Read fon Maki 11 Bible Online

Maki 11 - fon bible

Maki 11

¹Jezu kpódó ahwanvú tɔn lɛ́ɛ kpó ko sɛkpɔ́ Jeluzalɛ́mu, bó ko ɖo malín málín mɛ dó Betaníi kpódó Bɛtifajée kpó, ɖo olívutín só ɔ́ kpá; bɔ Jezu sɛ́ ahwanvú tɔn we dó,

²bó ɖɔ nú yě ɖɔ: “Mi yi gletoxo e ɖo nukɔn mitɔn nɛ́ ɔ́ mɛ. Mi byɔ́ mɛ tlóló ɔ́, mi ná mɔ tócíví e jí mɛɖé ma ko xá gbeɖé ǎ ɔ́ ɖokpó ɖo sinsin; mi tún kan n'i, bó kplá ɛ wá nú mì.

³Mɛ ɖé ka kan nǔ e wú mi ɖo mɔ̌ wa wɛ ɔ́ byɔ́ mi hǔn, mi yí gbe n'i ɖɔ: ‘Nǔ tɔn wɛ hú dó Aklúnɔ;’ énɛ́ ɔ́, mɛ ɔ́ ná jó e nú mi tlóló, bɔ mi ná kplá ɛ wá fí.”

⁴Yě ka yi toxo ɔ́ mɛ, bó mɔ tócíví ɖokpó ɖo sinsin ɖo hɔn ɖé to, ɖo ali kpá, bó tún i.

⁵Mɛ e ɖo te fínɛ́ lɛ́ɛ ɖě kanbyɔ́ yě ɖɔ: “Ani wa wɛ mi ka ɖe nɛ́? Nɛ̌ ka gbɔn bɔ mi ɖo kan tún nú tócíví ɔ́ wɛ?”

⁶Yě ka yí gbe nú yě lě e Jezu ɖɔ gbɔn é, bɔ yě jó yě dó.

⁷Yě kplá tócíví ɔ́ wá nú Jezu, bó tɛ́ awu yětɔn lɛ́ɛ nyi tócíví ɔ́ jí, bɔ Jezu jínjɔ́n jí.

⁸Mɛ gěgé tɛ́ avɔ yětɔn lɛ́ɛ nyi ali ɔ́ jí, mɛ ɖě gbo ama kɔn nyi ali ɔ́ jí.

⁹ Bɔ mɛ e ɖo nukɔn nú Jezu lɛ́ɛ kpódó mɛ e ɖo gǔdo tɔn lɛ́ɛ kpó nɔ́ sú xó, bó nɔ́ ɖɔ: “Ozána! Susu nú mɛ e jǎwe ɖo Aklúnɔ nyǐkɔ mɛ é.

¹⁰Susu nú axɔ́súɖuɖu e jǎwe é; axɔ́súɖuɖu tɔ́ mǐtɔn Davídi tɔn. Ozána! Susu nú Mawu Ajalɔ̌nlɔn ɖo jǐxwé.”

¹¹Jezu yi Jeluzalɛ́mu, bó byɔ́ sinsɛnxɔ mɛ, lobo kpɔ́n lě e nǔ lɛ́ɛ ɖo yiyi gbɔn wɛ é. Ée é ka mɔ ɖɔ hwenu ko ɖo sisɛyi wɛ ɔ́, é kpódó mɛsɛ́dó tɔn wěwe lɛ́ɛ kpó lɛ́ kɔ yi Betaníi.

¹²Ayǐhɔ́ngbe tɔn hwenu e Jezu kpódó mɛsɛ́dó tɔn lɛ́ɛ kpó wá ɖo Betaníi gosín wɛ ɔ́, xovɛ́ sin i.

¹³É ka mɔ fígitín ɖé sɛ́ dó, bɔ é dó ama ganjí, bɔ é ɖidó atín ɔ́ sá, bó ná kpɔ́n ɖɔ émí ná mɔ sínsɛ́n ɖé ɖ'é jí a jí; lo ɔ́, ée é yi atín ɔ́ sá ɔ́, é mɔ nǔtí ɖo jǐ tɔn zɛ ama tɔn lɛ́ɛ wú ǎ, ɖó hwenu e é nɔ́ sɛ́n ɔ́ ko su ǎ.

