jaki nɔví Jǎan kpó, bɔ yě yi xá só ɖaxó ɖé jí; mɛ ɖěbǔ sɛkpɔ́ yě ǎ.

²Jezu húzú agbaza ɖo nukɔn yětɔn, bɔ nukún tɔn mɛ nɔ́ kɔ́n ɖi hwesivɔ́ ɖɔhun; bɔ awu tɔn lɛ́ɛ wé pépé.

³Ahwanvú tɔn atɔn lɛ́ɛ mɔ Mɔyízi kpó Elíi kpó ɖo xó ɖɔ xá ɛ wɛ.

⁴Ée Piyɛ́ɛ mɔ mɔ̌ ɔ́, é ɖɔ nú Jezu ɖɔ: “Aklúnɔ, fí e mǐ wǎ din ɔ́ nyɔ́ mɛ! Nú a jlǒ ɔ́, un ná gbá goxɔ atɔn ɖó fí, bɔ ɖokpó ná nyí towe, ɖokpó ná nyí Mɔyízi tɔn, bɔ ɖokpó ná nyí Elíi tɔn.”

⁵ Xó énɛ́ ɖɔ wɛ Piyɛ́ɛ ɖe kɛ́ɖɛ́ bɔ akpɔ́kpɔ́ wěwé tété ɖé wá cyɔ́n yě, bɔ gbe ɖé nɔ́ ɖi ɖo akpɔ́kpɔ́ ɔ́ mɛ, bó nɔ́ ɖɔ: “Vǐ ce vívɛ́ná wɛ mɛ élɔ́ nyí; xomɛ nɔ hun mì dó wǔtu tɔn; mi ɖótó e.”

⁶Ée ahwanvú tɔn lɛ́ɛ se gbe énɛ́ ɔ́, xɛsi ɖaxó ɖé jɛ yě jí, bɔ yě bǐ xwe agbɔ̌nnusú do.

⁷Jezu ka sɛ yá yě, bó ɖó alɔ yě jí, bó ɖɔ nú yě ɖɔ: “Mi sí te, mi ma ɖi xɛsi ó.”

⁸Ée yě zé ta yi jǐ, bó kpɔ́n fí bǐ ɔ́, yě sɔ́ mɔ mɛɖé ɖo fínɛ́ zɛ Jezu ɖokpónɔ wú ǎ.

⁹Hwenu yě wá ɖo te jɛ sín só ɔ́ jí wɛ ɔ́, Jezu gbɛ́ nú yě ɖɔ: “Mi ma ɖɔ nǔ e mi mɔ ɔ́ nú mɛɖé cóbónú Mawu ná fɔ́n nyɛ Gbɛtɔ́ví ɔ́ sín kú ó.”

¹⁰ Ahwanvú tɔn lɛ́ɛ ka kanbyɔ́ ɛ ɖɔ: “Nɛ̌ ka gbɔn bɔ sɛ́nkplɔ́nmɛtɔ́ lɛ́ɛ nɔ́ ɖɔ Elíi wɛ ná jɛ nukɔn wá hwɛ̌?”

¹¹Jezu ka yí gbe nú yě ɖɔ: “Nǔgbó wɛ, Elíi ɖó ná wá jɛ nukɔn, bó ná to nǔ lɛ́ɛ bǐ ɖó alɔ jí.

¹² Lo ɔ́, nyɛ ɖo ɖiɖɔ nú mi wɛ ɖɔ: Elíi ɔ́ ko wá, bɔ yě mɔ ɛ, cóbó tunwun i ǎ, lobo wa nǔ e jló yě lɛ́ɛ bǐ xá ɛ. Mɔ̌ ɖokpó ɔ́ jɛ́n wɛ yě ná wá dó ya nú nyɛ Gbɛtɔ́ví ɔ́ gbɔn.”

¹³Hwenɛ́nu wɛ ahwanvú tɔn lɛ́ɛ wá mɔ nǔ jɛ wú ɖɔ Jǎan Yɛhwesinlɛnúmɛtɔ́ ɔ́ xó ɖɔ wɛ é ɖe.

¹⁴Ée yě jɛ te sín só ɔ́ jí, bó wá mɛ e ɖo só ɔ́ kpá lɛ́ɛ gɔ́n ɔ́, nya ɖokpó sɛkpɔ́ Jezu, bó jɛ kpo ɖo nukɔn tɔn, bó ɖɔ n'i ɖɔ:

¹⁵“Aklúnɔ! Kú nǔbláwǔ nú vǐ ce, ɖó adǐngbekútɔ́ wɛ, bɔ é ɖo wǔvɛ́ mɔ wɛ ɖésú; hwɛhwɛ wɛ é nɔ́ ɖo myɔ mɛ jɛ wɛ, bó nɔ́ lɛ́ ɖo sin mɛ jɛ wɛ.

¹⁶Un kplá ɛ wá nú ahwanvú towe lɛ́ɛ, yě ká kpé azɔn ɔ́ wú, bó gbɔ n'i ǎ.”

