Read fon Maki 12 Bible Online

Maki 12 - fon bible

Maki 12

¹Jezu dó lǒ dó ɖɔ xó nú yě ɖɔ: “Nya ɖé ɖó ayǐkúngban, bó tun vǐwun kɔn nyi jí, bó tun atín dó dó kpá lɛ́ lɛ̌ dó vǐwungbo ɔ́ bǐ; é ka lɛ́ kun do e mɛ è nɔ li vǐwun sínsɛ́n ɖe ɔ́ ɖokpó dó vǐwungbo ɔ́ mɛ. É lɛ́ bló nǔ e jí glecɔ́tɔ́ lɛ́ɛ nɔ́ xá ɔ́ ɖokpó d'é mɛ, lobo sɔ́ vǐwungbo énɛ́ dó alɔ mɛ nú vǐwunzɔ́watɔ́ ɖé lɛ́ɛ, bó yi tomɛ.

²Ée vǐwun gbigbɛ sín hwenu wá su ɔ́, é sɛ́ mɛsɛntɔ́ tɔn ɖokpó dó vǐwunzɔ́watɔ́ lɛ́ɛ gɔ́n, bónú é ná yi yí vǐwun e nyí étɔn é wá n'i.

³Vǐwunzɔ́watɔ́ lɛ́ɛ ka wlí mɛsɛntɔ́ ɔ́, bó xo e, lobo nya ɛ asígbá alɔgbá.

⁴Nya ɔ́ ka lɛ́ sɛ́ mɛsɛntɔ́ tɔn ɖěvo dó yě, bɔ yě xo e, bó zɛ ta n'i, bó kɔ́n wi tɔn.

⁵É ka lɛ́ sɛ́ mɛsɛntɔ́ tɔn ɖěvo dó, bɔ yě hu éyɛ́. É wá sɛ́ mɛsɛntɔ́ tɔn gěgé ɖěvo lɛ́ɛ dó, bɔ yě xo mɛ ɖě, bó hu mɛ ɖě.

⁶É wá kpo vǐ tɔn vívɛ́ná ɔ́ kɛ́ɖɛ́, bɔ é wá sɛ́ ɛ dó yě gbɔn tó, bó ɖo linlin ɖo ayi mɛ wɛ ɖɔ: ‘Yě mɔ vǐ ce ɖésú ɔ́, yě ná sí i.’

⁷Lo ɔ́, vǐwunzɔ́watɔ́ énɛ́ lɛ́ɛ ɖɔ ɖo yěɖée tɛ́ntin ɖɔ: ‘Vǐ e ɖo xu ɔ́ ná ɖu wɛ ɔ́ ɖíe, mi wá nú mǐ ná hu i, bónú vǐwungbo ɔ́ ná húzú mǐtɔn.’

⁸Ée yě ɖɔ mɔ̌ ɔ́, yě zɔn vǐ ɔ́ jí bó hu i, bó dɔn cyɔ tɔn sín vǐwungbo ɔ́ mɛ, lobo sɔ́ nyi gbě.”

⁹Jezu ka kanbyɔ́ yě ɖɔ: “Nɛ̌ wɛ nya ɔ́ ka ná wa nǔ gbɔn? É ná wá, bó ná hu vǐwunzɔ́watɔ́ énɛ́ lɛ́ɛ, lobo ná sɔ́ vǐwungbo ɔ́ dó alɔ mɛ nú mɛ ɖěvo lɛ́ɛ.

¹⁰ Mi mɔ xó élɔ́ xa kpɔ́n gbeɖé ɖo Mawuxówéma ɔ́ mɛ ǎ cé? É wɛ nyí ɖɔ: ‘Awǐnnya e xɔmɛtɔ́ lɛ́ɛ má sɔ́ dó mɔ nǔɖéwanú ǎ bó xo nyi kɛ́n ɔ́, wá húzú awǐnnya e ɖo tají é.

¹¹Aklúnɔ sín nǔwiwa nɛ́, nǔjíwǔ wɛ é nyí ɖo nukún mǐtɔn mɛ.’ ”

¹²Jwifu lɛ́ɛ sín gǎn lɛ́ɛ ka ɖo biba ná wlí Jezu wɛ; ɖó yě mɔ gannaganna ɖɔ émí nyi mǎ wɛ é ɖe gbɔn lǒ e é dó ɔ́ mɛ; lo ɔ́, yě ɖo xɛsi ɖi nú togun ɔ́ wɛ bó gbɔ bó jó e dó bó yi.

