Read fon Maki 10 Bible Online

Maki 10 - fon bible

Maki 10

¹Jezu wá gosín fínɛ́, bó ɖidó Judée gbé jí ɖo Judɛ́ɛn tɔ ɔ́ gúdo. Mɛ lɛ́ɛ ka lɛ́ nyi ahwan xwedó e, bɔ é jɛ nǔ kplɔ́n yě jǐ, lě e é ko nɔ́ bló gbɔn é.

²Falizyɛn ɖé lɛ́ɛ ka wá xwetɔ́n, bó jló ná tɛ́n ɛ kpɔ́n; yě sɛ yá ɛ, bó jɛ nǔ kanbyɔ́ ɛ jí ɖɔ: “Sɛ́n mǐtɔn ná gbe ɖɔ súnnu ní gbɛ́ asi tɔn a?”

³Bɔ Jezu yí xó, bó kanbyɔ́ yě ɖɔ: “Étɛ́ wɛ Mɔyízi ka ɖɔ mi ní bló?”

⁴ Yě yí gbe n'i ɖɔ: “Mɔyízi ná gbe ɖɔ è hɛn ɔ́, è nǎ wlán wěma ɖɔ émí gbɛ́ ɛ, lobo nya ɛ.”

⁵Jezu ka yí gbe nú yě ɖɔ: “Tótlítlí mitɔn wɛ zɔ́n bɔ Mɔyízi gbɔ bo ná sɛ́n énɛ́ mi.

⁶ Sín bǐbɛ́mɛ ɔ́, hwenu e Mawu bló nǔ lɛ́ɛ bǐ fó ɔ́, ‘é wá bló gbɛtɔ́ súnnu kpódó nyɔ̌nu kpó.

⁷ Énɛ́ wú wɛ súnnu ná jó tɔ́ tɔn kpódó nɔ tɔn kpó dó, bó ná jɛ kpɔ́ xá asi tɔn,

⁸bɔ yě mɛ we lɛ́ɛ ná húzú ɖokpó géé;’ énɛ́ ɔ́, yě sɔ́ ɖo mɛ we nyí wɛ ǎ, lo ɔ́, yě húzú ɖokpó géé.

⁹Ényí mɔ̌ hǔn, gbɛtɔ́ ní bo ma klán nǔ e Mawu dɔn cá é ó.”

¹⁰Ée yě wá xwé gbe ɔ́, ahwanvú tɔn lɛ́ɛ lɛ́ vɔ́ nǔ ɖokpó ɔ́ kanbyɔ́ ɛ dó xó énɛ́ wú,

¹¹bɔ é ɖɔ nú yě ɖɔ: “Mɛ e nya asi tɔn bo da nyɔ̌nu ɖěvo ɔ́, acɛ wɛ é gba nyɔ̌nu nukɔntɔn ɔ́ wú.

¹²Mɔ̌ ɖokpó ɔ́, ényí nyɔ̌nu ɖé gbɛ́ asú tɔn, bó yi da ɖěvo ɔ́, aga wɛ é lɛ.”

¹³Mɛ ɖé lɛ́ɛ kplá yɔkpɔ́vú ɖé lɛ́ɛ wá nú Jezu bónú é ná xo ɖɛ dó yě jí; ahwanvú tɔn lɛ́ɛ ka lɔn ǎ, bó bɛ́ adǎn dó mɛ lɛ́ɛ jí.

¹⁴Ée Jezu mɔ mɔ̌ ɔ́, xomɛ sin i dó ahwanvú tɔn lɛ́ɛ wú, bɔ é ɖɔ nú yě ɖɔ: “Mi jó yɔkpɔ́vú lɛ́ɛ dó nú yě ní wá gɔ̌n ce; mi ma sú ali dó yě ó; ɖó axɔ́súɖuto Mawu tɔn ɔ́, mɛ e cí yě ɖɔhun lɛ́ɛ tɔn wɛ.

¹⁵ Má ɖɔ nǔgbó nú mi: mɛ e ma ná yí axɔ́súɖuɖu Mawu tɔn ɔ́ yɔkpɔ́vú ɖɔhun ǎ ɔ́, é ná sixú byɔ́ mɛ ǎ.”

¹⁶Ée é ɖɔ mɔ̌ ɔ́, é dɔn vǐ lɛ́ɛ dó wǔ, bó lílí alɔ ta nú yě, bó xo ɖɛ dó yě jǐ.

