Read fon Matíe 22 Bible Online

Matíe 22 - fon bible

Matíe 22

¹Jezu lɛ́ dó lǒ dó ɖɔ xó nú yě ɖɔ:

²“Axɔ́súɖuto sɛ́xwé tɔn ɔ́, nǔ e wú è hɛn ɔ́, è nǎ jlɛ́ dó ɔ́ ɖíe: axɔ́sú ɖé ylɔ́ agɔ̌ gbe ɖokpó, ɖó vǐ tɔn ɖo asi ná kplá wɛ.

³Axɔ́sú énɛ́ sɛ́ deví tɔn lɛ́ɛ dó, bónú yě yi ylɔ́ mɛ e é da, bɔ yě ná wá ɖu agɔ̌ xá ɛ lɛ́ɛ wá; lo ɔ́, mɛ lɛ́ɛ jló ná wá ǎ.

⁴É lɛ́ sɛ́ deví tɔn ɖěvo lɛ́ɛ dó, bó ɖɔ nú yě ɖɔ: ‘Mi yi ɖɔ nú mɛ e un da lɛ́ɛ ɖɔ nǔɖuɖu lɛ́ɛ ko sɔgbe; un hu nyibú ce asú lɛ́ɛ, bó hu kanlin ce e dó jǒ lɛ́ɛ; nǔ bǐ ko sɔgbe; mi wá ɖu agɔ̌.’

⁵Lo ɔ́, mɛ e è da lɛ́ɛ dó vɛ̌ nú nǔ énɛ́ lɛ́ɛ bǐ, bó ɖidó nǔ yětɔn yětɔn wa gbé; mɛ ɖě ɖidó gleta, mɛ ɖě ɖidó ajɔ̌ tɔn wa gbé.

⁶Mɛ ɖě ká zɔn mɛsɛntɔ́ énɛ́ lɛ́ɛ jí, bó dó ya nú yě káká bó hu yě.

⁷Axɔ́sú ɔ́ sin xomɛ tlala, bó sɛ́ ahwan tɔn lɛ́ɛ dó, bɔ yě yi hu mɛhutɔ́ énɛ́ lɛ́ɛ, bó dó toxo yětɔn zo.

⁸Énɛ́ gúdo ɔ́, é ɖɔ nú deví tɔn lɛ́ɛ ɖɔ: ‘Nǔ lɛ́ɛ bǐ ɖíe ko sɔgbe e; lo ɔ́, mɛ e un da ɖɔ yě ní wá ɖu agɔ̌ xá mì lɛ́ɛ nyí mɛ e è nǎ wlí yɛ̌yi ná ɖé ǎ.

⁹Mi gbɔ bó yi alikpléhɔ̌ntɛn lɛ́ɛ, bó ylɔ́ mɛ e mi ná mɔ lɛ́ɛ bǐ, bónú yě ní wá ɖu agɔ̌.’

¹⁰Mɛsɛntɔ́ énɛ́ lɛ́ɛ ka yi gbɔn ali xo ali xo, bó kplá mɛ e yě mɔ lɛ́ɛ bǐ wá; mɛ ɖagbe kpódó mɛ nyanya kpó bǐ, bɔ gbɛtɔ́ gɔ́ agɔ̌ɖutɛn ɔ́.

¹¹“Axɔ́sú ɔ́ ka wá byɔ́ xɔ ɔ́ sá, bó ja jǒnɔ lɛ́ɛ kpɔ́n gbé, bó mɔ nya ɖé ɖo yě mɛ, bɔ é dó awu e è nɔ dó yi asi kplá gbé ɔ́ ǎ.

¹²Axɔ́sú ɔ́ ɖɔ nú nya énɛ́ ɖɔ: ‘Xɔ́ntɔn ce! Nɛ̌ a ka wa gbɔn bo byɔ́ xɔsá fí, bɔ awu e è nɔ dó yi asi kplá gbé ɔ́ ma ka ɖo kɔ nú we ǎ?’ Nya ɔ́ ka kɛ nu ǎ.

¹³ Bɔ axɔ́sú ɔ́ ɖɔ nú nǔɖuɖumátɔ́ lɛ́ɛ ɖɔ: ‘Mi blá afɔ tɔn lɛ́ɛ kpódó alɔ tɔn lɛ́ɛ kpó, bó sɔ́ ɛ nyi dó zǐnflú mɛ ɖo kɔ́xo. Fínɛ́ wɛ é ná ya avǐ, bó ná ɖu aɖǔkún ɖe.’ ”

¹⁴Bɔ Jezu wá sú ta nú xó ɔ́, bó ɖɔ: “Mɛ gěgé wɛ Mawu ylɔ́, mɛ kpɛɖé wɛ è ka cyán.”

