Read fon Maki 6 Bible Online

Maki 6 - fon bible

Maki 6

¹Jezu gosín fínɛ́, bó wá yi Nazalɛ́ti, to e mɛ é su ɖe é, bɔ ahwanvú tɔn lɛ́ɛ xwedó e.

²Gbɔjɛzán Jwifu lɛ́ɛ tɔn gbe wá su, bɔ Jezu jɛ nǔ kplɔ́n mɛ lɛ́ɛ jí ɖo kplɔ́ngbasá; xó e ɖɔ wɛ é ɖe ɔ́ kpácá mɛ e ɖo tó ɖó e wɛ lɛ́ɛ bǐ, bɔ yě nɔ́ ɖɔ: “Fítɛ́ é ká ba nǔ ɖagbe ɖagbe énɛ́ lɛ́ɛ sín? Nǔnywɛ́ tɛ́ ká nyí énɛ́ e è nǎ ɛ ɔ́? Nɛ̌ wɛ é ká nɔ́ bló gbɔn, bó nɔ́ jlɛ́ nǔdábaɖa énɛ́ lɛ́ɛ?

³Atínkpatɔ́ ɔ́ nɛ́ ǎ cé? Mali ví ɔ́ jɛ́n ká nɛ́ sín! Jaki kpódó Jozɛ́si kpó Judi kpó, kpódó Sinmɔ́ɔ kpán sín nɔví ɔ́ nɛ́ ǎ cé? Nɔví tɔn nyɔ̌nu lɛ́ɛ lɔ ma ka ɖo mǐ mɛ fí din a?” Bɔ nǔ énɛ́ lɛ́ɛ nyí afɔklɛ́nnú nú yě.

⁴ Jezu ka ɖɔ nú yě ɖɔ: “Mɛ bǐ wɛ nɔ́ sí gbeyíɖɔ Mawu tɔn; to tɔn mɛ nu lɛ́ɛ, hɛ̌nnumɔ tɔn lɛ́ɛ, kpódó xwé tɔn gbe nu lɛ́ɛ kpán jɛ́n ma nɔ́ sí i ǎ.”

⁵Jezu ka sɔ́ jlɛ́ nǔ ɖaxó ɖé ɖo fínɛ́ zɛ azinzɔnnɔ kwín we e jí é ɖó alɔ, bó gbɔ azɔn ná lɛ́ɛ wú ǎ.

⁶Nǔ e yě ma ɖi n'i ǎ ɔ́ kpácá ɛ, bɔ é gosín fínɛ́, bó yi jɛ nǔ kplɔ́n mɛ lɛ́ɛ jí gbɔn gletoxo e sɛ yá fínɛ́ lɛ́ɛ mɛ.

⁷Jezu ylɔ́ ahwanvú tɔn wěwe lɛ́ɛ kplé, bó jɛ yě sɛ́ dó jí webɔ webɔ. É ná yě acɛ bónú yě ná dó kpé yɛ nyanya lɛ́ɛ wú.

⁸ É ka ɖɔ nú yě ɖɔ: “Mi jɛ ali hǔn, mi ma hɛn nǔ ɖěbǔ zɛ kpogɛ ɖokpó ɖokpó wú ó, mi ma hɛn nǔɖuɖu ó, mi ma hɛn nǔbyɔ́ɖutɔ́glo ó, mi ma hɛn akwɛ́ ó.

⁹Mi blá afɔkpakan mitɔn lɛ́ɛ, mi ma hɛn awu ɖěvo gɔ́ nú ée ɖo kɔ nú mi é ó.

¹⁰“Mi byɔ́ to ɖé mɛ hǔn, mi nɔ xwé e gbe è nǎ yí jǒnɔ mitɔn ɖe é, káká jɛ hwenu e mi ná gosín to énɛ́ mɛ dó é.

¹¹ Ényí yě ma ka yí mi ɖo to ɖé mɛ ǎ, abǐ yě ma ɖótó xó mitɔn ǎ hǔn, mi xúxú afɔkɔ́ mitɔn[2], bó tɔ́n sín to ɔ́ mɛ; nǔ énɛ́ ná ɖe xlɛ́ yě ɖɔ hwɛ yětɔn kún nyɔ́ ó.”

¹²Yě sɔ́ nǔ bó yi, bó jɛ Mawuxó jlá mɛ lɛ́ɛ jí, ɖɔ yě ní lɛ́ kɔ sín hwɛ yětɔn lɛ́ɛ gúdo.

¹³ Yě nɔ́ nya yɛ nyanya sín mɛ gěgé jí, bó nɔ́ sá ami nú azinzɔnnɔ gěgé, bɔ azɔn yětɔn nɔ́ gbɔ.

