Read fon Maki 5 Bible Online

Maki 5 - fon bible

Maki 5

¹Jezu kpódó ahwanvú tɔn lɛ́ɛ kpó dó asá Galilée tɔ ɔ́, bó yi Jelazáanu lɛ́ɛ sín ayǐkúngban jí.

²Ée Jezu jɛ te sín tɔjíhún ɔ́ mɛ tlóló ɔ́, dǎwe ɖé wá kpé e; dǎwe énɛ́ ɔ́, yɛ nyanya ɖo jǐ tɔn, bɔ é tɔ́n sín sóxo mɛ.

³Sóxo mɛ fínɛ́ wɛ nya énɛ́ ɔ́ nɔ́ nɔ, bɔ mɛɖé sɔ́ nɔ sixú blá ɛ ǎ; è nǎ bó zé wlɔ ɔ́, è nɔ sixú kpé wú ǎ.

⁴Đó azɔn mɔ̌kpán wɛ è ko dó gan afɔ n'i, bó ko dó gɛdɛ ɛ, có é hɛn nǔ énɛ́ lɛ́ɛ bǐ wɛ̌n, bɔ mɛ ɖěbǔ nɔ́ sixú kpé jǐ tɔn ǎ.

⁵É nɔ ɖo yɔdo lɛ́ɛ tɛ́ntin zǎn kéze, bó nɔ́ ɖo sóklɛ́nmɛ sóklɛ́nmɛ gbɔn wɛ, bó nɔ́ ɖo xó sú wɛ, bó nɔ́ ɖo awǐnnya sɔ́ tlɛ́n wǔ nú éɖée wɛ.

⁶Hwenu e é mɔ Jezu sɛ́ dó ɔ́, é kán wezun yi gɔ̌n tɔn, bó jɛ kpo ɖo nukɔn tɔn, bó ɖe kɔ́ n'i,

⁷bó sú xó, bó ɖɔ: “Étɛ́ wɛ nyɛ kpódó hwi kpán kpédó, Jezu Mawu Ajalɔ̌nlɔn ví? Un sɔ́ Mawu ɖó afɔ nú we, ma dó ya nú mì ó.”

⁸(É ɖɔ mɔ̌ ɖó Jezu ɖe gbe dó e ɖɔ: “Hwi yɛ nyanya élɔ́, gosín nya élɔ́ jí!”)

⁹Jezu ka kanbyɔ́ ɛ ɖɔ: “Nɛ̌ wɛ nyǐkɔ towe nɔ́ nyí?” Bɔ é yí gbe n'i ɖɔ: “ ‘Ahwan’, ɖó mǐ mɛ gěgé wɛ.”

¹⁰Bɔ é jɛ vo sa nú Jezu jí ma gbokɔ ɖɔ ní ma nya émí sín gbějí fí ó.

¹¹Aglǔzahwan ɖaxó ɖé ka ɖo só ɔ́ jí fínɛ́, bó ɖo nǔ ba ɖu wɛ.

¹²Bɔ yɛ nyanya énɛ́ lɛ́ɛ dó kɛnklɛ́n nú Jezu ɖɔ: “Nǎ gbe mǐ, bónú mǐ ní yi byɔ́ aglǔza énɛ́ lɛ́ɛ mɛ.”

¹³Bɔ Jezu ná gbe yě, bɔ yě gosín dǎwe ɔ́ jí, bó yi byɔ́ aglǔza lɛ́ɛ mɛ, bɔ aglǔza lɛ́ɛ nyi agbo kɔn nyi xu mɛ. Yě bǐ kplékplé ná yi afɔwó (2.000) mɔ̌ bɔ yě bǐ kútɔ.

¹⁴Ée aglǔzanyitɔ́ lɛ́ɛ mɔ mɔ̌ ɔ́, yě hɔn bó yi ɖɔ nǔ e jɛ lɛ́ɛ nú mɛ lɛ́ɛ ɖo toxo ɔ́ kpódó gletoxo lɛ́ɛ kpó mɛ, bɔ mɛ lɛ́ɛ wá kpɔ́n nǔ e jɛ ɔ́.

¹⁵Yě wá Jezu gɔ́n, bó mɔ nya e jí yɛ nyanya wɔ̌buwɔ́bú kó nɔ ɔ́, ɖo ayǐjínjɔ́n, bó dó awu, bɔ ayi tɔn wá gbɛ bɔ xɛsi jɛ yě jí.

