Read fon Matíe 6 Bible Online

Matíe 6 - fon bible

Matíe 6

¹ “Mi ma nɔ wa Mawuzɔ́ mitɔn lɛ́ɛ ɖo agbawungba bo na dó xɔ susu ɖo gbɛtɔ́ lɛ́ɛ nukɔn ó. Ɖó, ényí ɖɔ mɔ̌ wɛ mi nɔ wa Mawuzɔ́ mitɔn lɛ́ɛ gbɔn ɔ́, mi sɔ́ ná mɔ ajɔ tɔn yí ɖo Tɔ́ mitɔn e ɖo sɛ́xwé ɔ́ gɔ́n ǎ.

²A ɖo nǔ ná mɛ wɛ hǔn, ma bló ɖi yɛmɛnúwatɔ́ lɛ́ɛ ɖɔhun ó; yědɛɛ lɛ́ɛ ɖo nǔ ná mɛ wɛ ɔ́, gan wɛ yě nɔ ɖó gbɔn kplɔ́ngbasá lɛ́ɛ, bó nɔ́ ɖó gbɔn alixo alixo, bó ná dó xɔ susu ɖo gbɛtɔ́ lɛ́ɛ nukɔn. Má ɖɔ nǔgbó nú mi: yě ko mɔ ajɔ yětɔn lɛ́ɛ yí.

³Amɔ̌, hwɛ ɔ́, a ɖo nǔ ná mɛ wɛ hǔn, alɔ towe amyɔ ɔ́ ní má tunwun nǔ e wa wɛ ɖisí ɔ́ ɖe ɔ́ ó,

⁴bónú nǔ e ná wɛ a ɖe ɔ́ ná dó nɔ wi mɛ; énɛ́ ɔ́, Tɔ́ towe e nɔ mɔ nǔ jɛ wi mɛ ɔ́ ná ná ajɔ tɔn we.”

⁵ “Mi ɖo ɖɛ xo wɛ hǔn, mi ma cí yɛmɛnúwatɔ́ lɛ́ɛ ɖɔhun ó; yědɛɛ lɛ́ɛ nɔ yí wǎn nú te ninɔ ɖo kplɔ́ngbasá lɛ́ɛ kpódó alitó alitó lɛ́ɛ kpó, bo nɔ ɖo ɖɛ xo wɛ, nú gbɛtɔ́ lɛ́ɛ na dó mɔ yě. Má ɖɔ nǔgbó nú mi: yě ko mɔ ajɔ yětɔn lɛ́ɛ yí.

⁶Amɔ̌, hwɛ ɔ́, a ja ɖɛ xo gbé hǔn, byɔ̌ xɔ towe mɛ, bó sú hɔn towe dó ta, bó ɖɔ xó nú Tɔ́ towe e ɖo fínɛ́ bɔ mɛɖé ma nɔ mɔ ǎ é; énɛ́ ɔ́, éyɛ́ mɛ e nɔ mɔ nǔ jɛ wi mɛ ɔ́ ná ná ajɔ tɔn we.

⁷“Mi ɖo ɖɛ xo wɛ hǔn, mi ma nɔ wlí xómaɖixó lɛ́ɛ ɖɔ mɛ e ma nɔ sɛn Mawu ǎ lɛ́ɛ ɖɔhun ó; yědɛɛ lɛ́ɛ wɛ nɔ vɛdó ɖɔ xó gěgé wlí ɖɔ wɛ ná zɔ́n bɔ Mawu ná yí ɖɛ émítɔn sín.

⁸Mi ma bló yě ɖɔhun ó; ɖó Tɔ́ mitɔn ko tunwun nǔ e hu dó mi ɔ́, cóbɔ mi wá ja byɔ̌byɔ́ ɛ gbé.

⁹Lě e mi ɖó ná nɔ xo ɖɛ gbɔn ɔ́ ɖíe: ‘Tɔ́ mǐtɔn e ɖo sɛ́xwé ɔ́, nyǐkɔ towe ní nyí nǔsísí.

¹⁰Axɔ́súɖuɖu towe ní wá; jlǒ towe ní nyí wiwa ɖo ayǐkúngban jí fí, lě e é nɔ nyí wiwa ɖo sɛ́xwé ɔ́ ɖɔhun.