¹⁴ Axɔ́sú Elódu ka se nǔ e jlɛ́ wɛ Jezu ɖe lɛ́ɛ, ɖó nyǐkɔ tɔn gba kpé fí bǐ. Énɛ́ ɔ́, é ɖɔ: “Jǎan Yɛhwesinlɛnúmɛtɔ́ ɔ́ wɛ fɔ́n sín kú, nǔ e wútu wɛ é ɖó hlɔ̌nhlɔ́n, bó ɖo nǔ énɛ́ lɛ́ɛ jlɛ́ wɛ ɔ́ nɛ́.”

¹⁵Lo ɔ́, mɛɖé lɛ́ɛ nɔ́ ɖɔ: “Elíi wɛ.” Mɛ ɖěvo lɛ́ɛ ká nɔ́ ɖɔ: “Gbeyíɖɔ Mawu tɔn lɛ́ɛ ɖě wɛ ɖɔhun.”

¹⁶Ée Elódu se nǔ e jlɛ́ wɛ Jezu ɖe nɛ́ lɛ́ɛ ɔ́, é ɖɔ: “Jǎan ɖěe un gbo ta ná ɔ́ wɛ fɔ́n sín kú.”

¹⁷ Elódu énɛ́ ɔ́ wɛ zɔ́n bɔ è wlǐ Jǎan dó gankpá mɛ, ɖó Elodiadi, nɔví tɔn Filípu sín asi e é yí ɔ́ wútu.

¹⁸Đó Jǎan ɖɔ nú Elódu ɖɔ: “Sɛ́n ɔ́ ná gbe we ɖɔ a nǐ yí nɔví towe sín asi ǎ.”

¹⁹Elodiadi ka hɛn Jǎan xomɛ, bó jló ná hu i; lo ɔ́, é mɔ ali tɔn ǎ.

²⁰Elódu nɔ ɖo xɛsi ɖi nú Jǎan wɛ, ɖó é tunwun ɖɔ gbɛtɔ́ hwɛjijɔnɔ wɛ é nyí, bó lɛ́ nyí mɛ mímɛ́. Elódu nɔ jɛ ahwan jǐ tɔn; é se xó tɔn ɔ́, é nɔ́ tunwun nǔ e é ná lin d'é wú é ǎ, có é ɖo tó ɖó e wɛ ɔ́, é nɔ́ víví n'i.

²¹Ayǐ ɖagbe ɖé ká wá hɔ́n nú Elodiadi, bɔ gbe nɛ́ gbe ɔ́, Elódu ɖo jijizán tɔn sín xwe ɖu wɛ, lobo ylɔ́ gǎn hɔn-yitɔ́ tɔn lɛ́ɛ, ahwangán tɔn lɛ́ɛ, kpódó mɛ nukúnɖéjí Galilée to ɔ́ tɔn lɛ́ɛ kpó ɖɔ yě ní wá ɖu xwe xá émí.

²²Elodiadi sín vǐ nyɔ̌nuví ɔ́ ka wá ɖú we, bɔ weɖúɖú tɔn nyɔ́ Elódu kpódó mɛ e ɖo xwe ɖu xá ɛ wɛ lɛ́ɛ kpó sín nukún mɛ, bɔ axɔ́sú Elódu ɖɔ nú vǐ ɔ́ ɖɔ: “Nǔɖé jló we hǔn, byɔ̌ nú má ná we.”

²³Bó dó akpá n'i ɖɔ: “Nǔ ɖěbǔ e a ko sixú byɔ́ ɔ́, é ná bo nyí axɔ́súɖuto ce sín vlɔ̌ɖówe ɔ́, un ná ná we.”

²⁴Vǐ ɔ́ ká tɔ́n, bó yi kanbyɔ́ nɔ tɔn ɖɔ: “Étɛ́ un ka sixú byɔ́ din?” Bɔ nɔ tɔn yí gbe n'i ɖɔ: “Byɔ̌ Jǎan Yɛhwesinlɛnúmɛtɔ́ ɔ́ sín ta.”

²⁵Vǐ ɔ́ ká fyá, bó yi axɔ́sú ɔ́ gɔ́n, bó ɖɔ n'i ɖɔ: “Un jló ɖɔ a nǐ ná Jǎan Yɛhwesinlɛnúmɛtɔ́ sín ta mì dó gannúgbɛ́jɛ́ mɛ ɖo fí din tlóló.”

²⁶Ée axɔ́sú ɔ́ se mɔ̌ ɔ́, wǔ kú i tlala, amɔ̌, é sixú gbɛ́ ǎ, ɖó akpá e é kó dó n'i ɖo jǒnɔ lɛ́ɛ nukɔn é wú.

