Read fon Matíe 3 Bible Online

Matíe 3 - fon bible

Matíe 3

¹Hwenɛ́nu ɔ́, Jǎan Yɛhwesinlɛnúmɛtɔ́ ɔ́ wá, bó ɖo Mawuxó jlá wɛ ɖo gbětótló mɛ ɖo Judée,

²bó nɔ́ ɖɔ: “Mi lɛ́ kɔ sín hwɛ mitɔn lɛ́ɛ gúdo, ɖó axɔ́súɖuɖu sɛ́xwé tɔn kó sɛ yá.”

³ Jǎan wɛ nyí mɛ e wú gbeyíɖɔ Mawu tɔn Ezayíi ɖɔ xógbe élɔ́ dó é: “È se mɛɖé ɖo xó sú wɛ ɖo gbětótló mɛ, bó ɖo ɖiɖɔ wɛ ɖɔ: ‘Mi bló ali ɖó nú Aklúnɔ, mi jlɔ́ ali tɔn lɛ́ɛ ɖó.’ ”

⁴ Awu kacakaca ɖé wɛ Jǎan nɔ dó, bɔ è sɔ́ lǎkúnmí sín fún dó lɔn ná, bɔ é nɔ́ sin gǒjíblánú e è sɔ́ anyǔ dó bló ná é. É nɔ ɖu wɛn kpódó wǐin akú kpó.

⁵Jeluzalɛ́munu lɛ́ɛ, Judéenu lɛ́ɛ kpódó mɛ e ɖo to e ɖo Judɛ́ɛn tɔ kpá é mɛ lɛ́ɛ kpó nɔ́ yi gɔ̌n tɔn.

⁶Yě nɔ́ ɖɔ hwɛ yětɔn lɛ́ɛ, bɔ Jǎan nɔ lɛ yɛhwesin nú yě ɖo Judɛ́ɛn tɔ ɔ́ mɛ.

⁷ Ée é mɔ Falizyɛn lɛ́ɛ kpódó Saduseɛn lɛ́ɛ gěgé kpó wá yɛhwesin lɛ gbé ɔ́, é ɖɔ nú yě ɖɔ: “Jakpata kúnkan e mi! Mɛ̌ ka kplɔ́n mi ɖɔ mi ní hɔn nú xomɛsin Mawu tɔn e jǎwe ɔ́?”

⁸Nǔwiwa mitɔn lɛ́ɛ ní bó ɖe xlɛ́ ɖɔ mi lɛ́ kɔ sín hwɛ mitɔn lɛ́ɛ gúdo nǔgbó.

⁹ Mi ma vɛdó ɖɔ ée émí ko nyí Ablaxámu ví kpowun ɔ́, é ko kpé wɛ sín ó. Ɖó, ma ɖɔ nú mi, awǐnnya e mɔ wɛ mi ɖe nɛ́ lɛ́ɛ ɔ́, Mawu hɛn ɔ́, é ná sɔ́ yě dó húzú vǐ nú Ablaxámu.

¹⁰ Asyɔ́ví ɖíe ko ɖo atín lɛ́ɛ sín ɖɔ wú e: atín e ma nɔ ná sínsɛ́n ɖagbe ǎ ɔ́, è nǎ gbo e, bó bɛ́ kɔn nyi myɔ mɛ.

¹¹Nyɛ ɔ́, sin wɛ un sɔ́ dó ɖo yɛhwesin lɛ nú mi wɛ, bó ná dó ɖe xlɛ́ ɖɔ mi lɛ́ kɔ sín hwɛ mitɔn lɛ́ɛ gúdo; amɔ̌, mɛ e ɖo gǔdo ce jǎwe ɔ́, mɛ énɛ́ ɔ́ hú gǎn mì, bɔ un nyí mɛɖé bó ná sixú hɛn afɔkpa tɔn lɛ́ɛ n'i vɔ́vɔ́ ǎ; éyɛ́ ɔ́, Yɛsinsɛn kpódó zo kpó wɛ é ná sɔ́ dó lɛ yɛhwesin nú mi.

¹²É hɛn atɛ tɔn alɔ mɛ, bó ná fún jinukún tɔn, bó ná bɛ́ dó kɔ́zún mɛ; wɔn lɛ́ɛ ɔ́, é ná bɛ́ kɔn nyi zo e ma nɔ cí gbeɖé ǎ é mɛ.

¹³Hwe énɛ́ ɔ́ nu wɛ Jezu gosín Galilée yíkúngban jí, bó wá Jǎan gɔ́n ɖo Judɛ́ɛn tɔ ɔ́ nu, bónú Jǎan ná lɛ yɛhwesin n'i.

¹⁴Jǎan ka gbɛ́, bó ɖɔ: “Nyi wɛ ɖó ná wá gɔ̌n towe, bɔ a nǎ lɛ yɛhwesin nú mì, bɔ hwɛ ka wá gɔ̌n ce a?”

¹⁵Jezu ka yí gbe n'i ɖɔ: “Vɛ̌ gbɔ, ní to nyí mɔ̌ hwɛ̌; ɖó lě e mǐ sixú wa nǔ jlɔ́jlɔ́ gbɔn é nɛ́.” Énɛ́ ɔ́, Jǎan yí gbe.

¹⁶Ée é lɛ yɛhwesin n'i fó ɔ́, Jezu tɔ́n sín tɔ ɔ́ mɛ; tlóló ɔ́, jǐnukúnsin kɛ wun, bɔ Yɛ Mawu tɔn cí ahwannɛ́ ɖɔhun, bó wá jɛ te dó jǐ tɔn.

¹⁷ Tlóló ɔ́, è se gbe ɖé sín jǐxwé bɔ é ɖɔ: “Vǐ ce vívɛ́ná wɛ mɛ élɔ́ nyí; xomɛ nɔ hun mì dó wǔtu tɔn tlala.”