¹³È sɛ́ Falizyɛn ɖé lɛ́ɛ kpódó Elódu sín ahwanvú ɖé lɛ́ɛ kpó dó Jezu gɔ́n, nú yě ná kan nǔ byɔ́ ɛ dó ɖó mɔ n'i, bó ná sixú wlí i ɖo xóɖiɖɔ tɔn lɛ́ɛ mɛ.

¹⁴Yě yi, bó ɖɔ n'i ɖɔ: “Mɛ̌si, mǐ tunwun ɖɔ nǔgbóɖɔtɔ́ wɛ a nyǐ; a nɔ ɖi xɛsi nú mɛɖé ǎ, a ka nɔ kpɔ́n mɛɖé sín nukúnta dó ɖɔ xó ǎ; a nɔ xlɛ́ Mawu sín ali mɛ titewungbe. Đo sɛ́n mǐtɔn mɛ ɔ́, è hɛn ɔ́, è nǎ sú takwɛ́ Dadá Hlɔ̌ma tɔn tɔn a, abǐ è nǐ gbɔ súsú?”

¹⁵Jezu ka tunwun ɖɔ ayi we zán xá émí wɛ yě ɖe, bó yí gbe nú yě ɖɔ: “Étɛ́ sín mɔ ɖó nú mì wɛ mi ka ɖe? Mi sɔ́ gankwɛ́[4] Hlɔ̌manu lɛ́ɛ tɔn ɖokpó wá nú ma kpɔ́n.”

¹⁶Bɔ yě sɔ́ gankwɛ́ ɖokpó wá n'i, bɔ é kpɔ́n jí, bó kanbyɔ́ yě ɖɔ: “Mɛ̌ ɖíe è ɖe ɖ'é jí e? Mɛ̌ sín nyǐkɔ ɖíe ɖ'é jí e?” Yě yí gbe n'i ɖɔ: “Dadá Hlɔ̌ma tɔn tɔn wɛ.”

¹⁷Bɔ Jezu ɖɔ nú yě ɖɔ: “Mi bo sɔ́ nǔ e nyí Dadá Hlɔ̌ma tɔn tɔn ɔ́ jó nú Dadá Hlɔ̌ma tɔn, bó sɔ́ nǔ e nyí Mawu tɔn ɔ́ jó nú Mawu.” Xósin énɛ́ e Jezu ná yě ɔ́ kpácá yě tlala.

¹⁸ Sinsɛngbɛ́ e è nɔ ylɔ́ ɖɔ Saduseɛn lɛ́ɛ wá Jezu gɔ́n; (yě wɛ nɔ ɖɔ mɛkúkú lɛ́ɛ kún ná fɔ́n ó.) Yě kanbyɔ́ ɛ ɖɔ:

¹⁹ “Mɛ̌si, nǔ e Mɔyízi wlán ɖ'ayǐ nú mǐ ɔ́ ɖíe: ‘Ényí mɛɖé ɖó nɔví súnnu, bó ka da asi, bó má ji vǐ ǎ, lobo kú jó asi tɔn dó ɔ́, nɔví tɔn ná sɔ́ asi ɔ́ da, bó ji vǐ ɖo xo tɔn mɛ, bó ná sixú ɖó donu nú nɔví tɔn e kú é.’

²⁰Nɔví nɔví súnnu tɛ́nwe ɖé lɛ́ɛ ka tíin. Mɛ nukɔntɔn ɔ́ da asi, é ka ji vǐ ɖě ǎ, lobo kú jó asi ɔ́ dó.

²¹Mɛ wegɔ́ ɔ́ sɔ́ asúkúsi ɔ́ da; é ka ji vǐ ǎ, bo kú. Mɔ̌ jɛ́n wɛ mɛ atɔngɔ́ ɔ́ lɔmɔ̌ tɔn nyí gbɔn é nɛ́.

²²Bɔ nɔví nɔví tɛ́nwe énɛ́ lɛ́ɛ bǐ kú ma ɖó vǐ donu. Énɛ́ ɔ́ gúdo ɔ́, nyɔ̌nu ɔ́ lɔmɔ̌ wá kú.

²³Hwenu e mɛkúkú lɛ́ɛ ka na fɔ́n ɔ́, mɛ̌ sín asi wɛ nyɔ̌nu énɛ́ ɔ́ ka na wá nyí ɖo yě mɛ? Éɖíe ko nyí yě mɛ tɛ́nwe lɛ́ɛ bǐ sín asi kpɔ́n e.”

