Read fon Maki 16 Bible Online

Maki 16 - fon bible

Maki 16

¹Ée gbɔjɛzán Jwifu lɛ́ɛ tɔn wá yi ɔ́, Mali Magidalanu ɔ́ kpódó Mali Jaki sín nɔ ɔ́ kpó, kpódó Salomɛ́ɛ kpó, xɔ nǔsáwǔ wǎnɖagbenɔ, bó ná yi sá nú Jezu sín cyɔ.

²Aklúnɔzán gbe zǎnzǎn tɛɛn hwenu e hwe ɖo tíntɔ́n wɛ ɔ́, yě yi Jezu sín yɔdo kɔn.

³Yě nɔ́ kanbyɔ́ yěɖée ɖɔ: “Mɛ̌ ká ná blí awǐnnya e ɖo yɔdo ɔ́ nu ɔ́ síin nú mǐ?”

⁴Ée yě kpɔ́n dɔ̌n sɛ́ dó ɔ́, yě mɔ ɖɔ è ko blí awǐnnya ɖaxó énɛ́ ɔ́ sín yɔdo ɔ́ nu.

⁵Yě byɔ́ yɔdo ɔ́ mɛ, bó mɔ dɔ̌nkpɛvú ɖé ɖo ayǐjínjɔ́n ɖo ɖisíxwé, bɔ é dó awu wěwé, bɔ xɛsi ɖaxó ɖé jɛ yě jǐ.

⁶Dɔ̌nkpɛvú ɔ́ ka ɖɔ nú yě ɖɔ: “Mi ma ɖi xɛsi ó; Jezu Nazalɛ́ti tɔn e è ká nyi aklúzu jí ɔ́ ba wɛ mi ɖe. È ko fɔ́n ɛ sín kú, é sɔ́ ɖo fí ǎ; fí e è ɖi i dó ɔ́ ɖíe.

⁷ Lo ɔ́, mi yi ɖɔ nú Piyɛ́ɛ, kpódó ahwanvú ɖě lɛ́ɛ kpó ɖɔ: é ko jɛ nukɔn nú mi xwe Galilée. Fínɛ́ wɛ mi ná yi mɔ ɛ ɖe, lě e é ko ɖɔ gbɔn nú mi é.”

⁸Ayi yětɔn bǐ gbadó, bɔ yě ɖo sísɔ́sísɔ́ wɛ, bó tɔ́n sín yɔdo ɔ́ mɛ, bó hɔn. Yě ká glá ɖɔ xó ɖé nú mɛɖé ǎ, ɖó yě ɖo xɛsi ɖi wɛ. [

⁹Ée è fɔ́n Jezu sín kú Aklúnɔzán gbe zǎnzǎn ɔ́, é tó sɔ́ éɖée xlɛ́ Mali Magidalanu e jí é nya yɛ nyanya tɛ́nwe sín é hwɛ̌.

¹⁰Éyɛ́ ka yi ɖɔ nú mɛ e kpódó Jezu kpó kó nɔ kpɔ́, bɔ yě wá ɖo aluwɛ mɛ, bó ɖo avǐ ya wɛ lɛ́ɛ é.

¹¹Ée yě se ɖɔ Jezu ɖo gbɛ, bɔ Mali mɔ ɛ ɔ́, yě ɖi ǎ.

¹²Énɛ́ ɔ́ gúdo ɔ́, Jezu sín ahwanvú we ɖo ali jí xwe gleta. Jezu ka sɔ́ ninɔmɛ ɖěvo, bo tɔ́n dó yě jǐ.

¹³Ahwanvú lɛ́ɛ lɛ́ kɔ wá yi ɖɔ nú ahwanvú ɖě lɛ́ɛ. Yě ka ɖi nǔ nú yě lɔmɔ̌ ǎ.

¹⁴Gǔdo gúdo ɔ́, Jezu wá zé éɖée xlɛ́ ahwanvú tɔn wǒ-ɖokpó lɛ́ɛ hwenu e yě ɖo nǔ ɖu wɛ é. É kɛ nu dó nǔmaɖi yětɔn kpódó tótlítlí yětɔn kpó wú nú yě; ɖó yě ɖi nǔ nú mɛ e mɔ ɛ, bó wá ɖɔ nú yě lɛ́ɛ é ǎ.

¹⁵ É ka ɖɔ nú yě ɖɔ: “Mi gbɔn gbɛ ɔ́ bǐ mɛ, bo jlá Wɛn Ɖagbe Mawu tɔn ɔ́ gbɛtɔ́ lɛ́ɛ bǐ.

¹⁶Mɛ e ná ɖi nǔ, bɔ è nǎ lɛ yɛhwesin n'i ɔ́ ná gán. Mɛ e ma ka na ɖi nǔ ǎ ɔ́, è nǎ ɖǒ hwɛ n'i.

¹⁷Nǔ e mɛ e ɖi nǔ nú mì lɛ́ɛ ná nɔ jlɛ́ ɔ́ ɖíe: ɖo nyǐkɔ ce mɛ ɔ́, yě ná nɔ́ nya yɛ nyanya lɛ́ɛ sín gbɛtɔ́ lɛ́ɛ jí, bó ná nɔ́ ɖɔ xó dó gbe yɔ̌yɔ́ mɛ.

¹⁸Yě na bo zé dan ɔ́, é ná wa nǔɖé nú yě ǎ; yě na bo nu nǔvɛ́nu ɔ́, é ná wa nǔɖé nú yě ǎ. Yě ná nɔ́ ɖó alɔ azinzɔnnɔ lɛ́ɛ jí, bó ná nɔ́ gbɔ azɔn nú yě.”

¹⁹ Ée Aklúnɔ ɖɔ xó énɛ́ lɛ́ɛ nú yě gúdo ɔ́, è sɔ́ ɛ yi jǐnukúnsin, bɔ é jínjɔ́n ɖisíxwé nú Mawu.

²⁰Ahwanvú tɔn lɛ́ɛ ka sɔ́nǔ, bó jɛ Mawuxó jlá jí gbɔn fí bǐ. Aklúnɔ nɔ́ dó alɔ yě ɖo azɔ̌ énɛ́ kɔn, bó nɔ́ ɖe xlɛ́ ɖɔ xó e ɖɔ wɛ yě ɖe ɔ́ nyí nǔgbó, gbɔn nǔdábaɖa e yě nɔ́ jlɛ́ lɛ́ɛ gbla mɛ.]