¹⁴Jezu ka ɖɔ nú atín ɔ́ ɖɔ: “Mɛ ɖé ní ma sɔ́ ɖu sínsɛ́n towe gbeɖé ó,” bɔ ahwanvú tɔn lɛ́ɛ se xó e é ɖɔ nɛ́ ɔ́.

¹⁵Jezu kpódó mɛsɛ́dó tɔn lɛ́ɛ kpó lɛ́ lɛ́ kɔ wá Jeluzalɛ́mu, bɔ Jezu byɔ́ sinsɛnxɔ mɛ, bó jɛ nǔsatɔ́ lɛ́ɛ kpódó nǔxɔtɔ́ e ɖo xɔ ɔ́ mɛ lɛ́ɛ bǐ kpó nya jí; é flí akwɛ́ɖyɔ́tɔ́ lɛ́ɛ sín távo xwe, bó flí ahwannɛ́satɔ́ lɛ́ɛ sín zinkpo lɛ́ɛ nyi ayǐ,

¹⁶bó dó sɛ́n nú yě ɖɔ mɛɖé ní ma sɔ́ hɛn ajɔ̌nú ɖěbǔ dín gbɔn sinsɛnxɔ ɔ́ mɛ ó.

¹⁷ É ka jɛ nǔ kplɔ́n yě jí ɖɔ: “È ko wlán dó Mawuxówéma ɔ́ mɛ ɖɔ: ‘Xwé ce ɔ́, ɖɛxwé wɛ è nǎ nɔ́ ylɔ́ ɖɔ, bɔ akɔta lɛ́ɛ bǐ ná nɔ́ wá ɖɔ xó xá Mawu ɖ'é mɛ.’ Midɛɛ lɛ́ɛ ka sɔ́ dó ɖó ajotɔ́ lɛ́ɛ sín avatɛn ná.”

¹⁸Vɔ̌sánú-xwlémawutɔ́gán lɛ́ɛ kpódó sɛ́nkplɔ́nmɛtɔ́ lɛ́ɛ kpó se nǔ e Jezu wa nɛ́ ɔ́, bó jɛ lě e yě ná wa gbɔn bó hu i ɔ́ sín wě ɖe jí, yě ka ɖo xɛsi ɖi wɛ, ɖó mɛ lɛ́ɛ bǐ wɛ nǔkplɔ́nmɛ Jezu tɔn nɔ byɔ́ ayi mɛ ná.

¹⁹Ée gbadanu wá su ɔ́, Jezu kpódó mɛsɛ́dó tɔn lɛ́ɛ kpó tɔ́n sín toxo ɔ́ mɛ.

²⁰Ayǐhɔ́ngbe tɔn zǎnzǎn tɛɛn ɔ́, Jezu kpódó ahwanvú tɔn lɛ́ɛ kpó wá sɔ́ ali, bó ɖo yiyi wɛ, bó mɔ atín e Jezu dó nu ɔ́, bɔ é ko xú bǐ káká yí dó ɖɔ.

²¹Piyɛ́ɛ ka flín nǔ e jɛ wá yi ɔ́, bó ɖɔ nú Jezu ɖɔ: “Mɛ̌si, kpɔ́n atín e a dó nu ɔ́ nɛ́ xú nɛ́!”

²² Bɔ Jezu yí gbe, bó ɖɔ nú ahwanvú tɔn lɛ́ɛ ɖɔ: “Mi ɖi nǔ nú Mawu; má ɖɔ nǔgbó nú mi, ényí mɛɖé ɖɔ nú só élɔ́ ɖɔ: ‘Sɛ sín fí, bo yi jɛ xu mɛ,’ bó ma ká xo nǔ kpɔ́n ɖo ayi mɛ ǎ, lobo ɖi ɖɔ nǔ e ɖɔ wɛ émí ɖe ɔ́ ná jɛ ɔ́, é ná jɛ.

