Read fon Matíe 27 Bible Online

Matíe 27 - fon bible

Matíe 27

¹Ée ayǐ hɔ́n tlóló ɔ́, vɔ̌sánú-xwlémawutɔ́gán lɛ́ɛ bǐ kpódó tomɛxó lɛ́ɛ kpó kplé, bó ɖe gbeta tɔ́n, ɖɔ émí ná hu Jezu.

²Yě blá Jezu, bó kplá ɛ yi jó nú tokpɔngán Pilátu.

³ Ée Judási e jó Jezu ɔ́ mɔ ɖɔ è ɖǒ kúhwɛ n'i ɔ́, nǔ e é wa ɔ́ vɛ́ n'i, bɔ é sɔ́ gankwɛ́ gban (30) ɔ́ yi jó nú vɔ̌sánú-xwlémawutɔ́gán lɛ́ɛ kpódó tomɛxó lɛ́ɛ kpó,

⁴bó ɖɔ: “Un hu hwɛ; nya e un jó nú mi ɔ́, xomɛvɔ́nɔ wɛ.” Yě ká yí gbe n'i ɖɔ: “Étɛ́ wɛ kan mǐ ɖ'é mɛ? Hwi wɛ énɛ́ kan.”

⁵Judási ka bɛ́ gankwɛ́ gban (30) lɛ́ɛ nyi dó sinsɛnxɔ mɛ, bó ɖidó. Énɛ́ ɔ́ gúdo ɔ́, é yi dó kan kɔ bo kú.

⁶Vɔ̌sánú-xwlémawutɔ́gán lɛ́ɛ ka yi cyán akwɛ́ lɛ́ɛ, bó ɖɔ: “Ɖo sɛ́n mǐtɔn mɛ ɔ́, è ɖǒ ná sɔ́ akwɛ́ élɔ́ yi dó sinsɛnxɔmɛkwɛ́ ɔ́ jí ǎ, ɖó akwɛ́ e è nǎ bó ná dó hu mɛ ná ɔ́ wɛ.”

⁷Ée yě gbéjé kpɔ́n káká ɔ́, yě wá ɖó gbe kpɔ́, bó sɔ́ akwɛ́ ɔ́ dó yi xɔ zɛ̌nmɛtɔ́ ɖé sín gle ná, bó dó ɖó kúxwé nú mɛ e ma nyí Jwifu ǎ lɛ́ɛ.

⁸Nǔ e wú è nɔ ylɔ́ ayǐkúngban énɛ́ ɔ́ ɖɔ kanjɔgle káká jɛ égbé ɔ́ nɛ́.

⁹ Nǔ nyí mɔ̌, bónú xó e Mawu kó ɖɔ ɖ'ayǐ gbɔn gbeyíɖɔ tɔn Jelemíi jí ɔ́ ná dó jɛ; é wɛ nyí ɖɔ: “Yě bɛ́ kpatágankwɛ́ gban (30) lɛ́ɛ; akwɛ́ énɛ́ jí wɛ Izlayɛ́li ví ɖé lɛ́ɛ ɖɔ gbo dó, bó dó xɔ Jezu ná.

¹⁰Yě sɔ́ akwɛ́ ɔ́ dó xɔ zɛ̌nmɛtɔ́ ɖé sín gle ná, lě e Aklúnɔ ko ɖɔ gbɔn nú mì ɖ'ayǐ é.”

¹¹Ée Jezu wá tokpɔngán Pilátu nukɔn ɔ́, tokpɔngán ɔ́ kanbyɔ́ ɛ ɖɔ: “Hwi wɛ nyí Jwifu lɛ́ɛ sín axɔ́sú ɔ́ a?” Jezu ka yí gbe n'i ɖɔ: “Hwi wɛ ɖɔ.”

¹²Lo ɔ́, hwenu e vɔ̌sánú-xwlémawutɔ́gán lɛ́ɛ kpódó tomɛxó lɛ́ɛ kpó ɖo hwɛ dó Jezu wɛ ɖo Pilátu nukɔn ɔ́, Jezu kɛ nu ǎ,

¹³bɔ Pilátu ɖɔ n'i ɖɔ: “A se hwɛ tobutóbú e dó we wɛ yě ɖe ɔ́ ǎ cé? Étɛ́ a mɔ d'é wú?”

