Read fon Maki 2 Bible Online

Maki 2 - fon bible

Maki 2

¹Azǎn ɖé jɛ ǎ, bɔ Jezu wá yi Kafaanawúmu, bɔ yě se ɖɔ é ɖo xwé gbe,

²bó nyi ahwan yi kplé ɖo fínɛ́, bɔ tɛn ján káká yi hɔnto. Jezu nɔ ɖo Mawuxó ɖɔ nú yě wɛ.

³Mɛ ɖé lɛ́ɛ wá gɔ̌n tɔn, bɔ mɛ ɛnɛ ɖo yě mɛ, bó hɛn ayǐsónɔ ɖokpó wá gɔ̌n tɔn.

⁴Ée ahwan ɔ́ sukpɔ́ káká, bɔ yě ma sixú sɛkpɔ́ ɛ ǎ é ɔ́, yě gbɔ bó xá xɔ e mɛ Jezu ɖe ɔ́ ta, bó kɔ́n xɔ ɔ́ ɖo akpá e xwé Jezu ɖe ɔ́, bó zé ayǐsónɔ ɔ́, kpódó zan e jí é ɖe ɔ́ kpó gbɔn fínɛ́ yi jɛ Jezu sín asá mɛ.

⁵Ée Jezu mɔ lě e yě ɖi nǔ sɔ ɔ́, é ɖɔ nú ayǐsónɔ ɔ́ ɖɔ: “Vǐ ce, è sɔ́ hwɛ towe lɛ́ɛ kɛ we.”

⁶Sɛ́nkplɔ́nmɛtɔ́ ɖé lɛ́ɛ ká ɖo ayǐjínjɔ́n ɖo mɛ lɛ́ɛ mɛ, bó jɛ ɖiɖɔ dó xomɛ jí ɖɔ:

⁷“Nɛ̌ nya élɔ́ sixú ɖɔ nǔ mɔ̌hunkɔtɔn gbɔn? Nu nylá dó Mawu wú wɛ é ɖe. Mɛ̌ wɛ ká sixú sɔ́ hwɛ kɛ mɛ zɛ Mawu ɖokpónɔ wú?”

⁸Ée Jezu wɔ́ tlóló ɖɔ yě ɖo xó mɔ̌hunkɔtɔn ɖɔ dó xomɛ wɛ ɔ́, é kanbyɔ́ yě ɖɔ: “Aniwú wɛ mi ka ɖo nǔ mɔ̌hunkɔtɔn lɛ́ɛ lin wɛ?

⁹Ényí è ɖɔ nú ayǐsónɔ ɖɔ: ‘È sɔ́ hwɛ towe lɛ́ɛ kɛ we,’ abǐ, ‘Sí te, sɔ́ zan towe bo ɖi zɔnlin’ ɔ́, ɖě tɛ́ wɛ ká bɔkun hú ɖě?

¹⁰Lo ɔ́, un jló ɖɔ mi ní tunwun ɖɔ nyɛ Gbɛtɔ́ví ɔ́ ɖó acɛ e sɔ́ hwɛ kɛ mɛ ɖo ayǐkúngban jí é”. Ée é ɖɔ mɔ̌ ɔ́, é ɖɔ nú

¹¹ayǐsónɔ ɔ́ ɖɔ: “Un ɖe gbe nú we, sí te, sɔ́ zan towe, bó yi xwé.”

¹²Azɔn ɖokpó ɔ́, nya ɔ́ sí te, bó sɔ́ zan tɔn, bó ɖi zɔnlin, bó tɔ́n ɖo yě bǐ nukún mɛ, bɔ ahwi xo yě bǐ; bɔ yě jɛ Mawu xomlá jí, bó nɔ́ ɖɔ: “Mǐ kó mɔ nǔ lěhunkɔtɔn kpɔ́n gbeɖé ǎ.”

¹³Jezu lɛ́ yi Galilée tɔ ɔ́ tó, bɔ mɛ lɛ́ɛ bǐ nɔ́ wá gɔ̌n tɔn, bɔ é nɔ ɖo nǔ kplɔ́n yě wɛ.

¹⁴Ée Jezu ɖidó ɔ́, é mɔ Levíi Alufée ví ɔ́ ɖo ayǐjínjɔ́n ɖo denuzɔ́watɔ́ lɛ́ɛ xɔsá, bó ɖɔ n'i ɖɔ: “Xwedó mì.” Bɔ é sí te, bó xwedó e.

¹⁵Jezu ka wá ɖo nǔ ɖu wɛ ɖo Levíi xwé, bɔ tokwɛ́yítɔ́ lɛ́ɛ kpódó hwɛhutɔ́ gěgé kpán ɖo nǔ ɖu xá é kpódó ahwanvú tɔn lɛ́ɛ kpó wɛ, ɖó yě sukpɔ́ bó xwedó e.

¹⁶Ée sɛ́nkplɔ́nmɛtɔ́ e ɖo Falizyɛn lɛ́ɛ sín ahwan mɛ lɛ́ɛ mɔ mɔ̌ ɔ́, yě kanbyɔ́ ahwanvú tɔn lɛ́ɛ ɖɔ: “Aniwú é ká nɔ́ ɖu nǔ xá hwɛhutɔ́ lɛ́ɛ kpódó tokwɛ́yítɔ́ lɛ́ɛ kpó?”