¹⁶Yě mɛ e mɔ lě e nǔ lɛ́ɛ jɛ dó yɛnyanyanɔ ɔ́ kpódó aglǔza lɛ́ɛ kpán jí gbɔn ɔ́, wlǐ bǐ ɖɔ nú yě, bɔ xɛsi jɛ yě jí.

¹⁷Bɔ yě jɛ vo sa nú Jezu jí ɖɔ é ní gosín ayǐkúngban émítɔn jí.

¹⁸Hwenu e Jezu ɖo tɔjíhún mɛ byɔ́ wɛ ɔ́, dǎwe e jí é nya yɛ nyanya lɛ́ɛ sín ɔ́ sa vo n'i ɖɔ émí ná xwedó e.

¹⁹Jezu ka gbɛ́, bó ɖɔ n'i ɖɔ: “Yi xwé mɛ towe lɛ́ɛ gɔ́n, bó ɖɔ nǔ e Aklúnɔ wa nú we ɔ́ bǐ nú yě, bó lɛ́ ɖɔ lě e é kú nǔbláwǔ nú we gbɔn ɔ́ bǐ nú yě.”

²⁰Bɔ nya ɔ́ ɖidó, bó jɛ nǔ e Jezu wá n'i ɔ́ jlá jí, gbɔn tota wǒ lɛ́ɛ gbé jí, bɔ é kpácá mɛ lɛ́ɛ bǐ.

²¹Ée Jezu zɔn tɔjíhún mɛ sín fínɛ́, bó yi jɛ agě ɖě ɔ́ jí ɔ́, é ɖo tɔ ɔ́ tó, bɔ mɛ gěgé ɖé lɛ́ɛ nyi ahwan wá lɛ́ lɛ̌ dó e.

²²Jayilɔ́si e nyí gǎn ɖokpó ɖo kplɔ́ngbasá Jwifu lɛ́ɛ tɔn ɔ́ ká wá xwetɔ́n, bó jɛ kpo ɖo Jezu nukɔn, bó jɛ kɛnklɛ́n dó n'i jí ɖɔ:

²³“Vǐ ce ɖyɔ̌vǐvú ɔ́ ɖo kúdonu; wǎ yi ɖó alɔ jǐ tɔn, bónú azɔn tɔn ná gbɔ, nú é ná gán.”

²⁴Énɛ́ ɔ́, Jezu xwedó e, bɔ mɛ gěgé nyi ahwan jɛ gǔdo tɔn; mɛ lɛ́ɛ sukpɔ́ káká bó ɖo fyɔ́nfyɔ́n ɛ wɛ gbɔn fí bǐ.

²⁵Nǎwe ɖé ka ɖo fínɛ́; nǎwe énɛ́ ɔ́ kó ɖo hun ɖi wɛ sín xwe wěwe ɖíe ɖokpóó.

²⁶É kó ji ya gbɔn azɔngblétɔ́ mɔ̌kpán xwé, lobo zán akwɛ́ tɔn bǐ dó wǔvɔ́, azɔn tɔn ka fɔ́n tɛgbɛ ɔ́, jijɛ jí wɛ jɛ́n nɔ́ ɖe.

²⁷Ée é se Jezu sín xó ɔ́, é xo agun ɔ́ zlɛ́ gbɔn gǔdo, bó ɖó alɔ Jezu sín awu wú;

²⁸ɖó é ɖo ɖiɖɔ dó ayi mɛ wɛ ɖɔ: “Un vɛ́ ko sixú ɖó alɔ awu tɔn wú kpowun ɔ́, azɔn ce ná gbɔ.”

²⁹Nǔgbó ɔ́, hun e ɖi wɛ é ɖe ɔ́ gbo ɖo tɛndo ɖokpó ɔ́ mɛ; bɔ é mɔ ɖo agbaza mɛ ɖɔ azɔn émítɔn gbɔ.

³⁰Azɔn ɖokpó ɔ́, Jezu mɔ ɖɔ hlɔ̌nhlɔ́n ɖé gosín émí wú, bó lílɛ́ kpan nukɔn mɛ lɛ́ɛ, bó ɖɔ: “Mɛ̌ ka ɖó alɔ awu ce wú?”