²⁴Énɛ́ ɔ́ wú wɛ un ɖo ɖiɖɔ nú mi wɛ ɖɔ: Nǔ ɖěbǔ e mi ná byɔ́ Mawu ɖo ɖɛ mɛ ɔ́, mi ɖeji ɖɔ émí ko mɔ yí; mi ka ná mɔ ɖ'é jí nǔgbó.

²⁵ Ényí mi ka ɖo te, bó ɖo ɖɛ xo wɛ bó flín ɖɔ nɔzo émítɔn wa nǔ nyi do nú émí hǔn, mi sɔ́ kɛ ɛ; énɛ́ ɔ́, Tɔ́ mitɔn e ɖo sɛ́xwé ɔ́ ná sɔ́ hwɛ kɛ mi lɔmɔ̌. [

²⁶Amɔ̌, ényí mi ma nɔ sɔ́ hwɛ kɛ mɛ ǎ ɔ́, Tɔ́ mitɔn e ɖo sɛ́xwé ɔ́ ná sɔ́ hwɛ kɛ mi lɔmɔ̌ ǎ.”]

²⁷Jezu kpódó ahwanvú tɔn lɛ́ɛ kpó lɛ́ kɔ yi Jeluzalɛ́mu, bó byɔ́ sinsɛnxɔ mɛ, bɔ hwenu e Jezu ɖo sa ɖi gbɔn xɔ ɔ́ mɛ wɛ ɔ́, vɔ̌sánú-xwlémawutɔ́gán lɛ́ɛ, kpódó sɛ́nkplɔ́nmɛtɔ́ lɛ́ɛ kpó, kpódó mɛxó lɛ́ɛ kpó sɛkpɔ́ ɛ,

²⁸bó kanbyɔ́ ɛ ɖɔ: “Acɛ tɛ́ wɛ a ka ɖó, bó nɔ́ ɖo nǔ énɛ́ lɛ́ɛ wa wɛ? Mɛ̌ ká ná acɛ énɛ́ ɔ́ we?”

²⁹Jezu ka yí gbe nú yě ɖɔ: “Un ná kan xó ɖokpó byɔ́ mi, nú mi ná sin tɔn mì ɔ́, nyɛ lɔ ná ɖɔ acɛ e un nɔ dó wa nǔ énɛ́ lɛ́ɛ ná ɔ́ nú mi.

³⁰Mɛ̌ ká sɛ́ Jǎan dó bɔ é wá lɛ yɛhwesin nú mɛ? Mawu wɛ a, abǐ gbɛtɔ́ lɛ́ɛ? Mi ɖɔ nú má se.”

³¹Yě ka jɛ ɖiɖɔ jí ɖo yěɖée tɛ́ntin ɖɔ: “Ényí mǐ yí gbe n'i ɖɔ Mawu wɛ ɔ́, é ná kanbyɔ́ mǐ ɖɔ: ‘Bɔ étɛ́wú mi ma ka ɖi nǔ nú Jǎan ǎ?’ ”

³²Yě ka ɖo xɛsi ɖi nú togun ɔ́ wɛ, bó nɔ́ ɖɔ: “Mǐ sixú glá din bó ɖɔ gbɛtɔ́ lɛ́ɛ wɛ sɛ́ ɛ dó ǎ, ɖó togun ɔ́ bǐ wɛ sɔ́ Jǎan dó mɔ gbeyíɖɔ Mawu tɔn ná.”

³³Bɔ yě gbɔ bo yí gbe nú Jezu ɖɔ: “Mǐ tunwun ǎ.” Bɔ Jezu ɖɔ nú yě ɖɔ: “Hǔn nyɛ lɔ ɖo mɛ e ná acɛ mì, bɔ un nɔ dó wa nǔ énɛ́ lɛ́ɛ ná ɔ́ ná ɖɔ nú mi wɛ ǎ.”