Read fon Matíe 19 Bible Online

Matíe 19 - fon bible

Matíe 19

¹Ée Jezu ɖɔ xó énɛ́ lɛ́ɛ vɔ ɔ́, é gosín Galilée, bó yi Judée gbé jí, ɖo Judɛ́ɛn tɔ ɔ́ gúdo dɔ̌n.

²Ahwan wɔ̌buwɔ́bú ɖé lɛ́ɛ xwedó e, bɔ é gbɔ azɔn nú azinzɔnnɔ lɛ́ɛ ɖo fínɛ́.

³Falizyɛn lɛ́ɛ sɛ yá ɛ, bó jló ná ɖó mɔ n'i ɖo xógbe mɛ; yě kanbyɔ́ ɛ ɖɔ: “Sɛ́n mǐtɔn ná gbe ɖɔ è ní ɖó dó nǔɖé wú, bó gbɛ́ asi mɛtɔn a?”

⁴ Jezu ka yí gbe nú yě ɖɔ: “Mi mɔ Mawuxó élɔ́ xa ǎ cé? ‘Ɖo bǐbɛ́mɛ ɔ́, Mawu Gbɛɖótɔ́ ɔ́ bló súnnu kpó nyɔ̌nu kpó,

⁵bó ɖɔ jí, énɛ́ wútu wɛ súnnu ná jó tɔ́ tɔn kpódó nɔ tɔn kpó dó, bó ná jɛ kpɔ́ xá asi tɔn, bɔ yě mɛ we lɛ́ɛ ná húzú ɖokpó géé.’

⁶Énɛ́ ɔ́, yě sɔ́ ɖo mɛ we nyí wɛ ǎ, lo ɔ́, yě húzú mɛ ɖokpó géé. Ényí mɔ̌ hǔn, gbɛtɔ́ ní bó ma klán nǔ e Mawu dɔn cá ɔ́ ó.”

⁷ Falizyɛn lɛ́ɛ yí xó, bó kanbyɔ́ Jezu ɖɔ: “Étɛ́wútu wɛ Mɔyízi ka ná gbe ɖɔ è hɛn ɔ́, è nǎ wlán wěma dó así nú asi mɛtɔn, ɖɔ émí gbɛ́ ɛ, lobo nya ɛ tɔ́n?”

⁸Jezu ka yí gbe nú yě ɖɔ: “Tó tlítlí mitɔn wɛ zɔ́n bɔ Mɔyízi ná gbe énɛ́ ɔ́ mi. Lo ɔ́, é ɖo mɔ̌ ɖ'ayǐ hwenu e Mawu ɖó gbɛ ɔ́ é ǎ.

⁹ Amɔ̌, má ɖɔ nú mi: ‘Ényí nyɔ̌nu ɖé ma dó afɔ gbě ǎ, bónú asú tɔn nya ɛ, bó da nyɔ̌nu ɖěvo ɔ́, aga wɛ súnnu énɛ́ ɔ́ lɛ.’ ”

¹⁰Ahwanvú Jezu tɔn lɛ́ɛ ka ɖɔ n'i ɖɔ: “Ényí mɔ̌ jɛ́n wɛ asidida xó ɔ́ ná nyí gbɔn nú súnnu hǔn, è gbɔ bo gɔn asi da ɔ́, é nyɔ́ hú.”

¹¹Jezu ka yí gbe nú yě bó ɖɔ: “Mɛ bǐ wɛ nɔ yí gbe nú xó énɛ́ ǎ; lo ɔ́, mɛ e Mawu ná acɛ tɔn lɛ́ɛ kɛ́ɖɛ́ wɛ nɔ yí gbe ná.

¹²Ɖó nǔ gěgé tíin, bó nɔ́ zɔ́n, bɔ súnnu lɛ́ɛ nɔ́ gɔn asi da: súnnu ɖé lɛ́ɛ tíin, bó ko nyí mɛ e ma sixú da asi ǎ é sín nɔ yětɔn xomɛ; súnnu ɖé lɛ́ɛ ka tíin, bɔ gbɛtɔ́ lɛ́ɛ wɛ nɔ́ ɖó yě nyi mɔ̌; súnnu ɖěvo lɛ́ɛ ka lɛ́ tíin, bó nɔ́ ɖó yěɖée mɔ̌, ɖó axɔ́súɖuto sɛ́xwé tɔn wú. Mɛ e ná sixú mɔ nǔ jɛ nǔkplɔ́nmɛ élɔ́ mɛ ɔ́ ní bó mɔ nǔ jɛ mɛ.”

¹³Hwenu e Jezu ɖɔ xó énɛ́ lɛ́ɛ vɔ ɔ́, è kplá yɔkpɔ́vú lɛ́ɛ wá n'i, bónú é ná ɖó alɔ ta nú yě, bó ná xo ɖɛ nú yě. Lo ɔ́, ahwanvú tɔn lɛ́ɛ bɛ́ adǎn dó mɛ lɛ́ɛ jí.

¹⁴Jezu ka ɖɔ nú yě ɖɔ: “Mi jó yɔkpɔ́vú lɛ́ɛ dó nú yě ní wǎ gɔ̌n ce; mi ma sú ali dó yě ó; ɖó axɔ́súɖuto sɛ́xwé tɔn ɔ́, mɛ e cí yě ɖɔhun lɛ́ɛ tɔn wɛ.”

¹⁵Ée Jezu ɖɔ mɔ̌ ɔ́, é dlɛ́n alɔ dó yɔkpɔ́vú lɛ́ɛ jí, bó xo ɖɛ dó yě jí, bó gosín fínɛ́.

