Read fon Matíe 21 Bible Online

Matíe 21 - fon bible

Matíe 21

¹Ée Jezu kpódó ahwanvú tɔn lɛ́ɛ kpó sɛkpɔ́ Jeluzalɛ́mu, bó ko ɖo malín málín mɛ dó Bɛtifajée toxo ɔ́, ɖo olívutín só ɔ́ kɔn dɔ̌n ɔ́, Jezu sɛ́ ahwanvú tɔn we dó;

²bó ɖɔ nú yě ɖɔ: “Mi yi gletoxo e ɖo nukɔn mitɔn nɛ́ ɔ́ mɛ; mi jɛ toxo ɔ́ mɛ tlóló ɔ́, mi ná mɔ tócí ɖé ɖo kan mɛ, bɔ vǐ tɔn ɖo akpá tɔn, mi tún yě, bó kplá yě wá nú mì.

³Ényí mɛɖé kan nǔ byɔ́ mi d'é wú hǔn, mi yí gbe n'i ɖɔ: ‘Nǔ tɔn wɛ hu dó Aklúnɔ.’ Azɔn ɖokpó ɔ́, é ná jó yě dó nú mi.”

⁴Nǔ cí mɔ̌, bónú xó e Mawu ko ɖɔ ɖ'ayǐ gbɔn gbeyíɖɔ tɔn jí ɔ́ ná dó jɛ; é wɛ nyí ɖɔ:

⁵ “Mi ɖɔ nú Sinyɔ́ɔnu lɛ́ɛ ɖɔ: axɔ́sú mitɔn ɖíe ja gɔ̌n mitɔn e; xomɛfífánɔ ɖé wɛ; bo jínjɔ́n tócí ɖé kpó tócíví ɖé kpó jí.”

⁶Ahwanvú tɔn we lɛ́ɛ ka yi toxo ɔ́ mɛ, bo bló lě e Jezu ɖɔ gbɔn nú yě é.

⁷Yě kplá tócí ɔ́ kpódó vǐ tɔn kpó wá, bó tɛ́ awu yětɔn nyi yě jǐ, bɔ Jezu jínjɔ́n jí.

⁸Mɛ gěgé tɛ́ avɔ yětɔn nyi ali ɔ́ jí, mɛɖé lɛ́ɛ ka yi fɛ́n atínla lɛ́ɛ, bó tɛ́ kɔn nyi ali ɔ́ jí.

⁹ Mɛ e ɖo nukɔn nú Jezu lɛ́ɛ kpódó mɛ e ɖo gǔdo n'i lɛ́ɛ kpán nɔ́ ɖo xó sú wɛ, bó nɔ́ ɖɔ: “Ozána nú Davídi ví! Susu nú mɛ e jǎwe ɖo Aklúnɔ nyǐkɔ mɛ é! Ozána! Susu nú Mawu Ajalɔ̌nlɔn ɖo jǐxwé!”

¹⁰Ée Jezu byɔ́ Jeluzalɛ́mu ɔ́, to ɔ́ mɛ nu lɛ́ɛ bǐ xozǐn, bó nɔ́ ɖɔ: “Mɛ̌ wɛ ka nyí nya énɛ́ ɔ́?”

¹¹Bɔ mɛ lɛ́ɛ yí gbe ɖɔ: “Gbeyíɖɔ Mawu tɔn Jezu e gosín Nazalɛ́ti, ɖo Galilée gbé jí ɔ́ wɛ.”

¹²Ée Jezu yi Jeluzalɛ́mu ɔ́, é byɔ́ sinsɛnxɔ mɛ, bó nya mɛ e ɖo nǔ sa wɛ ɖo xɔ ɔ́ mɛ lɛ́ɛ kpódó mɛ e ɖo nǔ xɔ wɛ lɛ́ɛ kpó bǐ tɔ́n; é flí akwɛ́ɖyɔ́tɔ́ e ɖo xɔ ɔ́ mɛ lɛ́ɛ sín távo xwe[10], bó flí ahwannɛ́satɔ́ lɛ́ɛ sín azinkpo nyi ayǐ.

¹³ É ɖɔ nú yě ɖɔ: “È ko wlán dó Mawuxówéma ɔ́ mɛ ɖɔ: ‘Xwé ce ɔ́, ɖɛxwé wɛ è nǎ nɔ́ ylɔ́ ɖɔ.’ Lo ɔ́, midɛɛ lɛ́ɛ sɔ́ dó húzú ajotɔ́ lɛ́ɛ sín avatɛn.”

¹⁴Nukúntíntɔ́nnɔ lɛ́ɛ kpódó mɛ e gblé wɔ̌n lɛ́ɛ kpó ka sɛ wá Jezu gɔ́n, ɖo sinsɛnxɔ ɔ́ mɛ, bɔ é gbɔ azɔn nú yě.