¹⁷Ali wɛ Jezu wlí kɛ́ɖɛ́, bó xweyǐgbe, bɔ nyaví dɔ̌nkpɛvú ɖé kán wezun wá mɔ ɛ, bó jɛ kpo ɖo nukɔn tɔn, lobo kanbyɔ́ ɛ ɖɔ: “Mɛ̌si ɖagbe, étɛ́ un ka ɖó ná wa, bɔ Mawu ná ná mì gbɛ mavɔ mavɔ?”

¹⁸Jezu ka yí gbe n'i ɖɔ: “Aniwú a ka ylɔ́ mì ɖɔ mɛ ɖagbe? Mɛ ɖěbǔ nyí mɛ ɖagbe zɛ Mawu wú ǎ.

¹⁹ A tunwun sɛ́n lɛ́ɛ: ‘Ma hu mɛ ó, ma lɛ aga ó, ma ja ajo ó, ma ɖe kúnnu agɔ ó, ma hízí mɛɖé nú ó, sí tɔ́ towe kpódó nɔ towe kpó.’ ”

²⁰Nyaví ɔ́ ka yí gbe n'i ɖɔ: “Mɛ̌si, sín yɔkpɔ́vú mɛ ce ɖokpóó wɛ un ko ɖo sɛ́n énɛ́ nyi wɛ.”

²¹Jezu ka kpɔ́n ɛ, bɔ nǔ tɔn nyɔ́ nukún tɔn mɛ, bɔ é ɖɔ n'i ɖɔ: “Nǔ ɖokpó géé wɛ kpo nú we: yi, bo sa nǔ e a ɖǒ lɛ́ɛ bǐ, bó má akwɛ́ tɔn nú wamamɔnɔ lɛ́ɛ; énɛ́ ɔ́, a nǎ ɖǒ dɔkun ɖo Mawu gɔ́n; énɛ́ ɔ́ gúdo ɔ́, wǎ, bó xwedó mì.”

²²Lo ɔ́, ée é se mɔ̌ ɔ́, wǔ kú i, bɔ é ɖidó wǔɖéwúɖé, ɖó dɔkunnɔ ɖaxó wɛ é nyí.

²³Jezu ka kpɔ́n ahwanvú tɔn e lɛ́ lɛ̌ dó e lɛ́ɛ bó ɖɔ: “Axɔ́súɖuto Mawu tɔn mɛ byɔ́byɔ́ ná vɛ́ wǔ nú dɔkunnɔ lɛ́ɛ kpɔ́n!”

²⁴Xó énɛ́ kpácá ahwanvú lɛ́ɛ; Jezu ka lɛ́ yí xó, bó ɖɔ nú yě ɖɔ: “Vǐ ce lɛ́ɛ mi, axɔ́súɖuto Mawu tɔn mɛ ná yi vɛ́ wǔ ɖésú.

²⁵Nyɛ̌ví li nu dín gbɔn ná bɔwǔ nú lǎkúnmí hú dɔkunnɔ ná byɔ́ axɔ́súɖuto Mawu tɔn mɛ.”

²⁶Ée ahwanvú lɛ́ɛ se mɔ̌ ɔ́, é lɛ́ kpácá yě, bɔ yě kanbyɔ́ Jezu ɖɔ: “Mɛ̌ ka sixú ɖo hwlɛngán ɔ́ ná mɔ wɛ lo?”

²⁷Jezu kpɔ́n yě dáán, bó ɖɔ: “Gbɛtɔ́ lɛ́ɛ wɛ nǔ énɛ́ ɔ́ gló, é ka ɖo mɔ̌ nú Mawu ǎ; ɖó Mawu kpé nǔ bǐ wǔ.”

²⁸Piyɛ́ɛ ka yí xó, bó ɖɔ n'i ɖɔ: “Mǐdɛɛ lɛ́ɛ ɖíe jó nǔ bǐ dó, bó xwedó we e.”

