Read fon Maki 7 Bible Online

Maki 7 - fon bible

Maki 7

¹Falizyɛn lɛ́ɛ kpódó sɛ́nkplɔ́nmɛtɔ́ ɖé lɛ́ɛ kpó gosín Jeluzalɛ́mu bó wá kplé ɖo Jezu gɔ́n.

²Yě mɔ ahwanvú tɔn ɖé lɛ́ɛ bɔ yě klɔ́ alɔ lě e Falizyɛn lɛ́ɛ sín sɛ́n ɔ́ zɔ́n gbɔn ɔ́ ǎ, bó ka ɖo nǔ ɖu wɛ.

³Falizyɛn lɛ́ɛ kpódó Jwifu lɛ́ɛ kpó ɔ́, nú yědɛɛ lɛ́ɛ ja nǔ ɖu gbé ɔ́, alɔ wɛ yě nɔ́ tó klɔ́ hwɛ̌, lě e tɔ́gbó yětɔn lɛ́ɛ sín hwɛndo zɔ́n gbɔn é.

⁴Yě ka gosín kplétɛn fí ɖé bó wá xwé gbe ɔ́, yě ɖó ná slá wǔ hwɛ̌, cóbó ná jɛ nǔ ɖu jí. Yě lɛ́ ɖó su ɖěvo lɛ́ɛ bó nɔ́ nyi, bɔ é nyí hwɛndo nú yě, ɖi kɔ́fu, tɔyizɛ́n kpódó ganvɔzɛ́n kpó e yě ɖó ná klɔ́ ɖó alɔkpa ɖé jí, cóbó zán ɔ́ ɖɔhun.

⁵Falizyɛn lɛ́ɛ kpódó sɛ́nkplɔ́nmɛtɔ́ lɛ́ɛ kpó ká kanbyɔ́ Jezu ɖɔ: “Aniwútu wɛ ahwanvú towe lɛ́ɛ ma nɔ xwedó tɔ́gbó mǐtɔn lɛ́ɛ sín hwɛndo ǎ, bó nɔ́ nɔ alɔ ma klɔ́, bó nɔ́ ɖu nǔ?”

⁶ Jezu ka yí gbe nú yě ɖɔ: “Yɛmɛnúwatɔ́ e mi! Xó e Ezayíi ɖɔ dó mi wú ɔ́ ɖi mi wú dódó; é wɛ nyí ɖɔ: ‘Togun élɔ́ nɔ sɔ́ mi su ɖo nu, lo ɔ́, ayi tɔn ɖo wǔ ce ǎ.

⁷Yě ɖo sinsɛn mì wɛ bo ɖɔ, lo ɔ́, nǔ yǎyá wa wɛ yě ɖe; yě ɖo Mawuxó kplɔ́n mɛ wɛ bo ɖɔ, lo ɔ́, gbɛtɔ́ lɛ́ɛ sín sɛ́n kplɔ́n mɛ wɛ yě ɖe.’

⁸Mi nɔ xo Mawusɛ́n lɛ́ɛ nyi kɛ́n, bó ká nɔ́ jɛ hun dó gbɛtɔ́ lɛ́ɛ tɔn e nyí hwɛndo é jí.”

⁹Jezu lɛ́ ɖɔ nú yě ɖɔ: “Mi nɔ jó Mawusɛ́n lɛ́ɛ dó, bó nɔ́ xwedó hwɛndo mitɔn lɛ́ɛ, bɔ é nyí nǔ ɖagbe wa wɛ mi ɖe nɛ́.

¹⁰Đó Mɔyízi ɖɔ: ‘Sí tɔ́ towe kpódó nɔ towe kpó; mɛ e ka ná dó nu tɔ́ tɔn abǐ nɔ tɔn ɔ́, è nǐ hu i.’

¹¹Midɛɛ lɛ́ɛ ka nɔ́ kplɔ́n mɛ ɖɔ nú mɛɖé ɖɔ nú tɔ́ tɔn abǐ nɔ tɔn ɖɔ: ‘Nǔ e un ɖó bó ná dó dó alɔ we ná ɔ́, Kɔbaan wɛ’ ɔ́, mɛ énɛ́ kún wa nǔ nyi do ó. (Kɔbaan ɔ́, tínmɛ tɔn wɛ nyí: nǔ e è sɔ́ ɖ'ayǐ nú Mawu é.)