¹⁵Lo ɔ́, ée vɔ̌sánú-xwlémawutɔ́gán lɛ́ɛ kpódó sɛ́nkplɔ́nmɛtɔ́ lɛ́ɛ kpó mɔ nǔjíwǔ e jlɛ́ wɛ Jezu ɖe ɖo sinsɛnxɔ ɔ́ mɛ, lobo ka lɛ́ se xó e sú dó kpa susu nú Davídi ví ɔ́ wɛ yɔkpɔ́vú lɛ́ɛ ɖe ɖo sinsɛnxɔ ɔ́ mɛ, bó nɔ́ ɖɔ: “Ozána nú Davídi ví” ɔ́, é vɛ́ yě wú tlala;

¹⁶bɔ yě ɖɔ nú Jezu ɖɔ: “A se nǔ e ɖɔ wɛ vǐ énɛ́ lɛ́ɛ ɖe ɔ́ ǎ cé?” Jezu ka yí gbe nú yě ɖɔ: “Un se ganjí hǔn. Mi lɔmɔ̌ mi ka ko xa Mawuxó élɔ́ ǎ cé? É wɛ nyí ɖɔ: ‘A blǒ bɔ yɔkpɔ́vú lɛ́ɛ kpódó vǐ ɖo anɔ̌nu lɛ́ɛ kpó lɔ kpa susu nú we.’ ”

¹⁷Ée Jezu ɖɔ xó énɛ́ ɔ́ vɔ ɔ́, é jó yě dó nyi fínɛ́, bó tɔ́n sín toxo ɔ́ mɛ, bó yi dɔ́ gletoxo e è nɔ ylɔ́ ɖɔ Betaníi é mɛ.

¹⁸Ayǐhɔ́ngbe tɔn zǎnzǎn, hwenu e Jezu lɛ́ kɔ sín Betaníi, bó ja Jeluzalɛ́mu ɔ́, xovɛ́ sin i.

¹⁹É mɔ fígitín ɖokpó ɖo ali ɔ́ xo, bó yi sá, é ka mɔ nǔɖé ɖ'é jí zɛ ama tɔn lɛ́ɛ wú ǎ; é dó nu fígitín ɔ́, bó ɖɔ: “A sɔ́ ná sɛ́n ɖě gbeɖé ǎ,” bɔ atín ɔ́ mlú ɖa tlóló.

²⁰Ée ahwanvú tɔn lɛ́ɛ mɔ mɔ̌ ɔ́, é kpácá yě tlala, bɔ yě kanbyɔ́ ɛ ɖɔ: “Nɛ̌ atín ɔ́ ka mlú ɖa gbɔn tlóló nɛ́?”

²¹ Jezu ka yí gbe nú yě ɖɔ: “Má ɖɔ nǔgbó nú mi: ényí mi ɖó nǔɖiɖi, bó má nɔ́ xo nǔ kpɔ́n ǎ ɔ́, nǔ e un jlɛ́ dó atín énɛ́ wú din, bɔ mi mɔ ɔ́ kɛ́ɖɛ́ wɛ mi ná jlɛ́ ǎ; lo ɔ́, nú mi na bo ɖɔ nú só élɔ́ ɖɔ: ‘Hɔn hwiɖée sín fí, bó yi jɛ xu mɛ’ ɔ́, nǔ ná nyí mɔ̌.

²²Nǔ ɖěbǔ e mi na xo ɖɛ kpódó nǔɖiɖi kpó, bó byɔ́ Mawu ɔ́, é ná ná bǐ mi.”

²³Hwenu e Jezu byɔ́ sinsɛnxɔ mɛ, bó ɖo nǔ kplɔ́n mɛ lɛ́ɛ wɛ ɔ́, vɔ̌sánú-xwlémawutɔ́gán lɛ́ɛ kpódó tomɛxó lɛ́ɛ kpó sɛ yá ɛ, bó kanbyɔ́ ɛ ɖɔ: “Acɛ tɛ́ a ka ɖó, bó nɔ́ ɖo nǔ énɛ́ lɛ́ɛ wa wɛ? Mɛ̌ wɛ ka ná acɛ énɛ́ ɔ́ we?”

²⁴Jezu ka yí xó, bó ɖɔ nú yě ɖɔ: “Nyɛ lɔ ná kan nǔ ɖokpó byɔ́ mi. Ényí mi ná sin tɔn mì ɔ́, nyɛ lɔ ná ɖɔ acɛ e un ɖó, bó nɔ́ wa nǔ gbɔn mɔ̌ ɔ́ nú mi.

