Read fon Matíe 26 Bible Online

Matíe 26 - fon bible

Matíe 26

¹Ée Jezu ɖɔ xó énɛ́ lɛ́ɛ bǐ gúdo ɔ́, é ɖɔ nú ahwanvú tɔn lɛ́ɛ ɖɔ:

² “Mi tunwun ɖɔ Dǐndínwáyi sín xwe ɔ́ kpo azǎn atɔn, bɔ è nǎ jó nyɛ Gbɛtɔ́ví ɔ́ nú gbɛtɔ́ lɛ́ɛ, bónú è nǎ ká mì nyi aklúzu jí.”

³Hwenɛ́nu ɔ́, vɔ̌sánú-xwlémawutɔ́gán lɛ́ɛ kpódó tomɛxó lɛ́ɛ kpó kplé ɖo vɔ̌sánú-xwlémawutɔ́ ɖaxó Kayífu xwé,

⁴bó ɖe gbeta tɔ́n dó lě e yě ná wa gbɔn bó ná sixú wlí Jezu, bó ná hu i, bɔ mɛɖé ma ná mɔ nukúnnú jɛ wú ǎ é wú.

⁵Lo ɔ́, yě ɖo ɖiɖɔ wɛ ɖo yěɖée tɛ́ntin ɖɔ: “Mǐ sixú wlí i xwe ɔ́ hwenu ǎ; é ma nyí mɔ̌ ǎ ɔ́, togun ɔ́ ná fɔ́n gǔ.”

⁶Jezu ka wá ɖo Betaníi, ɖo Sinmɔ́ɔ e ko jɛ gudu kpɔ́n ɔ́ sín xwé gbe.

⁷ Nyɔ̌nu ɖé sɛkpɔ́ ɛ, bó hɛn célu xɔ akwɛ́ dó go ɖé mɛ; go énɛ́ ɔ́, awǐnnya e è nɔ ylɔ́ ɖɔ alubatlu ɔ́ wɛ è sɔ́ dó bló ná. É kɔn célu ɔ́ dó ta nú Jezu hwenu e é ɖo nǔ ɖu wɛ é.

⁸Ée ahwanvú Jezu tɔn lɛ́ɛ mɔ mɔ̌ ɔ́, é vɛ́ yě wú tlala, bɔ yě jɛ ɖiɖɔ jí ɖɔ: “Nǔ hɛn gú tɛ́ ka nɛ́?

⁹È nǎ kó sa célu ɔ́ yí akwɛ́ gěgé, bó má nú wamamɔnɔ lɛ́ɛ.”

¹⁰Ée Jezu tunwun nǔ e ɖɔ wɛ ahwanvú tɔn lɛ́ɛ ɖe ɔ́, é ɖɔ nú yě ɖɔ: “Étɛ́ sín tagba dó nú nyɔ̌nu élɔ́ wɛ mi ka ɖe? Nǔ ɖagbe wɛ é wa nú mì hǔn.

¹¹ Mi kpódó wamamɔnɔ lɛ́ɛ kpó ɖo kpɔ́ tɛgbɛ, bɔ mi hɛn ɔ́, mi ná wa ɖagbe nú yě hweɖěbǔnu. Lo ɔ́, nyɛ ɖe xá mi tɛgbɛ ǎ.

¹²Célu énɛ́ e é kɔn dó wǔtu ce ɔ́, agbaza ce blóɖó ɖó ayǐ wɛ é ɖe, nú gbe e gbe è nǎ ɖi mì é.

¹³Má ɖɔ nǔgbó nú mi: fí ɖěbǔ e è nǎ jlá Wɛn Ɖagbe élɔ́ gbɔn ɖo gbɛ ɔ́ bǐ mɛ ɔ́, è nǎ nɔ́ ɖɔ nǔ e nyɔ̌nu élɔ́ wa din ɔ́ sín xó, bó ná nɔ́ dó flín i ná.”

¹⁴Énɛ́ ɔ́ gúdo ɔ́, mɛ e nyí Judási Isikaliɔ́ti ɖo ahwanvú Jezu tɔn wěwe lɛ́ɛ mɛ ɔ́ yi mɔ vɔ̌sánú-xwlémawutɔ́gán lɛ́ɛ,

¹⁵bó ɖɔ nú yě ɖɔ: “Étɛ́ mi ka ná ná mì, bónú má jó Jezu nú mi?” Bɔ yě sú i kpatágankwɛ́ gban (30).

