Read fon Matíe 5 Bible Online

Matíe 5 - fon bible

Matíe 5

¹Ée Jezu mɔ ahwan gěgé énɛ́ lɛ́ɛ ɔ́, é xá só jí, bo jínjɔ́n ayǐ; ahwanvú tɔn lɛ́ɛ sɛ yá ɛ,

²bɔ é jɛ nǔ kplɔ́n yě jí ɖɔ:

³Nǔ nyɔ́ nú mɛ e nyí wamamɔnɔ ɖo ayi mɛ lɛ́ɛ, ɖó yětɔn wɛ nyí axɔ́súɖuto sɛ́xwé tɔn.

⁴ Nǔ nyɔ́ nú mɛ e ɖo aluwɛ mɛ lɛ́ɛ, ɖó è nǎ dó gbɔ nú yě.

⁵ Nǔ nyɔ́ nú mɛfífá lɛ́ɛ, ɖó ayǐkúngban ɔ́ na nyí yětɔn!

⁶ Nǔ nyɔ́ nú mɛ e nǔjlɔ́jlɔ́wiwa sín xovɛ́ nɔ sín, bɔ kɔ tɔn nɔ xú yě lɛ́ɛ é; ɖó yě ná gɔ́ xo.

⁷Nǔ nyɔ́ nú mɛ e nɔ kú nǔbláwǔ nú nɔzo yětɔn lɛ́ɛ é, ɖó è nǎ kú nǔbláwǔ nú yě lɔmɔ̌.

⁸ Nǔ nyɔ́ nú ayimímɛ́nɔ lɛ́ɛ, ɖó yě ná mɔ Mawu.

⁹Nǔ nyɔ́ nú mɛ e nɔ jɛ tagba, nú fífá ná dó tíin lɛ́ɛ, ɖó è nǎ ylɔ́ yě ɖɔ Mawu ví.

¹⁰ Nǔ nyɔ́ nú mɛ e dó ya na wɛ è ɖe, ɖó yě ɖo nǔ jlɔ́jlɔ́ wa wɛ wú lɛ́ɛ, ɖó yětɔn wɛ nyí axɔ́súɖuto sɛ́xwé tɔn.

¹¹ “Nǔ nyɔ́ nú mi, hwenu e è wǎ ɖo mi zun wɛ, bó ɖo mi ɖe dó wɛ, bó ɖo nǔvú bǐ ɖó dó mi nu wɛ, ɖó nyɛ wútu é.

¹² Mi j'awǎ, bó hun xomɛ, ɖó ajɔ ɖaxó ɖo te kpɔ́n mi ɖo sɛ́xwé. Ɖó, mɔ̌ wɛ è ko dó ya nú gbeyíɖɔ Mawu tɔn e jɛ nukɔn nú mi lɛ́ɛ gbɔn ɔ́ nɛ́.

¹³“Jɛ wɛ mi nyí nú gbɛ ɔ́. Lo ɔ́, ényí jɛ ma ka sɔ́ ɖó tɔ́n ǎ ɔ́, étɛ́ wɛ è nǎ dó lɛ́ na ɛ tɔ́n na? É sɔ́ nyɔ́ nú nǔɖé zɛ è nǎ sɔ́ kɔn nyi gbě, bó ná gbídí kpó afɔ kpó wú ǎ.

¹⁴ “Mi wɛ nyí wěziza nú gbɛ ɔ́; to e ɖo só jí ɔ́ sixú nɔ hwlǎhwlá ǎ.

¹⁵ È ka nɔ ta zogbɛ́n bó nɔ́ sɔ́ dó zɛ̌n glɔ́ ǎ; lo ɔ́, nǔ ta aga wɛ è nɔ sɔ́ ɖó, bɔ é nɔ́ ɖi ɖɛ̌ nú mɛ e ɖo xwé gbe lɛ́ɛ bǐ ná mɔ nukúnnú.

¹⁶ Wěziza mitɔn ní bo hɔ́n ɖo gbɛtɔ́ lɛ́ɛ nukɔn, bónú yě ní mɔ nǔ ɖagbe wiwa mǐtɔn lɛ́ɛ, bo na dó kpa susu nú Tɔ́ mitɔn e ɖo sɛ́xwé é.