²⁷Azɔn ɖokpó ɔ́, axɔ́sú ɔ́ sɛ́ sɔ́ja tɔn lɛ́ɛ ɖokpó dó, bó ná ɛ gbe ɖɔ é ní yi gbo Jǎan sín ta wá.

²⁸Sɔ́ja ɔ́ ká yi gankpá ɔ́ mɛ, bó gbo Jǎan sín ta dó gannúgbɛ́jɛ́ mɛ wá jó nú vǐ ɔ́, bɔ é sɔ́ yi jó nú nɔ tɔn.

²⁹Ée Jǎan sín ahwanvú lɛ́ɛ se mɔ̌ ɔ́, yě wá yi sɔ́ cyɔ tɔn bó yi ɖi.

³⁰Mɛsɛ́dó wěwe lɛ́ɛ lɛ́ kɔ wá Jezu gɔ́n, bó ɖó nǔ e yě wa lɛ́ɛ bǐ kpódó nǔ e yě kplɔ́n mɛ lɛ́ɛ bǐ kpó sín gbe n'i.

³¹É ka ɖɔ nú yě ɖɔ: “Mi wá mǐ ní jɛ vo fí e mɛɖé ma ɖe ǎ é, bónú mi ná gbɔjɛ́ kpɛɖé.” Đó mɛ e wá ɖo yě ba kpɔ́n wɛ lɛ́ɛ sukpɔ́, bɔ mɛ ɖě ɖo wǐwá wɛ ɔ́, mɛ ɖě nɔ́ ɖo yiyi wɛ káká bɔ Jezu kpódó ahwanvú tɔn lɛ́ɛ kpó sɔ́ mɔ tɛn ná ɖu nǔ vɔ́vɔ́ ǎ.

³²Bɔ yě byɔ́ tɔjíhún mɛ, bó ɖidó zɔ fí e mɛɖé ma ɖe ǎ é.

³³Ée mɛ lɛ́ɛ mɔ yě xweyǐgbe ɔ́, mɛ gěgé wɔ́ fí e yě xwe ɔ́, bó nyi ahwan sín to lɛ́ɛ mɛ to lɛ́ɛ mɛ, bó zɔn afɔ, lobo kán wezun jɛ nukɔn nú yě yi fí ɔ́.

³⁴ Ée Jezu wá jɛ te sín tɔjíhún ɔ́ mɛ wá agě jí ɔ́, é mɔ gbɛtɔ́ wɔ̌buwɔ́bú ɖé lɛ́ɛ, bɔ nǔ yětɔn blá wǔ n'i; ɖó yě cí lɛ̌ngbɔ́ e má ɖó lɛ̌ngbɔ́nyitɔ́ ǎ é ɖɔhun. Énɛ́ ɔ́, é jɛ nǔ gěgé kplɔ́n yě jí.

³⁵Ée hwenu ko sɛ yi ɔ́, ahwanvú tɔn lɛ́ɛ sɛ yá ɛ, bó ɖɔ n'i ɖɔ: “Gblǒlǒ mɛ wɛ mǐ ɖe ɖo fí, hwenu ka ko sɛ yi tlala;

³⁶nyi mɛ lɛ́ɛ, nú yě yi gle lɛ́ɛ ta kpódó gletoxo e yá fí lɛ́ɛ kpó mɛ, lobo ba nǔɖé xɔ ɖu.”

³⁷É ká yí gbe nú yě ɖɔ: “Mi ɖésú mi ná nǔɖuɖu yě.” Lo ɔ́ yě yí gbe n'i ɖɔ: “Cóbónú è nǎ xɔ wɔ̌xúxú nú mɛ élɔ́ lɛ́ɛ bǐ ɔ́, è nǎ mɔ akwɛ́ ɖé bɔ é ná yi gankwɛ́ afɔɖé (200).”

³⁸Jezu ka kanbyɔ́ yě ɖɔ: “Wɔ̌xúxú nabí ka ɖo mi sí? Mi yi kpɔ́n.” Ée yě kpɔ́n bó tunwun nabí e wɛ é ɔ́, yě wá ɖɔ n'i ɖɔ: “Wɔ̌xúxú atɔ́ɔ́n kpódó hweví we kpó wɛ ɖo mǐ sí.”

³⁹Énɛ́ ɔ́ gúdo ɔ́, Jezu ɖɔ nú ahwanvú tɔn lɛ́ɛ ɖɔ yě ní ɖɔ nú mɛ lɛ́ɛ nú yě jínjɔ́n ayǐ sonu sonu ɖo gběhan mú jí.

⁴⁰Bɔ ahwanvú tɔn lɛ́ɛ má mɛ lɛ́ɛ kanwe ko (100) kanwe ko (100), kanɖé wǒ (50) kanɖé wǒ (50), bɔ yě jínjɔ́n ayǐ.