¹⁴Jezu ka kɛ nu dó xó e yě ɖɔ dó wǔtu tɔn lɛ́ɛ ɖěbǔ wú ǎ, bɔ é kpácá tokpɔngán ɔ́ tlala.

¹⁵Dǐndínwáyi sín xwe hwenu tɛgbɛ ɔ́, tokpɔngán Hlɔ̌ma tɔn ɔ́ nɔ́ ɖe gantɔ́ e ahwan ɔ́ ko sixú byɔ́ ɛ ɔ́ ɖokpó nyi te.

¹⁶Hwenɛ́nu ɔ́, gantɔ́ ɖokpó ka ɖo gankpá ɔ́ mɛ, bɔ è nɔ ylɔ́ ɛ ɖɔ Jezu Balabási. Gantɔ́ énɛ́ ɔ́, to ɔ́ bǐ wɛ tunwun i.

¹⁷Ée togun ɔ́ wá kplé ɔ́, Pilátu kanbyɔ́ yě ɖɔ: “Mɛ̌ wɛ mi jló nú ma ɖe nyi te nú mi ɖo gantɔ́ lɛ́ɛ mɛ? Jezu Balabási ɔ́ wɛ a, abǐ Jezu e è nɔ ylɔ́ ɖɔ Klísu ɔ́?”

¹⁸Ɖó é tunwun ganjí ɖɔ mɛnúvɛ́mɛwú wɛ zɔ́n bɔ yě wlí Jezu Klísu ɔ́ wá nú émí.

¹⁹Hwɛ ɔ́ ɖɔ wɛ Pilátu ɖe, bɔ asi tɔn sɛ́ wɛn dó e ɖɔ jí: “Nǔɖé ní má kan we ɖo nya énɛ́ ɔ́ sín xó mɛ ó, xomɛvɔ́nɔ wɛ. Ɖó zǎn élɔ́ mɛ ɔ́, un kú dlɔ̌ baɖabaɖa ɖé dó wǔ tɔn, bó mɔ wǔvɛ́ ɖésú ɖo amlɔ mɛ.”

²⁰Vɔ̌sánú-xwlémawutɔ́gán lɛ́ɛ kpódó tomɛxó lɛ́ɛ kpó ka bló káká bɔ ahwan ɔ́ yí dó xó yětɔn jí, bó byɔ́ ɖɔ è jǒ Balabási, bó hu Jezu.

²¹Tokpɔngán ɔ́ lɛ́ wá yí xó, bó kanbyɔ́ yě ɖɔ: “Ɖo mɛ we élɔ́ lɛ́ɛ mɛ ɔ́, mɛ̌ wɛ mi jló bónú má ɖe nyi te nú mi?” Yě ká yí gbe n'i ɖɔ: “Balabási.”

²²Pilátu ka kanbyɔ́ yě ɖɔ: “Jezu e è nɔ ylɔ́ ɖɔ Klísu ɔ́, nɛ̌ wɛ un ka ná wa éyɛ́ sín nǔ gbɔn?” Bɔ yě bǐ yí gbe bó ɖɔ: “Ká ɛ nyi aklúzu jí.”

²³Pilátu ka lɛ́ kanbyɔ́ yě ɖɔ: “Nǔ nyanya tɛ́ wɛ é ká wa?” Yě ká sú xó syɛ́nsyɛ́n bó ɖɔ: “Ká ɛ nyi aklúzu jí.”

²⁴ Ée Pilátu mɔ ɖɔ xó ɔ́ kún ɖo émí kpa wɛ ó, bɔ zǐngídi ahwan ɔ́ tɔn ká ɖo jijɛ jí wɛ jɛ́n wɛ ɔ́, é sɔ́ sin, bó klɔ́ alɔ ɖo yě bǐ nukún mɛ, bó ɖɔ: “Un nyɔ́ nǔɖé do ɖo nya élɔ́ sín kú mɛ ǎ; mi wɛ é kan.”

²⁵Bɔ ahwan ɔ́ bǐ yí gbe ɖɔ jí: “Nya élɔ́ sín kú ní nɔ kɔ nú mǐ kpódó vǐ mǐtɔn lɛ́ɛ kpó.”