¹⁶Sín gbe énɛ́ gbe ɔ́, Judási jɛ hwenu e ná nyɔ́ n'i, bɔ é ná jó Jezu nú yě ɔ́ ba jí.

¹⁷Hwenu è nɔ ɖu wɔ̌xúxú e mɛ è ma dó tɔ́n ǎ ɔ́ sín xwezán nukɔntɔn ɔ́ gbe ɔ́, ahwanvú Jezu tɔn lɛ́ɛ sɛ yá ɛ, bó kanbyɔ́ ɛ ɖɔ: “Fítɛ́ wɛ a jlǒ ɖɔ mǐ ní yi ɖa Dǐndínwáyixwe ɔ́ sín nǔɖuɖu nú we ɖe?”

¹⁸Jezu ka yí gbe nú yě ɖɔ yě ní yi toxo mɛ, ɖo mɛ lě xwé, bó ɖɔ n'i ɖɔ: “Mɛ̌si ɖɔ: ‘Gan ce kó ɖo nǎ xo wɛ; xwé towe gbe wɛ nyɛ kpódó ahwanvú ce lɛ́ɛ kpó ká ná ɖu Dǐndínwáyi sín xwe ɔ́ ɖe.’ ”

¹⁹Ahwanvú lɛ́ɛ ká yi bló nǔ e Jezu ɖɔ nú yě ɔ́, bó ɖa Dǐndínwáyixwe ɔ́ sín nǔɖuɖu ɖo fínɛ́.

²⁰Ée gbadanu wá su ɔ́, Jezu kpódó ahwanvú tɔn wěwe lɛ́ɛ kpó jínjɔ́n ayǐ, bó jɛ nǔ ɖu jí.

²¹Hwenu e yě ɖo nǔ ɖu wɛ ɔ́, Jezu ɖɔ nú yě ɖɔ: “Má ɖɔ nǔgbó nú mi, mɛ ɖokpó ɖo mi mɛ, bo ná sa mì.”

²²Ée ahwanvú tɔn lɛ́ɛ se mɔ̌ ɔ́, wǔ kú yě tlala. Bɔ yě ɖokpó ɖokpó jɛ nǔ kanbyɔ́ ɛ jí ɖɔ: “Aklúnɔ nyɛ wɛ ǎ mɛ! Abǐ?”

²³ Jezu ka yí gbe nú yě ɖɔ jí: “Mɛ e kplé alɔ xá mì ɖo nǔsúnnúká mɛ ɔ́ wɛ.

²⁴Nyɛ Gbɛtɔ́ví ɔ́ ɖó ná kú, lě e è ko wlán gbɔn ɖó wǔtu ce é; amɔ̌, heelú mɛ e ka ná sa mì é; mɛ énɛ́ gbɔ bó gɔn gbɛ wá ɔ́, é nyɔ́ n'i hú.”

²⁵Judási e ɖo na sá ɛ wɛ ɔ́ ka yí xó, bo ɖɔ: “Mɛ̌si! Nyɛ wɛ ǎ mɛ! Abǐ?” Jezu ka yí gbe n'i ɖɔ: “Hwi wɛ ɖɔ.”

²⁶Hwenu e yě ɖo nǔ ɖu wɛ ɔ́, Jezu zé wɔ̌xúxú bó dó kú nú Mawu, bó kán, lobo ná ahwanvú tɔn lɛ́ɛ bó ɖɔ: “Mi yí, bó ɖu, élɔ́ ɔ́, agbaza ce wɛ.”

²⁷É lɛ́ sɔ́ kɔ́fu ɖokpó bɔ vɛ̌ɛn ɖ'é mɛ, bɔ é dó kú nú Mawu, bó sɔ́ nú ahwanvú tɔn lɛ́ɛ, bo ɖɔ: “Mi yí, bónú mi bǐ ní nu.

²⁸ Ɖó élɔ́ ɔ́, hun ce wɛ; hun e Mawu dó sɔ́ akɔjijɛ sín afɔ ɖó te ná ɔ́ wɛ. É wɛ kɔn nyi ayǐ, dó gbɛtɔ́ gěgé tamɛ, nú hwɛ sɔ́ kɛ mɛ.