¹⁷“Mi ma vɛdó ɖɔ un wá, bó ná sú Mɔyízisɛ́n lɛ́ɛ, abǐ nǔkplɔ́nmɛ gbeyíɖɔ Mawu tɔn lɛ́ɛ tɔn dó wɛ sín ó. Lo ɔ́, un wá, bó ná bló, bɔ sɛ́n ɔ́ ná sɔgbe.

¹⁸ Ɖó ma ɖɔ nǔgbó nú mi: ényí jǐnukúnsin kpódó ayǐkúngban kpó ma ko vɔ ǎ ɔ́, wěkwín kpɛví títí ɖokpó géé ɖo sɛ́n lɛ́ɛ mɛ ná hwe sín wɛ káká cóbónú nǔ lɛ́ɛ bǐ ná sɔgbe ǎ.

¹⁹Hǔn, mɛ e na gba sɛ́n kpɛví títí ɖokpó ɖo sɛ́n nɛ́ lɛ́ɛ mɛ, lobo ná lɛ́ kplɔ́n mɛɖěvo lɛ́ɛ ɖɔ yě lɔ ní bló gbɔn mɔ̌ ɔ́, mɛ énɛ́ ɔ́ ná sɔ atɛ́n ɖo axɔ́súɖuto sɛ́xwé tɔn mɛ ǎ. Lo ɔ́, mɛ e ná nyi sɛ́n énɛ́ lɛ́ɛ, lobo ná kplɔ́n mɛɖěvo lɛ́ɛ ɖɔ yě lɔ ní bló gbɔn mɔ̌ ɔ́, mɛ énɛ́ ɔ́ na xɔ susu ɖo axɔ́súɖuto sɛ́xwé tɔn mɛ.

²⁰Ɖó, ma ɖɔ nú mi: ényí nǔjlɔ́jlɔ́wiwa mitɔn ma hú gǎn sɛ́nkplɔ́nmɛtɔ́ lɛ́ɛ kpódó Falizyɛn lɛ́ɛ kpó tɔn ǎ ɔ́, mi ɖo axɔ́súɖuto sɛ́xwé tɔn mɛ na byɔ́ wɛ ǎ.

²¹ “Mi se bɔ è ko ɖɔ nú tɔ́gbó mitɔn lɛ́ɛ ɖɔ: ‘Ma hu mɛ ó; ényí mɛɖé hu mɛ ɔ́, è nǎ ɖó hwɛ n'i.’

²²Lo ɔ́, nyɛ ka ɖo ɖiɖɔ nú mi wɛ ɖɔ: mɛ ɖěbǔ sin xomɛ dó nɔzo tɔn ɔ́, é jɛ xá ɖɔ è nǐ ɖɔ hwɛ xá mɛ énɛ́; mɛ e ka na zun nɔzo tɔn ɖɔ: ‘Nǔvɔ́nɔ’ ɔ́, é jɛ xá ɖɔ toxóɖɔgbɛ́ ɔ́ ní dɔn tó n'i. Mɛ e ka na zun nɔzo tɔn ɖɔ: ‘Nǔwanǔmɔnɔ’ ɔ́, zojimací wɛ jɛ xá ɛ.

²³Hǔn, ényí a wǎ vɔ̌sákpe nukɔn, bó ja nǔɖé xwlé Mawu gbé, bó flín ɖɔ hwɛgbe ɖé ɖo nɔzo émítɔn kpódó émí kpó tɛ́ntin hǔn,

²⁴jó vɔ̌sánú e xwlé Mawu gbé wɛ a ja ɔ́ dó nyi vɔ̌sákpe ɔ́ nukɔn, bó yi dó hwɛ gbɔ xá nɔzo towe hwɛ̌; énɛ́ ɔ́ gúdo ɔ́, lɛ́ kɔ bo wá zé vɔ̌sánú towe xwlé Mawu.

