Read fon Matíe 25 Bible Online

Matíe 25 - fon bible

Matíe 25

¹ “Énɛ́ ɔ́, axɔ́súɖuto sɛ́xwé tɔn ɔ́, è nǎ sɔ́ jlɛ́ dó hwenuxó ɖyɔ̌vǐ wǒ ɖé lɛ́ɛ tɔn wú. Ɖyɔ̌vǐ wǒ lɛ́ɛ fɔ zogbɛ́n yětɔn bó ɖidó asisúnɔ ɔ́ kpé gbé.

²Ɖyɔ̌vǐ wǒ énɛ́ lɛ́ɛ ɔ́, mɛ atɔ́ɔ́n ɖo yě mɛ, bó jɔ xlo, bɔ mɛ atɔ́ɔ́n ɖě lɛ́ɛ ka nyí ayiɖotenánɔ.

³Yě mɛ xlonɔ lɛ́ɛ ɔ́, yě fɔ zogbɛ́n yětɔn lɛ́ɛ, yě ká sɔ́ hɛn ami dó akpá ǎ.

⁴Lo ɔ́, ayiɖotenánɔ lɛ́ɛ hɛn zogbɛ́n yětɔn lɛ́ɛ, bó lɛ́ hɛn ami dó goví mɛ.

⁵Ée asisúnɔ ɔ́ ɖo lǐnlín wɛ ɔ́, yě jɛ kɔmlɔgɔ́ sa jí, káká bó dɔ́ amlɔ.

⁶“Ɖěe zǎn wá xwete ɔ́, mɛɖé jɛ xó sú jí, bó nɔ́ ɖɔ: ‘Asisúnɔ ɔ́ ɖíe jǎwe e, mi tɔ́n bó yi kpé e!’

⁷Hwenɛ́nu ɔ́, ɖyɔ̌vǐ lɛ́ɛ bǐ fɔ́n, bó bló zogbɛ́n yětɔn lɛ́ɛ ɖó.

⁸Xlonɔ atɔ́ɔ́n lɛ́ɛ ka mɔ ɖɔ ami vɔ sín zogbɛ́n émítɔn mɛ, bó ɖɔ nú ayiɖotenánɔ lɛ́ɛ ɖɔ: ‘Mi ná ami mitɔn kpɛɖé mǐ, ɖó zogbɛ́n mǐtɔn lɛ́ɛ ɖo cící wɛ.’

⁹Ayiɖotenánɔ lɛ́ɛ ka yí gbe nú yě ɖɔ: ‘Ami e mǐ hɛn ɔ́ ná sixú kpé mǐ, bó ná kpé mi lɔmɔ̌ ǎ. Mi gbɔ bo yi amisatɔ́ lɛ́ɛ gɔ́n, bó yi jɛ nǔ mitɔn.’

¹⁰Ami ɔ́ jɛ gbé wɛ yě yi, bɔ asisúnɔ ɔ́ wá, bɔ ayiɖotenánɔ atɔ́ɔ́n e kó ɖo gbesisɔ mɛ lɛ́ɛ xwedó e byɔ́ agɔ̌ɖuɖu sín xɔ ɔ́ mɛ, bɔ yě sú hɔn ɔ́, bó dó gan mɛ.

¹¹ Énɛ́ ɔ́ gúdo wɛ ɖyɔ̌vǐ xlonɔ atɔ́ɔ́n lɛ́ɛ lɛ́ kɔ wá, bó nɔ́ ɖɔ: ‘Aklúnɔ, aklúnɔ, hun hɔn nú mǐ!’

¹²Lo ɔ́, asisúnɔ ɔ́ gbɛ́, bó ɖɔ: ‘Má ɖɔ nǔgbó nú mi, un tunwun mi ǎ.’ ”

¹³Bó ná dó sú ta ná ɔ́, Jezu ka lɛ́ ɖɔ nú yě ɖɔ: “Hǔn mi bo nɔ acéjí, ɖó mi tunwun azǎn ɔ́ ǎ, mi ka tunwun gan ɔ́ mɛ ǎ.”

¹⁴“Axɔ́súɖuto sɛ́xwé tɔn ɔ́, nǔ e wú è sixú lɛ́ jlɛ́ dó ɔ́ ɖíe: nya ɖé ɖo tomɛ ná yi wɛ, bó ylɔ́ mɛsɛntɔ́ tɔn lɛ́ɛ, bó sɔ́ dɔkun tɔn lɛ́ɛ dó alɔ mɛ nú yě.