¹²Mi sɔ́ nɔ́ lɔn bónú mɛ énɛ́ ná wa nǔ ɖěbǔ nú tɔ́ tɔn abǐ nɔ tɔn ǎ.

¹³Énɛ́ ɔ́, mi nɔ sɔ́ hwɛndo e mɛxó mitɔn lɛ́ɛ jó nyi ayǐ nú mi ɔ́ dó gba xó e Mawu ɖɔ ɔ́ ná; nǔ mɔ̌hunkɔ gěgé ɖěvo tíin, bɔ mi nɔ lɛ́ dó sin.”

¹⁴Jezu lɛ́ ylɔ́ mɛ lɛ́ɛ wá, bó ɖɔ nú yě ɖɔ: “Mi bǐ, mi ɖótó te ganjí, bó ná mɔ nukúnnú jɛ xó e ɖɔ gbé un ja ɔ́ mɛ.

¹⁵Nǔ e è nɔ ɖu dó xomɛ ɔ́ wɛ nɔ́ hɛn gbɛtɔ́ blí ǎ; lo ɔ́, nǔ e tɔ́n sín gbɛtɔ́ sín ayi mɛ ɔ́ wɛ nɔ́ hɛn ɛ blí. [

¹⁶Mɛ e ɖó tó bó ná dó se nǔ ɔ́ ní ɖótó bó se.”]

¹⁷Hwenu e Jezu ka wá jó mɛ lɛ́ɛ dó, bó wá xwé gbe ɔ́, ahwanvú tɔn lɛ́ɛ kan nǔ byɔ́ ɛ dó lǒ e é dó ɔ́ wú.

¹⁸Jezu yí gbe nú yě ɖɔ: “Midɛɛ lɛ́ɛ lɔmɔ̌ ɔ́, nǔnywɛ́ hwedó mi sɔ mɔ̌ wɛ a? Hǔn mi tunwun ɖɔ nǔ e nɔ́ byɔ́ gbɛtɔ́ xomɛ ɔ́ kún sixú hɛn ɛ blí ó ǎ cé?

¹⁹Đó nǔ énɛ́ ɔ́, ayi mɛ wɛ é nɔ́ byɔ́ ǎ, adɔgo mɛ wɛ é nɔ́ byɔ́, bó nɔ́ wá yi tɔ́n hwenu è nɔ wá yi afɔ jí é.” (Gbɔn xó énɛ́ gbla mɛ ɔ́, Jezu lɛ́ ɖo ɖiɖe xlɛ́ wɛ ɖɔ nǔɖuɖu bǐ wɛ nyɔ́ bɔ è nǎ ɖu.)

²⁰Jezu ɖɔ nú yě ɖɔ: “Nǔ e tɔ́n sín gbɛtɔ́ sín ayi mɛ ɔ́ wɛ nɔ́ hɛn ɛ blí;

²¹ɖó gbɛtɔ́ sín ayi mɛ wɛ linlin nyanya lɛ́ɛ nɔ́ tɔ́n sín; nǔblíblíwiwa, ajojija, mɛhuhu,

²²agalilɛ, nǔjlómɛzɛjlɛ̌wú, adǎnúwiwa, ayiɖónukɔnnúmɛ, nǔmajɛganwiwa, mɛnújlójló, mɛnúɖiɖɔ, goyíyí, yɛyinɔnúwiwa

²³nǔ baɖabaɖa énɛ́ lɛ́ɛ bǐ ɔ́, ayi mɛ wɛ yě nɔ́ gosín, bó nɔ́ hɛn mɛ blí.”

²⁴Jezu wá gosín fínɛ́, bó yi Tíi gbé jí. É byɔ́ xwé ɖé gbe, é ká jló ɖɔ mɛɖé ní tunwun ɖɔ émí ɖo fínɛ́ ǎ, có mɛ lɛ́ɛ ka mɔ ɛ.