²⁶Hwenɛ́nu ɔ́, Pilátu ɖe Balabási nyi te nú yě, bo ka zɔ́n bɔ è xo Jezu ɖó bǎ wu. Énɛ́ ɔ́ gúdo ɔ́, é jó e nú sɔ́ja lɛ́ɛ ɖɔ è ní yi ká ɛ nyi aklúzu jí.

²⁷Tokpɔngán ɔ́ sín sɔ́ja lɛ́ɛ ka kplá Jezu yi hɔnmɛ, bo kplé ahwankpá ɔ́ bǐ dó wǔ tɔn.

²⁸Yě ɖe awu e é dó lɛ́ɛ bǐ sín kɔ n'i, bó ka sɔ́ awu vɔvɔ ɖaxó ɖé[12] dó n'i.

²⁹Yě sɔ́ wun dó lɔn axɔ́súgbákún ɖokpó ná, bó sɔ́ xwe n'i, bó ba fántín ɖokpó dó alɔ tɔn ɖisí ɔ́ mɛ, bó nɔ́ jɛ kpo ɖo nukɔn tɔn, bó nɔ́ ɖo cícá ɛ ko wɛ ɖɔ: “Mǐ kan xwé byɔ́, Jwifu lɛ́ɛ xɔ́sú!”

³⁰Yě nɔ tún atán kɔn nyi wǔtu tɔn, lobo nɔ yí fántín ɔ́ sín así tɔn, bo nɔ dó ta n'i.

³¹Ée yě cá ɛ ko mɔ̌ fó ɔ́, yě wá ɖe awu vɔvɔ ɖaxó ɔ́ sín kɔ n'i, bó lɛ́ sɔ́ awu é ɖésúnɔ tɔn lɛ́ɛ dó n'i. Yě kplá ɛ, bó ná yi ká ɛ nyi aklúzu jí.

³²Ée yě tɔ́n sín toxo ɔ́ mɛ ɔ́, yě kpé Silenɛ́ɛnu ɖokpó, bɔ è nɔ ylɔ́ ɛ ɖɔ Sinmɔ́ɔ. Sɔ́ja lɛ́ɛ hú gǎn ɛ, bó ɖíɖá ɛ aklúzu Jezu tɔn.

³³Ée yě jɛ tɛn e mɛ è nɔ ylɔ́ ɖɔ Gɔlugɔta dó Ebléegbe mɛ ɔ́, Gɔlugɔta ɔ́ sín tínmɛ wɛ nyí “takágo tɛnmɛ”.

³⁴ Yě wún vɛ̌ɛn bó kɔn nǔvívɛ́ ɖé d'é mɛ, bó ná Jezu ɖɔ ní nu. Ée é dó nu ɔ́, é gbɛ́ nunu.

³⁵ Sɔ́ja lɛ́ɛ ká Jezu nyi aklúzu jí; yě nyi akɔ dó awu tɔn lɛ́ɛ, bó má.

³⁶Énɛ́ ɔ́ gúdo ɔ́, sɔ́ja lɛ́ɛ jínjɔ́n ayǐ, bó jɛ cícɔ́ ɛ jí.

³⁷Bó ná dó ɖe nǔ e sín kúhwɛ è ɖǒ n'i ɔ́ xlɛ́ ɔ́, è wlǎn nǔ élɔ́, bó ká dó aklúzu ɔ́ wú ɖo ta tɔn nu ɖɔ: “Jezu, Jwifu lɛ́ɛ xɔ́sú ɔ́ ɖíe.”

³⁸Yě ká ajotɔ́ axánsúnxó we nyi aklúzu jí gɔ́ n'i: mɛ ɖokpó ɖo ɖisí tɔn xwé, bɔ mɛ ɖokpó ɖo amyɔ tɔn xwé.

³⁹ Mɛ e ɖo dǐndín wɛ lɛ́ɛ nɔ́ húnhún ta, bó nɔ ɖo zunzun i wɛ,

⁴⁰bó nɔ́ ɖɔ: “Hwi mɛ e ɖɔ émí ná gba sinsɛnxɔ Mawu tɔn, bó ná sɔ́ azǎn atɔn ɖó te, bó ná vɔ́ ɖěvo gbá ɔ́ ɖíe a? Hwlɛ̌n hwiɖée gán bó! Ényí Mawu ví ɔ́ jɛ́n a nyǐ hǔn, jɛ te sín aklúzu ɔ́ jí.”