²⁹Má ɖɔ nǔgbó nú mi: sín égbé ɔ́, un sɔ́ ɖo vɛ̌ɛn élɔ́ ɖě ná nu wɛ káká yi jɛ gbe e gbe nyɛ kpódó mi kpó ná lɛ́ wá nu yɔ̌yɔ́ ɔ́ ɖo axɔ́súɖuto Tɔ́ ce tɔn mɛ é ǎ.”

³⁰Énɛ́ ɔ́ gúdo ɔ́, yě ji xwe ɔ́ sín han lɛ́ɛ, bó ɖidó olívutín só ɔ́ jí.

³¹ Énɛ́ ɔ́, Jezu ɖɔ nú ahwanvú tɔn lɛ́ɛ ɖɔ: “Mi bǐ sésé wɛ ná hɔn jó mì dó ɖo zǎn élɔ́ mɛ. Ɖó è ko wlán dó Mawuxówéma ɔ́ mɛ ɖɔ: ‘Un ná hu lɛ̌ngbɔ́nyitɔ́ ɔ́, bɔ lɛ̌ngbɔ́ lɛ́ɛ bǐ ná gbadó.’

³² Lo ɔ́, hwenu e Mawu ná fɔ́n mì sín kú gúdo ɔ́, un ná jɛ nukɔn nú mi yi Galilée.”

³³Piyɛ́ɛ ka yí xó, bó ɖɔ nú Jezu ɖɔ: “Ényí mɛ ɖě lɛ́ɛ bǐ ná bó hɔn jó we dó ɔ́, nyɛ ná jó we dó gbeɖé ǎ.”

³⁴Jezu ka ɖɔ n'i ɖɔ: “Má ɖɔ nǔgbó nú we; ɖo zǎn élɔ́ mɛ din ɔ́, cóbónú kokló ná kɔ́ así ɔ́, a nǎ kó gbɛ́ azɔn atɔn ɖɔ émí kún tunwun mì ó.”

³⁵Piyɛ́ɛ ka lɛ́ yí xó, bó ɖɔ: “É ná bó byɔ́ ɖɔ ma yi kú xá we ɔ́, un ná gbɛ́ gbeɖé ɖɔ un kún tunwun we ó ǎ.” Bɔ ahwanvú ɖě lɛ́ɛ lɔ ɖɔ xó ɖokpó ɔ́. (Maki 14.32-42; Luki 22.39-46)

³⁶Énɛ́ ɔ́ gúdo ɔ́, Jezu kpódó ahwanvú tɔn lɛ́ɛ kpó wá yi tɛn e mɛ è nɔ ylɔ́ ɖɔ Jɛtisemaníi é, bɔ é ɖɔ nú ahwanvú tɔn lɛ́ɛ ɖɔ: “Mi jínjɔ́n fí, bónú ma yi dɔ̌n bó yi xo ɖɛ bo wá.”

³⁷É ka kplá Piyɛ́ɛ kpódó Zebeɖée ví we lɛ́ɛ kpó, bɔ wǔ jɛ kúkú i jí, bɔ ado jɛ huhu i jí;

³⁸bɔ é ɖɔ nú yě ɖɔ jí: “Aluwɛ e nɔ dɔn mɛ yi kú é mɛ wɛ un ɖe; mi nɔ fí, bó nɔ wunzɛn xá mì.”

³⁹Ée Jezu ɖɔ mɔ̌ nú yě ɔ́, é sɛ yi nukɔn kpɛɖé, bo xwe agbɔ̌nnusú do, bó jɛ ɖɛ xo jí ɖɔ: “Tɔ́ ce, ényí nǔ sixú nyí mɔ̌ hǔn, blǒ bónú ma gɔn wǔvɛ́ kɔ́fu élɔ́ nu. Amɔ̌, ní ma nyí jlǒ ce ó, lo ɔ́, ní nyí jlǒ towe.”

⁴⁰Énɛ́ ɔ́ gúdo ɔ́, Jezu lɛ́ kɔ wá ahwanvú tɔn atɔn lɛ́ɛ gɔ́n, bo mɔ yě ɖo amlɔ mɛ, bo ɖɔ nú Piyɛ́ɛ ɖɔ jí: “Mi sixú nɔ wunzɛn xá mì nú ganxixo ɖokpó vɔ́vɔ́ ǎ?