²⁵“Ényí a wa nǔ nyi do nú nɔzo towe ɖé, bónú é kplá we xwe hwɛ nukɔn hǔn, yǎ wǔ dó hwɛ gbɔ xá ɛ hwenu e hwi kpódó é kpó ɖo ali jí ɔ́, é ma nyí mɔ̌ ǎ ɔ́, é ná kplá we dó así nú hwɛɖɔtɔ́, bɔ hwɛɖɔtɔ́ ná jó we nú gantɔ́cɔ́tɔ́, bɔ éyɛ́ ná sɔ́ we dó gankpá mɛ.

²⁶Ma ɖɔ nǔgbó nú we: hwɛ e è ɖǒ nú we ɔ́ bǐ sín axɔ́ wɛ a nǎ sú vɔ cóbó ná tɔ́n sín gankpá ɔ́ mɛ.

²⁷ “Mi ka se ɖɔ: ‘Ma lɛ aga ó.’

²⁸Lo ɔ́, nyɛ ɖo ɖiɖɔ nú mi wɛ ɖɔ: mɛɖé kpɔ́n nyɔ̌nu ɖé bó ɖo linlin wɛ ná ɖó xó xá ɛ ɔ́, é ko lɛ aga xá nyɔ̌nu énɛ́ ɖo ayi mɛ xóxó.

²⁹ Ényí nukún towe ɖisíxwé tɔn ɔ́ na dɔn we dó nǔ nyanya mɛ hǔn, ɖe síin, bo sɔ́ nyi gbě; ɖó ényí a gbɔ bónú nǔɖé hwe ɖo wútu towe ɔ́, é nyɔ́ nú we hú nǔ lɛ́ɛ bǐ ní sɔgbe ɖo wǔtu towe bɔ è nǎ sɔ́ hwi ɖésúnɔ ɔ́ bǐ nyi dó zojimací mɛ.

³⁰ Ényí alɔ towe ɖisí ɔ́ na dɔn we dó nǔ nyanya mɛ hǔn, sɛ́n síin, bo sɔ́ nyi gbě; ɖó ényí ɖɔ a gbɔ bónú nǔɖé hwe ɖo wútu towe ɔ́, é nyɔ́ nú we hú nǔ lɛ́ɛ bǐ ní sɔgbe ɖo wútu towe, bɔ è nǎ sɔ́ hwi ɖésúnɔ ɔ́ bǐ kpéte nyi dó zojimací mɛ.

³¹ “È ka lɛ́ ɖɔ: ‘Mɛ ɖé gbɛ́ asi tɔn hǔn, ní wlán wěma dó así n'i ɖɔ émí gbɛ́ ɛ.’

³² Lo ɔ́, nyɛ ɖo ɖiɖɔ nú mi wɛ ɖɔ: mɛɖé nya asi tɔn, bɔ é ma nyí ɖɔ afɔ wɛ é dó gbě ǎ ɔ́, aga wɛ é ɖɔ é ní yi lɛ. Mɛ e ka da nyɔ̌nu e asú tɔn gbɛ́ ɛ ɔ́, é lɔmɔ̌ nyí agalɛtɔ́.

³³ “Mi ka lɛ́ se bɔ è ɖɔ nú tɔ́gbó mitɔn lɛ́ɛ ɖɔ: ‘Ma dó akpá bo xwlé Mawu d'é jí bo gɔn ɖiɖe ó; lo ɔ́, ɖe akpá e a dǒ nú Aklúnɔ é.’

³⁴ Lo ɔ́, nyɛ ɖo ɖiɖɔ nú mi wɛ ɖɔ: mi ma xwlé nǔ ɖěbǔ ó, mi ma xwlé jǐnukúnsin ó, ɖó é wɛ nyí axɔ́súzinkpo Mawu tɔn.

³⁵ Mi ma ka xwlé ayǐkúngban ó, ɖó é wɛ nyí afɔɖótɛn Mawu tɔn; mi ma xwlé Jeluzalɛ́mu ó, ɖó é wɛ nyí axɔ́sú ɖaxó ɔ́ sín to.

³⁶Mɔ̌ ɖokpó ɔ́, ma xwlé ta towe ó, ɖó a sixú bló bɔ ɖa e ɖo ta towe ɔ́ kwín ɖokpó géé ná húzú wěwé abǐ wiwi ǎ.