¹¹Nǎ nǔɖuɖu égbé tɔn mǐ.

¹²Sɔ́ hwɛ mǐtɔn lɛ́ɛ kɛ mǐ, lě e mǐ nɔ sɔ́ kɛ mɛ e nɔ wa nǔ nyi do nú mǐ lɛ́ɛ gbɔn é.

¹³Ma lɔn nú mǐ ní jɛ tɛ́nkpɔ́n mɛ ó, lo ɔ́, hwlɛ̌n mǐ gán ɖo awǒvi sí.’ [Ɖó towe wɛ nyí axɔ́súɖuɖu, hlɔ̌nhlɔ́n, kpódó susu kpó, káká sɔ́yi mavɔ mavɔ! Amǐ.]

¹⁴ “Ényí mi nɔ sɔ́ nǔ ɖěe gbɛtɔ́ lɛ́ɛ wa nyi do nú mi lɛ́ɛ kɛ yě ɔ́, Tɔ́ mitɔn e ɖo sɛ́xwé ɔ́ ná sɔ́ mi lɔmɔ̌ tɔn lɛ́ɛ kɛ mi.

¹⁵Lo ɔ́, ényí mi ma nɔ sɔ́ nǔ ɖěe gbɛtɔ́ lɛ́ɛ wa nyi do nú mi lɛ́ɛ kɛ yě ǎ ɔ́, Tɔ́ mitɔn ná sɔ́ mi lɔmɔ̌ tɔn lɛ́ɛ kɛ mi ǎ.”

¹⁶“Mi ɖo nu blá wɛ hǔn, mi ma nɔ nɔ aluwɛ mɛ yɛmɛnúwatɔ́ lɛ́ɛ ɖɔhun ó; yě nɔ dɔn nukún mɛ nyɔ, bo nɔ dó ɖe xlɛ́ gbɛtɔ́ lɛ́ɛ ɖɔ émí ɖo nu blá wɛ. Má ɖɔ nǔgbó nú mi, yě ko mɔ ajɔ yětɔn yí.

¹⁷Amɔ̌, hwɛ ɔ́, a ɖo nu blá wɛ hǔn, blǒ hwiɖée ɖó; fún nukún mɛ, bo vún ɖa towe,

¹⁸bónú mɛ ɖěbǔ ma tunwun ɖo wútu towe ɖɔ a ɖo nu blá wɛ zɛ Tɔ́ towe e ɖo wi mɛ ɖo fínɛ́ ɔ́ wú ó; énɛ́ ɔ́, éyɛ́ mɛ e nɔ mɔ nǔ jɛ wi mɛ ɔ́ ná ná ajɔ tɔn we.”

¹⁹ “Mi ma kplé dɔkun ɖó ayǐkúngban jí fí e nǔvínúví nɔ ɖu nǔ ɖe, bɔ nǔ nɔ jɛ ko ɖe, bɔ ajotɔ́ nɔ tɔ́n dǒ, bó nɔ́ fin nǔ ɖe ɔ́ ó.

²⁰Lo ɔ́, mi kplé dɔkun mitɔn lɛ́ɛ ɖó sɛ́xwé; ɖó nǔvínúví nɔ́ ɖu nǔ ɖo fínɛ́ ǎ; nǔ nɔ́ jɛ ko ɖo fínɛ́ ǎ; ajotɔ́ ka nɔ́ tɔ́n dǒ, bó nɔ́ fin nǔ ɖo fínɛ́ ǎ.

²¹Ɖó fí ɖěe dɔkun towe ɖe ɔ́, fínɛ́ wɛ ayi towe lɔmɔ̌ ná nɔ.”

²²“Nukún towe lɛ́ɛ wɛ nyí zogbɛ́n nú agbaza towe; ényí nukún towe lɛ́ɛ ɖo ganjí ɔ́, agbaza towe bǐ ná nɔ wěziza mɛ.

²³Lo ɔ́, ényí nukún towe lɛ́ɛ ma ɖo ganjí ǎ ɔ́, agbaza towe bǐ ná nɔ zǐnflú mɛ; ɖó nú wěziza e ɖo wútu towe ɔ́ húzú zǐnflú ɔ́, zǐnflú gɔngɔn tɛ́ mɛ wɛ a ka na ɖe nɛ́?”