⁴¹Mɔ̌ jɛ́n wɛ vɔ̌sánú-xwlémawutɔ́gán lɛ́ɛ, kpódó sɛ́nkplɔ́nmɛtɔ́ lɛ́ɛ kpó, kpódó tomɛxó lɛ́ɛ kpó lɔ ɖo slǎmɛ ɖɔ wǔ tɔn wɛ, bó nɔ́ ɖɔ:

⁴²“É hwlɛ́n mɛ ɖě lɛ́ɛ gán, bó ka sixú hwlɛ́n éɖée gán ǎ. Izlayɛ́li xɔ́sú wɛ é nyí bó ɖɔ ǎ cé? Ní bó jɛ te sín aklúzu ɔ́ jí bó! Énɛ́ ɔ́, mǐ ná ɖi nǔ n'i.

⁴³ É ɖeji dó Mawu wú; nú Mawu ɔ́ yí wǎn n'i nǔgbó hǔn, ní bó hwlɛ́n ɛ gán nú mǐ ná kpɔ́n; ɖó é ɖɔ: ‘Un nyí Mawu ví.’ ”

⁴⁴Mɔ̌ ɖokpó ɔ́ wɛ ajotɔ́ e è ká ɖó akpá tɔn lɛ́ɛ lɔmɔ̌ ɖo zunzun i gbɔn wɛ.

⁴⁵Sín gan wěwe mɛ káká yi jɛ gan atɔn mɛ ɔ́, ablu cyɔ́n to ɔ́ bǐ.

⁴⁶ Ée é wá su hwelɛ́kɔ ɔ́, Jezu sú xó gǎngán ɖé, bó ɖɔ: “Eli, Eli, lama sabakitani.” (Tínmɛ tɔn wɛ nyí: “Mawu ce, Mawu ce, nɛ̌ ka gbɔn bɔ a jǒ mì dó.”)

⁴⁷Mɛ e ɖo fínɛ́ lɛ́ɛ ɖě se xó e Jezu ɖɔ nɛ́ ɔ́, bó ɖɔ: “É ɖo Elíi ylɔ́ wɛ.”

⁴⁸ Tlóló ɔ́, mɛ ɖokpó kán wezun, bó sɔ́ xumɛtekan nylɔ́ dó vɛ̌ɛn sinvɛ́sinvɛ́ mɛ, bó zé slɔ́ fántín gaga ɖé nu, bó dlɛ́n dó Jezu ɖɔ ní nu.

⁴⁹Mɛ ɖé lɛ́ɛ ka ɖɔ nú mɛ e ɖo vɛ̌ɛn ná ɛ wɛ ɔ́ ɖɔ: “Gbɔ nú mǐ ná kpɔ́n ɖɔ Elíi ná wá hwlɛ́n ɛ gán a jí.”

⁵⁰Jezu lɛ́ sú xó ɖaxó ɖé, bó bɔnu.

⁵¹ Azɔn ɖokpó ɔ́, avɔ ɖaxó e ɖo sinsɛnxɔ mɛ ɔ́ dá ɖó we, sín jǐ wá do; ayǐkúngban dán wǔ, bɔ awǐnnya lɛ́ɛ zɛ.

⁵²Yɔdo lɛ́ɛ hun, bɔ mɛɖeɖóvo Mawu tɔn e kó kú lɛ́ɛ gěgé fɔ́n.

⁵³Yě tɔ́n sín yɔdo lɛ́ɛ mɛ, bɔ ée Jezu fɔ́n gúdo ɔ́, yě byɔ́ Jeluzalɛ́mu to mímɛ́ ɔ́ mɛ, bɔ mɛ gěgé mɔ yě.