¹⁵É kpɔ́n lě e ɖokpó ɖokpó yětɔn nɔ́ bí dó azɔ̌ wú gbɔn ɔ́, bó sɔ́ dɔkun tɔn dó así nú yě. É sɔ́ sikágankwɛ́ ɖaxó atɔ́ɔ́n dó así nú mɛ nukɔntɔn ɔ́, bó sɔ́ we dó así nú mɛ wegɔ́ ɔ́, lobo sɔ́ ɖokpó dó así nú mɛ atɔngɔ́ ɔ́, lobo yi to mɛ.

¹⁶Ée nya ɔ́ ɖidó tlóló ɔ́, mɛ nukɔntɔn e yí sikágankwɛ́ ɖaxó atɔ́ɔ́n ɔ́ sɔ́ akwɛ́ ɔ́ dó jɛ ajɔ wa ná jí. Ée é wa ajɔ ɔ́ káká ɔ́, é mɔ sikágankwɛ́ ɖaxó atɔ́ɔ́n ɖěvo d'é jí.

¹⁷Mɔ̌ ɖokpó ɔ́, mɛ e yí sikágankwɛ́ ɖaxó we ɔ́ lɔmɔ̌ ɖu we ɖěvo sín le d'é jí.

¹⁸Mɛ atɔngɔ́ ɔ́ e yí sikágankwɛ́ ɖaxó ɖokpó ɔ́ yi kun do, bó sɔ́ gǎn tɔn sín akwɛ́ ɔ́ hwlá d'é mɛ.

¹⁹“Ɖěe mɛsɛntɔ́ énɛ́ lɛ́ɛ sín gǎn yi nɔ to ɔ́ mɛ xɔ azǎn gěgé, bó lɛ́ kɔ wá ɔ́, é ylɔ́ yě, bɔ yě jɛ lě e yě wa akwɛ́ lɛ́ɛ nǔ gbɔn ɔ́ sín gbe ɖó n'i jí.

²⁰Mɛ nukɔntɔn e yí sikágankwɛ́ ɖaxó atɔ́ɔ́n ɔ́ sɛ yá ɛ, bó bɛ́ sikágankwɛ́ ɖaxó atɔ́ɔ́n ɖěvo dó atɔ́ɔ́n ɖěe é yí ɖ'ayǐ ɔ́ jí, bó ɖɔ: ‘Gǎn ce, sikágankwɛ́ ɖaxó atɔ́ɔ́n wɛ a sɔ́ nú mì; atɔ́ɔ́n ɖěvo ɖíe un ka mɔ d'é jí e.’

²¹Bɔ gǎn ɔ́ ɖɔ n'i ɖɔ: ‘A wa nǔ ɖó ganjí; mɛsɛntɔ́ ɖagbe gbejínɔtɔ́ wɛ nú we. Un sɔ́ we ɖó nǔ kpɛɖé nu, bɔ a blǒ ɖó ganjí; din ɔ́, un ná sɔ́ we ɖó nǔ gěgé nu. Énɛ́ ɔ́ wú ɔ́, bo wá j'awǎ xá mì.’

²²Mɛ wegɔ́ ɔ́ e yí sikágankwɛ́ ɖaxó we ɔ́ sɛ yi gǎn tɔn gɔ́n, bó bɛ́ sikágankwɛ́ ɖaxó we ɖěvo dó we ɖěe é yí ɖ'ayǐ ɔ́ jí n'i, bó ɖɔ: ‘Gǎn ce, sikágankwɛ́ we wɛ a sɔ́ nú mì; we ɖěvo ɖíe un ka mɔ d'é jí e.’

²³Bɔ gǎn ɔ́ ɖɔ n'i ɖɔ: ‘A wa nǔ ɖó ganjí; mɛsɛntɔ́ ɖagbe gbejínɔtɔ́ wɛ nú we. Un sɔ́ we ɖó nǔ kpɛɖé nu, bɔ a blǒ ɖó ganjí; din ɔ́, un ná sɔ́ we ɖó nǔ gěgé nu. Énɛ́ ɔ́ wú ɔ́, bó wá j'awǎ xá mì.’