⁴¹Mi nɔ wunzɛn bó xo ɖɛ, bó ma wá jɛ tɛ́nkpɔ́n mɛ ó; ɖó gbɛtɔ́ ɖó jlǒ ɖagbe, agbaza tɔn ka ɖó gǎn ɖé ǎ.”

⁴²Jezu lɛ́ jó yě dó azɔn wegɔ́ ɔ́, bó yi xo ɖɛ ɖɔ: “Tɔ́ ce, wǔvɛ́ kɔ́fu élɔ́ ma sixú dín wǔtu ce, bónú un gɔn nunu ǎ jɛ́n wɛ hǔn, jlǒ towe ní bó nyí wiwa.”

⁴³Énɛ́ ɔ́ gúdo ɔ́, Jezu lɛ́ lɛ́ kɔ wá ahwanvú tɔn lɛ́ɛ gɔ́n, bó lɛ́ mɔ yě ɖo amlɔ mɛ, ɖó nukún yětɔn bǐ wɛ kpɛn.

⁴⁴Jezu ka jó yě dó, bó sɛ yi zɔ bó xo ɖɛ azɔn atɔngɔ́ ɔ́, bó lɛ́ vɔ́ nǔ ɖokpó lɛ́ɛ ɖɔ.

⁴⁵Énɛ́ ɔ́ gúdo ɔ́, é lɛ́ lɛ́ kɔ wá ahwanvú tɔn lɛ́ɛ gɔn, bó ɖɔ nú yě ɖɔ: “Mi lɛ́ kpo ɖo amlɔ dɔ́ wɛ, bó ɖo gbigbɔ jɛ wɛ a? Gan e mɛ è nǎ jó nyɛ Gbɛtɔ́ví ɔ́ nyi hwɛhutɔ́ lɛ́ɛ sín alɔ mɛ ɔ́ ɖíe kó xo e.

⁴⁶Mi bo sí te nú mǐ ná yi. Mi kpɔ́n! Mɛ e ɖo sísɔ́ mì jó wɛ ɔ́ ɖíe kó sɛ yá e.”

⁴⁷Mɔ̌ ɖɔ wɛ Jezu ɖe kɛ́ɖɛ́ bɔ mɛ e nyí Judási ɖo ahwanvú tɔn wěwe lɛ́ɛ mɛ ɔ́ wá xwetɔ́n; mɛ gěgé ɖé lɛ́ɛ xwedó e, bó hɛn hwǐ kpódó kpo kpán. Vɔ̌sánú-xwlémawutɔ́gán lɛ́ɛ kpódó tomɛxó lɛ́ɛ kpó wɛ sɛ́ yě dó.

⁴⁸Judási e ɖo sisa ɛ ɖu wɛ ɔ́ ka ko ná xlɛ̌ élɔ́ yě ɖɔ: “Mɛ e un ná kí si ná ɔ́ wɛ, mi wlí i.”

⁴⁹Ée yě wá ɔ́, Judási sɛ yá Jezu tlóló, bó ɖɔ: “Un dó gbe we Mɛ̌si!” Lobo kí si n'i.

⁵⁰Jezu ka ɖɔ n'i ɖɔ: “Xɔ́ntɔn, wa nǔ e gbé a tɔ́n ɔ́;” bɔ mɛ lɛ́ɛ ka zɔn Jezu jí, bó wlí i.

⁵¹Mɛ e ɖo kpɔ́ xá Jezu lɛ́ɛ ɖokpó ka ɖe alɔ, bó sún hwǐ, bó xú vɔ̌sánú-xwlémawutɔ́ ɖaxó ɔ́ sín mɛsɛntɔ́, bó kpa tó e.

⁵²Jezu ka ɖɔ n'i ɖɔ jí: “Sɔ́ hwǐ towe ɖó tɛn tɔn mɛ. Ɖó mɛ e nɔ sɔ́ hwǐ dó fun ahwan ná ɔ́, hwǐ kú wɛ é ná kú.

⁵³Hǔn, a ɖi ɖɔ un hɛn ɔ́, un ná ɖɔ nú Tɔ́ ce, bɔ é ná sɛ́ wɛnsagun sín ahwangbɛ́ wɔ̌buwɔ́bú donu wěwe jɛjí dó mì tlóló din ǎ cé?