³⁷Ényí xó mitɔn nyí ‘ɛɛn’ hǔn, ní nyí ‘ɛɛn’, é ka nyí ‘éeǒ’ hǔn, ní nyí ‘éeǒ’. Nǔ e mi nɔ xwlé d'é jí ɔ́ bǐ ɔ́, awǒvi gɔ́n wɛ é gosín.

³⁸ “Mi se bɔ è ɖɔ: ‘Mɛ ɖé tɔ́n nukún we hǔn, tɔ́n nukún é lɔmɔ̌; nú mɛɖé sún aɖǔ we hǔn, sún aɖǔ é lɔmɔ̌.’

³⁹Lo ɔ́, nyɛ ɖo ɖiɖɔ nú mi wɛ ɖɔ: mɛɖé wa nǔ nyanya nú we hǔn, ma ba hlɔn tɔn ó; ényí mɛɖé xo tomɛ nú we dó ɖisíxwé hǔn, lǐlɛ́ amyɔxwé ɔ́ n'i.

⁴⁰Ényí mɛɖé jló ná ylɔ́ hwɛ we, bo na yí awu towe do tɔn ɔ́ hǔn, lɛ̌ jó awu towe ɖaxó ɔ́ dó n'i d'é jí.

⁴¹Ényí mɛɖé zín jǐ towe, bó ɖɔ hwi ní zɔn ali xá émí yi jɛ kilomɛ́tlu ɖokpó hǔn, zɔn ali xá ɛ yi jɛ kilomɛ́tlu we.

⁴²Ényí mɛɖé byɔ́ nǔ we hǔn, nǎ ɛ; mɛɖé ja nǔ hwé gbé ɖo así towe hǔn, ma ɖe kɔ dó e ó.

⁴³ “Mi se ɖɔ: ‘Yǐ wǎn nú nɔzo towe, bó gbɛ́ wǎn nú kɛntɔ́ towe.’

⁴⁴Lo ɔ́, nyɛ ɖo ɖiɖɔ nú mi wɛ ɖɔ: mi yí wǎn nú kɛntɔ́ mitɔn lɛ́ɛ. Mi xo ɖɛ dó mɛ e nɔ dó nu mi lɛ́ɛ jí. Mi wa ɖagbe nú mɛ e nɔ gbɛ́ wǎn nú mi lɛ́ɛ, bó xo ɖɛ ɖagbe nú mɛ e nɔ ɖe dó mi bó nɔ́ dó ya nú mi lɛ́ɛ.

⁴⁵Énɛ́ ɔ́, mi na nyí Tɔ́ mitɔn e ɖo sɛ́xwé ɔ́ sín vǐ; ɖó éyɛ́ nɔ́ zɔ́n, bɔ hwesivɔ́ tɔn nɔ́ hun dó mɛ nyanya lɛ́ɛ kpódó mɛ ɖagbe lɛ́ɛ kpan jí; é nɔ́ bló bɔ jǐ nɔ́ ja nú mɛ e nɔ wa nǔ jlɔ́jlɔ́ lɛ́ɛ kpódó mɛ e nɔ wa nǔ agɔ lɛ́ɛ kpán.

⁴⁶Ɖó ényí mɛ e yí wǎn nú mi lɛ́ɛ kɛ́ɖɛ́ jɛ́n mi nɔ yí wǎn ná ɔ́, le tɛ́ wɛ ɖ'é mɛ nú mi? Tokwɛ́yítɔ́ lɛ́ɛ lɔ nɔ bló gbɔn mɔ̌ ǎ cé?

⁴⁷É ka nyí nɔví mitɔn lɛ́ɛ kɛ́ɖɛ́ jɛ́n mi nɔ dó gbe ɔ́, nǔ gbɔn vo tɛ́ wa wɛ mi ka ɖe? Mɛ e ma nɔ sɛn Mawu ǎ lɛ́ɛ lɔ nɔ wa nǔ gbɔn mɔ̌ ǎ cé?

⁴⁸ Ényí mɔ̌ hǔn, mi bo yí wǎn nú mɛ bǐ, lě e Tɔ́ mitɔn e ɖo sɛ́xwé ɔ́ yí wǎn nú mɛ bǐ gbɔn é.”