²⁴Mɛ e yí sikágankwɛ́ ɖaxó ɖokpó ɔ́ wá gǎn tɔn gɔ́n, bó ɖɔ n'i ɖɔ: ‘Gǎn ce, un tunwun ɖɔ mɛ syɛ́nsyɛ́n wɛ a nyǐ, bɔ fí e a ma dó nǔkún ɖe ǎ ɔ́ wɛ a nɔ ya nǔkún ɖe; bɔ nǔ e a ma fún ǎ ɔ́ wɛ a nɔ yi bɛ́.

²⁵Énɛ́ ɔ́ wú wɛ xɛsi ɖi mì, bɔ un yi kun do, bó sɔ́ akwɛ́ ɖěe a sɔ́ nú mì ɔ́ hwlá d'é mɛ. Akwɛ́ towe ɖíe, bo yí.’

²⁶Bɔ gǎn ɔ́ yí gbe n'i ɖɔ: ‘Mɛsɛntɔ́ dídá fɔnlínnɔ wɛ nú we. A tunwun ganjí ɖɔ fí e un ma dó nǔ ɖe ǎ ɔ́ wɛ un nɔ ya nǔkún ɖe; bɔ nǔ e un ma fún ǎ ɔ́ wɛ un nɔ bɛ́.

²⁷A nǎ kó sɔ́ akwɛ́ ce dó akwɛ́xwé, bónú un lɛ́ kɔ wá ɔ́, un ná yí kpódó akwɛ́ví tɔn kpó.’

²⁸Gǎn ɔ́ ka wá ɖɔ nú mɛsɛntɔ́ tɔn ɖěvo lɛ́ɛ ɖɔ: ‘Mi yí akwɛ́ ɔ́ sín así tɔn, bó sɔ́ jó nú mɛ e ɖó sikágankwɛ́ ɖaxó wǒ é.

²⁹ Ɖó mɛ e ɖó nǔ ɔ́, è nǎ lɛ́ ná ɛ, bɔ é ná túnflá; lo ɔ́, mɛ e ma ɖó nǔɖé ǎ ɔ́, è nǎ lɛ́ yí kpɛ e ɖo así tɔn ɔ́.

³⁰ Mi sɔ́ mɛsɛntɔ́ nǔvɔ́nɔ énɛ́ nyi dó zǐnflú mɛ ɖo kɔ́xo; fínɛ́ wɛ é ná ya avǐ, bó ná ɖu aɖǔkún ɖe.’ ”

³¹ “Hwenu nyɛ Gbɛtɔ́ví ɔ́ ná lɛ́ kɔ wá, kpódó susu kpó, ɖo wɛnsagun lɛ́ɛ bǐ tɛ́ntin ɔ́, un ná wá jínjɔ́n axɔ́súzinkpo ce jí,

³²bɔ è nǎ kplé akɔta lɛ́ɛ bǐ ɖó nukɔn ce, bɔ un ná má yě ɖó donu we, lě e lɛ̌ngbɔ́nyitɔ́ nɔ́ cyán lɛ̌ngbɔ́ lɛ́ɛ ɖó vo, bó nɔ́ cyán gbɔ̌ lɛ́ɛ ɖó vo gbɔn é.

³³Un ná sɔ́ mɛ ɖagbe lɛ́ɛ ɖó ɖisí ce xwé, bó ná sɔ́ mɛ nyanya lɛ́ɛ ɖó amyɔ ce xwé,

³⁴bɔ nyɛ axɔ́sú ɔ́ ná ɖɔ nú mɛ e ɖo ɖisí ce xwé lɛ́ɛ ɖɔ: ‘Mi wá, mi mɛ e jí Tɔ́ ce ko xo ɖɛ ɖagbe dó lɛ́ɛ. Mi wá yí axɔ́súɖuɖu Mawu tɔn sín nǔ ɖagbe e è ko sɔ́ ɖ'ayǐ nú mi sín hwenu e Mawu ko ɖó gbɛ ɔ́ ɖokpóó é.

³⁵Ɖó xovɛ́ sin mì, bɔ mi ná nǔɖuɖu mì. Kɔ xú mì, bɔ mi ná sin mì. Un nyí jǒnɔ, bɔ mi yí mì dó xwé mitɔn gbe.