⁵⁴Ényí mɔ̌ wɛ un ka ko bló gbɔn ɔ́, nɛ̌ wɛ xó e è ka ko ɖɔ, bó wlán dó Mawuxówéma ɔ́ mɛ ɖ'ayǐ ɔ́ ná jɛ gbɔn?”

⁵⁵ Énɛ́ ɔ́ gúdo ɔ́, Jezu ɖɔ nú ahwan ɔ́ ɖɔ jí: “Ajotɔ́ axánsúnxó wɛ un ka nyí, bɔ mi hɛn hwǐ kpódó kpo kpó, bó wá ja wlǐwlí mì gbé a? Ayǐhɔ́ngbe ayǐhɔ́ngbe wɛ un nɔ ɖo mi tɛ́ntin, bó nɔ ɖo nǔ kplɔ́n mɛ wɛ ɖo sinsɛnxɔ mɛ, có mi ka wlí mì ǎ.

⁵⁶Lo ɔ́, nǔ énɛ́ lɛ́ɛ bǐ jɛ, bónú xó e Mawu ko ɖɔ gbɔn gbeyíɖɔ tɔn lɛ́ɛ jí, bɔ è wlǎn dó Mawuxówéma mɛ ɔ́ ná dó jɛ.” Ahwanvú Jezu tɔn lɛ́ɛ bǐ ka jó e dó, bó hɔn.

⁵⁷Mɛ e wlí Jezu lɛ́ɛ kplá ɛ hɛn yi vɔ̌sánú-xwlémawutɔ́ ɖaxó Kayífu xwé, ɖo fí e sɛ́nkplɔ́nmɛtɔ́ lɛ́ɛ kpódó tomɛxó lɛ́ɛ kpó ko kplé ɖe é.

⁵⁸Piyɛ́ɛ ka jɛ Jezu gúdo, é ka lɔn bó sɛkpɔ́ ɛ ǎ; é nɔ zɔ n'i káká yi vɔ̌sánú-xwlémawutɔ́ ɖaxó ɔ́ sín xwé gbe, bó yi jínjɔ́n mɛsɛntɔ́ lɛ́ɛ kpá, bó ná dó mɔ do nú lě e nǔ lɛ́ɛ ná jɛ gbɔn é.

⁵⁹Vɔ̌sánú-xwlémawutɔ́gán lɛ́ɛ kpódó yě mɛ e ko ɖo toxóɖɔgbɛ́ ɔ́ mɛ lɛ́ɛ bǐ kpán ka ɖo mɛ e ná ɖe kúnnu agɔ nú Jezu, bɔ yě ná mɔ tɛn bó ɖó kúhwɛ n'i ɔ́ ba wɛ.

⁶⁰Mɛ gěgé wá ɖe kúnnu agɔ n'i; lo ɔ́, xó e yě ɖɔ lɛ́ɛ kpé, bónú è nǎ sixú ɖó kúhwɛ n'i ǎ. Gbɔn gǔdo bǐ ɔ́, mɛ we ɖé lɛ́ɛ wá xwetɔ́n,

⁶¹bó ɖɔ: “Nya élɔ́ ɖɔ jí: ‘Un hɛn ɔ́, un ná gba sinsɛnxɔ Mawu tɔn ɔ́, bó ná sɔ́ azǎn atɔn ɖó te, bó ná vɔ́ ɖěvo gbá.’ ”

⁶²Vɔ̌sánú-xwlémawutɔ́ ɖaxó ɔ́ ka sí te, bó kanbyɔ́ Jezu ɖɔ: “Nǔ e kúnnuɖetɔ́ énɛ́ lɛ́ɛ ɖɔ dó wǔ towe ɔ́ nɛ́, a ɖǒ nu ɖé ná kɛ d'é wú a?”

⁶³Jezu ka tin d'é mɛ n'i. Vɔ̌sánú-xwlémawutɔ́ ɖaxó ɔ́ ka ɖɔ n'i ɖɔ: “Ɖo Mawu gbɛɖe ɔ́ sín nyǐkɔ mɛ ɔ́, ényí hwi wɛ nyí Klísu, Mawu ví ɔ́ nǔgbó hǔn, ɖɔ nú mǐ.”

