Read fon Matíe 20 Bible Online

Matíe 20 - fon bible

Matíe 20

¹“Axɔ́súɖuto sɛ́xwé tɔn ɔ́, nǔ e wú è hɛn ɔ́, è nǎ jlɛ́ dó ɔ́ ɖíe: glenɔ ɖé fɔ́n zǎn tɔ́n gbe ɖokpó, bó ná yi ba azɔ̌watɔ́ dó vǐwungle tɔn mɛ.

²Azɔ̌watɔ́ e é mɔ jɛ nukɔn, ɖo zǎnzǎn gan ayizɛ́n mɛ mɔ̌ lɛ́ɛ ɔ́, gankwɛ́ ɖokpó[9], gbe ɖokpó jí wɛ yě ɖɔ gbo dó; bɔ é nyi yě sɛ́ dó gle ɔ́ mɛ.

³Glenɔ ɔ́ lɛ́ tɔ́n ɖo zǎnzǎnhwe mɛ xwe gan tɛ́nnɛ mɛ mɔ̌, bó lɛ́ mɔ mɛ ɖěvo lɛ́ɛ, bɔ yě kplé ɖo tokplétɛn nǔɖé ma wa,

⁴bó ɖɔ nú yě ɖɔ: ‘Mi lɔmɔ̌ ɔ́, mi yi vǐwungle ce mɛ, bó yi wa azɔ̌, bónú ma sú akwɛ́ e jɛ xá ɔ́ mi,’

⁵bɔ yě yi jɛ azɔ̌ wa jí ɖo gle ɔ́ mɛ nǔgbó. Glenɔ ɔ́ ka lɛ́ tɔ́n gan wěwe mɛ mɔ̌, bó lɛ́ tɔ́n gan atɔn mɛ hwelɛ́kɔ mɔ̌, bó bló nǔ ɖokpó ɔ́.

⁶Ée é jɛ gan atɔ́ɔ́n mɛ mɔ̌ ɔ́, glenɔ ɔ́ lɛ́ tɔ́n, bó yi mɔ mɛ ɖěvo lɛ́ɛ ɖo tokplétɛn, bó kanbyɔ́ yě ɖɔ: ‘Étɛ́wú wɛ mi ka cí fí sín zǎnzǎn ɖokpóó káká jɛ lěhwenu nǔɖé ma wa?’

⁷Yě yí gbe n'i ɖɔ: ‘Mɛ ɖěbǔ ma yí mǐ dó azɔ̌mɛ nɛ́!’ Glenɔ ɔ́ ka ɖɔ nú yě ɖɔ: ‘Mi lɔmɔ̌, mi bo wá yi vǐwungle ce mɛ bó yi wa azɔ̌.’

⁸ “Ée gbadanu wá su ɔ́, glenɔ ɔ́ ɖɔ nú nǔjíkpɔ́ntɔ́ tɔn ɖɔ: ‘Yi ylɔ́ azɔ̌watɔ́ lɛ́ɛ wá, bó sú gbeɖokpókwɛ́ mɛ ɖokpó ɖokpó, bɛ́ sín mɛ e wá gbɔn gǔdo bǐ lɛ́ɛ jí káká yi jɛ mɛ e wá jɛ nukɔn lɛ́ɛ jí.’

⁹Yě mɛ e wá jɛ azɔ̌ wa jí ɖo gan atɔ́ɔ́n mɛ hwelɛ́kɔ lɛ́ɛ wá, bɔ é sú gankwɛ́ ɖokpó ɖokpó yě.

¹⁰Yě mɛ e jɛ azɔ̌ wa jí jɛ nukɔn lɛ́ɛ wá, lobo vɛdó ɖɔ émí lɛ́ɛ ná yí akwɛ́ hú mɔ̌ wɛ sín; lo ɔ́, gankwɛ́ ɖokpó ɖokpó jɛ́n è sú yě lɔmɔ̌.