²⁵Đó nǎwe ɖé ɖó ɖyɔ̌vǐvú ɖokpó, bɔ yɛ nyanya ɖo jǐ tɔn; ée nǎwe énɛ́ ɔ́ se Jezu sín xó ɔ́, é sɔ́nǔ tlóló, bó wá jɛ kpo ɖo akɔ́n tɔn mɛ,

²⁶bó dó kɛnklɛ́n n'i ɖɔ ní nya yɛ nyanya sín vǐ émítɔn jí. Nǎwe énɛ́ ká nyí Jwifu ǎ; Silíi-Fenisíi wɛ é gosín, bó nɔ́ dó Glɛ̌sigbe.

²⁷Jezu ka yí gbe n'i ɖɔ: “Gbɔ bónú yɔkpɔ́vú lɛ́ɛ ní tó ɖu nǔ gɔ́ xo hwɛ̌; ɖó é jɛ xá ɖɔ è nǐ zé yɔkpɔ́vú lɛ́ɛ sín nǔɖuɖu nyi dó cukúví lɛ́ɛ ǎ.”

²⁸Nyɔ̌nu ɔ́ ká yí gbe nú Jezu ɖɔ: “Nǔgbó wɛ Aklúnɔ; nǔ ɖo mɔ̌ có cukúví lɛ́ɛ nɔ́ cyán yɔkpɔ́vú lɛ́ɛ sín nǔɖuɖu e hlɛ́n kɔn nyi ayǐ lɛ́ɛ ɖu vɔ́vɔ́.”

²⁹Jezu ka yí gbe n'i ɖɔ: “Đó xó énɛ́ e a ɖɔ din ɔ́ wútu ɔ́, lɛ́ kɔ yi xwé, yɛ nyanya ko gosín vǐ towe jí.”

³⁰Nǎwe ɔ́ ká lɛ́ kɔ yi xwé, bó mɔ vǐ ɔ́ ɖo ayǐmlɔ́mlɔ́ ɖo zan jí, bɔ yɛ nyanya ɔ́ ko gosín jǐ tɔn nǔgbó.

³¹Jezu gosín Tíi gbé jí; é gbɔn Sidɔ́ɔn, bó xo tota wǒ lɛ́ɛ zlɛ́, bó wá Galilée tɔ ɔ́ tó.

³²Yě kplá nya ɖé wá n'i, bɔ é kú tó, bó nɔ́ lɛ́ sixú ɖɔ xó ganjí ǎ. Yě dó kɛnklɛ́n nú Jezu ɖɔ ní ɖó alɔ jǐ tɔn, bó gbɔ azɔn n'i.

³³Jezu ka kplá nya ɔ́ jɛ zɔ, bó sɔ́ alɔví dó tógwle tɔn lɛ́ɛ mɛ, bó ɖó atán ɖó ɖɛ̌ ta n'i.

³⁴Énɛ́ ɔ́ gúdo ɔ́, é kpɔ́n jǐ, bó yi agbɔ̌n jí, bó ɖɔ: “Efata” (tínmɛ tɔn wɛ nyí: “Hun.”)

³⁵Tlóló ɔ́, tó tɔn lɛ́ɛ hun, bɔ ɖɛ̌ tɔn tún kan, bɔ é jɛ xó ɖɔ jí céɖécéɖé.

³⁶Jezu ka dó sɛ́n nú yě ɖɔ yě ní ma ɖɔ nú mɛɖé ó; Jezu ɖo gbǐgbɛ́ nú yě wɛ có, jlǎjlá wɛ jɛ́n yě nɔ ɖe.

³⁷É kpácá mɛ lɛ́ɛ tlala, bɔ yě nɔ ɖɔ: “É nɔ́ bló nǔ bǐ ɖó. É nɔ́ hun tó nú tókúnɔ lɛ́ɛ, bɔ yě nɔ́ se nǔ; é nɔ́ gbɔ azɔn nú ɖɛ̌kúnánɔ lɛ́ɛ, bɔ yě nɔ́ ɖɔ xó.”