Read fon Matíe 28 Bible Online

Matíe 28 - fon bible

Matíe 28

¹Aklúnɔzán gbe ayǐtéhɔ̌nnu ɖo gbɔjɛzán Jwifu lɛ́ɛ tɔn gúdo ɔ́, Mali Magidalanu ɔ́ kpódó Mali ɖě ɔ́ kpán yi Jezu sín yɔdo kpɔ́n gbé.

²Tlóló ɔ́, ayǐkúngban dán wǔ kpódó hlɔ̌nhlɔ́n kpó; bɔ wɛnsagun Aklúnɔ tɔn ɖokpó jɛ te sín jǐxwé, bó wá blí awǐnnya e è dǒ sú yɔdo ɔ́ ná ɔ́ síin, bó jínjɔ́n jí.

³Wɛnsagun ɔ́ nɔ́ kɔ́n jǐkɛwun ɖɔhun; bɔ awu tɔn wé tété.

⁴Xɛsi jɛ sɔ́ja lɛ́ɛ jí, bɔ yě jɛ sísɔ́sísɔ́ jí, bó jɛ ayǐ, lobo cí mɛ e kú é ɖɔhun.

⁵Wɛnsagun ɔ́ ká ɖɔ nú nyɔ̌nu lɛ́ɛ ɖɔ: “Midɛɛ lɛ́ɛ ɔ́, mi ma ɖi xɛsi ó, ɖó un tunwun ɖɔ Jezu e è ká nyi aklúzu jí ɔ́ ba wɛ mi ɖe.

⁶É ɖo fí ǎ. É ko fɔ́n sín kú wá gbɛ, lě e é ko ɖɔ gbɔn ɖ'ayǐ é. Mi wá kpɔ́n; fí e è sɔ́ ɛ ɖó ɖ'ayǐ ɔ́ ɖíe.

⁷‘Mi yá wǔ yi ɖɔ nú ahwanvú tɔn lɛ́ɛ ɖɔ é kó fɔ́n sín kú, bó jɛ nukɔn nú mi xwe Galilée; fínɛ́ wɛ mi ná mɔ ɛ ɖe.’ É jɛ́n nɛ́ un kó ɖɔ nú mi nɛ́.”

⁸Nyɔ̌nu lɛ́ɛ yá wǔ gosín yɔdo ɔ́ kɔn; yě ɖo xɛsi jí; xomɛ ka lɛ́ ɖo yě hun wɛ ɖésú. Yě kán wezun ɖidó wɛn dó ahwanvú Jezu tɔn lɛ́ɛ gbé.

⁹Yě ná mɔ nǔɖé ɔ́, Jezu jɛ́n wɛ wá kpé yě ɖo alixo, bó ɖɔ: “Un dó gbe mi;” bɔ yě jɛ kpo, bó ɖó alɔ afɔ tɔn lɛ́ɛ wú bó ɖe kɔ́ n'i.

¹⁰Hwenɛ́nu ɔ́, Jezu ɖɔ nú yě ɖɔ: “Mi ma ɖi xɛsi ó. Mi yi, bó ɖɔ nú nɔví ce lɛ́ɛ ɖɔ yě ní yi Galilée; fínɛ́ wɛ yě ná mɔ mì ɖe.”

¹¹Hwenu nyɔ̌nu lɛ́ɛ ɖo ali jí xweyǐgbe ɔ́, sɔ́ja e ɖo Jezu sín yɔdo cɔ́ wɛ lɛ́ɛ ɖě wá Jeluzalɛ́mu toxo ɔ́ mɛ, bó wlí nǔ e jɛ ɔ́ bǐ ɖɔ nú vɔ̌sánú-xwlémawutɔ́gán lɛ́ɛ.

¹²Vɔ̌sánú-xwlémawutɔ́gán lɛ́ɛ kpódó tomɛxó lɛ́ɛ kpó ka wá kpléta bó ɖe wě dó xó e sɔ́ja lɛ́ɛ wá ɖɔ nú yě ɔ́ wú; yě ná akwɛ́ gěgé sɔ́ja énɛ́ lɛ́ɛ,

¹³bó blá ɖɔ xá yě ɖɔ: “Mi ɖɔ nú mɛ lɛ́ɛ ɖɔ hwenu e émí ɖo amlɔ dɔ́ wɛ ɖo yɔdo ɔ́ kɔn ɔ́, ahwanvú Jezu tɔn lɛ́ɛ zɔn zǎn bó wá fin cyɔ tɔn sɔ́ yi.

¹⁴Ényí tokpɔngán ɔ́ na bo se ɔ́, mǐ ná cikpɛ n'i bó ná hwlɛ́n mi gán sín tagba mɛ.”

¹⁵Sɔ́ja lɛ́ɛ yí akwɛ́ ɔ́, bó bló lě e è zɔ̌n yě gbɔn é, bɔ xó énɛ́ gba kpé Jwifu lɛ́ɛ mɛ káká jɛ égbé.

¹⁶ Ahwanvú Jezu tɔn wǒ-ɖokpó lɛ́ɛ yi Galilée, ɖo só e Jezu kó jlɛ́ nú yě ɖ'ayǐ ɔ́ jí.

¹⁷Ée yě mɔ Jezu ɖo fínɛ́ ɔ́, yě ɖe kɔ́ n'i; lo ɔ́, mɛɖé lɛ́ɛ ɖo yě mɛ, bó ɖo xixo kpɔ́n wɛ.

¹⁸Jezu ka sɛ yá yě, bó ɖɔ nú yě ɖɔ: “Mawu ná acɛ e ɖo jǐnukúnsin, kpódó ée ɖo ayǐkúngban jí ɔ́ kpó bǐ mì.

¹⁹ Hǔn, mi yi bó kplɔ́n nǔ akɔta lɛ́ɛ bǐ, bónú yě ní húzú ahwanvú ce. Mi ylɔ́ Tɔ́ ɔ́, Vǐ ɔ́, kpódó Yɛsinsɛn ɔ́ kpó sín nyǐkɔ dó lɛ yɛhwesin nú yě.

²⁰Mi kplɔ́n nǔ yě, bónú yě ní se tónú nú nǔ e un kplɔ́n mi lɛ́ɛ bǐ. Mi ka tunwun ɖɔ un ɖo kpɔ́ xá mi tɛgbɛ bɛ́ sín din káká yi jɛ gbe e gbe gbɛ ɔ́ ná vɔ dó é.”