¹¹Hwenu e yě ɖo akwɛ́ ɔ́ yí wɛ ɔ́, yě jɛ nǔ hlún ɖɔ dó glenɔ ɔ́ wú jí,

¹²bó nɔ́ ɖɔ: ‘Yě mɛ e wá gbɔn gǔdo lɛ́ɛ ɔ́, gan xixo ɖokpó jɛ́n wɛ yě dó wa azɔ̌ ná. A ka sú axɔ́ ɖokpó ɔ́ yě kpódó mǐ kpó; mǐdɛɛ lɛ́ɛ ka ko wá jɛ nukɔn, bó xú hwesivɔ́ káká wá jɛ din, bɔ nǔ cikɔ nú mǐ.’

¹³Glenɔ ɔ́ ka yí gbe nú mɛ ɖokpó ɖo yě mɛ, bó ɖɔ: ‘Xɔ́ntɔn ce; un ma ka wa nǔɖé nyi do nú we nɛ́; é má nyí gankwɛ́ ɖokpó jí wɛ mǐ ɖɔ gbo dó, cóbɔ mi jɛ azɔ̌ wa jí ǎ cé?

¹⁴Yǐ akwɛ́ e nyí towe ɔ́, bó yi xwé; gankwɛ́ ɖokpó ɔ́ wɛ jló mì, bɔ un sú mɛ élɔ́ e wá gbɔn gǔdo ɔ́ kpódó hwi kpó.

¹⁵Un sixú sɔ́ akwɛ́ ce dó wa nǔ e jló mì ɔ́ ná ǎ cé? Wǔhwan wɛ a ɖe a? Un sɔ́ akwɛ́ ce dó wa ɖagbe ná ɔ́, hwɛ wɛ nyí bɔ un hu a?’ ”

¹⁶ Énɛ́ ɔ́ gúdo ɔ́, Jezu lɛ́ ɖɔ nú yě ɖɔ: “È nǎ sɔ́ mɛ e ɖo gǔdo lɛ́ɛ wá nukɔn; bó ná sɔ́ mɛ e ɖo nukɔn lɛ́ɛ wá gǔdo.”

¹⁷Hwenu e Jezu ɖo kpó fán wɛ xwe Jeluzalɛ́mu ɔ́, é ylɔ́ ahwanvú tɔn wěwe lɛ́ɛ ɖó vo, bó ɖɔ nú yě ɖɔ:

¹⁸“Mǐ ɖíe xwe Jeluzalɛ́mu e; è nǎ jó nyɛ Gbɛtɔ́ví ɔ́ nú vɔ̌sánú-xwlémawutɔ́gán lɛ́ɛ kpódó sɛ́nkplɔ́nmɛtɔ́ lɛ́ɛ kpó, bɔ yě ná ɖó kúhwɛ nú mì,

¹⁹bó ná jó mì nú mɛ e ma nyí Jwifu ǎ lɛ́ɛ, bɔ yě ná ɖɔ slǎmɛ wǔtu ce; yě ná sɔ́ lanbá dó xo mì, lobo ná ká mì nyi aklúzu jí, bó ná hu mì. Azǎn tɔn atɔngɔ́ ɔ́ gbe ɔ́, Mawu ka ná fɔ́n mì sín kú.”

²⁰Énɛ́ ɔ́ gúdo ɔ́, Zebeɖée ví lɛ́ɛ sín nɔ sɛ yá Jezu é kpódó vǐ tɔn lɛ́ɛ kpó; é jɛ kpo ɖo Jezu nukɔn, bó ɖe kɔ́ n'i, bó jló ná byɔ́ nǔɖé e.

²¹Ée Jezu mɔ ɛ mɔ̌ ɔ́, é kanbyɔ́ ɛ ɖɔ: “Étɛ́ wɛ a jlǒ?” Nyɔ̌nu ɔ́ ka yí gbe n'i ɖɔ: “Un jló ɖɔ a nǐ ná mì gǎnjɛwú ɖɔ vǐ ce we élɔ́ lɛ́ɛ ná jínjɔ́n akpá towe hwenu e a nǎ wá ɖu axɔ́sú é. Mɛɖě ná jínjɔ́n ɖisíxwé, bɔ mɛ ɖě ná jínjɔ́n amyɔxwé.”