¹⁵Hwenɛ́nu ɔ́, Falizyɛn lɛ́ɛ yi kpá dó Jezu wú, bó ɖe wě dó lě e yě ná sixú wa gbɔn, bó kan nǔ byɔ́ ɛ, dó ɖó mɔ n'i, bó ná dó wlí i ɖo xó ɖiɖɔ tɔn lɛ́ɛ mɛ ɔ́ wú,

¹⁶bɔ yě sɛ́ ahwanvú yětɔn lɛ́ɛ kpódó toxóɖɔgbɛ́ Elódu tɔn ɖé lɛ́ɛ kpó dó gɔ̌n tɔn, bɔ yě yi ɖɔ n'i ɖɔ: “Mɛ̌si, mǐ tunwun ɖɔ nǔgbóɖɔtɔ́ wɛ a nyǐ, bɔ a nɔ xlɛ́ Mawu sín ali ɔ́ mɛ titewungbe; a nɔ ɖi xɛsi nú nǔ e lin wɛ gbɛtɔ́ lɛ́ɛ ɖe ɔ́ ǎ, ɖó a nɔ kpɔ́n mɛɖé sín nukúnta dó ɖɔ xó ǎ.

¹⁷Ɖo sɛ́n mǐtɔn mɛ ɔ́, è hɛn ɔ́, è nǎ sú takwɛ́ Dadá Hlɔ̌ma tɔn tɔn a, abǐ è nǐ gbɔ súsú? Ɖɔ nǔ e a lin d'é wú ɔ́ nú mǐ.”

¹⁸Jezu ka mɔ nǔ jɛ ayi hízíhízí yětɔn wú, bó ɖɔ nú yě ɖɔ: “Yɛmɛnúwatɔ́ e mi! Étɛ́ sín mɔ ɖó nú mì wɛ mi ka ɖe?

¹⁹Mi xlɛ́ gankwɛ́ e è nɔ dó sú takwɛ́ ɔ́ ná ɔ́ ɖokpó mì;” bɔ yě sɔ́ gankwɛ́ ɖokpó xlɛ́ ɛ;

²⁰bɔ Jezu kanbyɔ́ yě ɖɔ: “Mɛ̌ ɖíe è ɖe ɖ'é jí e? Mɛ̌ sín nyǐkɔ ɖíe ɖ'é jí e?”

²¹Yě yí gbe n'i ɖɔ: “Dadá Hlɔ̌ma tɔn tɔn wɛ.” Jezu ka ɖɔ nú yě ɖɔ: “Mi bo sɔ́ nǔ e nyí Dadá Hlɔ̌ma tɔn tɔn ɔ́ jó nú Dadá Hlɔ̌ma tɔn, bó sɔ́ nǔ e nyí Mawu tɔn ɔ́ jó nú Mawu.”

²²Xó e Jezu ɖɔ nɛ́ ɔ́ kpácá yě tlala, bɔ yě jó e dó, bó yi.

²³ Gbe énɛ́ gbe ɖokpó ɔ́, sinsɛngbɛ́ e è nɔ ylɔ́ ɖɔ Saduseɛn lɛ́ɛ wá Jezu gɔ́n. (Yě wɛ nɔ ɖɔ mɛkúkú lɛ́ɛ kún ná fɔ́n ó.) Yě kanbyɔ́ Jezu ɖɔ:

²⁴ “Mɛ̌si, Mɔyízi ɖɔ: ‘Ényí súnnu ɖé da asi, bó ma ka ji vǐ ǎ, bó kú ɔ́, nɔví tɔn ná sɔ́ asúkúsi ɔ́ da, bó ná ji vǐ ɖo xo tɔn mɛ, bó ná sixú ɖó donu nú nɔví tɔn e kú é.’

²⁵Nɔví nɔví tɛ́nwe ɖé lɛ́ɛ ka ko nɔ mǐ mɛ, bɔ mɛ nukɔntɔn ɔ́ da asi, é ka ji vǐ ɖěbǔ cóbó kú ǎ; bɔ nɔví tɔn sɔ́ asúkúsi ɔ́ da.

²⁶Nǔ ɖokpó ɔ́ wɛ xá mɛ wegɔ́ ɔ́; bó xá mɛ atɔngɔ́ ɔ́ káká yi jɛ mɛ tɛ́nwegɔ́ ɔ́ jí.

²⁷Ée yě bǐ kú gúdo ɔ́, nyɔ̌nu ɔ́ lɔmɔ̌ wá kú.

²⁸Hwenu e mɛkúkú lɛ́ɛ na wá fɔ́n ɔ́, mɛ̌ sín asi wɛ nyɔ̌nu ɔ́ ka na nyí ɖo yě mɛ tɛ́nwe nɛ́ lɛ́ɛ mɛ? Ɖó é ɖíe ko nyí yě bǐ sín asi kpɔ́n e.”