¹⁷Ée Jezu se mɔ̌ ɔ́, é ɖɔ nú yě ɖɔ: “Mɛ e ɖo ganjí lɛ́ɛ wɛ azɔngblétɔ́ nú hudó ǎ; lo ɔ́, mɛ e ɖo azɔn jɛ wɛ lɛ́ɛ wɛ nǔ tɔn hudó. Hwɛjijɔnɔ lɛ́ɛ ylɔ́ gbé wɛ un wá ǎ; hwɛhutɔ́ lɛ́ɛ ylɔ́ gbé wɛ un wá.”

¹⁸Jǎan sín ahwanvú lɛ́ɛ kpódó mawusɛntɔ́gbɛ́ e è nɔ ylɔ́ ɖɔ Falizyɛn lɛ́ɛ kpán nɔ́ ɖo nu blá wɛ, bɔ mɛɖé lɛ́ɛ wá kanbyɔ́ Jezu ɖɔ: “Aniwú wɛ Jǎan sín ahwanvú lɛ́ɛ kpódó ahwanvú Falizyɛn lɛ́ɛ tɔn kpó ká nɔ́ ɖo nu blá wɛ, bɔ ahwanvú towe lɛ́ɛ ma ka nɔ́ blá ɖě ǎ?”

¹⁹Jezu ka yí gbe nú yě ɖɔ: “Asisúnɔ ɔ́ sín xɔ́ntɔn lɛ́ɛ sixú blá nu hwenu e asisúnɔ ɔ́ kpo ɖo kpɔ́ xá yě ɔ́ a? Nǔ sixú nyí mɔ̌ ǎ; yě sixú blá nu hwenu e é kpo ɖo kpɔ́ xá yě ɔ́ ǎ.

²⁰Amɔ̌, é ná wá su hweɖénu, bɔ è nǎ wá sɔ́ ɛ sín yě gɔ́n; hwe énɛ́ ɔ́ nu wɛ yě ná blá nu.

²¹“Mɛ ɖé nɔ́ sɔ́ avɔxwɛ yɔ̌yɔ́ e ma yi sin mɛ kpɔ́n ǎ é dó ɖɛ́ awu xóxó ná ǎ, ɖó ényí è blǒ mɔ̌ ɔ́, avɔxwɛ yɔ̌yɔ́ ɔ́ ná dɔn awu xóxó ɔ́ vún, bɔ ali ɔ́ ná lɛ́ gbló d'é jí.

²²Mɛ ɖé ka nɔ́ sɔ́ vɛ̌ɛn yɔ̌yɔ́ kɔn dó anyǔglo xóxó mɛ ǎ, ɖó ényí è blǒ mɔ̌ ɔ́, vɛ̌ɛn ɔ́ ná hɛn anyǔglo ɔ́ wú, bɔ vɛ̌ɛn ɔ́ kpódó anyǔglo ɔ́ kpó bǐ ná lá mɛ; lo ɔ́, vɛ̌ɛn yɔ̌yɔ́ ɔ́, anyǔglo yɔ̌yɔ́ mɛ wɛ è nɔ kɔn dó.”

²³ É wá su gbɔjɛzán Jwifu lɛ́ɛ tɔn gbe gbe ɖokpó, bɔ Jezu ɖo jinukúngle ɖé mɛ gbɔn dín wɛ, é kpódó ahwanvú tɔn lɛ́ɛ kpó. Ée yě ɖo yiyi wɛ ɔ́, ahwanvú tɔn lɛ́ɛ jɛ nǔkún lɛ́ɛ ba ɖu jí.

²⁴Bɔ Falizyɛn lɛ́ɛ ɖɔ n'i ɖɔ: “Kpɔ́n! Étɛ́wú wɛ ahwanvú towe lɛ́ɛ nɔ́ wa nǔ e sɛ́n mǐtɔn gbɛ́ ɖɔ è ma wa gbɔjɛzán gbe ó é?”

²⁵ É ka yí gbe nú yě ɖɔ: “Nǔ e Davídi wa hwenu e é ɖo nǔɖuɖu ba ná ɖu wɛ, ɖó xovɛ́ sin é kpódó mɛ e kpó é kpó zɔn lɛ́ɛ kpó ɔ́, mi xa kpɔ́n ǎ cé?

²⁶ É byɔ́ sinsɛnxɔ mɛ, ɖo vɔ̌sánú-xwlémawutɔ́ ɖaxó Abiyatáa hwenu, lobɔ nǔɖuɖu e è sɔ́ xwlé Mawu bɔ ɖo sɛ́n mǐtɔn mɛ ɔ́, vɔ̌sánú-xwlémawutɔ́ lɛ́ɛ kɛ́ɖɛ́ jɛ́n ɖó ná ɖu ɔ́, é sɔ́ bo ɖu, bó lɛ́ ná mɛ e kpó é kpó zɔ́n lɛ́ɛ.”

²⁷É lɛ́ ɖɔ nú yě ɖɔ: “Gbɛtɔ́ wútu wɛ è ɖǒ gbɔjɛzán ɔ́; é nyí gbɔjɛzán ɔ́ wú wɛ è ɖǒ gbɛtɔ́ ǎ.

²⁸Énɛ́ ɔ́ wú wɛ nyɛ Gbɛtɔ́ví ɔ́ kpa acɛ dó gbɔjɛzán ɔ́ lɔmɔ̌ nu.”