²⁹Jezu ka yí xó, bó ɖɔ: “Má ɖɔ nǔgbó nú mi: mɛ e ná jó xwé tɔn dó, bó ná jó nɔví tɔn nyɔ̌nu, nɔví tɔn súnnu dó, bó ná jó tɔ́ tɔn kpódó nɔ tɔn kpó dó, bó ná jó vǐ dó, bó ná jó gle dó, ɖó nyɛ kpódó Wɛn Ɖagbe ɔ́ kpán wú ɔ́, é ná wá mɔ xwé, lobo mɔ nɔví sunnú, nɔví nyɔ̌nu, bó ná mɔ nɔ, bó ná mɔ vǐ, bó ná mɔ gle, bɔ nǔ énɛ́ e é jó dó lɛ́ɛ ɔ́, é ná mɔ mɔ̌hunkɔtɔn donu kanwe ko (100) hwe élɔ́ nu din; é ka ná lɛ́ mɔ wǔvɛ́, é ka wá yá ɔ́, é ná mɔ gbɛ mavɔ mavɔ.

³⁰

³¹ Mɛ e ɖo nukɔn din lɛ́ɛ gěgé ná wá jɛ gúdo, bɔ mɛ e ɖo gúdo din lɛ́ɛ gěgé ná wá jɛ nukɔn.”

³²Yě ɖo ali jí, bó ɖo kpó fán wɛ xwe Jeluzalɛ́mu, bɔ Jezu ɖo nukɔn nú yě. Ado ɖo mɛsɛ́dó lɛ́ɛ hu wɛ, bɔ mɛ e xwedó yě lɛ́ɛ ɖo xɛsi jí. Jezu ka ylɔ́ mɛsɛ́dó tɔn wěwe lɛ́ɛ sín mɛ lɛ́ɛ mɛ yi jɛ zɔ, bó jɛ nǔ e ná jɛ dó jǐ tɔn ɖo malín málín mɛ ɔ́ tínmɛ nú yě jí ɖɔ:

³³“Mǐ ɖíe xwe Jeluzalɛ́mu e; è nǎ jó nyɛ Gbɛtɔ́ví ɔ́ nú vɔ̌sánú-xwlémawutɔ́gán lɛ́ɛ, kpódó sɛ́nkplɔ́nmɛtɔ́ lɛ́ɛ kpó, bɔ yě ná ɖó kúhwɛ nú mì, bó ná jó mì nú mɛ e ma nyí Jwifu ǎ lɛ́ɛ.

³⁴Yě ná cá mì ko; yě ná tún atán kɔn nyi wǔ ce; yě ná zé lanbá dó xo mì, bó ná hu mì. Azǎn atɔngɔ́ ɔ́ gbe ɔ́, un ka ná fɔ́n sín kú.”

³⁵Énɛ́ gúdo ɔ́, Zebeɖée sín vǐ Jaki kpó Jǎan kpán wá Jezu gɔ́n, bó ɖe kpá ɛ ɖɔ: “Mɛ̌si, mǐ jló ɖɔ a nǐ bló nǔ e byɔ́ we gbé mǐ ja ɔ́ nú mǐ.”

³⁶Jezu ka kanbyɔ́ yě ɖɔ: “Étɛ́ mi jló ma bló nú mi?”

³⁷Bɔ yě yí gbe n'i ɖɔ: “Hwenu a nǎ wá ɖo susu towe mɛ ɔ́, nǎ gbe, bónú mǐ mɛ we lɛ́ɛ ná wá jínjɔ́n akpá towe; mɛ ɖokpó ná jínjɔ́n ɖisí towe xwé, mɛ wegɔ́ ɔ́ ná jínjɔ́n amyɔ towe xwé.”

³⁸ Jezu ka yí gbe nú yě ɖɔ: “Mi tunwun nǔ e byɔ́ wɛ mi ɖe ɔ́ ǎ. Wǔvɛ́ kɔ́fu e nu gbé wɛ un ja ɔ́, mi sixú nu xá mì a? Yɛhwesin wǔvɛ́ tɔn e ná lɛ wɛ un ɖe ɔ́, mi ná sixú lɛ a?”

³⁹Yě ka yí gbe n'i ɖɔ: “Mǐ ná kpé wú.” Bɔ Jezu ɖɔ nú yě ɖɔ: “Mi ná wá nu wǔvɛ́ kɔ́fu e nu gbé un ja ɔ́, bó ná lɛ yɛhwesin wǔvɛ́ tɔn e lɛ gbé un ja ɔ́ nǔgbó.