²⁹Jezu ka yí gbe nú yě ɖɔ: “Ali bú wɛ mi ɖe, ɖó mi mɔ nǔ jɛ Mawuxó ɔ́ wú ǎ; mi ka lɛ́ mɔ nǔ jɛ hlɔ̌nhlɔ́n Mawu tɔn wú ǎ.

³⁰Ɖó hwenu e mɛkúkú lɛ́ɛ bǐ ná fɔ́n ɔ́, súnnu na da asi ǎ; nyɔ̌nu ɖě ká sɔ́ ná da asú ǎ, yě ná cí wɛnsagun Mawu tɔn lɛ́ɛ ɖɔhun ɖo sɛ́xwé.

³¹Nǔ e ka kan fínfɔ́n sín kú mɛkúkú lɛ́ɛ tɔn ɔ́, mi mɔ nǔ e Mawu ɖɔ d'é wú ɔ́ xa ǎ cé? É wɛ nyí ɖɔ:

³²‘Nyɛ wɛ nyí Mawu Ablaxámu tɔn, Mawu Izáki tɔn, Mawu Jakɔ́bu tɔn.’ Mawu nyí Mawu mɛkúkú lɛ́ɛ tɔn ǎ; lo ɔ́, mɛ e ɖo gbɛ lɛ́ɛ sín Mawu wɛ é nyí.”

³³Nǔ énɛ́ e Jezu kplɔ́n yě ɔ́ kpácá mɛ e se lɛ́ɛ bǐ.

³⁴Ée Falizyɛn lɛ́ɛ se ɖɔ Jezu xwe Saduseɛn lɛ́ɛ sín nu dó xɔ ɔ́, yě sɛ́ ta kplé,

³⁵bɔ sɛ́nkplɔ́nmɛtɔ́ ɖokpó ɖo yě mɛ, bó jló ná ɖó mɔ nú Jezu, bó kanbyɔ́ ɛ ɖɔ:

³⁶“Mɛ̌si, sɛ́n tɛ́ wɛ ka ɖo tají ɖo sɛ́n lɛ́ɛ bǐ mɛ?”

³⁷ Jezu yí gbe n'i ɖɔ: “ ‘A nǎ yí wǎn nú Aklúnɔ Mawu towe kpódó ayi towe bǐ kpó, kpódó lǐndɔ̌n towe bǐ kpó, kpódó linlin towe bǐ kpó.’

³⁸Sɛ́n ɖaxó e jɛ nukɔn nú sɛ́n lɛ́ɛ bǐ ɔ́ nɛ́.

³⁹ Sɛ́n wegɔ́ ɔ́ e bɔ d'é wú, bó ɖi nukɔntɔn ɔ́ ɖíe: ‘A nǎ yí wǎn nú nɔzo towe hwi ɖésú ɖɔhun.’

⁴⁰Sɛ́n we énɛ́ lɛ́ɛ jí wɛ Mɔyízisɛ́n lɛ́ɛ bǐ, kpódó nǔkplɔ́nmɛ gbeyíɖɔ Mawu tɔn lɛ́ɛ tɔn bǐ kpó jínjɔ́n.”

⁴¹Ée Falizyɛn lɛ́ɛ kplé ɔ́, Jezu kan xó byɔ́ yě

⁴²ɖɔ: “Ani mi ka lin dó Klísu ɔ́ wú? Mɛ̌ ví wɛ é nyí?” Yě yí gbe n'i ɖɔ: “Davídi ví wɛ é nyí.”

⁴³Jezu ka ɖɔ nú yě ɖɔ: “Nú Davídi ví wɛ é nyí ɔ́, nɛ̌ ka gbɔn bɔ Yɛ ɔ́ sɔ́ xó élɔ́ dó ayi mɛ nú Davídi, bɔ é ylɔ́ Klísu ɔ́ ɖɔ: ‘Aklúnɔ,’ bó ɖɔ jí:

⁴⁴ ‘Aklúnɔ ɖɔ nú Aklúnɔ ce ɖɔ: Jínjɔ́n ɖisí ce xwé, káká nú má sɔ́ kɛntɔ́ towe lɛ́ɛ dó bló afɔɖótɛn towe.’

⁴⁵“Hǔn ényí Davídi ɖésú ka ylɔ́ Klísu ɖɔ: ‘Aklúnɔ’ ɔ́, nɛ̌ wɛ é ka sixú lɛ́ nyí vǐ tɔn gbɔn?”

⁴⁶Mɛ ɖé ka sɔ́ kpé xósin ɖé wú bó ná ɛ ǎ; bɔ, sín gbe énɛ́ gbe ɔ́, mɛ ɖěbǔ sɔ́ nɔ́ glá kan nǔ byɔ́ Jezu ǎ.