²⁵Jǎan Yɛhwesinlɛnúmɛtɔ́ ɔ́, mɛ̌ ka ná ɛ acɛ, bɔ é nɔ́ lɛ yɛhwesin nú mɛ? Mawu wɛ a, abǐ gbɛtɔ́ lɛ́ɛ?” Lo ɔ́, yě jɛ ɖiɖɔ jí ɖo yěɖée tɛ́ntin ɖɔ: “Ényí mǐ yí gbe n'i ɖɔ Mawu wɛ ɔ́, é ná kanbyɔ́ mǐ ɖɔ: ‘Bɔ étɛ́wú mi ma ka ɖi nǔ nú Jǎan ǎ?’

²⁶Ényí mǐ ka yí gbe n'i ɖɔ gbɛtɔ́ lɛ́ɛ wɛ ɔ́, mǐ ɖó ná ɖi xɛsi nú togun ɔ́; ɖó yě bǐ wɛ sɔ́ Jǎan dó ɖó gbeyíɖɔ Mawu tɔn ná.”

²⁷Énɛ́ ɔ́, yě gbɔ bó yí gbe nú Jezu ɖɔ: “Mǐ tunwun ǎ.” Bɔ Jezu ɖɔ nú yě ɖɔ: “Hǔn nyɛ lɔ ɖo mɛ e ná acɛ mì, bɔ un nɔ dó wa nǔ énɛ́ lɛ́ɛ ná ɔ́ ná ɖɔ nú mi wɛ ǎ.”

²⁸“Mi ɖótó xó élɔ́, bó ɖɔ nǔ e mi lin d'é wú ɔ́ nú mì: nya ɖé ɖó vǐ súnnu we, bó ɖɔ nú mɛ nukɔntɔn ɔ́ gbe ɖokpó ɖɔ jí: ‘Vǐ ce, égbé ɔ́, a na yi wa azɔ̌ ɖo vǐwungle ce mɛ.’

²⁹Vǐ ɔ́ ka gbɛ́; zaanɖé ɔ́, é húzú ayixa bó yi wa azɔ̌ ɖo gle ɔ́ mɛ.

³⁰Tɔ́ yětɔn ka lɛ́ yi ɖɔ xó ɖokpó ɔ́ nú vǐ wegɔ́ ɔ́. Éyɛ́ yí gbe nú tɔ́ ɔ́ ɖɔ: ‘Daá, un ná yi;’ é ka yi ǎ.

³¹Ɖo vǐ we énɛ́ lɛ́ɛ mɛ ɔ́, mɛ̌ ka wa tɔ́ tɔn sín jlǒ?” Bɔ yě yí gbe n'i ɖɔ: “Vǐ nukɔntɔn ɔ́ wɛ.” Jezu ka ɖɔ nú yě ɖɔ: “Má ɖɔ nǔgbó nú mi: tokwɛ́yítɔ́ lɛ́ɛ kpódó agalɛtɔ́ lɛ́ɛ kpó ná jɛ nukɔn nú mi ɖo axɔ́súɖuto Mawu tɔn mɛ.

³² Ɖó Jǎan wá mi gɔ́n, bó kplɔ́n nǔ mi dó lě e mi ná wa nǔ jlɔ́jlɔ́ gbɔn ɔ́ wú, bɔ midɛɛ lɛ́ɛ ɔ́, mi ka yí xó tɔn se ǎ. Lo ɔ́, tokwɛ́yítɔ́ lɛ́ɛ kpódó agalɛtɔ́ lɛ́ɛ kpó yí xó tɔn se, bó lɛ́ kɔ sín hwɛ yětɔn lɛ́ɛ gúdo. Mi mɔ nǔ énɛ́ lɛ́ɛ, có é ka ɖɔ nǔ ɖěbǔ nú mi ɖo ayi mɛ, bónú mi lɔmɔ̌ ná yí xó tɔn se, bó lɛ́ kɔ sín hwɛ mitɔn lɛ́ɛ gúdo ǎ.”

³³ “Mi bo lɛ́ ɖótó lǒ ɖěvo: Nya xwétɔ́ ɖé ɖó ayǐkúngban, bó dó vǐwun kɔn nyi jí, lobo dó kpá lɛ́ lɛ̌ dó bǐ; é lɛ́ kun vǐwunto ɖokpó dó vǐwungbo ɔ́ mɛ. É lɛ́ bló nǔ e jí glecɔ́tɔ́ lɛ́ɛ nɔ́ xá ɔ́ ɖokpó d'é mɛ, lobo sɔ́ vǐwungle énɛ́ dó alɔ mɛ nú vǐwunzɔ́watɔ́ ɖé lɛ́ɛ, bó yi tomɛ.

³⁴Ée vǐwun gbigbɛ hwenu wá su ɔ́, nya ɔ́ sɛ́ mɛsɛntɔ́ tɔn lɛ́ɛ dó vǐwunzɔ́watɔ́ lɛ́ɛ gɔ́n, bónú yě ná yí vǐwun e nyí étɔn ɔ́ wá n'i.

