Read fon Maki 1 Bible Online

Maki 1 - fon bible

Maki 1

¹Fí e Wɛn Ɖagbe e ɖɔ xó dó Jezu Klísu Mawu ví ɔ́ wú ɔ́ bɛ́ sín ɔ́ ɖíe.

²Gbeyíɖɔ Mawu tɔn Ezayíi ko wlán ɖ'ayǐ ɖɔ: “Mawu ɖɔ: ‘Wɛnsagun ce ɖíe un sɛ́ dó e, bɔ é ná jɛ nukɔn nú we, bó ná bló ali ɖó nú we.’

³ É ná nɔ́ ɖo xó sú wɛ ɖo gbětótló mɛ, bó ná nɔ́ ɖɔ: ‘Mi bló ali ɖó nú Aklúnɔ, mi jlɔ́ ali tɔn lɛ́ɛ ɖó.’ ”

⁴Jǎan Yɛhwesinlɛnúmɛtɔ́ wá, bó nɔ́ ɖo xó sú wɛ ɖo gbětótló mɛ ɖɔ: “Mi lɛ́ kɔ sín hwɛ mitɔn lɛ́ɛ gúdo, bó wá lɛ yɛhwesin, bónú Mawu ná sɔ́ hwɛ mitɔn lɛ́ɛ kɛ mi.”

⁵Mɛ e ɖo Judée gbé jí lɛ́ɛ bǐ, kpódó mɛ e ɖo Jeluzalɛ́mu lɛ́ɛ kpán nɔ́ wá gɔ̌n tɔn, bó nɔ́ ɖɔ hwɛ yětɔn lɛ́ɛ bǐ, bɔ Jǎan nɔ lɛ yɛhwesin nú yě ɖo Judɛ́ɛn tɔ ɔ́ mɛ.

⁶ Awu kacakaca ɖé wɛ Jǎan nɔ dó, bɔ è sɔ́ lǎkúnmí sín fún dó lɔn ná, bɔ é nɔ́ sin anyǔgójíblánú. É nɔ́ ɖu wɛn kpódó wǐin akú kpó.

⁷É nɔ́ ɖo Mawuxó ɔ́ jlá togun lɛ́ɛ wɛ ɖɔ: “Mɛ ɖé ɖo gǔdo ce jǎwe; mɛ énɛ́ ɔ́ hú gǎn mì, bɔ un nyí mɛɖé bó sixú fɛ, bó tún afɔkpakan tɔn lɛ́ɛ vɔ́vɔ́ ǎ.

⁸Nyɛ ɔ́, sin wɛ un sɔ́ dó ɖo yɛhwesin lɛ nú mi wɛ; éyɛ́ ká ná sɔ́ Yɛsinsɛn dó lɛ yɛhwesin nú mi.”

⁹Hwenɛ́nu wɛ Jezu gosín gletoxo e è nɔ ylɔ́ ɖɔ Nazalɛ́ti é mɛ, ɖo Galilée yíkúngban jí wá, bɔ Jǎan lɛ yɛhwesin n'i ɖo Judɛ́ɛn tɔ ɔ́ mɛ.

¹⁰Hwenu e Jezu ɖo tɔ ɔ́ mɛ tɔ́n sín wɛ ɔ́ jǐnukúnsin hun, bɔ Yɛsinsɛn cí ahwannɛ́ ɖɔhun bó wá jɛ te dó jǐ tɔn.

¹¹ Bɔ è se gbe ɖé sín jǐxwé, bɔ é ɖɔ: “Vǐ vívɛ́ná wɛ a nyǐ nú mì, bɔ xomɛ nɔ hun mì dó wǔtu towe tlala.”

¹²Énɛ́ gúdo ɔ́, Yɛ ɔ́ nyi Jezu sɛ́ dó gbětótló mɛ.

¹³É nɔ fínɛ́ xɔ azǎn kanɖé (40), bɔ Satáan tɛ́n ɛ kpɔ́n. Gběkanlin lɛ́ɛ tɛ́ntin wɛ é nɔ́ nɔ, bɔ Mawu sín wɛnsagun lɛ́ɛ nɔ́ wá gɔ́ alɔ n'i.

