Read fon Matíe 4 Bible Online

Matíe 4 - fon bible

Matíe 4

¹ Énɛ́ ɔ́ gúdo ɔ́, Yɛ ɔ́ kplá Jezu yi gbětótló mɛ bónú awǒvi ná tɛ́n ɛ kpɔ́n.

²Jezu blá nu xɔ kéze kanɖé (40), zǎn kanɖé (40), énɛ́ ɔ́ gúdo ɔ́, xovɛ́ wá sín i,

³bɔ mɛtɛ́nkpɔ́ntɔ́ ɔ́ sɛ yá ɛ, bó ɖɔ n'i ɖɔ: “Nú Mawu ví jɛ́n wɛ a nyǐ nǔgbó hǔn, ɖe gbe nú awǐnnya élɔ́ lɛ́ɛ, nú yě ní húzú nǔɖuɖu.”

⁴ Jezu ka yí gbe n'i ɖɔ: “È ko wlán dó Mawuxówéma ɔ́ mɛ ɖɔ jí: ‘Nǔɖuɖu kɛ́ɖɛ́ wɛ gbɛtɔ́ nɔ́ ɖu bó nɔ́ nɔ gbɛ ǎ; lo ɔ́, xó e ko tɔ́n sín Mawu nu mɛ ɔ́ bǐ wɛ nɔ́ hɛn mɛ ɖó gbɛ.’ ”

⁵Énɛ́ ɔ́ gúdo ɔ́, awǒvi kplá Jezu yi Jeluzalɛ́mu, to mímɛ́ ɔ́ mɛ, bó sɔ́ ɛ ɖó sinsɛnxɔ ɔ́ ta aga ɖéé,

⁶bó ɖɔ n'i ɖɔ: “Mawu ví jɛ́n a nyǐ nǔgbó hǔn, lɔ̌n yi jɛ dodomɛ; ɖó è ko wlán dó Mawuxówéma ɔ́ mɛ ɖɔ jí: ‘Mawu ná zɔ́n wɛnsagun tɔn lɛ́ɛ, bɔ yě ná hɛn we dó alɔ mɛ, bónú a ma yi klɛ́n afɔ dó awǐnnya ɖé wú ó.’ ”

⁷ Jezu ka yí gbe n'i ɖɔ: “Mɔ̌ jɛ́n wɛ è lɛ́ wlán ɖɔ jí: ‘Ma tɛ́n Aklúnɔ Mawu towe kpɔ́n ó.’ ”

⁸Awǒvi lɛ́ kplá ɛ yi só ɖé jí; só ɔ́ yi jǐ ɖésú; é xlɛ́ ɛ axɔ́súɖuto gbɛmɛ fí tɔn lɛ́ɛ, kpódó dɔkun yětɔn lɛ́ɛ kpan,

⁹lobo ɖɔ n'i ɖɔ: “Ényí a jɛ kpo, bó ɖe kɔ́ nú mì ɔ́, un ná ná nǔ énɛ́ lɛ́ɛ bǐ we.”

¹⁰ Jezu ka ɖɔ n'i ɖɔ: “Satáan, bǔ dó mì! Ɖó è ko wlán dó Mawuxówéma ɔ́ mɛ ɖɔ jí: ‘Aklúnɔ Mawu towe wɛ a nǎ ɖe kɔ́ ná, lobo sɛn é ɖokpónɔ géé.’ ”

¹¹Awǒvi ka jó e dó bo yi; bɔ wɛnsagun Mawu tɔn lɛ́ɛ wá Jezu gɔ́n, bo wá gɔ́ alɔ n'i.

¹² Ée Jezu se ɖɔ è wlǐ Jǎan dó gankpá mɛ ɔ́[2], é gosín fínɛ́, bo yi Galilée gbé jí.

¹³ Ée é gosín Nazalɛ́ti ɔ́, é yi cí Kafaanawúmu, to e ɖo Galilée xutó ɔ́ mɛ, ɖo Zabulɔ́ɔn kpódó Nɛfutali to kpan gbé jí.