³⁵Hwenu e mɛsɛntɔ́ tɔn lɛ́ɛ yi vǐwunzɔ́watɔ́ lɛ́ɛ gɔ́n ɔ́, vǐwunzɔ́watɔ́ lɛ́ɛ wlí yě, bó xo mɛ ɖokpó ɖo yě mɛ, bó hu mɛ wegɔ́ ɔ́, lobo ɖó awǐnnyaglo nú mɛ atɔngɔ́ ɔ́.

³⁶Nya ɔ́ lɛ́ sɛ́ mɛsɛntɔ́ ɖěvo lɛ́ɛ dó, bɔ yě sukpɔ́ hú mɛ nukɔntɔn lɛ́ɛ. Vǐwunzɔ́watɔ́ lɛ́ɛ ka lɛ́ wa nǔ yětɔn lě e yě wa mɛ nukɔntɔn lɛ́ɛ sín nǔ gbɔn é.

³⁷Gbɔn gǔdo bǐ ɔ́, nya ɔ́ wá sɛ́ vǐ é ɖésúnɔ tɔn dó yě, ɖó é ɖo ɖiɖɔ dó ayi mɛ wɛ ɖɔ: ‘Yě mɔ vǐ ce ɖésú ɔ́, yě ná sí i.’

³⁸Lo ɔ́, ɖěe vǐwunzɔ́watɔ́ lɛ́ɛ mɔ vǐ tɔn lě ɔ́, yě ɖɔ ɖo yěɖée tɛ́ntin ɖɔ: ‘Vǐ e ɖo xu ɔ́ ná ɖu wɛ é ɖíe; mi wá bónú mǐ ná hu i, bónú vǐwungbo ɔ́ ná húzú mǐtɔn.’

³⁹Énɛ́ ɔ́, yě zɔn vǐ ɔ́ jí, bó dɔn ɛ yi vǐwungbo ɔ́ gúdo, bó hu i.”

⁴⁰Jezu kanbyɔ́ yě ɖɔ: “Ényí vǐwunglenɔ ɔ́ ka wá ɔ́, nɛ̌ wɛ é ka ná wa vǐwunzɔ́watɔ́ énɛ́ lɛ́ɛ sín nǔ gbɔn?”

⁴¹Yě yí gbe n'i ɖɔ: “É ná hu nya dídá énɛ́ lɛ́ɛ ma kpɔ́n gǔdo, bó ná sɔ́ vǐwungbo ɔ́ dó alɔ mɛ nú vǐwunzɔ́watɔ́ ɖěvo e ná nɔ ná ɛ kanta tɔn dó hwetɔnnu lɛ́ɛ é.”

⁴² Énɛ́ ɔ́ gúdo ɔ́, Jezu ɖɔ nú yě ɖɔ: “Mi mɔ xó élɔ́ xa ɖo Mawuxówéma ɔ́ mɛ ǎ cé? É wɛ nyí ɖɔ: ‘Awǐnnya e xɔmɛtɔ́ lɛ́ɛ ma sɔ́ dó mɔ nǔɖéwanú ǎ, bó xo nyi kɛ́n ɔ́ wá húzú awǐnnya e ɖo tají é, awǐnnya zwe jí tɔn; Aklúnɔ sín nǔwiwa nɛ́, nǔjíwǔ wɛ é nyí ɖo nukún mǐtɔn mɛ.’

⁴³Énɛ́ ɔ́ wútu wɛ un ɖo ɖiɖɔ nú mi wɛ ɖɔ: ‘Mawu ná ɖe mi sín axɔ́súɖuto tɔn mɛ, bó ná sɔ́ akɔta e nǔwiwa yětɔn lɛ́ɛ jɛ xá axɔ́súɖuto tɔn lɛ́ɛ d'é mɛ, [

⁴⁴bɔ mɛ e ná jɛ awǐnnya énɛ́ ɔ́ jí ɔ́ ná gba hánnyá; mɛ e jí awǐnnya ɔ́ ka ná jɛ ɔ́, é ná li i kpɔ́ɖɔ́kpɔ́ɖɔ́.]’ ”

⁴⁵Ée vɔ̌sánú-xwlémawutɔ́gán lɛ́ɛ kpódó Falizyɛn lɛ́ɛ kpó se lǒ e Jezu dó nɛ́ lɛ́ɛ ɔ́, yě mɔ nǔ jɛ wú ganjí ɖɔ émí xó ɖɔ wɛ é ɖe,

⁴⁶bɔ yě ɖo biba ná wlí i wɛ; lo ɔ́, yě ɖi xɛsi nú togun ɔ́, ɖó togun ɔ́ sɔ́ Jezu dó ɖó gbeyíɖɔ Mawu tɔn ná.