¹⁶Dɔ̌nkpɛvú ɖé sɛ yá Jezu gbe ɖokpó, bó kanbyɔ́ ɛ ɖɔ: “Mɛ̌si nǔ ɖagbe tɛ́ un ka ɖó ná wa, bɔ Mawu ná ná mì gbɛ mavɔ mavɔ?”

¹⁷Jezu yí gbe n'i ɖɔ: “Étɛ́wú a ka kan nǔ byɔ́ mì dó nǔ e nyí ɖagbe ɔ́ wú? Mawu ɖokpónɔ géé wɛ nyí mɛ ɖagbe. Nú a jlǒ ɖɔ Mawu ná ná émí gbɛ mavɔ mavɔ hǔn, bo nyi Mawusɛ́n lɛ́ɛ.”

¹⁸ Dɔ̌nkpɛvú ɔ́ ka kanbyɔ́ Jezu ɖɔ: “Mawusɛ́n tɛ́ lɛ́ɛ ka wɛ?” Bɔ Jezu yí gbe n'i ɖɔ: “Ma hu mɛ ó, ma lɛ aga ó, ma ja ajo ó, ma ɖe kúnnu agɔ ó,

¹⁹ sí tɔ́ towe kpódó nɔ towe kpó, bó yí wǎn nú nɔzo towe hwi ɖésú ɖɔhun.”

²⁰Dɔ̌nkpɛvú ɔ́ ka ɖɔ nú Jezu ɖɔ: “Un nɔ nyi sɛ́n énɛ́ lɛ́ɛ bǐ; étɛ́ wɛ ka lɛ́ kpo nú mì din bɔ nǎ bló?”

²¹Jezu ka ɖɔ n'i ɖɔ: “Nú a jlǒ ná nyí mɛ ɖagbe yi fó hǔn, bo yi bɛ́ nǔ e ɖo así towe lɛ́ɛ bǐ sa, bó sɔ́ akwɛ́ tɔn má nú wamamɔnɔ lɛ́ɛ; énɛ́ ɔ́, a nǎ ɖó dɔkun ɖo Mawu gɔ́n. Énɛ́ ɔ́ gúdo ɔ́, wǎ xwedó mì.”

²²Ée dɔ̌nkpɛvú ɔ́ se xó énɛ́ lɛ́ɛ ɔ́, é ɖidó wǔbláwúblá, ɖó dɔkunnɔ ɖaxó wɛ é nyí.

²³Jezu ka ɖɔ nú ahwanvú tɔn lɛ́ɛ ɖɔ: “Má ɖɔ nǔgbó nú mi; axɔ́súɖuto sɛ́xwé tɔn mɛ byɔ́byɔ́ ná vɛ́ wǔ nú dɔkunnɔ lɛ́ɛ tlala.

²⁴Má lɛ́ ɖɔ nǔgbó nú mi: nyɛ̌vílinu dín gbɔn ná bɔwǔ nú lǎkúnmí hú dɔkunnɔ ná byɔ́ axɔ́súɖuto Mawu tɔn mɛ.”

²⁵Ée ahwanvú Jezu tɔn lɛ́ɛ se xó énɛ́ lɛ́ɛ ɔ́, é kpácá yě tlala, bɔ yě ɖɔ: “Ényí nǔ ɖo mɔ̌ ɔ́, mɛ̌ wɛ ka sixú ɖo hwlɛngán ɔ́ ná mɔ wɛ lo?”

²⁶Jezu ka kpɔ́n yě bó ɖɔ: “Gbɛtɔ́ lɛ́ɛ wɛ nǔ énɛ́ ɔ́ gló; lo ɔ́, Mawu kpé nǔ bǐ wú.”

²⁷Piyɛ́ɛ ka yí xó, bó ɖɔ nú Jezu ɖɔ: “Mǐdɛɛ lɛ́ɛ ɖíe ka jó nǔ bǐ dó, bó xwedó we e; nɛ̌ wɛ é ka ná wá cí gbɔn nú mǐ?”

²⁸ Bɔ Jezu yí gbe n'i ɖɔ: “Má ɖɔ nǔgbó nú mi: hwenu e nyɛ Gbɛtɔ́ví ɔ́ ná wá jínjɔ́n axɔ́súzinkpo ce jí, ɖo susu ce mɛ, ɖo gbɛ yɔ̌yɔ́ ɔ́ mɛ ɔ́, mi mɛ wěwe e xwedó mì lɛ́ɛ lɔmɔ̌ ná jínjɔ́n axɔ́súzinkpo wěwe jí, bó ná ɖɔ hwɛ xá Izlayɛ́li sín akɔta wěwe lɛ́ɛ,

²⁹bɔ mɛ ɖěbǔ e ná jó xwé tɔn dó, bó ná jó nɔví tɔn súnnu lɛ́ɛ, abǐ nyɔ̌nu lɛ́ɛ dó, bó ná jó tɔ́ tɔn kpódó nɔ tɔn kpó dó, abǐ vǐ tɔn lɛ́ɛ dó, bó ná jó ayǐkúngban tɔn lɛ́ɛ dó, ɖó nyɛ wútu ɔ́, Mawu ná ná ɛ nǔ e hú mɔ̌ ɔ́ donu kanwe ko (100), bó ná lɛ́ ná ɛ gbɛ mavɔ mavɔ.

³⁰ Mɛ e ɖo nukɔn din lɛ́ɛ gěgé ná wá jɛ gǔdo, bɔ mɛ e ɖo gǔdo din lɛ́ɛ gěgé ná wá jɛ nukɔn.”