¹⁴Nǔ nyí mɔ̌, bónú xó e gbeyíɖɔ Mawu tɔn Ezayíi ɖɔ ɔ́ na dó jɛ. È wɛ nyí ɖɔ:

¹⁵ “Togun e ɖo Zabulɔ́ɔn kpódó Nɛfutali kpó yíkúngban jí, bó ɖo xutó, ɖo Judɛ́ɛn tɔ ɔ́ sín akpá ɖě ɔ́ xwé, ɖo Galilée gbé jí, fí e mɛ e ma nyí Jwifu ǎ lɛ́ɛ ɖe é;

¹⁶togun énɛ́ e ɖo zǐnflú mɛ ɔ́ mɔ wěziza ɖaxó ɖé, bɔ yě mɛ e ɖo kúyɛmɛ lɛ́ɛ ɔ́, wěziza hɔ́n dó yě jí.”

¹⁷ Bɛ́ sín hwenɛ́nu ɔ́, Jezu jɛ Wɛn Ɖagbe ɔ́ jlá jí, bo nɔ ɖɔ: “Mi lɛ́ kɔ sín hwɛ mitɔn lɛ́ɛ gúdo, ɖó axɔ́súɖuɖu sɛ́xwé tɔn ko sɛ yá.”

¹⁸Ée Jezu ɖo Galilée xutó gbɔn wɛ xweyǐgbe ɔ́, é mɔ nɔví nɔví we ɖé lɛ́ɛ, Sinmɔ́ɔ e è nɔ ylɔ́ ɖɔ Piyɛ́ɛ ɔ́, kpódó nɔví tɔn Andlé kpán, bɔ yě ɖo ɖɔ nyi wɛ ɖo xu jí, ɖó ɖɔnyitɔ́ wɛ nú yě.

¹⁹Jezu ɖɔ nú yě ɖɔ: “Mi xwedó mì; un ná ná kplɔ́n mi, bɔ mi ná nɔ dɔn gbɛtɔ́ lɛ́ɛ, lě e mi nɔ nyi ɖɔ dó wlí hweví gbɔn é.”

²⁰Yě ká jó ɖɔ yětɔn lɛ́ɛ dó tlóló bó xwedó e.

²¹Jezu ná lɛ́ sɛ yi nukɔn kpɛɖé ɔ́, é mɔ Zebeɖée ví we, Jaki kpódó Jǎan kpó, bɔ yě kpódó tɔ́ yětɔn kpó ɖo akló mɛ, bo ɖo ɖɔ yětɔn lɛ́ɛ blóɖó wɛ. É ylɔ́ yě.

²²Azɔn ɖokpó ɔ́, yě jó akló ɔ́ kpódó tɔ́ yětɔn kpó dó, bó xwedó e.

²³ Jezu ka nɔ gbɔn Galilée gbé ɔ́ bǐ jí, bó nɔ́ ɖo nǔ kplɔ́n mɛ lɛ́ɛ wɛ, gbɔn kplɔ́ngbasá Jwifu lɛ́ɛ tɔn, bó nɔ́ ɖo axɔ́súɖuɖu Mawu tɔn sín Wɛn Ɖagbe jlá wɛ, lobo nɔ gbɔ azɔn alɔkpa alɔkpa lɛ́ɛ bǐ, kpódó wɔngblézɔn lɛ́ɛ bǐ kpó nú mɛ lɛ́ɛ ɖo togun ɔ́ mɛ.

²⁴Nyǐkɔ tɔn gba kpé Silíito ɔ́ bǐ mɛ, bɔ mɛ lɛ́ɛ nɔ kplá azinzɔnnɔ e ɖo azɔn alɔkpa alɔkpa jɛ wɛ lɛ́ɛ wá n'i; mɛ e jí yɛ nyanya ɖe lɛ́ɛ, adǐngbekútɔ́ lɛ́ɛ, ayǐsónɔ lɛ́ɛ, bɔ é nɔ gbɔ azɔn nú yě.

²⁵Ahwan wɔ̌buwɔ́bú ɖé lɛ́ɛ xwedó e; yě gosín Jeluzalɛ́mu, bó gosín Galilée gbé jí, bó gosín Judée gbé jí, lobo gosín tota wǒ lɛ́ɛ gbé jí[3] kpódó to e ɖo Judɛ́ɛn tɔ ɔ́ gúdo lɛ́ɛ kpan mɛ.