¹⁷Énɛ́ ɔ́, Jezu ɖɔ: “Gbɛtɔ́ nyanya nǔmaɖitɔ́ e mi, káká jɛ hwetɛ́nu wɛ un ná nɔ mi gɔ́n yi jɛ? Káká jɛ hwetɛ́nu wɛ mi ka ná nɔ kɔ jí nú mì yi jɛ? Mi bo kplá azinzɔnnɔ ɔ́ wá nú mì.”

¹⁸Bɔ yě kplá ɛ wá, bɔ Jezu wa adǎn dó yɛ nyanya e ɖo nyaví ɔ́ jí ɔ́ jí, bɔ é gosín jǐ tɔn, bɔ azɔn gbɔ nú nyaví ɔ́ tlóló tɛn tɔn mɛ.

¹⁹Énɛ́ ɔ́ gúdo ɔ́, ahwanvú lɛ́ɛ wá yi mɔ Jezu ɖó vo, bó kanbyɔ́ ɛ ɖɔ jí: “Étɛ́wútu wɛ mǐdɛɛ lɛ́ɛ ma ka kpé yɛ nyanya énɛ́ ɔ́ wú, bó nya ǎ?”

²⁰ Jezu ka yí gbe nú yě ɖɔ: “Nǔɖiɖi kpɛví e mi ɖó ɔ́ wútu wɛ; ɖó ma ɖɔ nǔgbó nú mi, ényí nǔɖiɖi mitɔn na bo sɔ atínkwín e wínní hú atínkwín lɛ́ɛ bǐ é, bónú mi ɖɔ nú só élɔ́ ɖɔ ní sɛ tɛn sín fí, bó yi jɛ dɔ̌n ɔ́, é ná sí te; bɔ nǔ ɖěbǔ wiwa sɔ ná nɔ́ gló mi ǎ. [

²¹Lo ɔ́, yɛ nyanya mɔ̌hunkɔtɔn lɛ́ɛ ɔ́, ɖɛ kpódó nubláblá kpó mɛ jɛ́n wɛ è nɔ sixú kpé yě wú ɖe.”]

²²Jezu kpódó ahwanvú tɔn lɛ́ɛ kpó kplé ɖo Galilée, bɔ é ɖɔ nú yě ɖɔ: “È nǎ wá jó nyɛ Gbɛtɔ́ví ɔ́ nú mɛ lɛ́ɛ;

²³bɔ yě ná hu mì; lo ɔ́, azǎn tɔn atɔngɔ́ ɔ́ gbe ɔ́, Mawu ná fɔ́n mì sín kú.” Xó énɛ́ kú wǔ nú ahwanvú tɔn lɛ́ɛ tlala.

²⁴ Ée Jezu kpódó ahwanvú tɔn lɛ́ɛ kpó byɔ́ Kafaanawúmu ɔ́, mɛ e nɔ yí takwɛ́ sinsɛnxɔ mɛ tɔn lɛ́ɛ sɛ yá Piyɛ́ɛ bó kanbyɔ́ ɛ ɖɔ: “Mɛ̌si midɛɛ lɛ́ɛ tɔn ka nɔ́ ná takwɛ́ sinsɛnxɔ mɛ tɔn ɔ́ ɖě ǎ wɛ a?” Piyɛ́ɛ yí gbe n'i ɖɔ:

²⁵“Ɛɛn,” bó ɖidó xwé gbe. Hwenu e é wá xwé gbe ɔ́, Jezu jɛ nukɔn, bó kanbyɔ́ ɛ ɖɔ: “Axɔ́sú e ɖo gbɛmɛ fí lɛ́ɛ ɔ́, mɛ̌ lɛ́ɛ sí wɛ yě ká nɔ́ yí nǔjɔ kpódó tokwɛ́ kpó ɖe? Toví lɛ́ɛ sí wɛ a, abǐ jǒnɔ lɛ́ɛ sí? Étɛ́ wɛ hwɛ ka mɔ dó xó énɛ́ wú?”

²⁶Piyɛ́ɛ yí gbe n'i ɖɔ: “Jǒnɔ lɛ́ɛ sí wɛ.” Bɔ Jezu ka yí xó, bó ɖɔ n'i ɖɔ: “Ényí mɔ̌ wɛ hǔn, toví lɛ́ɛ ɖ'é mɛ ǎ nɛ́.

²⁷Lo ɔ́, nú mǐ ma wá nyí afɔklɛ́nnú nú yě ó wútu ɔ́, yi xu jí, bó yi ɖó mlɛ; hweví e a nǎ wlí dó nukɔn ɔ́, kɛ nu tɔn, a ná mɔ akwɛ́ e ná kpé takwɛ́ nyɛ kpó hwɛ kpó tɔn ɔ́ ɖokpó ɖ'é mɛ; sɔ́, bó dó yi sú takwɛ́ nyɛ kpó hwɛ kpó tɔn ná.”