²⁴“Mɛ ɖé sixú sɛn gǎn we ǎ; ɖó é ná gbɛ́ wǎn nú mɛ ɖě, bo na yí wǎn nú mɛ ɖě; abǐ é ná se tónú nú mɛ ɖě, bo na vɛ́ tóli nú mɛ ɖě. Mi sixú sɛn Mawu bo lɛ́ sɛn dɔkun ǎ.”

²⁵“Énɛ́ wú ɔ́, má ɖɔ nú mi: ado ní ma hu mi dó nǔ e mi na ɖu, bo na nɔ gbɛ é, kpódó nǔ e mi na dó é kpó wú ó; gbɛ ma xɔ akwɛ́ hú nǔɖuɖu, bɔ agbaza lɔ ma xɔ akwɛ́ hú nǔzínzán ǎ cé?

²⁶Mi kpɔ́n xɛ lɛ́ɛ; yě nɔ dó nǔkún ǎ, yě ká nɔ ya nǔkún bó nɔ́ bɛ́ dó agɔ̌ mɛ ǎ; có Tɔ́ mitɔn e ɖo sɛ́xwé ɔ́ ka nɔ́ ná nǔɖuɖu yě. Midɛɛ lɛ́ɛ ɔ́, mi ma ka xɔ akwɛ́ hú xɛ énɛ́ lɛ́ɛ ǎ cé?

²⁷Mɛ̌ ka ɖo mi mɛ, bɔ nǔlinkpɔ́n tɔn ná zɔ́n, bɔ é ná sixú dó azǎn kpɛɖé gbɛzán é ɖésú tɔn jí?

²⁸“Étɛ́wútu mi ka nɔ ɖo tagba jɛ dó nǔ e mi ná dó ɔ́ wú wɛ? Mi kpɔ́n lě e folówa lɛ́ɛ nɔ su gbɔn ɖo gběhan lɛ́ɛ mɛ é; yě nɔ wa azɔ̌ ɖě ǎ, yě ká nɔ lɔn avɔ ǎ.

²⁹ Axɔ́sú Salomɔ́ɔ ɖésú ɔ́, lě e é ɖó dɔkun sɔ ɔ́ nɛ́, có é ma ka ɖó avɔ sɔ ɖokpó yětɔn nɛ́!

³⁰Ényí Mawu ka ba acɔ́ nú gběhan e ɖo te égbé, bɔ sɔ ɔ́, è nǎ bɛ̌ dó myɔ mɛ ɔ́ sɔ mɔ̌ ɔ́, nɛ̌ wɛ é ma ka ná ná mi nǔ e mi ná dó lɛ́ɛ ǎ gbɔn, nǔɖiɖi kpɛvínɔ e mi?

³¹Hǔn, mi bo ma jɛ tagba, bó nɔ́ ɖɔ: ‘Ani mǐ ka ná ɖu’; ‘ani mǐ ka ná nu’; ‘étɛ́ mǐ ka ná dó’ ó.

³²Ɖó mɛ e ma ɖi nǔ nú Mawu ǎ lɛ́ɛ wɛ nɔ́ ɖo wezun dó wɛ, ɖo nǔ énɛ́ lɛ́ɛ gúdo. Tɔ́ mǐtɔn e ɖo sɛ́xwé ɔ́ tunwun ɖɔ nǔ énɛ́ lɛ́ɛ hu dó mi.

³³Axɔ́súɖuɖu Mawu tɔn kpódó jlǒ tɔn wiwa kpó ní nɔ́ myá nukún nú mi jɛ nukɔn; énɛ́ ɔ́, é ná ná nǔ énɛ́ lɛ́ɛ bǐ mi.

³⁴Mi ma lin sɔ e ja ɔ́ kpɔ́n ó, ɖó sɔ e ja ɔ́ ná wá kpódó tagba é ɖésúnɔ tɔn lɛ́ɛ kpó. Tagba e ayǐhínhɔ́n ɖokpó ɖokpó ná hɛn wá ɔ́ ko kpé nú ayǐhínhɔ́n énɛ́ ɔ́.”