¹⁴Ée è wlǐ Jǎan gúdo ɔ́, Jezu yi Galilée, bó jɛ Wɛn Ɖagbe Mawu tɔn jlá mɛ lɛ́ɛ jí,

¹⁵bó nɔ́ ɖɔ: “Hwe ɔ́ nu ɖíe su e. Axɔ́súɖuɖu Mawu tɔn kó sɛ yá. Mi lɛ́ kɔ sín hwɛ mitɔn lɛ́ɛ gúdo, bó ɖi nǔ nú Wɛn Ɖagbe Mawu tɔn.”

¹⁶Jezu ka ɖo Galilée tɔ ɔ́ tó gbɔn wɛ, bó mɔ Sinmɔ́ɔ kpódó nɔví tɔn Andlé kpán ɖo ɖɔ nyi wɛ ɖo tɔ ɔ́ jí; ɖó ɖɔnyitɔ́ wɛ nú yě.

¹⁷Jezu ɖɔ nú yě ɖɔ: “Mi xwedó mì. Un ná ná kplɔ́n mi, bɔ mi ná nɔ́ dɔn gbɛtɔ́ lɛ́ɛ, lě e mi nɔ nyi ɖɔ dó wlí hweví gbɔn é.”

¹⁸Énɛ́ ɔ́, yě jó ɖɔ yětɔn lɛ́ɛ dó tlóló, bó xwedó e.

¹⁹Ée Jezu ná lɛ́ sɛ yi nukɔn kpɛɖé ɔ́, é mɔ Zebeɖée ví we: Jaki kpódó Jǎan kpán, bɔ yě ɖo tɔjíhún mɛ, bó ɖo ɖɔ yětɔn lɛ́ɛ blóɖó wɛ,

²⁰bɔ Jezu ylɔ́ yě tlóló, bɔ yě jó tɔ́ yětɔn Zebeɖée ɔ́ dó nyi tɔjíhún ɔ́ mɛ kpódó azɔ̌watɔ́ lɛ́ɛ kpán, lobo xwedó e.

²¹Jezu kpódó ahwanvú tɔn lɛ́ɛ kpó yi Kafaanawúmu; gbɔjɛzán Jwifu lɛ́ɛ tɔn gbe ɔ́, é byɔ́ kplɔ́ngbasá, bó jɛ nǔ kplɔ́n mɛ jí.

²² Nǔkplɔ́nmɛ tɔn nɔ kpácá yě mɛ e ɖo tó ɖó e wɛ lɛ́ɛ, ɖó é nɔ kplɔ́n nǔ mɛ kpódó acɛkpikpa kpán; é cí sɛ́nkplɔ́nmɛtɔ́ lɛ́ɛ ɖɔhun ǎ.

²³Hwenɛ́nu ɔ́, dǎwe ɖé ɖo kplɔ́ngbasá ɔ́, bɔ yɛ nyanya ɖo jǐ tɔn; é sú xó, bó ɖɔ:

²⁴“Étɛ́ wɛ mǐ kpó hwi kpó kpédó, Jezu Nazalɛ́tinu? Kún mǐtɔn sú dó gbé wɛ a ja bo wá a? Un tunwun mɛ e a nyǐ é; mɛ mímɛ́ Mawu tɔn wɛ a nyǐ.”

²⁵Jezu ka bɛ́ adǎn dó jǐ tɔn ɖɔ: “Nɔ abwɛ̌, bó gosín dǎwe élɔ́ jí.”

²⁶Bɔ yɛ nyanya ɔ́ húnhún dǎwe ɔ́ syɛ́nsyɛ́n, bó gosín jǐ tɔn, lobo sú xó ɖaxó ɖé.

²⁷É kpácá yě bǐ bɔ yě nɔ́ kanbyɔ́ yěɖée ɖɔ: “Ani ka ɖíe? Nǔkplɔ́nmɛ alɔkpa vo ɖíe mɛ! É nɔ́ ɖe gbe dó yɛ nyanya lɛ́ɛ, kpódó acɛkpikpa kpán, bɔ yě nɔ́ se gbe n'i.”

²⁸Azɔn ɖokpó ɔ́, nyǐkɔ tɔn gba kpé Galilée gbé ɔ́ bǐ jí.

²⁹Ée Jezu tɔ́n sín kplɔ́ngbasá Jwifu lɛ́ɛ tɔn ɔ́, é kpódó Jaki kpó, kpódó Jǎan kpán wá yi Sinmɔ́ɔ kpódó Andlé kpán sín xwé gbe.