²⁴Jezu ka yí gbe nú yě ɖɔ: “Hǔn mi mɔ ɖɔ ali bú wɛ émí ɖe din ǎ cé? Đó mi mɔ nukúnnú jɛ Mawuxó ɔ́ wú ǎ, mi ka lɛ́ mɔ nukúnnú jɛ hlɔ̌nhlɔ́n Mawu tɔn wú ǎ.

²⁵Hwenu e mɛkúkú lɛ́ɛ bǐ ná wá fɔ́n sín kú ɔ́, mɛɖé ná da asi ǎ, mɛɖé ka ná da asú ǎ. Mɛ bǐ ná cí wɛnsagun Mawu tɔn e ɖo sɛ́xwé lɛ́ɛ ɖɔhun.

²⁶ Mɛkúkú lɛ́ɛ ná fɔ́n sín xó ɔ́, mi ma mɔ xa ɖo wěma Mɔyízi tɔn e ɖɔ xó dó zungodwe ɔ́ wú ɔ́ mɛ a? É wɛ nyí ɖɔ: ‘Nyɛ wɛ nyí Mawu Ablaxámu tɔn, Mawu Izáki tɔn, Mawu Jakɔ́bu tɔn.’

²⁷Mawu nyí Mawu mɛkúkú lɛ́ɛ tɔn ǎ; lo ɔ́, mɛ e ɖo gbɛ lɛ́ɛ sín Mawu wɛ é nyí. Ali bú wɛ mi ɖe ɖaxó.”

²⁸ Sɛ́nkplɔ́nmɛtɔ́ ɖé ká ɖo fínɛ́, bó se nǔ e dɔn wɛ yě ɖe ɔ́. Ée é mɔ ɖɔ Jezu yí gbe nú yě ɖó ganjí ɔ́, é sɛkpɔ́ ɛ, bó kanbyɔ́ ɛ ɖɔ: “Sɛ́n tɛ́ wɛ ɖo nukɔn ɖo sɛ́n lɛ́ɛ bǐ mɛ?”

²⁹ Jezu ka yí gbe ɖɔ: “Sɛ́n nukɔntɔn ɔ́ ɖíe: ‘Izlayɛ́li, ɖǒtó! Aklúnɔ Mawu mǐtɔn ɖokpónɔ géé wɛ nyí Aklúnɔ,

³⁰bɔ a nǎ yí wǎn nú Aklúnɔ Mawu towe kpódó ayi towe bǐ kpó, kpódó lǐndɔ̌n towe bǐ kpó, kpódó linlin towe bǐ kpó, kpódó hlɔ̌nhlɔ́n towe bǐ kpán.’

³¹ Sɛ́n wegɔ́ ɔ́ ká ɖíe: ‘A nǎ yí wǎn nú nɔzo towe hwi ɖésúnɔ ɖɔhun.’ Sɛ́n ɖé sɔ́ hú gǎn énɛ́ lɛ́ɛ ǎ.”

³² Sɛ́nkplɔ́nmɛtɔ́ ɔ́ ká ɖɔ nú Jezu ɖɔ: “Mɛ̌si, é nyɔ́ ganjí, xó nǔgbó wɛ a ɖɔ; Aklúnɔ ɔ́ wɛ nyí Mawu ɖokpó géé e tíin é, bɔ Mawu ɖě sɔ́ ɖe zɛ éyɛ́ wú ǎ.

³³ Hǔn, gbɛtɔ́ ɖó ná yí wǎn nú Mawu kpódó ayixa tɔn bǐ kpó, kpódó linlin tɔn bǐ kpó, kpódó hlɔ̌nhlɔ́n tɔn bǐ kpó, bó ná yí wǎn nú nɔzo tɔn é ɖésúnɔ ɖɔhun; énɛ́ ɔ́ nyɔ́ hú vɔ̌ e è dó zo é, kpódó vɔ̌sísá ɖě lɛ́ɛ bǐ kpán.”

³⁴Jezu mɔ ɖɔ nǔnywɛ́tɔ́ sín gbe wɛ nya énɛ́ ɔ́ yí, bó ɖɔ n'i ɖɔ: “A sɔ́ lín dó axɔ́súɖuto Mawu tɔn ǎ.” Mɛ ɖěbǔ ka sɔ́ glá bó kan nǔɖé byɔ́ ɛ ǎ.