⁵⁴Ée sɔ́ja kanwekogán ɔ́ kpódó sɔ́ja e ɖo Jezu cɔ́ xá ɛ wɛ lɛ́ɛ kpó mɔ lě e ayǐkúngban dán wǔ gbɔn, bó mɔ lě e nǔ lɛ́ɛ jɛ gbɔn ɔ́, xɛsi ɖaxó ɖé jɛ yě jí, bɔ yě ɖɔ jí: “Nya élɔ́ ɔ́, Mawu ví wɛ é nyí nǔgbó.”

⁵⁵ Nyɔ̌nu e nɔ xwedó Jezu bó nɔ dó alɔ ɛ lɛ́ɛ gěgé xwedó e sín Galilée wá fínɛ́. Yě ɖo te, bó ɖo nǔ e ɖo jijɛ wɛ lɛ́ɛ kpɔ́n sɛ́ dó wɛ.

⁵⁶Mali Magidalanu ɔ́, Mali e nyí Jaki kpódó Jozɛ́fu kpó sín nɔ ɔ́, kpódó Zebeɖée ví lɛ́ɛ sín nɔ kpó ɖo yě mɛ.

⁵⁷Cóbónú hwe ná yi xɔ ɔ́, nya akwɛ́nɔ ɖé wá; nya énɛ́ ɔ́, Alimatéenu wɛ, bɔ è nɔ ylɔ́ ɛ ɖɔ Jozɛ́fu; ahwanvú Jezu tɔn wɛ nú é lɔmɔ̌.

⁵⁸É wá yi mɔ tokpɔngán Pilátu, bó byɔ́ ɛ Jezu sín cyɔ. Pilátu ka ɖe gbe nú sɔ́ja lɛ́ɛ, nú è ní jó cyɔ ɔ́ n'i.

⁵⁹Jozɛ́fu ka ɖe cyɔ ɔ́ sín aklúzu jí, bó lɛ́ akwɛ́núvɔ yɔ̌yɔ́ ɖé dó,

⁶⁰bó sɔ́ yi ɖi dó yɔdo yɔ̌yɔ́ e é kún dó sóxo mɛ ɖ'ayǐ nú é ɖésúnɔ ɔ́ mɛ, bó blí awǐnnya ɖaxó ɖé dó yɔdo ɔ́ nu, bó yi.

⁶¹Mali Magidalanu ɔ́ kpódó Mali ɖě ɔ́ kpó jínjɔ́n ayǐ ɖo fínɛ́, bó kpan nukɔn yɔdo ɔ́.

⁶²Ayǐhɔ́ngbe tɔn e jɛ dó gbɔjɛzán gbe Jwifu lɛ́ɛ tɔn gúdo ɔ́, vɔ̌sánú-xwlémawutɔ́gán lɛ́ɛ kpódó Falizyɛn lɛ́ɛ kpó zɔn kpɔ́ bo yi tokpɔngán Pilátu gɔ́n.

⁶³ Bó ɖɔ n'i ɖɔ: “Aklúnɔ, mǐ flín ɖɔ hwenu e nya mɛblɛ́ɖutɔ́ énɛ́ kpo ɖo gbɛ ɔ́, é ɖɔ azǎn atɔngɔ́ ɔ́ gbe ɔ́, émí ná fɔ́n sín kú wá gbɛ.

⁶⁴Énɛ́ wútu ɔ́, nǎ gbe, bónú sɔ́ja lɛ́ɛ ná yi cɔ́ yɔdo ɔ́ ganjí káká jɛ azǎn atɔngɔ́ ɔ́ gbe. É má nyí mɔ̌ ǎ ɔ́, ahwanvú tɔn lɛ́ɛ táá wá yi fin cyɔ tɔn sɔ́ yi, bó ná ɖɔ nú to lɛ́ɛ ɖɔ: ‘É kó fɔ́n sín kú; nǔvú énɛ́ e yě ná ɖó ɔ́ ná nylá hú nukɔntɔn ɔ́.’ ”

⁶⁵Pilátu ka ɖɔ nú yě ɖɔ: “Sɔ́ja lɛ́ɛ ɖíe, mi bo kplá yě bónú yě ní yi cɔ́ yɔdo ɔ́ lě e mi jló gbɔn é.”

⁶⁶Yě ká sú yɔdo ɔ́ ganjí, bó ɖó wuntun, lobo ɖó sɔ́ja lɛ́ɛ fínɛ́.