³⁰Avivɔ ka ɖo Sinmɔ́ɔ sín asinɔ jí, bɔ é ɖo ayǐmlɔ́mlɔ́; ée Jezu wá lě tlóló ɔ́, yě ɖɔ xó tɔn nú Jezu.

³¹Jezu sɛ yá azinzɔnnɔ ɔ́, bó hɛn alɔ tɔn, bó sɔ́ ɛ sí te; tlóló ɔ́, avivɔ ɔ́ kɔ́n n'i, bɔ é jɛ jǒnɔ yětɔn yí jí.

³²Gbadanu hwenu e hwe ɖo xɔ yi wɛ ɔ́, è kplá azinzɔnnɔ lɛ́ɛ bǐ, kpódó mɛ e jí yɛ nyanya ɖe lɛ́ɛ kpó wá nú Jezu,

³³bɔ to ɔ́ bǐ sésé wá kplé ɖo xwé e gbe Jezu ɖe ɔ́ sín hɔntogbó jí.

³⁴Jezu gbɔ azɔn tɛnmɛ tɛnmɛ nú azinzɔnnɔ gěgé, bó nya yɛ nyanya gěgé. É ka lɔn nú yɛ nyanya lɛ́ɛ ní ɖɔ xó ǎ, ɖó yě tunwun mɛ e é nyí ɔ́.

³⁵Jezu fɔ́n zǎn ayǐtéhɔ̌nnu, bó tɔ́n yi fí e mɛɖé ma ná dó tagba n'i ɖe ǎ é, bó xo ɖɛ ɖo fínɛ́.

³⁶Sinmɔ́ɔ kpódó gbɛ̌ tɔn lɛ́ɛ kpó ká jɛ gbě tɔn mɛ.

³⁷Hwenu e yě wá yi mɔ ɛ ɔ́, yě ɖɔ n'i ɖɔ: “Mɛ lɛ́ɛ bǐ wɛ ɖo biba we wɛ.”

³⁸É ka ɖɔ nú yě ɖɔ: “Mi nú mǐ ná gosín fí bó ná yi to e sɛkpɔ́ fí lɛ́ɛ mɛ, nú má yi jlá Mawuxó ɖo fí énɛ́ lɛ́ɛ lɔmɔ̌, ɖó nǔ e wú un tɔ́n é nɛ́.”

³⁹ Bɔ é gbɔn Galilée to ɔ́ bǐ mɛ, bó nɔ́ jlá Mawuxó ɖo kplɔ́ngbasá lɛ́ɛ, bó nɔ́ nya yɛ nyanya sín mɛ lɛ́ɛ jí.

⁴⁰Nya gudunɔ ɖé wá Jezu gɔ́n, bó jɛ kpo ɖo nukɔn tɔn, bó ɖɔ: “Nú é jló we ɔ́, a hɛn ɔ́, a nǎ gbɔ azɔn nú mì.”

⁴¹Nǔ tɔn ka blá wǔ nú Jezu, bɔ é dlɛ́n alɔ, bó ɖó wǔ tɔn bó ɖɔ: “Un jló, azɔn towe ní gbɔ.”

⁴²Tlóló ɔ́, azɔn tɔn gbɔ, bɔ wútu tɔn jɛ te.

⁴³ Jezu ɖɔ xó n'i kpódó adǎn kpó ɖɔ: “Đǒtó mì ganjí! Ma ɖɔ nú mɛɖé ó; lo ɔ́, sɔ́ lě e a ɖe ɔ́ yi xlɛ́ vɔ̌sánú-xwlémawutɔ́ lɛ́ɛ, bó ná wǔsláslá sín agban e xó Mɔyízi ɖɔ ɔ́, bónú yě ná dó tunwun ɖɔ azɔn towe gbɔ nǔgbó.” Énɛ́ ɔ́ gúdo ɔ́, é nyi i.

⁴⁵Lo ɔ́, ée nya énɛ́ ɔ́ ɖidó ɔ́, é jɛ nǔ e Jezu wa n'i ɔ́ jlá jí gbɔn fí bǐ; énɛ́ ɔ́ wú wɛ Jezu ma sɔ́ sixú yi toxo ɖé mɛ ǎ. É gbɔ bó yi cí fí e mɛɖé ma ɖe ǎ é, bɔ mɛ lɛ́ɛ nɔ gosín fí tɛnmɛ tɛnmɛ wá mɔ ɛ.