⁴¹É yí wɔ̌xúxú atɔ́ɔ́n lɛ́ɛ kpódó hweví we lɛ́ɛ kpó; é kpɔ́n jǐnukúnsin, bó dó kú nú Tɔ́ ɔ́. Énɛ́ ɔ́ gúdo ɔ́, é kán wɔ̌xúxú lɛ́ɛ, bó sɔ́ nú ahwanvú tɔn lɛ́ɛ, nú yě ní má nú mɛ lɛ́ɛ. Jezu lɛ́ má hweví we lɛ́ɛ nú yě bǐ.

⁴²Yě bǐ ɖu nǔ, bó gɔ́ xo ganjí.

⁴³È kplé wɔ̌xúxú kpódó hweví e yě ɖu kpo ɔ́ kpó, bɔ é gɔ́ xasun wěwe.

⁴⁴Súnnu děgba ɖě afatɔ́n (5.000) wɛ ɖu nǔ ɖo fínɛ́.

⁴⁵Énɛ́ gúdo tlóló ɔ́, Jezu ɖɔ nú ahwanvú tɔn lɛ́ɛ ɖɔ yě ní byɔ́ tɔjíhún ɔ́ mɛ jɛ nukɔn nú émí ɖidó Bɛtisayida ɖo agě ɖe ɔ́ jí dɔ̌n, bónú émí ɖésú ná nyi mɛ lɛ́ɛ sɛ́ dó xwé.

⁴⁶Ée é nyi mɛ lɛ́ɛ gúdo ɔ́, é xá só jí, bó xo ɖɛ.

⁴⁷Ée zǎn wá ɖo bibɔ wɛ ɔ́, tɔjíhún ɔ́ ko ɖo xuzan mɛ, bɔ Jezu ɖokpónɔ géé ka kpo ɖo agě ɔ́ jí.

⁴⁸Jezu mɔ ahwanvú tɔn lɛ́ɛ sɛ́ dó, bɔ yě ɖo kan ván wɛ ɖésú, dó ɖo hǔn ɔ́ kun wɛ, ɖó jɔhɔn kpé wɛ yě ɖe; bɔ, sín gan atɔn mɛ zǎn mɛ, sɔ́ yi ayǐtéhɔ̌nnu mɔ̌ ɔ́, é zun zɔnlin gbɔn xu ɔ́ jí yi yě gɔ̌n, bó jló ná zɛ yě wú.

⁴⁹Ée ahwanvú tɔn lɛ́ɛ mɔ ɛ ɖo zɔnlin zun gbɔn xu ɔ́ jí wɛ ɔ́, yě vɛdó ɖɔ nǔ kpé wɛ émí ɖe sín, bó jɛ xó sú jí;

⁵⁰ɖó yě bǐ wɛ mɔ ɛ, bɔ ado hu yě. Lo ɔ́, é ɖɔ: “Mi kpan akɔ́n, nyɛ wɛ; mi ma ɖi xɛsi ó.”

⁵¹É ka byɔ́ tɔjíhún e mɛ yě ɖe ɔ́ mɛ, bɔ jɔhɔn ɔ́ xwɛ, bɔ é kpácá yě ɖésú;

⁵²ɖó yě mɔ nǔ jɛ nǔjlɛ́jlɛ́ wɔ̌xúxú tɔn ɔ́ wú ǎ; ɖó yě tlí tó.

⁵³Jezu kpódó ahwanvú tɔn lɛ́ɛ kpán xo xu ɔ́ zlɛ́, bó wá glín hǔn dó Jenɛzalɛ́ti.

⁵⁴Ée yě jɛ te sín tɔjíhún ɔ́ mɛ ɔ́, mɛ lɛ́ɛ mɔ Jezu bó tunwun i tlóló.

⁵⁵Énɛ́ ɔ́, yě kán wezun bo yi jlá gbɔn gbě ɔ́ bǐ jí ɖɔ Jezu wá, bɔ azinzɔnnɔ yětɔn lɛ́ɛ nɔ ɖo zan jí, bɔ yě nɔ zé wá nú Jezu.

⁵⁶Bɔ fí e Jezu ko sixú jɛ é ɖěbǔ ɔ́, gletoxo mɛ oo, toxo ɖaxó mɛ oo, gleta oo, mɛ lɛ́ɛ nɔ zé azinzɔnnɔ lɛ́ɛ wá agblo lɛ́ɛ jí, bɔ yě nɔ́ ɖɔ nú Jezu ɖɔ é ní kɛnklɛ́n nú azinzɔnnɔ lɛ́ɛ ɖó alɔ awu tɔn tó vɔ́vɔ́, bɔ mɛ e nɔ ɖó alɔ awu tɔn tó lɛ́ɛ bǐ sín azɔn nɔ gbɔ.