³⁵Jezu kpo ɖo nǔ kplɔ́n mɛ wɛ ɖo sinsɛnxɔ ɔ́ mɛ, bó kanbyɔ́ ɖɔ: “Nɛ̌ wɛ sɛ́nkplɔ́nmɛtɔ́ lɛ́ɛ ka sixú ɖɔ Klísu ɔ́ Davídi ví wɛ é nyí gbɔn?

³⁶Đó Yɛsinsɛn sɔ́ dó ayi mɛ nú Davídi, bɔ é ɖésúnɔ ɖɔ: ‘Aklúnɔ ɖɔ nú Aklúnɔ ce ɖɔ: Jǐnjɔ́n ɖisí ce xwé, káká nú má sɔ́ kɛntɔ́ towe lɛ́ɛ dó bló afɔɖótɛn towe.’

³⁷Davídi ɖésú nɛ́ ylɔ́ ɛ ɖɔ ‘Aklúnɔ’ nɛ́. Nɛ̌ wɛ é ká sixú lɛ́ nyí vǐ tɔn gbɔn?” Xó énɛ́ e ɖɔ wɛ Jezu ɖe ɔ́ nyɔ́ se nú mɛ e ɖo fínɛ́ lɛ́ɛ bǐ.

³⁸Jezu ɖɔ nú mɛ e kplɔ́n nǔ wɛ é ɖe lɛ́ɛ ɖɔ: “Mi cɔ́ miɖée dó sɛ́nkplɔ́nmɛtɔ́ lɛ́ɛ wú, ɖó nǔ e nɔ víví nú yě lɛ́ɛ wɛ nyí ɖɔ yě ní nɔ́ ɖo awu gaga mɛ, bó nɔ́ ɖo sa ɖi wɛ; è nǐ nɔ́ dó gbe yě ɖo tokplétɛn lɛ́ɛ.

³⁹Yě nɔ́ ba ná jínjɔ́n zinkpo nukúnɖéjí lɛ́ɛ mɛ ɖo kplɔ́ngbasá lɛ́ɛ, bó nɔ́ ba ná jínjɔ́n tɛn nukɔn nukɔntɔn lɛ́ɛ mɛ ɖo jǒnɔgbé.

⁴⁰Yě nɔ́ klá jɛ nǔ e nyí asúkúsi lɛ́ɛ tɔn é bǐ nu, bó ka nɔ́ ɖo ɖɛ gaga xo wɛ, bó ná dó ɖe xlɛ́ gbɛtɔ́ lɛ́ɛ ɖɔ mɛ ɖagbe wɛ émí nyí. Mawu ná dɔn tó nú yě, bɔ é ná syɛ́n ɖésú.”

⁴¹Jezu jínjɔ́n ayǐ, bó kpan nukɔn gbǎ e mɛ è nɔ sɔ́ akwɛ́ dó ɔ́, bó ɖo lě e mɛ lɛ́ɛ ɖo akwɛ́ sɔ́ dó gbǎ ɔ́ mɛ gbɔn wɛ ɔ́ kpɔ́n wɛ. Dɔkunnɔ gěgé ɖo akwɛ́ ɖaxó ɖaxó bɛ́ d'é mɛ wɛ.

⁴²Asúkúsi wamamɔnɔ ɖé ka wá, bó bɛ́ akwɛ́ kpɛví kpɛví we dó gbǎ ɔ́ mɛ; akwɛ́ we énɛ́ lɛ́ɛ bǐ yi fánlan ɖokpó mɔ̌.

⁴³Jezu ka ylɔ́ ahwanvú tɔn lɛ́ɛ kplé, bó ɖɔ: “Má ɖɔ nǔgbó nú mi, akwɛ́ e asúkúsi wamamɔnɔ énɛ́ ɔ́ ná din ɔ́ hú gǎn mɛ ɖě lɛ́ɛ bǐ tɔn.

⁴⁴Đó mɛ ɖě lɛ́ɛ bǐ sésé ɔ́, nǔ e kpé yě kpo ɔ́ wɛ yě wá ná dó akwɛ́gbá ɔ́ mɛ. Éyɛ́ ɔ́, akwɛ́ e é ɖó bó ná dó xɔ nǔ ɖu, bó ná nɔ gbɛ ɔ́, bǐ sésé wɛ é sɔ́ wá dó gbǎ ɔ́ mɛ.”