⁶⁴ Jezu ka yí gbe n'i ɖɔ: “Hwi wɛ ɖɔ, lo ɔ́, un lɛ́ ɖo ɖiɖɔ nú mi wɛ ɖɔ: bɛ́ sín din ɔ́, mi ná mɔ nyɛ Gbɛtɔ́ví ɔ́ ɖo ayǐjínjɔ́n, ɖo Mawu Nǔbǐwúkpétɔ́ ɔ́ sín ɖisíxwé; mi ná lɛ́ mɔ mì, bɔ un ná gosín jǐxwé jǎwe, ɖo akpɔ́kpɔ́ jí.”

⁶⁵ Ée vɔ̌sánú-xwlémawutɔ́ ɖaxó ɔ́ se xó énɛ́ ɔ́, é vún awu dó kɔ nú éɖée, bó ɖɔ jí: “É nylá nu dó Mawu wú! Kúnnuɖetɔ́ tɛ́ ba wɛ mǐ ka lɛ́ kpo ɖe? Mi ɖésúnɔ kó se lě e é nylá nu dó Mawu wú gbɔn din é.

⁶⁶Ani wɛ mi lin d'é wú?” Bɔ yě yí gbe n'i ɖɔ: “Nǔ wɛ é wa nyi do bɔ è ɖǒ ná hu i!”

⁶⁷ Ée yě ɖɔ mɔ̌ ɔ́, yě jɛ atán tún dó nukún mɛ n'i jí, bó jɛ nǔ dó e jí. Mɛ ɖě nɔ xo tomɛ n'i,

⁶⁸bó nɔ ɖɔ n'i ɖɔ: “Klísu, bo ɖɔ mɛ e xo we din ɔ́ nú mǐ nǎ kpɔ́n.”

⁶⁹Hwenɛ́nu ɔ́, Piyɛ́ɛ ɖo ayǐjínjɔ́n ɖo kɔ́xota, ɖo xwé ɔ́ gbe. Nyɔ̌nu mɛsɛntɔ́ vɔ̌sánú-xwlémawutɔ́ ɖaxó ɔ́ tɔn ɖokpó sɛ yá ɛ, bó ɖɔ n'i ɖɔ: “Hwi lɔmɔ̌ ko nyí ahwanvú Jezu Galiléenu ɔ́ tɔn kpɔ́n.”

⁷⁰Lo ɔ́, Piyɛ́ɛ gbɛ́, ɖo mɛ e ɖo fínɛ́ lɛ́ɛ bǐ nukún mɛ, bo ɖɔ jí: “Un mɔ nǔ jɛ nǔ e ɖɔ wɛ a ɖe ɔ́ mɛ lɔ ǎ.”

⁷¹Ée Piyɛ́ɛ ɖidó hɔntogbó ɔ́ kɔn ɔ́, mɛsɛntɔ́ nyɔ̌nu ɖěvo mɔ ɛ, bó ɖɔ nú mɛ e ɖo fínɛ́ lɛ́ɛ ɖɔ: “Mɛ élɔ́ ko nyí ahwanvú Jezu Nazalɛ́tinu ɔ́ tɔn kpɔ́n.”

⁷²Piyɛ́ɛ ka lɛ́ gbɛ́ káká, bó xwlé nǔ d'é jí, bo ɖɔ: “Un tunwun nya énɛ́ ǎ.”

⁷³Ée é ka nɔ zaan kpɛɖé ɔ́, mɛ e ɖo fínɛ́ lɛ́ɛ sɛkpɔ́ Piyɛ́ɛ, bo ɖɔ n'i ɖɔ: “Hwi lɔ ɖo yě mɛ dandan, ɖó gbe e ɖo kɔ towe nu ɔ́ ko ɖe xlɛ́.”

⁷⁴Piyɛ́ɛ ka jɛ nu dó éɖée jí, bo jɛ nǔ bǐ xwlé jí, bo ɖɔ: “Un tunwun nya énɛ́ ǎ.” Tlóló ɔ́, kokló kɔ así,

⁷⁵bɔ Piyɛ́ɛ flín xó e Jezu ko ɖɔ n'i ɖ'ayǐ ɔ́, é wɛ nyí ɖɔ: “Cóbónú kokló ná kɔ́ así ɔ́, a nǎ ko gbɛ́ azɔn atɔn ɖɔ émí kún tunwun mì ó.” Ée Piyɛ́ɛ tɔ́n ɔ́, é ya avǐ, kpódó vǐvɛ́ kpó.