³¹Bɔ ahwanvú tɔn lɛ́ɛ yí gbe n'i ɖɔ: “A mɔ mɛ lɛ́ɛ ɖo fyɔ́nfyɔ́n we wɛ gbɔn fí bǐ, bó ká nɔ́ kanbyɔ́ ɖɔ: ‘Mɛ̌ ka ɖó alɔ wǔ ce?’ ”

³²Jezu ka ɖo mɛ e wa mɔ̌ ɔ́ ba wɛ ɖo mɛ e lɛ́ lɛ̌ dó e lɛ́ɛ mɛ.

³³Énɛ́ ɔ́, xɛsi jɛ nǎwe ɔ́ jí, bɔ é jɛ sísɔ́sísɔ́ jí; ɖó é tunwun nǔ e jɛ ɖo agbaza tɔn mɛ ɔ́, bó gbɔ bó wá jɛ kpo ɖo Jezu nukɔn, bó ɖɔ xó nǔgbó n'i.

³⁴Jezu ka ɖɔ n'i ɖɔ: “Vǐ ce, nǔɖiɖi towe zɔ́n, bɔ azɔn towe gbɔ. Yi dó fífá mɛ; azɔn towe ní gbɔ nú we bǐ.”

³⁵Xó énɛ́ lɛ́ɛ ɖɔ wɛ Jezu ɖe kɛ́ɖɛ́, bɔ mɛɖé lɛ́ɛ gosín kplɔ́ngbaságán ɔ́ xwé, bó wá ɖɔ nú kplɔ́ngbaságán ɔ́ ɖɔ: “Vǐ towe kó kú, étɛ́ sín tagba wɛ a nǎ lɛ́ dó nú mɛ̌si ɔ́?”

³⁶Jezu ka wlí tó xó e ɖɔ wɛ yě ɖe nɛ́ lɛ́ɛ ɖěbǔ wú ǎ, bó ká ɖɔ nú kplɔ́ngbaságán Jayilɔ́si ɖɔ: “Ma ɖi xɛsi ó, vɛ̌ kó ɖi nǔ kpowun.”

³⁷Jezu ka lɔn bónú mɛɖé xwedó e zɛ Piyɛ́ɛ kpódó Jaki kpó, kpódó Jaki nɔví Jǎan kpán wú ǎ.

³⁸Jezu kpódó mɛ e é cyán nɛ́ lɛ́ɛ kpó sɛkpɔ́ kplɔ́ngbaságán Jayilɔ́si xwé, bɔ yě se mɛ lɛ́ɛ ɖo hlǔnhlún wɛ, bó ɖo avǐ ya wɛ, lobo ɖo xó sú wɛ.

³⁹Jezu ka byɔ́ xwé ɔ́ gbe, bó kanbyɔ́ yě ɖɔ: “Étɛ́ sín hlǔnhlún wɛ mi ka ɖe, bó ɖo avǐ ya wɛ sɔ lě? Vǐ ɔ́ ma ká kú nɛ́! Amlɔ dɔ́ wɛ é ɖe.”

⁴⁰Mɛ lɛ́ɛ ka jɛ kiko e jí; lo ɔ́, é nya yě bǐ tɔ́n, bó kplá vǐtɔ́ ɔ́, vǐnɔ ɔ́, kpódó ahwanvú tɔn e xwedó e lɛ́ɛ kpán, bɔ yě byɔ́ xɔ e mɛ vǐ ɔ́ ɖe ɔ́;

⁴¹é ká hɛn vǐ ɔ́ sín alɔ, bó ɖɔ: “Talita, kúmi.” (Tínmɛ tɔn wɛ nyí ɖɔ: “Đyɔ̌vǐ un ɖe gbe nú we; sí te.”)

⁴²Azɔn ɖokpó ɔ́, ɖyɔ̌vǐ ɔ́ sí te, bó jɛ zɔnlin ɖi jí, (ɖó é ko ɖó xwe wěwe.) Nǔ énɛ́ nyí nǔɖé, bó kpácá yě tlala.

⁴³Jezu ka dó sɛ́n nú yě syɛ́nsyɛ́n ɖɔ: “Mɛ ɖé ma se ɖo nu mitɔn ó, mi ka ná nǔɖuɖu i.”