³⁶Un ɖo mɛ̌, bɔ mi ná avɔ mì. Un ɖo azɔn jɛ wɛ, bɔ mi kpé nukún wǔ ce. Un ɖo ganxó, bɔ mi wá ba mì kpɔ́n.’

³⁷Mɛ ɖagbe énɛ́ lɛ́ɛ ká ná yí gbe nú mì ɖɔ: ‘Aklúnɔ, hwetɛ́nu wɛ mǐ ká mɔ we ɖo xovɛ́, bó ná nǔɖuɖu we dó? Hwetɛ́nu kɔ ka ɖo xúxú we wɛ, bɔ mǐ ná sin we dó?

³⁸Hwetɛ́nu wɛ a nyǐ jǒnɔ, bɔ mǐ yí we dó xwé mǐtɔn gbe dó? Hwetɛ́nu wɛ a ɖo mɛ̌, bɔ mǐ ná avɔ we dó?

³⁹Hwetɛ́nu wɛ a ka ɖo azɔn jɛ wɛ, abǐ a ɖo ganxó, bɔ mǐ wá ba we kpɔ́n dó?’

⁴⁰Nyɛ axɔ́sú ɔ́ ná yí gbe nú yě ɖɔ: ‘Má ɖɔ nǔgbó nú mi: hweɖěbǔnu e mi bló nǔ énɛ́ lɛ́ɛ nú nɔví ce élɔ́ lɛ́ɛ ɔ́, é ná bo nyí mɛ e ma nyí mɛ ɖé ɖo gbɛtɔ́ lɛ́ɛ nukún mɛ ǎ wɛ ɔ́, nyɛ wɛ mi bló ná.’

⁴¹“Énɛ́ ɔ́ gúdo ɔ́, un ná ɖɔ nú mɛ e ɖo amyɔ ce xwé lɛ́ɛ ɖɔ: ‘Mi sɛ yi zɔ nú mì, mi mɛ e Mawu ko ɖó hwɛ ná lɛ́ɛ é, mi yi jɛ zo e ma nɔ cí gbeɖé ǎ, bɔ Mawu kó bɔ ɖ'ayǐ nú awǒvi kpódó ahwan tɔn lɛ́ɛ kpó é mɛ.

⁴²Ɖó xovɛ́ sin mì, bɔ mi tɛ nǔɖuɖu mì; kɔ xú mì, bɔ mi tɛ sin mì.

⁴³Un nyí jǒnɔ, bɔ mi yí mì dó xwé mitɔn gbe ǎ. Un ɖo mɛ̌, bɔ mi ná avɔ mì ǎ. Un jɛ azɔn, bo lɛ́ nɔ ganxó, bɔ mi ka wá ba mì kpɔ́n ǎ.’

⁴⁴Yě lɔmɔ̌ ka ná kanbyɔ́ mì ɖɔ: ‘Aklúnɔ, hwetɛ́nu wɛ mǐ mɔ we ɖo xovɛ́, abǐ kɔ xú we? Hwetɛ́nu wɛ a nyǐ jǒnɔ ɖo to mǐtɔn mɛ? Hwetɛ́nu wɛ mǐ mɔ we ɖo mɛ̌? Hwetɛ́nu wɛ mǐ mɔ we ɖo azɔn jɛ wɛ, abǐ hwetɛ́nu wɛ mǐ mɔ we ɖo ganxó, bɔ mǐ ma ka gɔ́ alɔ nú we ǎ?’

⁴⁵Un ka ná yí gbe nú yě ɖɔ: ‘Má ɖɔ nǔgbó nú mi, hweɖěbǔnu e mi gbɛ́ nǔ énɛ́ lɛ́ɛ bló nú mɛɖé ɖo mɛ élɔ́ lɛ́ɛ mɛ ɔ́, é ná bó nyí mɛ e ma nyí mɛɖé ɖo gbɛtɔ́ lɛ́ɛ sín nukún mɛ ǎ ɔ́ wɛ ɔ́, nyɛ wɛ mi gbɛ́ blǒbló ná.’

⁴⁶ Mɛ nyanya énɛ́ lɛ́ɛ ɔ́, è nǎ ɖo tó dɔn nú yě wɛ ma gbokɔ, bɔ mɛ e bló jlǒ Mawu tɔn lɛ́ɛ ná yi gbɛ mavɔ mavɔ mɛ.”