⁴⁰Amɔ̌, ɖisí ce xwé abǐ amyɔ ce xwé ninɔ ɔ́, nyɛ wɛ ná ná ǎ. Mɛ e Mawu kó bló tɛnmɛ énɛ́ lɛ́ɛ ɖ'ayǐ ná lɛ́ɛ tɔn wɛ.”

⁴¹Ée mɛsɛ́dó wǒ ɖě lɛ́ɛ se nǔ e Jaki kpódó Jǎan kpó byɔ́ ɔ́, nǔ yětɔn vɛ́ yě wú.

⁴² Jezu ka ylɔ́ yě bǐ kplé, bó ɖɔ nú yě ɖɔ: “Mi tunwun ɖɔ mɛ e è nɔ ylɔ́ ɖɔ togán ɖo ayǐkúngban jí fí lɛ́ɛ ɔ́, acɛ e jló yě lɛ́ɛ wɛ yě nɔ́ kpa nú toví yětɔn lɛ́ɛ, lobɔ gǎnhúnǔtɔ́ lɛ́ɛ lɔ nɔ kpa acɛ nú yě.

⁴³ Nǔ ka ɖó ná nyí mɔ̌ ɖo midɛɛ lɛ́ɛ tɛ́ntin ǎ; lo ɔ́, mɛ ɖěbǔ jló ná nyí gǎn ɖo mi mɛ hǔn, ní nyí mɛsɛntɔ́ mitɔn.

⁴⁴Mɛ ɖé ka jló ná nyí nukɔntɔ́ ɖo mi mɛ hǔn, ní nyí kannumɔ nú mɛ bǐ.

⁴⁵Đó nyɛ Gbɛtɔ́ví ɔ́, è nǎ sɛn mì wú wɛ un wá ǎ; lo ɔ́, mɛ sɛn gbé wɛ un tɔ́n bó wá, bó ná sɔ́ gbɛ ce jó dó xɔ gbɛ nú mɛ gěgé.”

⁴⁶Yě wá yi jɛ toxo e è nɔ ylɔ́ ɖɔ Jeliko ɔ́ mɛ, bɔ Jezu kpódó ahwanvú tɔn lɛ́ɛ kpó wá ɖo toxo ɔ́ mɛ tɔ́n sín wɛ, bɔ mɛ gěgé ɖé lɛ́ɛ ka nyi ahwan xwedó yě. Nya nukúntíntɔ́nnɔ nǔbyɔ́ɖutɔ́ ɖé ɖo to énɛ́ mɛ, bɔ è nɔ ylɔ́ ɛ ɖɔ Baatimɛ́ɛ, tínmɛ tɔn wɛ nyí Timɛ́ɛ sín vǐ súnnu. É ɖo ayǐjínjɔ́n ɖo ali kpá.

⁴⁷Ée é se ɖɔ Jezu Nazalɛ́ti tɔn wɛ ɔ́, é jɛ xó sú jí ɖɔ: “Jezu Davídi ví, kú nǔbláwǔ nú mì!”

⁴⁸Mɛ gěgé wɔ́ ɛ, bó ɖɔ n'i ɖɔ ní xwɛ; lo ɔ́, é nɔ lɛ́ sú xó d'é jí ɖɔ: “Davídi ví, kú nǔbláwǔ nú mì!”

⁴⁹Jezu ka nɔ te, bó ɖɔ: “Mi yi ylɔ́ ɛ wá!” Bɔ yě yi ylɔ́ ɛ, bó ɖɔ n'i ɖɔ: “Kpan akɔ́n, sí te, é ɖo ylɔ̌ylɔ́ we wɛ.”

⁵⁰Bɔ nukúntíntɔ́nnɔ ɔ́ ɖe awu tɔn ɖaxó ɔ́ nyi gbě, lobo kán wezun yi Jezu gɔ́n.

⁵¹Jezu ka kanbyɔ́ ɛ ɖɔ: “Ani wɛ a jlǒ nú ma wa nú we?” Nya ɔ́ ka yí gbe n'i ɖɔ: “Mɛ̌si, bló bónú ma lɛ́ vɔ́ mɔ nukúnnú.”

⁵²Jezu ka ɖɔ n'i ɖɔ: “Yi, nǔ e a ɖi ɔ́ zɔ́n bɔ Mawu gbɔ azɔn nú we.” Azɔn ɖokpó ɔ́, nukún tɔn lɛ́ɛ hun, bɔ é wlí ali jɛ Jezu gúdo.