²²Jezu ka yí gbe nú vǐ lɛ́ɛ ɖɔ: “Mi tunwun nǔ e byɔ́ wɛ mi ɖe ɔ́ ǎ. Wǔvɛ́ kɔ́fu e nu gbé wɛ un ja ɔ́, mi sixú kpé wú bó nu a?” Yě ká yí gbe ɖɔ: “Ɛɛn mǐ ná kpé wú.”

²³Jezu ka ɖɔ nú yě ɖɔ: “Mi ná wá nu wǔvɛ́ kɔ́fu ce énɛ́ ɔ́ nǔgbó; amɔ̌, ɖisíxwé ce kpódó amyɔxwé ce kpó ná jínjɔ́n ɔ́, nyɛ wɛ ná ná ǎ; mɛ e Mawu ko bló tɛnmɛ énɛ́ lɛ́ɛ ɖ'ayǐ ná lɛ́ɛ tɔn wɛ.”

²⁴Ée Jezu sín ahwanvú wǒ ɖě lɛ́ɛ se xó énɛ́ ɔ́, yě sin xomɛ dó nɔví nɔví we énɛ́ lɛ́ɛ.

²⁵ Jezu ka ylɔ́ yě, bó ɖɔ nú yě ɖɔ: “Mi tunwun ɖɔ togán e ma nyí Jwifu ǎ lɛ́ɛ ɔ́, acɛ gannaganna wɛ yě nɔ́ kpa nú toví yětɔn lɛ́ɛ lobɔ gǎnhúnǔtɔ́ lɛ́ɛ lɔ nɔ kpa acɛ nú yě.

²⁶ Nǔ ka ɖó ná nyí mɔ̌ ɖo midɛɛ lɛ́ɛ tɛ́ntin ǎ; lo ɔ́, mɛ ɖěbǔ e jló ná nyí gǎn ɖo mi mɛ ɔ́, ní nyí mɛsɛntɔ́ mitɔn.

²⁷Mɛ ɖěbǔ ka jló ná nyí nukɔntɔ́ ɖo mi mɛ ɔ́, ní nyí kannumɔ mitɔn.

²⁸Mɔ̌ wɛ ɖe gbɔn nú nyɛ Gbɛtɔ́ví ɔ́; è nǎ sɛn mì wú wɛ un wá ǎ; lo ɔ́, mɛ sɛn gbé wɛ un tɔ́n bó wá, bó ná sɔ́ gbɛ ce jó dó xɔ gbɛ nú mɛ gěgé.”

²⁹Hwenu e Jezu kpódó ahwanvú tɔn lɛ́ɛ kpó tɔ́n sín Jeliko, bó ɖo yiyi wɛ ɔ́, ahwan wɔ̌buwɔ́bú ɖé xwedó e.

³⁰Nukúntíntɔ́nnɔ we ɖé lɛ́ɛ ka ɖo ayǐjínjɔ́n ɖo ali ɔ́ kpá. Ée yě se ɖɔ Jezu wá xweyǐgbe ɔ́, yě jɛ xó sú jí, bó nɔ́ ɖɔ: “Aklúnɔ! Davídi ví, kú nǔbláwǔ nú mǐ.”

³¹Ahwan e xwedó Jezu lɛ́ɛ ka bɛ́ adǎn dó yě jí, bó ɖɔ yě ní xwɛ. Lo ɔ́, yě lɛ́ sú xó syɛ́nsyɛ́n, bó ɖɔ: “Aklúnɔ! Davídi ví, kú nǔbláwǔ nú mǐ.”

³²Énɛ́ ɔ́, Jezu nɔ te, bó ylɔ́ yě, bó kanbyɔ́ yě ɖɔ: “Étɛ́ mi jló ɖɔ má wa nú mi?”

³³Bɔ yě yí gbe n'i ɖɔ: “Aklúnɔ, a ní hun nukún nú mǐ.”

³⁴Bɔ Jezu kú nǔbláwǔ nú yě, bó ɖó alɔ nukún yětɔn lɛ́ɛ jí, bɔ yě mɛ we lɛ́ɛ bǐ sín nukún hun tlóló, bɔ yě jɛ nǔ mɔ jí, bó xwedó Jezu.